ດານີເອນ
1 ໃນປີທີ 3 ທີ່ເຢໂຮຢາກີມ+ເປັນກະສັດປົກຄອງຢູດາ ເນບູກາດເນັດຊາກະສັດຂອງບາບີໂລນໄດ້ມາລ້ອມເມືອງເຢຣູຊາເລັມ.+ 2 ພະເຢໂຫວາໄດ້ໃຫ້ເນບູກາດເນັດຊາຕໍ່ສູ້ຊະນະເຢໂຮຢາກີມກະສັດຂອງຢູດາ.+ ເນບູກາດເນັດຊາໄດ້ເອົາເຄື່ອງໃຊ້ບາງຢ່າງໃນວິຫານຂອງພະເຈົ້າທ່ຽງແທ້ໄປບາບີໂລນ*+ ແລະເອົາໄປໄວ້ໃນຄັງຊັບສິນຢູ່ວິຫານຂອງພະເຈົ້າຂອງລາວ.+
3 ກະສັດໄດ້ສັ່ງອັດຊະເປນັດທີ່ເປັນຫົວໜ້າພວກຂ້າລາຊະການໃຫ້ພາຄົນອິດສະຣາເອນຈຳນວນໜຶ່ງມາຫາລາວ ໂດຍສະເພາະແມ່ນລູກຫຼານຂອງກະສັດແລະລູກຫຼານຂອງພວກເຈົ້ານາຍ.+ 4 ເຂົາເຈົ້າຕ້ອງເປັນຄົນໜຸ່ມທີ່ມີຮູບຮ່າງໜ້າຕາດີ ບໍ່ມີບ່ອນຕິ ສະຫຼາດ ມີຄວາມຮູ້ຄວາມເຂົ້າໃຈ+ ແລະເຮັດວຽກຮັບໃຊ້ໃນວັງຂອງກະສັດໄດ້. ອັດຊະເປນັດຕ້ອງສອນພາສາແລະວິຊາຕ່າງໆຂອງພວກການເດອາໃຫ້ເຂົາເຈົ້າ. 5 ກະສັດຍັງໄດ້ສັ່ງໃຫ້ເອົາອາຫານແລະເຫຼົ້າແວງແບບດຽວກັບທີ່ລາວກິນ*ໃຫ້ຄົນໜຸ່ມເຫຼົ່ານີ້ກິນທຸກໆມື້. ເຂົາເຈົ້າຕ້ອງໄດ້ຮັບການຝຶກ*ເປັນເວລາ 3 ປີ. ຫຼັງຈາກຄົບ 3 ປີແລ້ວ ເຂົາເຈົ້າຕ້ອງເຂົ້າໄປເຮັດວຽກຢູ່ໃນວັງຂອງກະສັດ.
6 ຄົນໜຸ່ມເຫຼົ່ານີ້ບາງຄົນມາຈາກຕະກູນຢູດາ. ເຂົາເຈົ້າຊື່ດານີເອນ*+ ຮານານີຢາ* ມີຊາເອນ* ແລະອາຊາຣີຢາ.*+ 7 ແຕ່ຫົວໜ້າພວກຂ້າລາຊະການໄດ້ຕັ້ງຊື່ໃໝ່*ໃຫ້ເຂົາເຈົ້າ. ລາວປ່ຽນຊື່ດານີເອນເປັນເບນເຕຊັດຊາເຣ+ ຮານານີຢາເປັນຊາດຣາກ ມີຊາເອນເປັນເມຊາກ ແລະອາຊາຣີຢາເປັນອາເບດເນໂກ.+
8 ແຕ່ດານີເອນຕັ້ງໃຈວ່າຈະບໍ່ກິນອາຫານແລະເຫຼົ້າແວງຂອງກະສັດ ເພາະສິ່ງເຫຼົ່ານີ້ຖືວ່າບໍ່ສະອາດຕາມກົດໝາຍຂອງພະເຈົ້າ. ລາວຈຶ່ງຂໍກັບຫົວໜ້າພວກຂ້າລາຊະການວ່າຈະບໍ່ກິນຫຼືດື່ມສິ່ງເຫຼົ່ານີ້ເພື່ອຈະບໍ່ເຮັດໃຫ້ໂຕເອງບໍ່ສະອາດ. 9 ພະເຈົ້າທ່ຽງແທ້ໄດ້ເຮັດໃຫ້ຫົວໜ້າພວກຂ້າລາຊະການອີ່ຕົນແລະພໍໃຈດານີເອນ.+ 10 ແຕ່ຫົວໜ້າພວກຂ້າລາຊະການເວົ້າວ່າ: “ຂ້ອຍຢ້ານກະສັດຈະໃຈຮ້າຍ ຖ້າພວກເຈົ້າບໍ່ກິນບໍ່ດື່ມຕາມທີ່ລາວສັ່ງ. ຖ້າກະສັດເຫັນພວກເຈົ້າຈ່ອຍກວ່າຄົນອື່ນເດ້ຈະເຮັດແນວໃດ? ພວກເຈົ້າຈະເຮັດໃຫ້ຂ້ອຍມີຄວາມຜິດໄດ໋.” 11 ດານີເອນຈຶ່ງເວົ້າກັບຜູ້ທີ່ຫົວໜ້າພວກຂ້າລາຊະການໄດ້ແຕ່ງຕັ້ງໃຫ້ເບິ່ງແຍງດານີເອນ ຮານານີຢາ ມີຊາເອນ ແລະອາຊາຣີຢາວ່າ: 12 “ຂໍໃຫ້ເອົາແຕ່ຜັກ*ກັບນ້ຳມາໃຫ້ພວກເຮົາກິນຈັກ 10 ມື້ລອງເບິ່ງໄດ້ບໍ? 13 ຫຼັງຈາກນັ້ນ ໃຫ້ສົມທຽບພວກເຮົາກັບຊາຍໜຸ່ມຄົນອື່ນໆທີ່ກິນອາຫານຂອງກະສັດ. ເມື່ອເຫັນແລ້ວ ທ່ານຈຶ່ງຕັດສິນໃຈວ່າຈະເຮັດແນວໃດກັບພວກເຮົາຕໍ່.”
