ເອເຊກຽນ
39 “ລູກມະນຸດ ໃຫ້ເຈົ້າພະຍາກອນກ່ຽວກັບໂຄກ+ແລະບອກລາວແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ໂຄກ ເຈົ້າທີ່ເປັນຫົວໜ້າຂອງຫົວໜ້າເມເຊກກັບຕູບານ+ ເຮົາຈະເປັນສັດຕູກັບເຈົ້າ. 2 ເຮົາຈະພາເຈົ້າໄປອີກທາງໜຶ່ງ. ເຮົາຈະພາເຈົ້າມາຈາກທາງເໜືອສຸດ+ແລະໄປພູຂອງອິດສະຣາເອນ. 3 ເຮົາຈະຕີຄັນທະນູໃຫ້ຫຼຸດຈາກມືຊ້າຍຂອງເຈົ້າ ແລະເຮົາຈະເຮັດໃຫ້ລູກທະນູຕົກຈາກມືຂວາຂອງເຈົ້າ. 4 ເຈົ້າກັບກອງທະຫານທັງໝົດຂອງເຈົ້າແລະຫຼາຍໆຊາດທີ່ຢູ່ນຳເຈົ້າຈະຕາຍຢູ່ເທິງພູຂອງອິດສະຣາເອນ.+ ເຮົາຈະໃຫ້ນົກທີ່ກິນຊີ້ນແລະສັດປ່າທີ່ຢູ່ທົ່ງຫຍ້າກິນສົບເຈົ້າ.”’+
5 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຈົ້າຈະຕາຍຢູ່ທົ່ງຫຍ້າ+ຍ້ອນເຮົາໄດ້ເວົ້າໄວ້ແລ້ວ.
6 ເຮົາຈະສົ່ງໄຟໄປຈູດມາໂຄກແລະຄົນທີ່ອາໄສຢູ່ຢ່າງປອດໄພຕາມເກາະຕ່າງໆ+ ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ. 7 ເຮົາຈະເຮັດໃຫ້ພວກອິດສະຣາເອນປະຊາຊົນຂອງເຮົາຮູ້ຈັກຊື່ທີ່ບໍລິສຸດຂອງເຮົາ ແລະເຮົາຈະບໍ່ຍອມໃຫ້ຊື່ທີ່ບໍລິສຸດຂອງເຮົາຖືກດູຖູກອີກຕໍ່ໄປ. ແລ້ວຊາດຕ່າງໆຈະຮູ້ວ່າ ເຮົາເຢໂຫວາ+ເປັນພະເຈົ້າອົງບໍລິສຸດຂອງອິດສະຣາເອນ.’+
8 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເລື່ອງທີ່ພະຍາກອນໄວ້ຈະເກີດຂຶ້ນແທ້. 9 ຄົນທີ່ຢູ່ຕາມເມືອງຕ່າງໆຂອງອິດສະຣາເອນຈະອອກໄປເກັບໂລ້ນ້ອຍ* ໂລ້ໃຫຍ່ ລູກທະນູ ຄັນທະນູ ໄມ້ຄ້ອນ* ແລະຫອກ. ເຂົາເຈົ້າຈະໃຊ້ອາວຸດເຫຼົ່ານັ້ນເປັນຟືນດັງໄຟ+ເປັນເວລາ 7 ປີ. 10 ເຂົາເຈົ້າຈະບໍ່ຕ້ອງໄປເກັບໄມ້ຢູ່ທົ່ງຫຼືຫາຟືນຢູ່ປ່າ ຍ້ອນເຂົາເຈົ້າຈະໃຊ້ອາວຸດເຫຼົ່ານັ້ນເພື່ອດັງໄຟ.’
ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຂົາເຈົ້າຈະປຸ້ນເອົາເຄື່ອງຈາກຄົນທີ່ເຄີຍປຸ້ນເຂົາເຈົ້າ ແລະຈະຍຶດເອົາຊັບສົມບັດຈາກຄົນທີ່ເຄີຍຍຶດເອົາຊັບສົມບັດຂອງເຂົາເຈົ້າ.’
