ລະບຽບພວກເລວີ
11 ພະເຢໂຫວາບອກໂມເຊກັບອາໂຣນວ່າ: 2 “ໃຫ້ບອກພວກອິດສະຣາເອນວ່າ ‘ສັດຕໍ່ໄປນີ້ແມ່ນສັດທີ່ພວກເຈົ້າກິນໄດ້.+ 3 ສັດທຸກຊະນິດທີ່ມີຕີນແຍກເປັນ 2 ກີບແລະຄ້ຽວເອື້ອງ ພວກເຈົ້າກິນໄດ້.
4 ແຕ່ຖ້າສັດຊະນິດໃດມີແຕ່ຄ້ຽວເອື້ອງ ຫຼືມີແຕ່ຕີນແຍກເປັນ 2 ກີບ ຫ້າມພວກເຈົ້າກິນ ເຊັ່ນ: ໂຕອູດ ເພາະມັນຄ້ຽວເອື້ອງແຕ່ຕີນມັນບໍ່ໄດ້ແຍກເປັນ 2 ກີບ. ມັນເປັນສັດທີ່ຖືວ່າບໍ່ສະອາດ.+ 5 ໂຕຣັອກແບດເຈີ້*+ກໍຫ້າມກິນ ເພາະມັນຄ້ຽວເອື້ອງແຕ່ຕີນມັນບໍ່ໄດ້ແຍກເປັນ 2 ກີບ. ມັນເປັນສັດທີ່ຖືວ່າບໍ່ສະອາດ. 6 ໂຕກະຕ່າຍປ່າກໍຫ້າມກິນ ເພາະມັນຄ້ຽວເອື້ອງແຕ່ຕີນມັນບໍ່ໄດ້ແຍກເປັນ 2 ກີບ. ມັນເປັນສັດທີ່ຖືວ່າບໍ່ສະອາດ. 7 ໂຕໝູ+ກໍຫ້າມກິນ ເພາະຕີນມັນແຍກເປັນ 2 ກີບ ແຕ່ມັນບໍ່ໄດ້ຄ້ຽວເອື້ອງ. ມັນເປັນສັດທີ່ຖືວ່າບໍ່ສະອາດ. 8 ຫ້າມພວກເຈົ້າກິນຊີ້ນ ຫຼືຈັບບາຍຊາກຂອງສັດເຫຼົ່ານີ້. ສັດທັງໝົດນີ້ຖືວ່າເປັນສັດທີ່ບໍ່ສະອາດ.+
9 ສັດຕໍ່ໄປນີ້ທີ່ຢູ່ໃນນ້ຳເປັນສັດທີ່ພວກເຈົ້າກິນໄດ້. ສັດທຸກຊະນິດທີ່ຢູ່ໃນນ້ຳທີ່ມີຄີແລະມີເກັດ ບໍ່ວ່າຈະຢູ່ທະເລຫຼືຢູ່ແມ່ນ້ຳ ພວກເຈົ້າກິນໄດ້.+ 10 ແຕ່ສັດທຸກຊະນິດທີ່ຢູ່ທະເລແລະຢູ່ແມ່ນ້ຳ ລວມທັງສັດໂຕນ້ອຍໆທີ່ຢູ່ນຳກັນເປັນຝູງ ຖ້າບໍ່ມີຄີຫຼືບໍ່ມີເກັດ ພວກເຈົ້າຕ້ອງຖືວ່າເປັນສັດທີ່ເປັນຕາຂີ້ດຽດ. 11 ພວກເຈົ້າຕ້ອງຂີ້ດຽດສັດເຫຼົ່ານີ້ກັບຊາກຂອງມັນ. ຫ້າມພວກເຈົ້າກິນຊີ້ນຂອງພວກມັນເດັດຂາດ.+ 12 ສັດທຸກຊະນິດທີ່ຢູ່ໃນນ້ຳທີ່ບໍ່ມີຄີຫຼືບໍ່ມີເກັດ ພວກເຈົ້າຕ້ອງຖືວ່າເປັນສັດທີ່ເປັນຕາຂີ້ດຽດ.