14 ຜູ້ເບິ່ງແຍງຍອມໃຫ້ເຂົາເຈົ້າເຮັດຕາມທີ່ຂໍເປັນເວລາ 10 ມື້. 15 ເມື່ອຮອດ 10 ມື້ແລ້ວ ລາວກໍເຫັນວ່າເຂົາເຈົ້າມີໜ້າຕາສົດຊື່ນແລະແຂງແຮງກວ່າຊາຍໜຸ່ມທຸກຄົນທີ່ກິນອາຫານຂອງກະສັດ. 16 ຜູ້ເບິ່ງແຍງຈຶ່ງເອົາຜັກມາໃຫ້ເຂົາເຈົ້າກິນຕໍ່ໄປ ແລະບໍ່ໄດ້ເອົາອາຫານກັບເຫຼົ້າແວງຂອງກະສັດມາໃຫ້ກິນ. 17 ພະເຈົ້າທ່ຽງແທ້ໄດ້ໃຫ້ 4 ຄົນນີ້ມີສະຕິປັນຍາແລະມີຄວາມຮູ້ກັບຄວາມເຂົ້າໃຈກ່ຽວກັບສິ່ງທີ່ຂຽນໄວ້ໃນປຶ້ມທຸກຫົວ. ພະເຈົ້າຍັງໃຫ້ດານີເອນເຂົ້າໃຈນິມິດແລະຄວາມຝັນທຸກຢ່າງ.+
18 ເມື່ອຮອດເວລາທີ່ກະສັດເນບູກາດເນັດຊາກຳນົດໄວ້ ຫົວໜ້າພວກຂ້າລາຊະການໄດ້ພາຊາຍໜຸ່ມເຫຼົ່ານັ້ນເຂົ້າໄປຫາກະສັດ.+ 19 ຕອນທີ່ກະສັດເວົ້ານຳເຂົາເຈົ້າ ລາວກໍເຫັນວ່າດານີເອນ ຮານານີຢາ ມີຊາເອນ ແລະອາຊາຣີຢາເກັ່ງກວ່າທຸກຄົນ.+ ຕັ້ງແຕ່ມື້ນັ້ນ 4 ຄົນນີ້ຈຶ່ງເລີ່ມຕົ້ນຮັບໃຊ້ກະສັດ. 20 ທຸກເທື່ອທີ່ກະສັດຖາມເລື່ອງໃດກໍຕາມທີ່ຕ້ອງໃຊ້ສະຕິປັນຍາແລະຄວາມເຂົ້າໃຈ ລາວກໍເຫັນວ່າ 4 ຄົນນີ້ເກັ່ງກວ່າພວກໝໍຄາຖາອາຄົມແລະພວກໝໍມໍ+ 10 ເທົ່າໃນທົ່ວເຂດທີ່ລາວປົກຄອງ. 21 ດານີເອນຢູ່ຫັ້ນຈົນຮອດປີທຳອິດ*ທີ່ກະສັດໄຊຣັດປົກຄອງ.+
2 ໃນປີທີ 2 ທີ່ເນບູກາດເນັດຊາເປັນກະສັດ ລາວໄດ້ຝັນຫຼາຍເທື່ອ ແລະຄວາມຝັນເຫຼົ່ານັ້ນເຮັດໃຫ້ລາວວຸ່ນວາຍໃຈຫຼາຍ+ຈົນນອນບໍ່ຫຼັບ. 2 ລາວຈຶ່ງສັ່ງໃຫ້ຄົນໄປເອີ້ນໝໍຄາຖາອາຄົມ ໝໍມໍ ພວກທີ່ເບິ່ງໂຊກລາງ ແລະພວກການເດອາທີ່ທຳນາຍໂດຍເບິ່ງດວງດາວໃຫ້ມາຫາ ເພື່ອໃຫ້ເຂົາເຈົ້າບອກວ່າລາວຝັນຫຍັງ. ຄົນເຫຼົ່ານີ້ກໍມາຫາກະສັດ.+ 3 ກະສັດເວົ້າກັບເຂົາເຈົ້າວ່າ: “ຂ້ອຍໄດ້ຝັນແລະວຸ່ນວາຍໃຈຫຼາຍຍ້ອນຢາກຮູ້ວ່າໂຕເອງຝັນຫຍັງ.” 4 ພວກການເດອາທີ່ທຳນາຍໂດຍເບິ່ງດວງດາວຕອບກະສັດເປັນພາສາອາຣາເມອິກວ່າ:*+ “ກະສັດ ຂໍໃຫ້ທ່ານມີອາຍຸຍືນຍາວຕະຫຼອດໄປ. ຂໍໃຫ້ກະສັດເລົ່າຄວາມຝັນໃຫ້ພວກເຮົາທີ່ເປັນຜູ້ຮັບໃຊ້ຂອງທ່ານຟັງ ແລ້ວພວກເຮົາຈະແປຄວາມໝາຍຂອງຄວາມຝັນນັ້ນໃຫ້ທ່ານ.”
5 ກະສັດບອກເຂົາເຈົ້າວ່າ: “ຂ້ອຍຈະເຕືອນພວກເຈົ້າເປັນເທື່ອສຸດທ້າຍເດີ້. ຖ້າພວກເຈົ້າບອກບໍ່ໄດ້ວ່າຂ້ອຍຝັນຫຍັງແລະແປຄວາມໝາຍຂອງຄວາມຝັນນັ້ນບໍ່ໄດ້ ພວກເຈົ້າຈະຖືກຕັດເປັນຕ່ອນແລະເຮືອນຂອງພວກເຈົ້າຈະກາຍເປັນຫ້ອງນ້ຳສາທາລະນະ.* 6 ແຕ່ຖ້າພວກເຈົ້າບອກໄດ້ວ່າຂ້ອຍຝັນຫຍັງແລະແປຄວາມໝາຍຂອງຄວາມຝັນນັ້ນໄດ້ ຂ້ອຍຈະເອົາຂອງຂວັນ ລາງວັນ ແລະຕຳແໜ່ງທີ່ສູງໆໃຫ້ພວກເຈົ້າ.+ ໃຫ້ບອກມາວ່າຂ້ອຍຝັນຫຍັງແລະມັນໝາຍຄວາມວ່າແນວໃດ.”
7 ເຂົາເຈົ້າຕອບກະສັດເປັນເທື່ອທີ 2 ວ່າ: “ຂໍໃຫ້ກະສັດເລົ່າຄວາມຝັນໃຫ້ພວກເຮົາທີ່ເປັນຜູ້ຮັບໃຊ້ຂອງທ່ານຟັງ ແລ້ວພວກເຮົາຈະແປຄວາມໝາຍຂອງຄວາມຝັນນັ້ນໃຫ້ທ່ານ.”
8 ກະສັດເວົ້າວ່າ: “ຂ້ອຍຮູ້ໄດ໋ ພວກເຈົ້າກຳລັງຖ່ວງເວລາ ຍ້ອນພວກເຈົ້າຮູ້ຄຳສັ່ງຂອງຂ້ອຍ. 9 ຖ້າພວກເຈົ້າບອກບໍ່ໄດ້ວ່າຂ້ອຍຝັນຫຍັງ ພວກເຈົ້າທຸກຄົນຈະຖືກໂທດແບບດຽວກັນ. ຢ່າຄິດເດີ້ວ່າພວກເຈົ້າຈະສ້າງເລື່ອງຂຶ້ນມາຕົວະແລະຫຼອກລວງຂ້ອຍ ແລ້ວຄິດວ່າຂ້ອຍຈະປ່ຽນໃຈ. ໃຫ້ບອກມາວ່າຂ້ອຍຝັນຫຍັງ ຂ້ອຍຈຶ່ງຈະຮູ້ວ່າພວກເຈົ້າສາມາດອະທິບາຍຄວາມໝາຍຂອງຄວາມຝັນນັ້ນໄດ້ແທ້ໆ.”
10 ເຂົາເຈົ້າຕອບກະສັດວ່າ: “ບໍ່ມີໃຜໃນໂລກນີ້ຈະເຮັດໄດ້ຕາມທີ່ກະສັດສັ່ງດອກ ແລະກໍບໍ່ມີກະສັດທີ່ຍິ່ງໃຫຍ່ອົງໃດຫຼືຜູ້ປົກຄອງຄົນໃດເຄີຍຂໍໃຫ້ໝໍຄາຖາອາຄົມ ໝໍມໍ ຫຼືພວກການເດອາທີ່ທຳນາຍໂດຍເບິ່ງດວງດາວໃຫ້ເຮັດແບບນີ້. 11 ສິ່ງທີ່ທ່ານບອກໃຫ້ເຮັດມັນຍາກໂພດ ບໍ່ມີມະນຸດຄົນໃດໃນໂລກນີ້ຈະບອກທ່ານໄດ້ດອກ ນອກຈາກພວກພະເຈົ້າເທົ່ານັ້ນ.”
12 ເມື່ອໄດ້ຍິນແບບນີ້ ກະສັດກໍໃຈຮ້າຍຫຼາຍແລະສັ່ງໃຫ້ຂ້າທີ່ປຶກສາທຸກຄົນໃນບາບີໂລນ.+ 13 ຕອນທີ່ມີຄຳສັ່ງອອກມາ ຄົນຂອງກະສັດກໍອອກໄປເພື່ອຈະຂ້າພວກທີ່ປຶກສາທັງໝົດ. ເຂົາເຈົ້າຈະໄປຂ້າດານີເອນກັບພວກໝູ່ຂອງລາວນຳ.
14 ຕອນທີ່ອາຣີໂອກທີ່ເປັນຫົວໜ້າທະຫານປ້ອງກັນໂຕກະສັດອອກໄປເພື່ອຈະຂ້າທີ່ປຶກສາທຸກຄົນໃນບາບີໂລນ ດານີເອນໄດ້ໄປເວົ້າກັບລາວດ້ວຍຄວາມນັບຖືແລະຢ່າງລະມັດລະວັງ. 15 ດານີເອນຖາມອາຣີໂອກວ່າ: “ເປັນຫຍັງກະສັດຈຶ່ງອອກຄຳສັ່ງທີ່ໂຫດແບບນີ້?” ແລ້ວອາຣີໂອກກໍເລົ່າເລື່ອງທີ່ເກີດຂຶ້ນໃຫ້ດານີເອນຟັງ.+ 16 ດານີເອນຈຶ່ງໄປຫາກະສັດ ແລະຂໍເວລາເພື່ອຈະແປຄວາມໝາຍຂອງຄວາມຝັນນັ້ນໃຫ້ກະສັດຟັງ.