11 ‘ໃນມື້ນັ້ນ ເຮົາຈະໃຫ້ໂຄກ+ມີບ່ອນຝັງສົບໃນອິດສະຣາເອນຢູ່ຮ່ອມພູທີ່ຄົນເດີນທາງໄປທິດຕາເວັນອອກຂອງທະເລ ແລະບ່ອນຝັງສົບນັ້ນຈະຂວາງທາງຄົນທີ່ກາຍໄປກາຍມາ. ເຂົາເຈົ້າຈະຝັງໂຄກກັບພວກທະຫານຂອງລາວຢູ່ຫັ້ນ ແລະເຂົາເຈົ້າຈະເອີ້ນບ່ອນນັ້ນວ່າຮ່ອມພູຮາໂມນໂຄກ.*+ 12 ພວກອິດສະຣາເອນຈະໃຊ້ເວລາ 7 ເດືອນຝັງສົບພວກນີ້ເພື່ອເຮັດໃຫ້ແຜ່ນດິນສະອາດ.+ 13 ທຸກຄົນໃນແຜ່ນດິນຈະຝັງສົບພວກນີ້ ແລະເລື່ອງນີ້ຈະເຮັດໃຫ້ເຂົາເຈົ້າມີຊື່ສຽງໃນມື້ທີ່ເຮົາເຮັດໃຫ້ໂຕເອງໄດ້ຮັບກຽດ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
14 ‘ຈະມີບາງຄົນຖືກມອບໝາຍໃຫ້ໄປທົ່ວແຜ່ນດິນເພື່ອຝັງສົບທີ່ຍັງເຫຼືອຢູ່ເທິງໂລກແລະເຮັດໃຫ້ແຜ່ນດິນສະອາດ. ເຂົາເຈົ້າຈະຊອກຫາສົບເປັນເວລາ 7 ເດືອນ. 15 ຈະມີກຸ່ມໜຶ່ງໃນພວກນັ້ນອອກໄປຊອກຫາກະດູກຄົນ ແລະເມື່ອເຂົາເຈົ້າເຫັນກໍຈະເຮັດເຄື່ອງໝາຍໄວ້ທາງຂ້າງກະດູກນັ້ນ. ແລ້ວຈະມີອີກກຸ່ມໜຶ່ງເອົາກະດູກນັ້ນໄປຝັງຢູ່ຮ່ອມພູຮາໂມນໂຄກ.+ 16 ໃນແຜ່ນດິນນັ້ນຈະມີເມືອງໜຶ່ງທີ່ຊື່ວ່າຮາໂມນາ.* ເຂົາເຈົ້າຈະເຮັດແນວນີ້ເພື່ອໃຫ້ແຜ່ນດິນສະອາດ.’+
17 ລູກມະນຸດ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ໃຫ້ເຈົ້າບອກນົກທຸກຊະນິດແລະສັດປ່າທຸກໂຕໃນທົ່ງວ່າ “ໃຫ້ພວກເຈົ້າມາລວມກັນ. ເຮົາກຳລັງຈັດງານລ້ຽງໃຫຍ່ໃຫ້ພວກເຈົ້າຢູ່ເທິງພູຂອງອິດສະຣາເອນ.+ 18 ພວກເຈົ້າຈະກິນຊີ້ນຂອງພວກທະຫານທີ່ເກັ່ງໆແລະກິນເລືອດຂອງພວກຫົວໜ້າໃນໂລກ. ເຂົາເຈົ້າເປັນແກະໂຕຜູ້ ແກະນ້ອຍ ແບ້ ແລະງົວໂຕຜູ້ ເຊິ່ງເປັນສັດທີ່ຕຸ້ຍພີຈາກບາຊານ. 19 ພວກເຈົ້າຈະກິນນ້ຳມັນຈົນແໜ້ນທ້ອງແລະກິນເລືອດຈົນເມົາໃນງານລ້ຽງໃຫຍ່ທີ່ເຮົາຈັດໃຫ້ພວກເຈົ້າ.”’
