ເອຊາຢາ
2 ຕໍ່ໄປນີ້ແມ່ນນິມິດທີ່ພະເຈົ້າໃຫ້ເອຊາຢາລູກຊາຍຂອງອາມອດເຫັນກ່ຽວກັບສິ່ງທີ່ຈະເກີດຂຶ້ນໃນຢູດາແລະເຢຣູຊາເລັມ.+
2 ໃນສະໄໝສຸດທ້າຍ
ພູໜ່ວຍທີ່ວິຫານຂອງພະເຢໂຫວາຕັ້ງຢູ່
ຈະຕັ້ງຢ່າງໝັ້ນຄົງແລະສູງເດັ່ນກວ່າພູທຸກໜ່ວຍ.+
ພູໜ່ວຍນີ້ຈະສູງກວ່າໂນນພູທຸກໂນນ
ແລະຄົນຈາກທຸກຊາດຈະໄປຫັ້ນ.+
3 ຄົນຈາກຊາດຕ່າງໆຈະພາກັນເວົ້າວ່າ:
“ໄປ໋ ໃຫ້ພວກເຮົາຂຶ້ນໄປເທິງພູຂອງພະເຢໂຫວາ
ແລະໄປວິຫານພະເຈົ້າຂອງຢາໂຄບ.+
ເພິ່ນຈະສອນພວກເຮົາໃຫ້ຮູ້ຈັກແນວທາງຂອງເພິ່ນ
ແລະພວກເຮົາຈະໄດ້ໃຊ້ຊີວິດຕາມທີ່ເພິ່ນຕ້ອງການ.”+
4 ເພິ່ນຈະເປັນຜູ້ຕັດສິນຊາດຕ່າງໆ
ແລະເພິ່ນຈະແກ້ໄຂເລື່ອງທີ່ບໍ່ຖືກຕ້ອງໃນຊາດເຫຼົ່ານັ້ນ.
ຊາດຕ່າງໆຈະບໍ່ຕໍ່ສູ້ກັນ
ແລະຈະບໍ່ມີໃຜຝຶກເຮັດສົງຄາມອີກເລີຍ.+
5 ມາແມ້ ລູກຫຼານຂອງຢາໂຄບ
ໃຫ້ພວກເຮົາຍ່າງໃນທາງທີ່ແຈ້ງສະຫວ່າງຂອງພະເຢໂຫວາ.+
6 ພະເຈົ້າເອີ້ຍ ພະອົງໄດ້ປະຖິ້ມປະຊາຊົນຂອງພະອົງທີ່ເປັນລູກຫຼານຂອງຢາໂຄບແລ້ວ+
ຍ້ອນເຂົາເຈົ້າໄດ້ເອົາທຳນຽມຫຼາຍຢ່າງມາຈາກທາງທິດຕາເວັນອອກ.
ເຂົາເຈົ້າໃຊ້ຄາຖາອາຄົມ+ຄືກັບພວກຟີລິດສະຕີນ
ແລະຍອມໃຫ້ພວກຄົນຕ່າງຊາດມາຢູ່ປົນກັບເຂົາເຈົ້າ.
7 ແຜ່ນດິນຂອງເຂົາເຈົ້າມີເງິນມີຄຳຫຼາຍແທ້ຫຼາຍວ່າ
ແລະມີຊັບສົມບັດຫຼາຍຈົນນັບບໍ່ໄດ້.
ແຜ່ນດິນຂອງເຂົາເຈົ້າມີມ້າບັກຫຼາຍໆ
ແລະມີລົດຮົບຫຼາຍຄັນຈົນນັບບໍ່ຖ້ວນ.+
8 ແຜ່ນດິນຂອງເຂົາເຈົ້າມີແຕ່ຮູບບູຊາທີ່ບໍ່ມີຄ່າຫຍັງເລີຍ.+
ເຂົາເຈົ້າຂາບໄຫວ້ຮູບພະທີ່ເຂົາເຈົ້າເຮັດຂຶ້ນມາ
ແລະນະມັດສະການສິ່ງທີ່ເຂົາເຈົ້າເຮັດດ້ວຍມືຂອງໂຕເອງ.
9 ເຂົາເຈົ້າຈະຖືກເຮັດໃຫ້ຕົກຕ່ຳແລະຖືກເຮັດໃຫ້ອັບອາຍ
ແລະພະອົງຈະບໍ່ຍົກໂທດໃຫ້ເຂົາເຈົ້າ.