17 ດານີເອນກັບເມືອເຮືອນ ແລ້ວໄປເລົ່າເລື່ອງນັ້ນໃຫ້ຮານານີຢາ ມີຊາເອນ ແລະອາຊາຣີຢາຟັງ. 18 ດານີເອນຂໍໃຫ້ເຂົາເຈົ້າອະທິດຖານຫາພະເຈົ້າທີ່ຢູ່ໃນສະຫວັນໃຫ້ເພິ່ນອີ່ຕົນ ແລະໃຫ້ເພິ່ນບອກເລື່ອງຄວາມຝັນຂອງກະສັດ ເພື່ອດານີເອນກັບພວກໝູ່ຈະບໍ່ຖືກຂ້ານຳກັນກັບພວກທີ່ປຶກສາໃນບາບີໂລນ.
19 ໃນຄືນນັ້ນ ພະເຈົ້າໄດ້ບອກໃຫ້ດານີເອນຮູ້ເລື່ອງຄວາມຝັນນັ້ນໂດຍທາງນິມິດ.+ ລາວຈຶ່ງສັນລະເສີນພະເຈົ້າທີ່ຢູ່ໃນສະຫວັນ. 20 ດານີເອນເວົ້າວ່າ:
“ຂໍໃຫ້ຊື່ຂອງພະເຈົ້າໄດ້ຮັບການສັນລະເສີນຕະຫຼອດໄປ
ຍ້ອນວ່າມີແຕ່ເພິ່ນຜູ້ດຽວເທົ່ານັ້ນທີ່ມີສະຕິປັນຍາແລະມີລິດເດດ.+
21 ເພິ່ນປ່ຽນເວລາແລະລະດູຕ່າງໆ.+
ເພິ່ນແຕ່ງຕັ້ງແລະປົດກະສັດ.+
ເພິ່ນໃຫ້ຄົນສະຫຼາດມີສະຕິປັນຍາ ແລະໃຫ້ຄົນທີ່ມີຄວາມເຂົ້າໃຈມີຄວາມຮູ້.+
22 ເພິ່ນເປີດເຜີຍສິ່ງທີ່ເລິກເຊິ່ງແລະສິ່ງທີ່ຖືກເຊື່ອງໄວ້.+
ເພິ່ນຮູ້ສິ່ງທີ່ຢູ່ໃນບ່ອນມືດໆ+
ແລະແສງສະຫວ່າງຢູ່ກັບເພິ່ນ.+
23 ພະເຈົ້າເອີ້ຍ ພະອົງເປັນພະເຈົ້າຂອງປູ່ຍ່າຕານາຍຂອງລູກ. ລູກຂໍຂອບໃຈແລະສັນລະເສີນພະອົງ
ຍ້ອນພະອົງໃຫ້ລູກມີສະຕິປັນຍາແລະອຳນາດ.
ຕອນນີ້ ພະອົງໃຫ້ລູກຮູ້ໃນສິ່ງທີ່ພວກເຮົາຂໍ.
ພະອົງໃຫ້ພວກເຮົາຮູ້ເລື່ອງຄວາມຝັນຂອງກະສັດ.”+
24 ຈາກນັ້ນ ດານີເອນກໍໄປຫາອາຣີໂອກຜູ້ທີ່ກະສັດແຕ່ງຕັ້ງໃຫ້ໄປຂ້າພວກທີ່ປຶກສາໃນບາບີໂລນ.+ ດານີເອນເວົ້າກັບລາວວ່າ: “ຢ່າຂ້າພວກທີ່ປຶກສາໃນບາບີໂລນ. ຂໍໃຫ້ເຈົ້າພາຂ້ອຍໄປຫາກະສັດ ແລະຂ້ອຍຈະແປຄວາມຝັນນັ້ນໃຫ້ກະສັດຟັງ.”
25 ອາຣີໂອກຟ້າວພາດານີເອນໄປຫາກະສັດແລະເວົ້າວ່າ: “ຂ້ອຍພາຜູ້ໜຶ່ງທີ່ເປັນຊະເລີຍຈາກຢູດາມາຫາກະສັດ.+ ລາວສາມາດແປຄວາມຝັນຂອງທ່ານໄດ້.” 26 ກະສັດຖາມດານີເອນທີ່ມີອີກຊື່ໜຶ່ງວ່າເບນເຕຊັດຊາເຣວ່າ:+ “ເຈົ້າຮູ້ແທ້ໆບໍວ່າຂ້ອຍຝັນເຫັນຫຍັງ? ເຈົ້າແປຄວາມຝັນນັ້ນໄດ້ແທ້ໆເບາະ?”+ 27 ດານີເອນຕອບກະສັດວ່າ: “ພວກທີ່ປຶກສາ ໝໍມໍ ໝໍຄາຖາອາຄົມ ຫຼືພວກທີ່ທຳນາຍໂດຍເບິ່ງດວງດາວ ບໍ່ມີໃຜຈັກຄົນສາມາດບອກຄວາມຝັນນັ້ນທີ່ກະສັດຖາມ.+ 28 ແຕ່ມີພະເຈົ້າອົງໜຶ່ງໃນສະຫວັນເຊິ່ງເປັນຜູ້ເປີດເຜີຍເລື່ອງທີ່ເປັນຄວາມລັບ+ ແລະເພິ່ນໄດ້ໃຫ້ກະສັດເນບູກາດເນັດຊາຮູ້ສິ່ງທີ່ຈະເກີດຂຶ້ນໃນສະໄໝສຸດທ້າຍ. ຕໍ່ໄປນີ້ແມ່ນຄວາມຝັນແລະນິມິດທີ່ກະສັດເຫັນຕອນທີ່ທ່ານນອນຫຼັບຢູ່:
29 “ຕອນທີ່ກະສັດນອນຫຼັບ ທ່ານຝັນກ່ຽວກັບສິ່ງທີ່ຈະເກີດຂຶ້ນໃນອະນາຄົດ ແລະພະເຈົ້າຜູ້ເປີດເຜີຍເລື່ອງທີ່ເປັນຄວາມລັບໄດ້ໃຫ້ທ່ານຮູ້ໃນສິ່ງທີ່ຈະເກີດຂຶ້ນ. 30 ເພິ່ນໄດ້ບອກໃຫ້ຂ້ອຍຮູ້ຄວາມຝັນນີ້ ບໍ່ແມ່ນຍ້ອນຂ້ອຍສະຫຼາດກວ່າຄົນອື່ນ ແຕ່ຍ້ອນເພິ່ນຢາກໃຫ້ຂ້ອຍແປຄວາມໝາຍຂອງຄວາມຝັນນີ້ໃຫ້ກະສັດ ເພື່ອທ່ານຈະໄດ້ຮູ້ສິ່ງທີ່ຄາໃຈທ່ານຢູ່.+
31 ໃນຄວາມຝັນ ກະສັດເຫັນຮູບປັ້ນທີ່ໃຫຍ່ໆຢູ່ຕໍ່ໜ້າທ່ານ. ຮູບປັ້ນນັ້ນບັກໃຫຍ່ໆ ເຫຼື້ອມ ແລະເປັນຕາຢ້ານຫຼາຍ. 32 ຫົວຂອງຮູບປັ້ນເປັນຄຳແທ້+ ເອິກກັບແຂນເປັນເງິນ+ ທ້ອງກັບກົກຂາເປັນທອງແດງ+ 33 ຂາເປັນເຫຼັກ+ ແລະຕີນເປັນເຫຼັກປົນກັບດິນດາກ.+ 34 ຕອນທີ່ກະສັດແນມເບິ່ງຮູບປັ້ນນັ້ນ ມີຫີນກ້ອນໜຶ່ງຖືກງັດອອກມາຈາກພູ ແຕ່ບໍ່ແມ່ນຄົນງັດມັນອອກມາ. ແລ້ວຫີນກ້ອນນັ້ນກໍໄປຕຳຕີນຂອງຮູບປັ້ນຈົນເຮັດໃຫ້ສ່ວນທີ່ເປັນເຫຼັກປົນກັບດິນດາກມຸ່ນ.+ 35 ຈາກນັ້ນ ເຫຼັກ ດິນດາກ ທອງແດງ ເງິນ ແລະຄຳກໍມຸ່ນອຸ້ຍປຸ້ຍຄືກັບຂີ້ແກບຢູ່ລານຟາດເຂົ້າໃນຍາມແລ້ງ ແລ້ວລົມກໍພັດມັນປິວໄປຈົນບໍ່ເຫຼືອຫຍັງ. ແຕ່ກ້ອນຫີນທີ່ຕຳຮູບປັ້ນນັ້ນໄດ້ກາຍເປັນພູໜ່ວຍໜຶ່ງທີ່ໃຫຍ່ຈົນເຕັມໂລກ.