20 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຢູ່ໂຕະຂອງເຮົາ ພວກເຈົ້າຈະກິນມ້າ ທະຫານມ້າ ພວກທະຫານທີ່ເກັ່ງໆ ແລະທະຫານຄົນອື່ນໆທັງໝົດຈົນອີ່ມ.+
21 ເຮົາຈະໃຫ້ຊາດຕ່າງໆເຫັນຄວາມຍິ່ງໃຫຍ່ຂອງເຮົາ. ທຸກຊາດຈະເຫັນເຮົາຕັດສິນລົງໂທດແລະເຫັນລິດເດດ*ຂອງເຮົາ.+ 22 ນັບຕັ້ງແຕ່ມື້ນັ້ນ ພວກອິດສະຣາເອນຈະຮູ້ວ່າ ເຮົາແມ່ນເຢໂຫວາພະເຈົ້າຂອງເຂົາເຈົ້າ. 23 ແລ້ວຊາດຕ່າງໆຈະຮູ້ວ່າພວກອິດສະຣາເອນຖືກຈັບໄປເປັນຊະເລີຍກໍຍ້ອນເຂົາເຈົ້າເຮັດຜິດແລະບໍ່ສັດຊື່ຕໍ່ເຮົາ.+ ເຮົາໄດ້ປິ່ນໜ້າໜີ+ ປ່ອຍໃຫ້ສັດຕູມາໂຈມຕີເຂົາເຈົ້າ+ ແລະໃຫ້ເຂົາເຈົ້າຖືກຂ້າດ້ວຍດາບ. 24 ເຮົາເຮັດກັບເຂົາເຈົ້າຕາມທີ່ເຂົາເຈົ້າສົມຄວນໄດ້ຮັບ ຍ້ອນເຂົາເຈົ້າເຮັດຜິດແລະເຮັດສິ່ງທີ່ບໍ່ສະອາດ. ເຮົາປິ່ນໜ້າໜີກໍຍ້ອນເຂົາເຈົ້າເຮັດແບບນີ້.’
25 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະພາລູກຫຼານຂອງຢາໂຄບທີ່ເປັນຊະເລີຍກັບມາແຜ່ນດິນຂອງເຂົາເຈົ້າ.+ ເຮົາຈະອີ່ຕົນພວກອິດສະຣາເອນທັງໝົດ+ ແລະເຮົາຈະປົກປ້ອງຊື່ທີ່ບໍລິສຸດຂອງເຮົາຢ່າງເຕັມທີ.+ 26 ຫຼັງຈາກທີ່ເຂົາເຈົ້າຖືກເຮັດໃຫ້ອັບອາຍຍ້ອນບໍ່ສັດຊື່ຕໍ່ເຮົາ+ ເຂົາເຈົ້າຈະໄດ້ຢູ່ຢ່າງປອດໄພໃນແຜ່ນດິນຂອງໂຕເອງ ແລະຈະບໍ່ມີໃຜເຮັດໃຫ້ເຂົາເຈົ້າຢ້ານ.+ 27 ເມື່ອເຮົາພາເຂົາເຈົ້າກັບມາຈາກຊາດຕ່າງໆ ແລະລວບລວມເຂົາເຈົ້າອອກມາຈາກແຜ່ນດິນຂອງພວກສັດຕູ+ ເຮົາຈະເຮັດໃຫ້ທຸກຊາດເຫັນວ່າເຮົາເປັນພະເຈົ້າອົງບໍລິສຸດ.’+
28 ‘ເຂົາເຈົ້າຈະຖືກຈັບໄປເປັນຊະເລີຍຢູ່ຊາດຕ່າງໆ ແລ້ວເຮົາກໍຈະລວບລວມເຂົາເຈົ້າກັບມາຢູ່ແຜ່ນດິນຂອງໂຕເອງ. ເຮົາຈະບໍ່ປະເຂົາເຈົ້າໄວ້ຈັກຄົນເລີຍ.+ ເມື່ອເຮົາເຮັດແນວນີ້ ເຂົາເຈົ້າກໍຈະຮູ້ວ່າເຮົາແມ່ນເຢໂຫວາພະເຈົ້າຂອງເຂົາເຈົ້າ. 29 ເຮົາຈະບໍ່ປິ່ນໜ້າໜີຈາກພວກອິດສະຣາເອນອີກຕໍ່ໄປ+ ແລະເຮົາຈະເອົາພະລັງບໍລິສຸດຂອງເຮົາໃຫ້ເຂົາເຈົ້າ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”