ປະຖົມມະການ
22 ຈາກນັ້ນ ພະເຈົ້າທ່ຽງແທ້ໄດ້ທົດສອບອັບຣາຮາມ.+ ເພິ່ນເວົ້າວ່າ: “ອັບຣາຮາມເອີ້ຍ.” ອັບຣາຮາມຕອບວ່າ: “ໂດຍ ພະອົງ.” 2 ເພິ່ນບອກວ່າ: “ຂໍໃຫ້ພາອີຊາກ+ລູກຊາຍຄົນດຽວທີ່ເຈົ້າຮັກຫຼາຍ+ໄປແຜ່ນດິນໂມຣີຢາ+ ແລ້ວເອົາລາວເປັນເຄື່ອງບູຊາຢູ່ເທິງພູທີ່ເຮົາຊິບອກເຈົ້າ.”
3 ອັບຣາຮາມຕື່ນແຕ່ເຊົ້າໆແລະກຽມອານໃສ່ຫຼັງລາ ແລ້ວພາອີຊາກກັບຄົນຮັບໃຊ້ 2 ຄົນໄປນຳ. ອັບຣາຮາມຜ່າຟືນເພື່ອຈະເອົາໄປເຜົາເຄື່ອງບູຊາ. ແລ້ວລາວກໍເດີນທາງໄປບ່ອນທີ່ພະເຈົ້າທ່ຽງແທ້ບອກໃຫ້ລາວໄປ. 4 ເມື່ອຮອດມື້ທີ 3 ອັບຣາຮາມກໍແນມເຫັນບ່ອນທີ່ເຂົາເຈົ້າຈະໄປນັ້ນແຕ່ໄກໆ. 5 ອັບຣາຮາມບອກຄົນຮັບໃຊ້ວ່າ: “ພວກເຈົ້າຖ້າຢູ່ນີ້ກັບລາ ຂ້ອຍກັບລູກຈະຂຶ້ນໄປພຸ້ນ. ເມື່ອນະມັດສະການພະເຈົ້າແລ້ວໆກໍຈະກັບມາຫາພວກເຈົ້າ.”
6 ອັບຣາຮາມໃຫ້ອີຊາກແບກຟືນທີ່ຈະໃຊ້ເຜົາເຄື່ອງບູຊາ. ສ່ວນລາວກໍເອົາໄຟ*ກັບມີດໄປ. ແລ້ວທັງສອງພໍ່ລູກກໍຍ່າງໄປນຳກັນ. 7 ແລ້ວອີຊາກກໍເອີ້ນອັບຣາຮາມວ່າ: “ພໍ່ເອີ້ຍ!” ອັບຣາຮາມກໍຕອບວ່າ: “ມີຫຍັງລູກ?” ອີຊາກຖາມວ່າ: “ໄຟກໍມີແລ້ວ ຟືນກໍມີແລ້ວ ແຕ່ແກະທີ່ຈະເຜົາເປັນເຄື່ອງບູຊາຢູ່ໃສພໍ່?” 8 ອັບຣາຮາມຕອບວ່າ: “ບໍ່ຕ້ອງຫ່ວງເດີ້ລູກ. ພະເຈົ້າຈະກຽມແກະທີ່ເປັນເຄື່ອງບູຊາ+ໄວ້ໃຫ້.” ແລ້ວສອງພໍ່ລູກກໍຍ່າງໄປນຳກັນ.