36 ນີ້ແມ່ນຄວາມຝັນຂອງກະສັດ. ຕອນນີ້ ພວກເຮົາຈະບອກທ່ານໃຫ້ຮູ້ກ່ຽວກັບຄວາມໝາຍຂອງຄວາມຝັນນັ້ນ. 37 ທ່ານເປັນກະສັດເໜືອກະສັດອົງອື່ນໆ ຍ້ອນພະເຈົ້າທີ່ຢູ່ໃນສະຫວັນໄດ້ເອົາອານາຈັກ+ ອຳນາດ ຄວາມເຂັ້ມແຂງ ແລະກຽດຕິຍົດໃຫ້ທ່ານ. 38 ເພິ່ນໃຫ້ທ່ານມີອຳນາດເໜືອຄົນທີ່ຢູ່ທຸກບ່ອນ ແລະໃຫ້ມີອຳນາດເໜືອສັດທີ່ຢູ່ທົ່ງຫຍ້າກັບນົກທີ່ຢູ່ເທິງຟ້າ. ເພິ່ນໃຫ້ທ່ານປົກຄອງສິ່ງເຫຼົ່ານີ້ທັງໝົດ.+ ຫົວທີ່ເປັນຄຳຂອງຮູບປັ້ນນັ້ນໝາຍເຖິງໂຕທ່ານເອງ.+
39 ຕໍ່ຈາກທ່ານຈະມີອານາຈັກໜຶ່ງຂຶ້ນມາ+ ແຕ່ຈະດ້ອຍກວ່າທ່ານ. ຈາກນັ້ນຈະມີອານາຈັກທີ 3 ເຊິ່ງເປັນສ່ວນທີ່ເປັນທອງແດງ ແລະມັນຈະປົກຄອງທົ່ວໂລກ.+
40 ອານາຈັກທີ 4 ຈະແຂງຄືເຫຼັກ.+ ຄືກັບທີ່ເຫຼັກທຸບທຸກຢ່າງໃຫ້ມຸ່ນ ອານາຈັກນັ້ນກໍຈະທຸບທຸກອານາຈັກທີ່ຢູ່ກ່ອນໃຫ້ມຸ່ນຄືກັນ.+
41 ກະສັດໄດ້ເຫັນວ່າຕີນກັບນິ້ວຕີນຂອງຮູບປັ້ນມີສ່ວນທີ່ເປັນເຫຼັກແລະມີສ່ວນທີ່ເປັນດິນດາກ. ນີ້ໝາຍຄວາມວ່າອານາຈັກນັ້ນຈະຖືກແບ່ງແຍກ ແຕ່ບາງສ່ວນຂອງອານາຈັກຈະຍັງແຂງຄືກັບເຫຼັກ ຍ້ອນມີເຫຼັກປົນກັບດິນດາກທີ່ອ່ອນໆ. 42 ນິ້ວຕີນຂອງຮູບປັ້ນມີບາງສ່ວນເປັນເຫຼັກແລະບາງສ່ວນເປັນດິນດາກ. ດັ່ງນັ້ນ ອານາຈັກນັ້ນກໍຈະມີສ່ວນທີ່ເຂັ້ມແຂງແລະມີສ່ວນທີ່ອ່ອນແອ. 43 ກະສັດເຫັນເຫຼັກປົນກັບດິນດາກທີ່ອ່ອນໆ ໝາຍຄວາມວ່າສ່ວນທີ່ເຂັ້ມແຂງຈະປົນຢູ່ກັບປະຊາຊົນ. ແຕ່ 2 ສ່ວນນີ້ຈະເຂົ້າກັນບໍ່ໄດ້ ຄືກັບທີ່ເຫຼັກບໍ່ເຂົ້າກັນກັບດິນດາກ.
44 ໃນຕອນທີ່ກະສັດເຫຼົ່ານັ້ນກຳລັງປົກຄອງ ພະເຈົ້າທີ່ຢູ່ໃນສະຫວັນຈະຕັ້ງການປົກຄອງໜຶ່ງຂຶ້ນ+ ເຊິ່ງຈະບໍ່ຖືກທຳລາຍຈັກເທື່ອ+ແລະຈະບໍ່ມີໃຜມາຍຶດເອົາໄປໄດ້.+ ມີແຕ່ການປົກຄອງນີ້ເທົ່ານັ້ນທີ່ຈະຢູ່ຕະຫຼອດໄປ+ແລະມັນຈະທຳລາຍອານາຈັກເຫຼົ່ານັ້ນທັງໝົດ.+ 45 ການປົກຄອງນີ້ຈະເປັນຄືກັບກ້ອນຫີນທີ່ຖືກງັດອອກມາຈາກພູ ແຕ່ບໍ່ແມ່ນຄົນງັດອອກມາ. ມັນຈະທຳລາຍເຫຼັກ ທອງແດງ ດິນດາກ ເງິນ ແລະຄຳຈົນມຸ່ນອຸ້ຍປຸ້ຍຄືກັບທີ່ກະສັດເຫັນ.+ ພະເຈົ້າຜູ້ຍິ່ງໃຫຍ່ໄດ້ໃຫ້ທ່ານຮູ້ກ່ຽວກັບສິ່ງທີ່ຈະເກີດຂຶ້ນໃນອະນາຄົດ.+ ຄວາມຝັນນີ້ຈະເກີດຂຶ້ນແທ້ໆຕາມທີ່ອະທິບາຍໄວ້.”
46 ຈາກນັ້ນ ກະສັດເນບູກາດເນັດຊາກໍໝູບໜ້າລົງພື້ນຕໍ່ໜ້າດານີເອນເພື່ອໃຫ້ກຽດລາວ. ກະສັດໄດ້ສັ່ງໃຫ້ເອົາຂອງຂວັນມາໃຫ້ດານີເອນ ແລະໃຫ້ເຜົາເຄື່ອງຫອມໃຫ້ລາວ. 47 ກະສັດເວົ້າກັບດານີເອນວ່າ: “ທີ່ຈິງແລ້ວ ພະເຈົ້າຂອງເຈົ້າເໜືອກວ່າພະເຈົ້າທັງໝົດ ຍິ່ງໃຫຍ່ກວ່າກະສັດທຸກອົງ ແລະເປັນຜູ້ເປີດເຜີຍເລື່ອງທີ່ເປັນຄວາມລັບໄດ້ແທ້ໆ. ເພິ່ນເຮັດໃຫ້ເຈົ້າເປີດເຜີຍຄວາມລັບນີ້ໄດ້.”+ 48 ກະສັດໄດ້ເລື່ອນຕຳແໜ່ງໃຫ້ດານີເອນແລະເອົາຂອງຂວັນທີ່ດີໆຫຼາຍຢ່າງໃຫ້ລາວ. ກະສັດໃຫ້ດານີເອນປົກຄອງທົ່ວແຂວງບາບີໂລນ+ ແລະໃຫ້ລາວເປັນຫົວໜ້າຂ້າລາຊະການທີ່ເບິ່ງແຍງພວກທີ່ປຶກສາທັງໝົດໃນບາບີໂລນ. 49 ດານີເອນໄດ້ຂໍໃຫ້ກະສັດແຕ່ງຕັ້ງຊາດຣາກ ເມຊາກ ແລະອາເບດເນໂກ+ໃຫ້ເບິ່ງແຍງວຽກລາຊະການໃນແຂວງບາບີໂລນ. ສ່ວນດານີເອນກໍເຮັດວຽກຢູ່ວັງຂອງກະສັດ.
3 ກະສັດເນບູກາດເນັດຊາໄດ້ເຮັດຮູບປັ້ນຄຳ ສູງ 60 ສອກ* ແລະກວ້າງ 6 ສອກ.* ລາວເອົາຮູບປັ້ນນີ້ໄວ້ຢູ່ທົ່ງພຽງດູຣາໃນແຂວງບາບີໂລນ. 2 ຈາກນັ້ນ ກະສັດເນບູກາດເນັດຊາໄດ້ສັ່ງເຈົ້າແຂວງ ເຈົ້າເມືອງ ຜູ້ປົກຄອງ ທີ່ປຶກສາ ນາຍຄັງ ຜູ້ຕັດສິນ ໄອຍະການ ແລະພວກຂ້າລາຊະການຂອງແຂວງຕ່າງໆໃຫ້ມາລວມກັນໃນການສະຫຼອງຮູບປັ້ນທີ່ລາວໄດ້ເຮັດຂຶ້ນມາ.
