ຈົດໝາຍສະບັບທີສອງເຖິງຄລິດສະຕຽນໃນເມືອງໂກຣິນໂທ
5 ພວກເຮົາຮູ້ວ່າເຮືອນຂອງພວກເຮົາຢູ່ໂລກນີ້ແມ່ນຮ່າງກາຍທີ່ປຽບຄືກັບເຕັ້ນທີ່ຈະຕ້ອງຖືກຮື້ຖິ້ມ+ ແຕ່ພວກເຮົາຈະໄດ້ເຮືອນຫຼັງໃໝ່ທີ່ຕັ້ງຢູ່ຕະຫຼອດໄປໃນສະຫວັນ ເປັນເຮືອນທີ່ພະເຈົ້າສ້າງ ບໍ່ແມ່ນມະນຸດສ້າງ.+ 2 ຕອນທີ່ຢູ່ເຮືອນຫຼັງນີ້ເຊິ່ງກໍແມ່ນຮ່າງກາຍຂອງພວກເຮົາ ພວກເຮົາຮ້ອງຄາງຍ້ອນຢາກສຸບໃສ່ອີກຮ່າງກາຍໜຶ່ງທີ່ກຽມໄວ້ໃຫ້ພວກເຮົາໃນສະຫວັນ.+ 3 ເມື່ອພວກເຮົາໄດ້ສຸບໃສ່ຮ່າງກາຍນັ້ນ ພວກເຮົາຈະບໍ່ປະເປືອຍ. 4 ທີ່ຈິງ ໃນຮ່າງກາຍທີ່ປຽບຄືກັບເຕັ້ນຫຼັງນີ້ ພວກເຮົາເປັນທຸກໂສກເສົ້າ ບໍ່ແມ່ນຍ້ອນຢາກຖິ້ມເຕັ້ນຫຼັງນີ້ ແຕ່ຍ້ອນພວກເຮົາຢາກຢູ່ໃນເຕັ້ນອີກຫຼັງໜຶ່ງ+ ເພື່ອຊີວິດຕະຫຼອດໄປຈະມາແທນຮ່າງກາຍທີ່ຕາຍໄດ້.+ 5 ພະເຈົ້າກຽມພວກເຮົາໄວ້ສຳລັບຊີວິດແບບນັ້ນ.+ ເພິ່ນເອົາພະລັງຂອງເພິ່ນໃຫ້ພວກເຮົາເພື່ອຮັບຮອງ*ວ່າພວກເຮົາຈະໄດ້ຮັບລາງວັນ.+
6 ດັ່ງນັ້ນ ພວກເຮົາຈຶ່ງໝັ້ນໃຈສະເໝີແລະຮູ້ວ່າຕອນທີ່ພວກເຮົາຢູ່ໃນຮ່າງກາຍນີ້ທີ່ປຽບຄືກັບເຮືອນ ພວກເຮົາຍັງບໍ່ໄດ້ຢູ່ນຳຜູ້ເປັນນາຍ.+ 7 ພວກເຮົາຈຶ່ງໃຊ້ຊີວິດຕາມຄວາມເຊື່ອ ບໍ່ແມ່ນຕາມສິ່ງທີ່ເຫັນ. 8 ພວກເຮົາໝັ້ນໃຈໃນເລື່ອງນີ້ຫຼາຍແລະຢາກຢູ່ກັບຜູ້ເປັນນາຍຫຼາຍກວ່າຢູ່ໃນຮ່າງກາຍນີ້.+ 9 ແຕ່ບໍ່ວ່າພວກເຮົາຈະຢູ່ກັບເພິ່ນຫຼືບໍ່ ພວກເຮົາກໍພະຍາຍາມເຮັດທຸກຢ່າງເພື່ອໃຫ້ເພິ່ນພໍໃຈສະເໝີ. 10 ພວກເຮົາທຸກຄົນຕ້ອງຢູ່ຕໍ່ໜ້າບັນລັງຕັດສິນຂອງພະຄລິດ ແລະແຕ່ລະຄົນຈະໄດ້ຮັບຜົນຕາມສິ່ງທີ່ໂຕເອງເຮັດຕອນທີ່ຢູ່ໃນຮ່າງກາຍນີ້ ບໍ່ວ່າຈະເຮັດດີຫຼືເຮັດຊົ່ວ.+