10 ໃຫ້ພວກເຈົ້າເຂົ້າໄປລີ້ຢູ່ໃນຫຼືບຫີນແລະມຸດລົງໄປໃນດິນ
ຍ້ອນວ່າເມື່ອພະເຢໂຫວາໃຈຮ້າຍກໍເປັນຕາຢ້ານຫຼາຍ
ແລະຍ້ອນເພິ່ນມີລິດເດດທີ່ຍິ່ງໃຫຍ່.+
11 ຄົນທີ່ຈອງຫອງຈະຕ້ອງກົ້ມຫົວລົງ
ແລະຄົນທີ່ຍິ່ງຈະຕ້ອງໝູບລົງ.*
ໃນມື້ນັ້ນ ມີແຕ່ພະເຢໂຫວາເທົ່ານັ້ນທີ່ຈະຖືກຍົກໃຫ້ສູງຂຶ້ນ.
12 ມື້ນັ້ນເປັນມື້ຂອງພະເຢໂຫວາຜູ້ບັນຊາການກອງທັບ.+
ເພິ່ນຈະລົງໂທດທຸກຄົນທີ່ຍິ່ງແລະຈອງຫອງ
ແລະເພິ່ນຈະຕັດສິນທຸກຄົນ ທັງຄົນທີ່ມີຕຳແໜ່ງສູງແລະຄົນທຳມະດາ.+
13 ຕົ້ນຊີດ້າ*ທີ່ສູງໆທຸກຕົ້ນຢູ່ເລບານອນຈະຕ້ອງລົ້ມລົງ
ແລະຕົ້ນໂອກທຸກຕົ້ນຢູ່ບາຊານກໍຈະຕ້ອງລົ້ມລົງຄືກັນ.
14 ພູທີ່ໃຫຍ່ໆທຸກໜ່ວຍຈະຕ້ອງແຕກ
ແລະໂນນພູທີ່ສູງໆທຸກໂນນຈະຖືກເຮັດໃຫ້ແປລົງ.
15 ປ້ອມທີ່ສູງໆທຸກປ້ອມຈະໂຫງ້ຍລົງ ແລະກຳແພງທຸກບ່ອນຈະເຈື່ອນລົງມາ.
16 ເຮືອທຸກລຳຈາກຕາຊິດຈະແຕກ+
ແລະເຮືອທຸກລຳທີ່ງາມໆກໍຈະແຕກຄືກັນ.
17 ຄົນທີ່ຈອງຫອງຈະຕ້ອງກົ້ມຫົວລົງ
ແລະຄົນທີ່ຍິ່ງຈະຕ້ອງໝູບລົງ.
ໃນຕອນນັ້ນ ມີແຕ່ພະເຢໂຫວາເທົ່ານັ້ນທີ່ຈະຖືກຍົກໃຫ້ສູງຂຶ້ນ.
18 ພະເຈົ້າຕ່າງໆທີ່ບໍ່ມີຄ່າຈະສູນຫາຍໝົດ.+
19 ຄົນຈະເຂົ້າໄປລີ້ຢູ່ໃນຖ້ຳ
ແລະໄປລີ້ໃນຂຸມທີ່ຢູ່ໃຕ້ດິນ.+
ຍ້ອນວ່າເມື່ອພະເຢໂຫວາໃຈຮ້າຍກໍເປັນຕາຢ້ານຫຼາຍ
ແລະຍ້ອນເພິ່ນມີລິດເດດທີ່ຍິ່ງໃຫຍ່.+
ຕອນນັ້ນ ເພິ່ນຈະເຮັດໃຫ້ໂລກສັ່ນສະເທືອນແລະເຮັດໃຫ້ຄົນຢ້ານ.
20 ຄົນເອົາເງິນເອົາຄຳເຮັດຮູບພະທີ່ບໍ່ມີຄ່າ
ແລະເຂົາເຈົ້າກໍກົ້ມກາບຮູບພະເຫຼົ່ານັ້ນ.
ແຕ່ໃນມື້ນັ້ນ ເຂົາເຈົ້າຈະຖິ້ມມັນໃຫ້ຢູ່ກັບໂຕໜູແລະໂຕເຈຍ.+
21 ເຂົາເຈົ້າຈະເຂົ້າໄປລີ້ຢູ່ໃນຖ້ຳ
ແລະເຂົ້າໄປລີ້ຢູ່ໃນຫຼືບຫີນ.
ຍ້ອນວ່າເມື່ອພະເຢໂຫວາໃຈຮ້າຍກໍເປັນຕາຢ້ານຫຼາຍ
ແລະຍ້ອນເພິ່ນມີລິດເດດທີ່ຍິ່ງໃຫຍ່.
ຕອນນັ້ນ ເພິ່ນຈະເຮັດໃຫ້ໂລກສັ່ນສະເທືອນແລະເຮັດໃຫ້ຄົນຢ້ານ.
22 ໃຫ້ພວກເຈົ້າເຊົາໄວ້ໃຈມະນຸດ
ເພາະເມື່ອມະນຸດເຊົາຫາຍໃຈ ລາວກໍຈະຕາຍ
ແລະຊ່ວຍຫຍັງພວກເຈົ້າບໍ່ໄດ້.