3 ດັ່ງນັ້ນ ເຈົ້າແຂວງ ເຈົ້າເມືອງ ຜູ້ປົກຄອງ ທີ່ປຶກສາ ນາຍຄັງ ຜູ້ຕັດສິນ ໄອຍະການ ແລະພວກຂ້າລາຊະການຂອງແຂວງຕ່າງໆຈຶ່ງມາລວມກັນໃນການສະຫຼອງຮູບປັ້ນທີ່ກະສັດເນບູກາດເນັດຊາເຮັດ. ເຂົາເຈົ້າຢືນຢູ່ຕໍ່ໜ້າຮູບປັ້ນທີ່ກະສັດເນບູກາດເນັດຊາເຮັດຂຶ້ນມາ. 4 ຕົວແທນຂອງກະສັດປະກາດດັງໆວ່າ: “ກະສັດສັ່ງຄົນທຸກຊາດແລະທຸກພາສາວ່າ 5 ເມື່ອພວກເຈົ້າໄດ້ຍິນສຽງແກເຂົາສັດ ສຽງຂຸ່ຍ ສຽງພິນ ສຽງພິນນ້ອຍ ສຽງເຄື່ອງດົນຕີທີ່ມີສາຍ ສຽງປີ່ ແລະສຽງເຄື່ອງດົນຕີຊະນິດອື່ນໆ ໃຫ້ພວກເຈົ້າໝູບໜ້າລົງກາບຮູບປັ້ນຄຳທີ່ກະສັດເນບູກາດເນັດຊາໄດ້ເຮັດຂຶ້ນມາ. 6 ຖ້າຜູ້ໃດບໍ່ໝູບໜ້າລົງກາບຮູບປັ້ນນັ້ນ ລາວຈະຖືກໂຍນເຂົ້າໄປໃນເຕົາໄຟທີ່ຮ້ອນໆທັນທີ.”+ 7 ເມື່ອຄົນຈາກທຸກຊາດແລະທຸກພາສາໄດ້ຍິນສຽງແກເຂົາສັດ ສຽງຂຸ່ຍ ສຽງພິນ ສຽງພິນນ້ອຍ ສຽງເຄື່ອງດົນຕີທີ່ມີສາຍ ແລະສຽງເຄື່ອງດົນຕີຊະນິດອື່ນໆ ເຂົາເຈົ້າກໍໝູບໜ້າລົງກາບຮູບປັ້ນຄຳທີ່ກະສັດເນບູກາດເນັດຊາໄດ້ເຮັດຂຶ້ນມາ.
8 ໃນຕອນນັ້ນ ພວກການເດອາບາງຄົນໄດ້ມາຟ້ອງກະສັດເລື່ອງຂອງຄົນຢິວ. 9 ເຂົາເຈົ້າເວົ້າກັບກະສັດເນບູກາດເນັດຊາວ່າ: “ກະສັດເອີ້ຍ ຂໍໃຫ້ທ່ານມີອາຍຸຍືນຍາວ. 10 ທ່ານໄດ້ສັ່ງວ່າ ເມື່ອໄດ້ຍິນສຽງແກເຂົາສັດ ສຽງຂຸ່ຍ ສຽງພິນ ສຽງພິນນ້ອຍ ສຽງເຄື່ອງດົນຕີທີ່ມີສາຍ ສຽງປີ່ ແລະສຽງເຄື່ອງດົນຕີຊະນິດອື່ນໆ ທຸກຄົນຕ້ອງໝູບໜ້າລົງກາບຮູບປັ້ນຄຳ 11 ແລະຖ້າຜູ້ໃດບໍ່ໝູບໜ້າລົງກາບຮູບປັ້ນຄຳນັ້ນ ລາວຈະຖືກໂຍນເຂົ້າໄປໃນເຕົາໄຟທີ່ຮ້ອນໆ.+ 12 ແຕ່ມີພວກຢິວບາງຄົນບໍ່ໄດ້ເຮັດຕາມທີ່ທ່ານສັ່ງ. ພວກນີ້ແມ່ນຊາດຣາກ ເມຊາກ ແລະອາເບດເນໂກທີ່ທ່ານແຕ່ງຕັ້ງໃຫ້ເບິ່ງແຍງວຽກຂອງແຂວງບາບີໂລນ.+ ເຂົາເຈົ້າບໍ່ນະມັດສະການພະເຈົ້າຂອງທ່ານ ແລະບໍ່ຍອມກົ້ມກາບຮູບປັ້ນຄຳທີ່ທ່ານເຮັດຂຶ້ນມາ.”
13 ກະສັດເນບູກາດເນັດຊາໃຈຮ້າຍຫຼາຍ. ລາວສັ່ງໃຫ້ໄປພາຊາດຣາກ ເມຊາກ ແລະອາເບດເນໂກມາຫາລາວ. ແລ້ວ 3 ຄົນນີ້ກໍຖືກພາມາຫາກະສັດ. 14 ເນບູກາດເນັດຊາຖາມເຂົາເຈົ້າວ່າ: “ຊາດຣາກ ເມຊາກ ອາເບດເນໂກ ມັນແມ່ນແທ້ບໍທີ່ພວກເຈົ້າບໍ່ນະມັດສະການພະເຈົ້າຂອງຂ້ອຍ+ ແລະບໍ່ຍອມກົ້ມກາບຮູບປັ້ນຄຳທີ່ຂ້ອຍເຮັດຂຶ້ນມາ? 15 ຕອນນີ້ ຖ້າພວກເຈົ້າໄດ້ຍິນສຽງແກເຂົາສັດ ສຽງຂຸ່ຍ ສຽງພິນ ສຽງພິນນ້ອຍ ສຽງເຄື່ອງດົນຕີທີ່ມີສາຍ ສຽງປີ່ ແລະສຽງເຄື່ອງດົນຕີຊະນິດອື່ນໆແລ້ວໝູບລົງກາບຮູບປັ້ນຄຳທີ່ຂ້ອຍເຮັດຂຶ້ນມາ ຂ້ອຍຈະບໍ່ເຮັດຫຍັງໃຫ້ພວກເຈົ້າ. ແຕ່ຖ້າພວກເຈົ້າບໍ່ຍອມເຮັດແນວນັ້ນ ພວກເຈົ້າກໍຈະຖືກໂຍນເຂົ້າໄປໃນເຕົາໄຟທີ່ຮ້ອນໆທັນທີ. ລອງເບິ່ງດຸ ຊິມີພະເຈົ້າອົງໃດບໍທີ່ຊ່ວຍພວກເຈົ້າໃຫ້ລອດຈາກມືຂ້ອຍໄດ້?”+
16 ຊາດຣາກ ເມຊາກ ແລະອາເບດເນໂກເວົ້າວ່າ: “ກະສັດເນບູກາດເນັດຊາເອີ້ຍ ຈັ່ງໃດພວກເຮົາກໍຈະບໍ່ປ່ຽນໃຈ. 17 ຖ້າພວກເຮົາຖືກໂຍນເຂົ້າໄປໃນເຕົາໄຟແທ້ໆ ພະເຈົ້າທີ່ພວກເຮົານະມັດສະການກໍຈະຊ່ວຍພວກເຮົາໃຫ້ລອດຈາກເຕົາໄຟທີ່ຮ້ອນໆນັ້ນ ແລະຈະຊ່ວຍພວກເຮົາໃຫ້ລອດຈາກມືທ່ານ.+ 18 ແຕ່ເຖິງເພິ່ນຈະບໍ່ຊ່ວຍ ຂໍໃຫ້ກະສັດຮູ້ວ່າພວກເຮົາກໍຈະບໍ່ນະມັດສະການພະເຈົ້າຂອງທ່ານ ແລະຈະບໍ່ຍອມກົ້ມກາບຮູບປັ້ນຄຳທີ່ທ່ານເຮັດຂຶ້ນມາ.”+
19 ກະສັດເນບູກາດເນັດຊາໃຈຮ້າຍຫຼາຍໃຫ້ຊາດຣາກ ເມຊາກ ແລະອາເບດເນໂກຈົນສີໜ້າລາວປ່ຽນ.* ລາວຈຶ່ງສັ່ງໃຫ້ເພີ່ມຄວາມຮ້ອນໃນເຕົາໄຟຂຶ້ນເປັນ 7 ເທົ່າ. 20 ລາວສັ່ງທະຫານທີ່ແຂງແຮງໃນກອງທັບຂອງລາວໃຫ້ມັດຊາດຣາກ ເມຊາກ ແລະອາເບດເນໂກແລ້ວໂຍນເຂົາເຈົ້າເຂົ້າໄປໃນເຕົາໄຟທີ່ຮ້ອນໆນັ້ນ.