9 ໃນທີ່ສຸດ ເຂົາເຈົ້າກໍໄປຮອດບ່ອນທີ່ພະເຈົ້າທ່ຽງແທ້ບອກໃຫ້ໄປ. ອັບຣາຮາມສ້າງແທ່ນບູຊາຢູ່ຫັ້ນແລະກອງຟືນໃສ່ເທິງແທ່ນ. ຈາກນັ້ນ ລາວກໍມັດມືມັດຕີນອີຊາກແລ້ວວາງອີຊາກໄວ້ເທິງກອງຟືນ.+ 10 ອັບຣາຮາມຈັບເອົາມີດມາເພື່ອຈະຂ້າລູກ.+ 11 ແຕ່ທູດສະຫວັນຂອງພະເຢໂຫວາເອີ້ນລາວຈາກສະຫວັນວ່າ: “ອັບຣາຮາມ ອັບຣາຮາມເອີ້ຍ!” ລາວຕອບວ່າ: “ໂດຍ ຂ້ອຍໄດ້ຍິນແລ້ວ.” 12 ທູດສະຫວັນ*ຈຶ່ງເວົ້າວ່າ: “ຢ່າຂ້າລູກຂອງເຈົ້າແລະຢ່າເຮັດຫຍັງໃຫ້ລາວເລີຍ. ເຮົາຮູ້ແລ້ວວ່າເຈົ້າຢ້ານຢຳພະເຈົ້າ ເພາະເຈົ້າເຕັມໃຈເອົາລູກຊາຍຄົນດຽວຂອງເຈົ້າໃຫ້ເຮົາ.”+ 13 ຕອນນັ້ນ ອັບຣາຮາມຫຼຽວໄປເຫັນແກະຜູ້ໂຕໜຶ່ງທີ່ເຂົາຂອງມັນຄາຢູ່ຟຸ່ມໄມ້ ອັບຣາຮາມກໍເລີຍໄປເອົາແກະໂຕນັ້ນມາເຜົາເປັນເຄື່ອງບູຊາແທນລູກຊາຍ. 14 ອັບຣາຮາມຕັ້ງຊື່ໃຫ້ບ່ອນນັ້ນວ່າເຢໂຫວາຢິເຣ.* ດັ່ງນັ້ນ ໃນທຸກມື້ນີ້ກໍຍັງມີຄົນເວົ້າກັນວ່າ: “ພະເຢໂຫວາຈະກຽມສິ່ງຈຳເປັນໃຫ້ຢູ່ເທິງພູຂອງເພິ່ນ.”+
15 ທູດສະຫວັນຂອງພະເຢໂຫວາເອີ້ນອັບຣາຮາມຈາກຟ້າເປັນເທື່ອທີສອງ 16 ແລະເວົ້າວ່າ: “ພະເຢໂຫວາບອກກັບເຈົ້າແບບນີ້.+ ‘ຍ້ອນເຈົ້າໄດ້ເຮັດທັງໝົດນີ້ແລະເຕັມໃຈເອົາລູກຊາຍຄົນດຽວຂອງເຈົ້າໃຫ້ເຮົາ.+ ເຮົາຈະເຮັດສັນຍາກັບເຈົ້າ. 17 ເຮົາຈະອວຍພອນໃຫ້ເຈົ້າແນ່ນອນ. ເຮົາຈະເຮັດໃຫ້ເຈົ້າມີລູກມີຫຼານຫຼາຍຄືກັບດາວເທິງຟ້າ ແລະຫຼາຍຄືກັບເມັດດິນຊາຍຢູ່ຫາດຊາຍ.+ ລູກຫຼານຂອງເຈົ້າຈະຍຶດເມືອງຕ່າງໆຂອງສັດຕູໄດ້.+ 18 ຍ້ອນເຈົ້າເຊື່ອຟັງເຮົາ+ ຄົນຈາກທຸກຊາດຈະໄດ້ຮັບພອນໂດຍທາງລູກຫຼານຂອງເຈົ້າ.’”+
19 ຈາກນັ້ນ ອັບຣາຮາມກັບມາຫາພວກຄົນຮັບໃຊ້ຂອງລາວ ແລະເຂົາເຈົ້າກໍເດີນທາງກັບມາເບເອເຊບາ.+ ແລ້ວອັບຣາຮາມກໍຢູ່ທີ່ເບເອເຊບາຕໍ່ໄປ.
20 ຫຼັງຈາກນັ້ນ ອັບຣາຮາມກໍໄດ້ຍິນຂ່າວວ່າມີລະກາມີລູກຫຼາຍຄົນໃຫ້ນາໂຮ ອ້າຍຂອງອັບຣາຮາມ.+ 21 ລູກກົກຊື່ອູເຊ ຜູ້ຕໍ່ມາຊື່ບູເຊ ແລະຄົນອື່ນໆແມ່ນເກມູເອນ (ພໍ່ຂອງອາຣາມ) 22 ເກເຊັດ ຮາໂຊ ປິນດາດ ຢິດລາບ ແລະເບທູເອນ.+ 23 ເບທູເອນເປັນພໍ່ຂອງເຣເບກາ.+ ລູກຊາຍທັງ 8 ຄົນນີ້ແມ່ນລູກຂອງມີລະກາທີ່ມີກັບນາໂຮ ອ້າຍຂອງອັບຣາຮາມ. 24 ນາໂຮມີເມຍອີກຄົນໜຶ່ງຊື່ເຣອູມາ. ເຂົາເຈົ້າມີລູກຊາຍນຳກັນຊື່ເຕບາ ກາຮາມ ຕາຮາດ ແລະມາອາກາ.