11 ດັ່ງນັ້ນ ເມື່ອພວກເຮົາຮູ້ວ່າຄວນຢ້ານຢຳຜູ້ເປັນນາຍ ພວກເຮົາຈຶ່ງພະຍາຍາມໂນ້ມນ້າວໃຈຄົນອື່ນໃຫ້ເຊື່ອສິ່ງທີ່ພວກເຮົາສອນ. ແຕ່ພະເຈົ້າຮູ້ຈັກພວກເຮົາດີ ແລະຂ້ອຍຫວັງວ່າພວກເຈົ້າ*ກໍຮູ້ຈັກພວກເຮົາດີຄືກັນ. 12 ຂ້ອຍເວົ້າແບບນີ້ ບໍ່ແມ່ນເພື່ອອວດໂຕເອງກັບພວກເຈົ້າ ແຕ່ເພື່ອໃຫ້ພວກເຈົ້າຮູ້ສຶກຢາກຈະອວດເລື່ອງຂອງພວກເຮົາ. ພວກເຈົ້າຈຶ່ງຈະມີຄຳຕອບໃຫ້ຄົນທີ່ມັກອວດສິ່ງທີ່ຢູ່ພາຍນອກ+ ແຕ່ບໍ່ອວດສິ່ງທີ່ຢູ່ໃນໃຈ. 13 ຖ້າພວກເຮົາເຮັດຫຍັງຄືກັບຄົນເປັນບ້າ+ ພວກເຮົາກໍເຮັດເພື່ອພະເຈົ້າ ແຕ່ຖ້າພວກເຮົາເຮັດແບບຄົນມີສະຕິ ກໍຈະເປັນປະໂຫຍດຕໍ່ພວກເຈົ້າ. 14 ຄວາມຮັກຂອງພະຄລິດກະຕຸ້ນພວກເຮົາຢູ່. ພວກເຮົາເຊື່ອວ່າຄົນໜຶ່ງຕາຍເພື່ອທຸກຄົນ+ ຍ້ອນທຸກຄົນກໍຄືກັບຕາຍຢູ່ແລ້ວ. 15 ພະຄລິດຕາຍເພື່ອທຸກຄົນ ເພື່ອຄົນທີ່ມີຊີວິດຢູ່ຈະບໍ່ໃຊ້ຊີວິດເພື່ອໂຕເອງອີກຕໍ່ໄປ+ ແຕ່ຈະຢູ່ເພື່ອຜູ້ທີ່ຕາຍແທນເຂົາເຈົ້າແລະຖືກປຸກໃຫ້ຄືນມາຈາກຕາຍແລ້ວ.
16 ຕັ້ງແຕ່ນີ້ຕໍ່ໄປ ພວກເຮົາຈະບໍ່ເບິ່ງຜູ້ໃດແບບທີ່ຄົນທົ່ວໄປເບິ່ງ.+ ເຖິງວ່າພວກເຮົາເຄີຍເບິ່ງພະຄລິດແບບທີ່ຄົນທົ່ວໄປເບິ່ງ* ແຕ່ດຽວນີ້ພວກເຮົາບໍ່ເບິ່ງເພິ່ນແບບນັ້ນອີກແລ້ວ.+ 17 ດັ່ງນັ້ນ ຖ້າຜູ້ໃດເປັນອັນໜຶ່ງອັນດຽວກັບພະຄລິດ ລາວກໍເປັນຄົນທີ່ຖືກສ້າງຂຶ້ນໃໝ່.+ ສິ່ງເກົ່າໆດັບສູນໄປ ແລ້ວສິ່ງໃໝ່ໆກໍເກີດຂຶ້ນມາ. 18 ທັງໝົດນີ້ມາຈາກພະເຈົ້າຜູ້ທີ່ເຮັດໃຫ້ພວກເຮົາຄືນດີກັບເພິ່ນຜ່ານທາງພະຄລິດ.+ ເພິ່ນໃຫ້ພວກເຮົາເຮັດວຽກຮັບໃຊ້ເພື່ອຊ່ວຍຄົນອື່ນໃຫ້ຄືນດີກັບເພິ່ນ.+ 19 ນີ້ໝາຍຄວາມວ່າ ພະເຈົ້າໃຊ້ພະຄລິດເພື່ອເຮັດໃຫ້ຄົນໃນໂລກຄືນດີກັບເພິ່ນ+ ເພື່ອເພິ່ນຈະບໍ່ເອົາຜິດນຳເຂົາເຈົ້າ+ ແລະເພິ່ນຝາກໃຫ້ພວກເຮົາໄປປະກາດເລື່ອງການຄືນດີນີ້.+
20 ດັ່ງນັ້ນ ພວກເຮົາທີ່ເປັນທູດ+ເຊິ່ງເຮັດໜ້າທີ່ແທນພະຄລິດ+ຖືກພະເຈົ້າໃຊ້ໃຫ້ໄປອ້ອນວອນຄົນ. ໃນຖານະຜູ້ເຮັດໜ້າທີ່ແທນພະຄລິດ ພວກເຮົາຂໍຮ້ອງເຂົາເຈົ້າວ່າ: “ມາຄືນດີກັບພະເຈົ້າແມ້.” 21 ພະເຈົ້າໃຫ້ເພິ່ນຜູ້ທີ່ບໍ່ເຄີຍເຮັດຜິດ+ມາເປັນເຄື່ອງບູຊາໄຖ່ບາບໃຫ້ພວກເຮົາ ເພື່ອພະເຈົ້າຈະຍອມຮັບພວກເຮົາໂດຍທາງເພິ່ນຜູ້ນັ້ນ.+