21 ສາມຄົນນີ້ຈຶ່ງຖືກມັດຕອນທີ່ຍັງໃສ່ຜ້າພາດບ່າ ໝວກ ແລະເຄື່ອງແຕ່ງກາຍຢູ່ ແລ້ວເຂົາເຈົ້າກໍຖືກໂຍນເຂົ້າໄປໃນເຕົາໄຟທີ່ຮ້ອນໆ. 22 ຍ້ອນກະສັດບໍ່ອີ່ຕົນ 3 ຄົນນີ້ແລະສັ່ງໃຫ້ເພີ່ມຄວາມຮ້ອນໃນເຕົາໄຟ ພວກທະຫານທີ່ຈັບຊາດຣາກ ເມຊາກ ແລະອາເບດເນໂກໂຍນເຂົ້າໄປໃນເຕົາໄຟຈຶ່ງຖືກຄວາມຮ້ອນຂອງແປວໄຟໄໝ້ຈົນຕາຍ. 23 ສ່ວນຊາດຣາກ ເມຊາກ ແລະອາເບດເນໂກທີ່ຖືກມັດຢູ່ກໍຕົກລົງໄປໃນເຕົາໄຟທີ່ຮ້ອນໆນັ້ນ.
24 ຫຼັງຈາກນັ້ນ ກະສັດເນບູກາດເນັດຊາກໍຢ້ານຫຼາຍ ລາວຈຶ່ງຟ້າວລຸກຂຶ້ນແລະເວົ້າກັບພວກຂ້າລາຊະການວ່າ: “ເຮົາມັດ 3 ຄົນນັ້ນແລະໂຍນເຂົ້າໄປໃນເຕົາໄຟຕົ໋ວ?” ເຂົາເຈົ້າຕອບວ່າ: “ແມ່ນແລ້ວກະສັດ.” 25 ກະສັດເວົ້າວ່າ: “ແຕ່ຂ້ອຍເຫັນມີ 4 ຄົນຍ່າງຢູ່ໃນໄຟ. ເຂົາເຈົ້າບໍ່ຖືກມັດແລະບໍ່ເປັນຫຍັງເລີຍ. ແລ້ວຜູ້ທີ 4 ເບິ່ງຄືກັບເປັນລູກຂອງພະເຈົ້າ.”
26 ເນບູກາດເນັດຊາເຂົ້າໄປໃກ້ປະຕູເຕົາໄຟທີ່ຮ້ອນໆນັ້ນແລະເວົ້າວ່າ: “ຊາດຣາກ ເມຊາກ ແລະອາເບດເນໂກ ຜູ້ຮັບໃຊ້ຂອງພະເຈົ້າສູງສຸດ+ ໃຫ້ພວກເຈົ້າອອກມາແມ້.” ແລ້ວ 3 ຄົນນີ້ກໍອອກມາຈາກເຕົາໄຟ. 27 ເຈົ້າແຂວງ ເຈົ້າເມືອງ ແລະພວກຂ້າລາຊະການຂອງກະສັດທີ່ລວມກັນຢູ່ຫັ້ນ+ກໍເຫັນວ່າໄຟບໍ່ໄດ້ໄໝ້ 3 ຄົນນັ້ນ+ ແມ່ນແຕ່ຜົມເສັ້ນໜຶ່ງກໍບໍ່ໄໝ້. ຜ້າພາດບ່າກໍຍັງຢູ່ຄືເກົ່າ ແລະກິ່ນຄວັນໄຟກໍບໍ່ໄດ້ຕິດໂຕເຂົາເຈົ້າເລີຍ.
28 ກະສັດເນບູກາດເນັດຊາຈຶ່ງປະກາດວ່າ: “ໃຫ້ສັນລະເສີນພະເຈົ້າຂອງຊາດຣາກ ເມຊາກ ແລະອາເບດເນໂກ.+ ເພິ່ນໄດ້ສົ່ງທູດສະຫວັນມາຊ່ວຍຊີວິດຜູ້ຮັບໃຊ້ຂອງເພິ່ນ. ເຂົາເຈົ້າເຊື່ອໝັ້ນໃນພະເຈົ້າຂອງເຂົາເຈົ້າແລະບໍ່ຍອມເຮັດຕາມຄຳສັ່ງຂອງກະສັດ. ເຂົາເຈົ້າຍອມຕາຍ ແທນທີ່ຈະນະມັດສະການພະເຈົ້າອື່ນທີ່ບໍ່ແມ່ນພະເຈົ້າຂອງໂຕເອງ.+ 29 ດັ່ງນັ້ນ ຂ້ອຍຂໍສັ່ງວ່າ ຖ້າຄົນໃນຊາດໃດຫຼືໃນພາສາໃດເວົ້າໃຫ້ພະເຈົ້າຂອງຊາດຣາກ ເມຊາກ ແລະອາເບດເນໂກ ລາວຈະຖືກຕັດເປັນຕ່ອນ ແລະເຮືອນຂອງລາວຈະກາຍເປັນຫ້ອງນ້ຳສາທາລະນະ* ຍ້ອນບໍ່ມີພະເຈົ້າອົງໃດສາມາດຊ່ວຍໃຫ້ລອດໄດ້ຄືກັບພະເຈົ້າອົງນີ້.”+
30 ຈາກນັ້ນ ກະສັດໄດ້ເລື່ອນຕຳແໜ່ງໃຫ້ຊາດຣາກ ເມຊາກ ແລະອາເບດເນໂກ. ລາວໃຫ້ເຂົາເຈົ້າມີອຳນາດຫຼາຍຂຶ້ນໃນແຂວງບາບີໂລນ.+
4 “ຕໍ່ໄປນີ້ແມ່ນຄຳເວົ້າຂອງກະສັດເນບູກາດເນັດຊາທີ່ສົ່ງມາຫາຄົນໃນທຸກຊາດແລະທຸກພາສາຢູ່ທົ່ວໂລກ. ຂໍໃຫ້ທຸກຄົນຢູ່ສຸກສະບາຍແລະຈະເລີນຮຸ່ງເຮືອງ. 2 ຂ້ອຍຢາກປະກາດເລື່ອງການອັດສະຈັນແລະປາຕິຫານທີ່ພະເຈົ້າສູງສຸດໄດ້ເຮັດຕໍ່ຂ້ອຍ. 3 ການອັດສະຈັນແລະປາຕິຫານທີ່ເພິ່ນເຮັດຍິ່ງໃຫຍ່ແທ້ໆ. ການປົກຄອງຂອງເພິ່ນຢູ່ຕະຫຼອດໄປທຸກຍຸກທຸກສະໄໝ.+
4 ຂ້ອຍເນບູກາດເນັດຊາຢູ່ຢ່າງສຸກສະບາຍແລະຈະເລີນຮຸ່ງເຮືອງໃນວັງຂອງຂ້ອຍ. 5 ຕອນທີ່ນອນຫຼັບຢູ່ຂ້ອຍໄດ້ຝັນ ແລະສິ່ງທີ່ຂ້ອຍເຫັນກໍເປັນຕາຢ້ານຫຼາຍ.+ 6 ຂ້ອຍຈຶ່ງສັ່ງໃຫ້ໄປເອີ້ນທີ່ປຶກສາທຸກຄົນໃນບາບີໂລນມາ ເພື່ອໃຫ້ເຂົາເຈົ້າແປຄວາມໝາຍຂອງຄວາມຝັນໃຫ້ຂ້ອຍ.+
7 ແລ້ວໝໍຄາຖາອາຄົມ ໝໍມໍ ແລະພວກການເດອາທີ່ທຳນາຍໂດຍເບິ່ງດວງດາວ+ກໍມາ. ຂ້ອຍເລົ່າຄວາມຝັນໃຫ້ເຂົາເຈົ້າຟັງ ແຕ່ເຂົາເຈົ້າແປຄວາມໝາຍບໍ່ໄດ້.+ 8 ໃນທີ່ສຸດ ດານີເອນກໍເຂົ້າມາ. ລາວມີອີກຊື່ໜຶ່ງວ່າເບນເຕຊັດຊາເຣ+ ເຊິ່ງຕັ້ງຕາມຊື່ພະເຈົ້າຂອງຂ້ອຍ.+ ລາວມີພະລັງອຳນາດຂອງພວກພະເຈົ້າທີ່ສັກສິດ.+ ຂ້ອຍເລົ່າຄວາມຝັນໃຫ້ລາວຟັງວ່າ:
9 ‘ເບນເຕຊັດຊາເຣຫົວໜ້າຂອງພວກໝໍຄາຖາອາຄົມ+ ຂ້ອຍຮູ້ດີວ່າເຈົ້າມີພະລັງອຳນາດຂອງພວກພະເຈົ້າຕ່າງໆ+ ແລະບໍ່ມີຄວາມລັບອັນໃດທີ່ຍາກໂພດສຳລັບເຈົ້າ.+ ໃຫ້ເຈົ້າບອກຄວາມໝາຍຂອງສິ່ງທີ່ຂ້ອຍເຫັນໃນຄວາມຝັນໃຫ້ຂ້ອຍຮູ້ແດ່.