13 ສັດຕໍ່ໄປນີ້ທີ່ບິນໄດ້ພວກເຈົ້າຕ້ອງຖືວ່າເປັນສັດທີ່ເປັນຕາຂີ້ດຽດ ຫ້າມພວກເຈົ້າກິນ. ສັດທີ່ເປັນຕາຂີ້ດຽດມີຄື: ນົກອິນຊີ+ ແຫຼວກິນປາ ແຮ້ງດຳ+ 14 ແຫຼວແດງ ແຫຼວດຳທຸກຊະນິດ 15 ກາທຸກຊະນິດ 16 ນົກກະຈອກເທດ ນົກເຄົ້າ ນົກນາງນວນ ແຫຼວຊະນິດອື່ນໆ 17 ນົກເຄົ້ານ້ອຍ ນົກເປັດນ້ຳ ນົກເຄົ້າຫູຍາວ 18 ຫົງ ນົກກະທຸງ ແຮ້ງ 19 ນົກກະສາ ນົກຍາງທຸກຊະນິດ ນົກກະລາງຫົວຂວານ ແລະເຈຍ. 20 ແມງໄມ້ທຸກຊະນິດທີ່ຢູ່ນຳກັນເປັນຝູງ ຖ້າມີປີກແລະໄຕ່ໄປໄດ້ ພວກເຈົ້າກໍຕ້ອງຖືວ່າເປັນສັດທີ່ເປັນຕາຂີ້ດຽດ.
21 ສຳລັບແມງໄມ້ທີ່ຢູ່ນຳກັນເປັນຝູງທີ່ມີປີກແລະໄຕ່ໄປໄດ້ ພວກເຈົ້າກິນໄດ້ສະເພາະແຕ່ຊະນິດທີ່ມີຂາຫຼັງພັບໄດ້ແລະເຕັ້ນໄປໄດ້. 22 ພວກເຈົ້າກິນໄດ້ແຕ່ຕັກກະແຕນຊະນິດຕ່າງໆ+ກັບຈີ່ລໍ່ຊະນິດຕ່າງໆ. 23 ສ່ວນແມງໄມ້ທີ່ຢູ່ນຳກັນເປັນຝູງທີ່ມີປີກແລະໄຕ່ໄປໄດ້ຊະນິດອື່ນໆທັງໝົດ ພວກເຈົ້າຕ້ອງຖືວ່າເປັນສັດທີ່ເປັນຕາຂີ້ດຽດ. 24 ສັດເຫຼົ່ານີ້ຈະເຮັດໃຫ້ພວກເຈົ້າບໍ່ສະອາດ. ຖ້າຜູ້ໃດໄປຖືກຫຼືໄປບາຍຊາກສັດເຫຼົ່ານີ້ ຈະຖືວ່າຜູ້ນັ້ນບໍ່ສະອາດຈົນຮອດຄ່ຳ.+ 25 ຖ້າຜູ້ໃດຈັບຊາກສັດເຫຼົ່ານີ້ກໍຕ້ອງໄດ້ຊັກເຄື່ອງ+ ແລະຈະຖືວ່າລາວບໍ່ສະອາດຈົນຮອດຄ່ຳ.
26 ສັດທີ່ມີຕີນແຍກເປັນ 2 ກີບ ແຕ່ບໍ່ແຍກກັນຫຼາຍ ແລະບໍ່ໄດ້ຄ້ຽວເອື້ອງ ພວກເຈົ້າຕ້ອງຖືວ່າມັນເປັນສັດທີ່ບໍ່ສະອາດ. ຜູ້ໃດທີ່ໄປຖືກຫຼືໄປບາຍສັດເຫຼົ່ານີ້ ຈະຖືວ່າຜູ້ນັ້ນບໍ່ສະອາດ.+ 27 ສັດທຸກຊະນິດທີ່ຍ່າງໄປມາດ້ວຍອົ້ງຕີນ ພວກເຈົ້າຕ້ອງຖືວ່າມັນບໍ່ສະອາດ. ຜູ້ໃດທີ່ໄປຖືກຫຼືໄປບາຍຊາກສັດເຫຼົ່ານີ້ ຈະຖືວ່າຜູ້ນັ້ນບໍ່ສະອາດຈົນຮອດຄ່ຳ. 28 ຜູ້ທີ່ຈັບຊາກສັດເຫຼົ່ານີ້ກໍຕ້ອງໄດ້ຊັກເຄື່ອງ+ ແລະຈະຖືວ່າລາວບໍ່ສະອາດຈົນຮອດຄ່ຳ.+ ສັດທັງໝົດນີ້ຖືວ່າເປັນສັດທີ່ບໍ່ສະອາດ.