10 ຕອນທີ່ນອນຫຼັບຢູ່ ຂ້ອຍຝັນເຫັນຕົ້ນໄມ້ຕົ້ນໜຶ່ງ+ຢູ່ກາງໂລກ. ມັນສູງຫຼາຍ.+ 11 ຕົ້ນໄມ້ນີ້ໃຫຍ່ຂຶ້ນແລະແຂງແຮງ. ປາຍມັນສູງຈົນຮອດຟ້າ ແລະຄົນຢູ່ທຸກຈອກທຸກແຈໃນໂລກກໍແນມເຫັນມັນ. 12 ໃບຂອງມັນງາມແລະໝາກກໍດົກ. ໝາກຂອງມັນເປັນອາຫານຂອງຄົນແລະສັດ. ສັດຕ່າງໆໄປອາໄສຢູ່ກ້ອງຮົ່ມຕົ້ນໄມ້ນັ້ນ ແລະນົກກໍໄປຈັບຢູ່ງ່າຂອງມັນ. ສິ່ງທີ່ມີຊີວິດທັງໝົດໄດ້ກິນໝາກຂອງຕົ້ນໄມ້ນັ້ນ.
13 ຕອນທີ່ຂ້ອຍຍັງຝັນຢູ່ ຂ້ອຍເຫັນຜູ້ສົ່ງຂ່າວ*ທີ່ບໍລິສຸດຜູ້ໜຶ່ງລົງມາຈາກສະຫວັນ.+ 14 ລາວຮ້ອງດັງໆວ່າ “ຕັດຕົ້ນໄມ້ນີ້ໃຫ້ລົ້ມລົງ+ ຕັດງ່າ ຕັດໃບ ແລະສັ່ນໃຫ້ໝາກມັນຕົກຊະໄປ. ສັດທີ່ຢູ່ກ້ອງຮົ່ມຂອງມັນກັບນົກທີ່ຈັບຢູ່ງ່າກໍຈະໜີໄປ. 15 ແຕ່ໃຫ້ຈົ່ງຕໍກັບຮາກຄາດິນໄວ້. ໃຫ້ເອົາປອກເຫຼັກກັບປອກທອງແດງມາຮັດໄວ້ ແລ້ວປະມັນໄວ້ຢູ່ທົ່ງຫຍ້າ. ໃຫ້ຕໍນັ້ນປຽກນ້ຳຄ້າງ. ໃຫ້ມັນຢູ່ກັບສັດປ່າແລະຢູ່ກັບຫຍ້າ.+ 16 ໃຫ້ໃຈຂອງມັນທີ່ເປັນໃຈຄົນປ່ຽນເປັນໃຈຂອງສັດປ່າ ແລະໃຫ້ເປັນແບບນີ້ 7 ປີ.*+ 17 ນີ້ເປັນຄຳຕັດສິນແລະຄຳສັ່ງຂອງຜູ້ສົ່ງຂ່າວ+ທີ່ບໍລິສຸດ ເພື່ອໃຫ້ທຸກຄົນຮູ້ວ່າພະເຈົ້າສູງສຸດເປັນຜູ້ປົກຄອງອານາຈັກຂອງມະນຸດ.+ ຖ້າເພິ່ນຕ້ອງການ ເພິ່ນຈະເອົາອຳນາດໃນການປົກຄອງໃຫ້ໃຜກໍໄດ້ ເຖິງວ່າຜູ້ນັ້ນຈະເປັນຄົນທີ່ຕ່ຳຕ້ອຍທີ່ສຸດ.”
18 ຂ້ອຍກະສັດເນບູກາດເນັດຊາຝັນແບບນີ້. ຕອນນີ້ ຂໍໃຫ້ເຈົ້າເບນເຕຊັດຊາເຣແປຄວາມຝັນໃຫ້ຂ້ອຍແດ່ ຍ້ອນວ່າທີ່ປຶກສາທຸກຄົນໃນອານາຈັກຂອງຂ້ອຍແປບໍ່ໄດ້.+ ແຕ່ເຈົ້າເຮັດໄດ້ ເພາະເຈົ້າມີພະລັງອຳນາດຂອງພວກພະເຈົ້າຕ່າງໆ.’
19 ດານີເອນທີ່ມີອີກຊື່ໜຶ່ງວ່າເບນເຕຊັດຊາເຣ+ຮູ້ສຶກຢ້ານແລະຊຶງຢູ່.
ກະສັດຈຶ່ງເວົ້າວ່າ ‘ເບນເຕຊັດຊາເຣ ຢ່າໃຫ້ຄວາມຝັນແລະຄວາມໝາຍຂອງຄວາມຝັນເຮັດໃຫ້ເຈົ້າຢ້ານ.’
ເບນເຕຊັດຊາເຣຈຶ່ງເວົ້າວ່າ ‘ກະສັດເອີ້ຍ ຂໍໃຫ້ຄວາມຝັນນີ້ເປັນເລື່ອງກ່ຽວກັບຄົນທີ່ຊັງທ່ານ ແລະຂໍໃຫ້ຄວາມໝາຍຂອງຄວາມຝັນເກີດຂຶ້ນກັບສັດຕູຂອງທ່ານ.