29 ສັດນ້ອຍຕໍ່ໄປນີ້ຖືວ່າເປັນສັດທີ່ບໍ່ສະອາດຄື: ໂຕຕຸ່ນ ໂຕໜູ+ ສັດເລືອຄານຈຳພວກໜຶ່ງ* 30 ໂຕກັບໂກ້ແລະໂຕຈີ່ກ້ຽມ ໂຕເຮ້ຍ ໂຕຊາລາແມນເດີ້* ໂຕກະປອມທີ່ຢູ່ໃນທະເລຊາຍ ແລະໂຕກະປອມຄາເມລຽນ. 31 ສັດນ້ອຍເຫຼົ່ານີ້ພວກເຈົ້າຕ້ອງຖືວ່າເປັນສັດທີ່ບໍ່ສະອາດ.+ ຖ້າຜູ້ໃດໄປຖືກຫຼືໄປບາຍຊາກສັດເຫຼົ່ານີ້ ຈະຖືວ່າຜູ້ນັ້ນບໍ່ສະອາດຈົນຮອດຄ່ຳ.+
32 ຖ້າຊາກສັດເຫຼົ່ານັ້ນຖືກສິ່ງໃດ ບໍ່ວ່າຈະເປັນເຄື່ອງໃຊ້ທີ່ເຮັດຈາກໄມ້ ເຄື່ອງນຸ່ງ ເຄື່ອງທີ່ເຮັດຈາກໜັງສັດ ຫຼືຜ້າເນື້ອຫຍາບ ພວກເຈົ້າຕ້ອງຖືວ່າສິ່ງເຫຼົ່ານັ້ນບໍ່ສະອາດ. ພວກເຈົ້າຕ້ອງເອົາສິ່ງຂອງເຫຼົ່ານັ້ນໄປລ້າງ ແລະຈະຖືວ່າມັນບໍ່ສະອາດຈົນຮອດຄ່ຳ ຫຼັງຈາກນັ້ນຈຶ່ງຈະຖືວ່າມັນສະອາດ. 33 ຖ້າຊາກສັດເຫຼົ່ານັ້ນຕົກລົງໃນເຄື່ອງໃຊ້ທີ່ເຮັດຈາກດິນ ໃຫ້ພວກເຈົ້າທຸບເຄື່ອງໃຊ້ນັ້ນຖິ້ມ ແລະສິ່ງທີ່ຢູ່ໃນເຄື່ອງໃຊ້ນັ້ນກໍຈະຖືວ່າບໍ່ສະອາດ.+ 34 ຖ້າແນວກິນໄປຖືກນ້ຳທີ່ຢູ່ໃນເຄື່ອງໃຊ້ນັ້ນ ຈະຖືວ່າແນວກິນນັ້ນບໍ່ສະອາດ ແລະຈະຖືວ່າເຄື່ອງດື່ມທີ່ຢູ່ໃນເຄື່ອງໃຊ້ນັ້ນບໍ່ສະອາດຄືກັນ. 35 ຊາກສັດເຫຼົ່ານັ້ນຖືກສິ່ງໃດ ພວກເຈົ້າຕ້ອງຖືວ່າສິ່ງນັ້ນບໍ່ສະອາດ. ບໍ່ວ່າຈະເປັນເຕົາອົບຫຼືເຕົາໄຟ ພວກເຈົ້າຕ້ອງທຸບມັນໃຫ້ແຕກເປັນປ່ຽງໆ. ພວກເຈົ້າຕ້ອງຖືວ່າສິ່ງເຫຼົ່ານັ້ນບໍ່ສະອາດຕະຫຼອດໄປ. 36 ຖ້າຊາກສັດເຫຼົ່ານັ້ນຕົກໃສ່ນ້ຳອອກບໍ່ ຫຼືບ່ອນເກັບນ້ຳ ບ່ອນນັ້ນກໍຈະຍັງຖືວ່າສະອາດຢູ່. ແຕ່ຜູ້ໃດທີ່ຈັບບາຍຊາກສັດເຫຼົ່ານັ້ນ ຕ້ອງຖືວ່າຜູ້ນັ້ນບໍ່ສະອາດ. 37 ຖ້າຊາກສັດເຫຼົ່ານັ້ນຖືກແນວປູກທີ່ຈະເອົາໄປຫວ່ານ ຈະຖືວ່າແນວປູກນັ້ນຍັງສະອາດຢູ່. 38 ແຕ່ຖ້າຊາກສັດເຫຼົ່ານັ້ນໄປຖືກແນວປູກທີ່ແຊ່ນ້ຳແລ້ວ ພວກເຈົ້າຕ້ອງຖືວ່າແນວປູກນັ້ນບໍ່ສະອາດ.
39 ຖ້າສັດທີ່ພວກເຈົ້າກິນໄດ້ມັນຕາຍເອງ ແລະມີຄົນໄປຖືກຫຼືໄປບາຍຊາກສັດນັ້ນ ພວກເຈົ້າຈະຕ້ອງຖືວ່າຜູ້ນັ້ນບໍ່ສະອາດຈົນຮອດຄ່ຳ.+ 40 ຖ້າຜູ້ໃດກິນຊີ້ນສັດນັ້ນ ລາວຕ້ອງຊັກເຄື່ອງ ແລະຈະຖືວ່າລາວບໍ່ສະອາດຈົນຮອດຄ່ຳ.+ ຜູ້ໃດທີ່ຈັບຊາກສັດນັ້ນ ລາວກໍຕ້ອງຊັກເຄື່ອງ ແລະຈະຖືວ່າລາວບໍ່ສະອາດຈົນຮອດຄ່ຳ. 41 ສັດນ້ອຍແລະແມງໄມ້ເປັນສັດທີ່ເປັນຕາຂີ້ດຽດ.+ ຫ້າມພວກເຈົ້າກິນເດັດຂາດ. 42 ຫ້າມພວກເຈົ້າກິນສັດທີ່ເລືອໄປເລືອມາ ແມງໄມ້ທີ່ໄຕ່ໄດ້ ຫຼືສັດໂຕນ້ອຍໆທີ່ມີຫຼາຍຂາ. ສັດເຫຼົ່ານີ້ເປັນຕາຂີ້ດຽດ.+ 43 ຢ່າໃຫ້ສັດເຫຼົ່ານີ້ເຮັດໃຫ້ໂຕພວກເຈົ້າເປັນຕາຂີ້ດຽດ ແລະຢ່າເຮັດໃຫ້ໂຕພວກເຈົ້າບໍ່ສະອາດ*ຍ້ອນສັດເຫຼົ່ານີ້.+ 44 ເຮົາແມ່ນເຢໂຫວາພະເຈົ້າຂອງພວກເຈົ້າ.+ ພວກເຈົ້າຕ້ອງເຮັດໃຫ້ໂຕເອງສະອາດສະເໝີແລະເປັນຄົນບໍລິສຸດ+ ເພາະເຮົາເປັນພະເຈົ້າທີ່ບໍລິສຸດ.+ ຢ່າໃຫ້ສັດເຫຼົ່ານີ້ເຮັດໃຫ້ໂຕພວກເຈົ້າບໍ່ສະອາດ. 45 ເຮົາແມ່ນເຢໂຫວາຜູ້ທີ່ພາພວກເຈົ້າອອກຈາກແຜ່ນດິນເອຢິບ ເພື່ອເຮັດໃຫ້ພວກເຈົ້າເຫັນວ່າເຮົາແມ່ນພະເຈົ້າຂອງພວກເຈົ້າ.+ ພວກເຈົ້າຕ້ອງເປັນຄົນບໍລິສຸດ+ ເພາະເຮົາເປັນພະເຈົ້າທີ່ບໍລິສຸດ.+
46 ນີ້ແມ່ນກົດໝາຍກ່ຽວກັບສັດຕ່າງໆ ສັດທີ່ບິນໄດ້ ສັດທີ່ຢູ່ໃນນ້ຳ ແລະສັດນ້ອຍທຸກຊະນິດ. 47 ກົດໝາຍເຫຼົ່ານີ້ຈະຊ່ວຍໃຫ້ພວກເຈົ້າຮູ້ວ່າ ສັດຊະນິດໃດຖືວ່າສະອາດ ຊະນິດໃດຖືວ່າບໍ່ສະອາດ ແລະສັດຊະນິດໃດກິນໄດ້ ຊະນິດໃດກິນບໍ່ໄດ້.’”+