20 ຕົ້ນໄມ້ທີ່ທ່ານເຫັນ ມັນໃຫຍ່ແລະແຂງແຮງ ມີປາຍສູງຈົນຮອດຟ້າ ແລະຄົນຢູ່ທຸກຈອກທຸກແຈໃນໂລກກໍແນມເຫັນ.+ 21 ໃບມັນງາມແລະໝາກກໍດົກ. ໝາກຂອງມັນເປັນອາຫານຂອງຄົນແລະສັດ. ສັດຕ່າງໆໄປອາໄສຢູ່ກ້ອງຮົ່ມຕົ້ນໄມ້ນັ້ນ ແລະນົກກໍໄປຈັບຢູ່ງ່າຂອງມັນ.+ 22 ກະສັດເອີ້ຍ ຕົ້ນໄມ້ນັ້ນໝາຍເຖິງທ່ານ. ທ່ານຍິ່ງໃຫຍ່ແລະເຂັ້ມແຂງ. ຄວາມຍິ່ງໃຫຍ່ຂອງທ່ານສູງຈົນຮອດຟ້າ+ ແລະທ່ານປົກຄອງທົ່ວໂລກ.+
23 ກະສັດເຫັນຜູ້ສົ່ງຂ່າວທີ່ບໍລິສຸດຜູ້ໜຶ່ງ+ລົງມາຈາກສະຫວັນ. ລາວເວົ້າວ່າ: “ຕັດຕົ້ນໄມ້ນີ້ໃຫ້ລົ້ມລົງແລະທຳລາຍມັນ ແຕ່ໃຫ້ຈົ່ງຕໍກັບຮາກຄາດິນໄວ້. ໃຫ້ເອົາປອກເຫຼັກກັບປອກທອງແດງມາຮັດໄວ້ ແລ້ວປະມັນໄວ້ຢູ່ທົ່ງຫຍ້າ. ໃຫ້ຕໍນັ້ນປຽກນ້ຳຄ້າງ. ໃຫ້ມັນຢູ່ກັບສັດຈົນຮອດ 7 ປີ.”+ 24 ກະສັດ ຕໍ່ໄປນີ້ແມ່ນຄວາມໝາຍຂອງຄວາມຝັນ. ພະເຈົ້າສູງສຸດໄດ້ຕັດສິນແລ້ວວ່າສິ່ງນີ້ຈະຕ້ອງເກີດຂຶ້ນກັບທ່ານ. 25 ທ່ານຈະຖືກໄລ່ໜີບໍ່ໃຫ້ຢູ່ນຳຄົນ. ທ່ານຈະຢູ່ກັບສັດໃນທົ່ງຫຍ້າແລະກິນຫຍ້າຄືກັບງົວ. ຕົນໂຕທ່ານຈະປຽກແຕ່ນ້ຳຄ້າງ+ ແລະມັນຈະເປັນແບບນີ້ 7 ປີ+ ຈົນກວ່າທ່ານຈະສຳນຶກວ່າພະເຈົ້າສູງສຸດເປັນຜູ້ປົກຄອງອານາຈັກຂອງມະນຸດ ແລະເພິ່ນຈະເອົາອຳນາດການປົກຄອງໃຫ້ໃຜກໍໄດ້ຕາມທີ່ເພິ່ນຕ້ອງການ.+
26 ແຕ່ຜູ້ສົ່ງຂ່າວບອກໃຫ້ຈົ່ງຕໍກັບຮາກຂອງຕົ້ນໄມ້ໄວ້+ ນີ້ຈຶ່ງໝາຍຄວາມວ່າ ຫຼັງຈາກທີ່ກະສັດສຳນຶກວ່າພະເຈົ້າໃນສະຫວັນເປັນຜູ້ປົກຄອງທີ່ແທ້ຈິງ ທ່ານກໍຈະໄດ້ອານາຈັກຄືນມາ. 27 ດັ່ງນັ້ນ ຂໍໃຫ້ທ່ານຟັງສິ່ງທີ່ຂ້ອຍເວົ້າ. ຂໍໃຫ້ທ່ານເຊົາເຮັດຜິດ ແລ້ວປ່ຽນມາເຮັດສິ່ງທີ່ຖືກຕ້ອງ. ໃຫ້ເຊົາເຮັດຊົ່ວ ແລ້ວມາອີ່ຕົນຄົນທຸກ. ຖ້າເຮັດແບບນີ້ ຊີວິດຂອງທ່ານຊິຈະເລີນຮຸ່ງເຮືອງຕໍ່ໆໄປ.’”+
28 ເລື່ອງທັງໝົດນີ້ໄດ້ເກີດຂຶ້ນກັບກະສັດເນບູກາດເນັດຊາ.
29 ສິບສອງເດືອນຕໍ່ມາ ຕອນທີ່ກະສັດຍ່າງຢູ່ເທິງດາດຟ້າໃນວັງຂອງລາວຢູ່ບາບີໂລນ 30 ກະສັດເວົ້າວ່າ: “ຂ້ອຍນິແຫຼະເປັນຜູ້ສ້າງເມືອງບາບີໂລນທີ່ຍິ່ງໃຫຍ່ໃຫ້ເປັນວັງຂອງຂ້ອຍ. ຂ້ອຍສ້າງມັນດ້ວຍກຳລັງແລະອຳນາດຂອງຂ້ອຍເພື່ອຂ້ອຍຈະໄດ້ຮັບກຽດທີ່ຍິ່ງໃຫຍ່.”
31 ກະສັດເວົ້າຍັງບໍ່ທັນສຸດຄວາມກໍມີສຽງມາຈາກເທິງຟ້າວ່າ: “ກະສັດເນບູກາດເນັດຊາ ມີຄຳຕັດສິນຕໍ່ທ່ານວ່າ ‘ອານາຈັກຂອງທ່ານຈະຖືກຍຶດໄປຈາກທ່ານ+ 32 ແລະທ່ານຈະຖືກໄລ່ໜີບໍ່ໃຫ້ຢູ່ນຳຄົນ. ທ່ານຈະຢູ່ກັບສັດໃນທົ່ງຫຍ້າແລະກິນຫຍ້າຄືກັບງົວ. ມັນຈະເປັນແບບນີ້ 7 ປີ ຈົນກວ່າທ່ານຈະສຳນຶກວ່າພະເຈົ້າສູງສຸດເປັນຜູ້ປົກຄອງອານາຈັກຂອງມະນຸດ ແລະເພິ່ນຈະເອົາອຳນາດການປົກຄອງໃຫ້ໃຜກໍໄດ້ຕາມທີ່ເພິ່ນຕ້ອງການ.’”+
33 ໃນຕອນນັ້ນ ທຸກຢ່າງກໍເກີດຂຶ້ນແທ້ກັບກະສັດເນບູກາດເນັດຊາ. ລາວຖືກໄລ່ໜີບໍ່ໃຫ້ຢູ່ນຳຄົນ. ລາວກິນຫຍ້າຄືກັບງົວແລະຕົນໂຕຂອງລາວກໍປຽກແຕ່ນ້ຳຄ້າງ. ຜົມຂອງລາວຍາວຄືກັບຂົນຂອງນົກອິນຊີ ແລະເລັບຂອງລາວກໍຍາວຄືກັບເລັບຂອງນົກ.+
34 “ເມື່ອຮອດ 7 ປີແລ້ວ+ ຂ້ອຍເນບູກາດເນັດຊາໄດ້ແນມຂຶ້ນໄປເທິງຟ້າ ແລະສະຕິຂອງຂ້ອຍໄດ້ກັບມາເປັນຄືກັບຄົນປົກກະຕິ. ຂ້ອຍຈຶ່ງສັນລະເສີນແລະໃຫ້ກຽດພະເຈົ້າສູງສຸດຜູ້ທີ່ມີຊີວິດຢູ່ຕະຫຼອດໄປ ຍ້ອນການປົກຄອງຂອງເພິ່ນຢູ່ຕະຫຼອດໄປທຸກຍຸກທຸກສະໄໝ.+ 35 ຖ້າທຽບກັບພະເຈົ້າແລ້ວ ຄົນຢູ່ໃນໂລກກໍບໍ່ມີຄ່າຫຍັງ. ເພິ່ນເຮັດສິ່ງຕ່າງໆຕໍ່ກອງທັບໃນສະຫວັນແລະຕໍ່ມະນຸດທຸກຄົນໃນໂລກຕາມທີ່ເພິ່ນຕ້ອງການ. ບໍ່ມີໃຜຈະຂັດຂວາງ+ຫຼືເວົ້າໃຫ້ເພິ່ນໄດ້ວ່າ ‘ເປັນຫຍັງພະອົງຈຶ່ງເຮັດຈັ່ງຊີ້?’+
36 ເມື່ອສະຕິຂອງຂ້ອຍກັບຄືນມາຄືກັບຄົນປົກກະຕິແລ້ວ ຂ້ອຍກໍໄດ້ອານາຈັກກັບຄວາມງາມທຸກຢ່າງທີ່ຢູ່ຫັ້ນກັບຄືນມາ. ຂ້ອຍໄດ້ຮັບກຽດຕິຍົດແລະຄວາມນັບຖືອີກເທື່ອໜຶ່ງ.+ ພວກຂ້າລາຊະການແລະພວກຜູ້ປົກຄອງກໍມາຂໍຄຳແນະນຳຈາກຂ້ອຍຄືເກົ່າ. ຂ້ອຍໄດ້ເລີ່ມປົກຄອງໃໝ່ແລະໄດ້ຮັບກຽດຕິຍົດຫຼາຍກວ່າເກົ່າອີກ.
37 ຕອນນີ້ ຂ້ອຍເນບູກາດເນັດຊາ ຂໍຍົກຍ້ອງສັນລະເສີນແລະໃຫ້ກຽດກະສັດທີ່ຢູ່ໃນສະຫວັນ+ ຍ້ອນທຸກສິ່ງທີ່ເພິ່ນເຮັດຖືກຕ້ອງແລະຍຸຕິທຳ+ ແລະຍ້ອນເພິ່ນເຮັດໃຫ້ຄົນຍິ່ງຕ້ອງອັບອາຍຂາຍໜ້າ.”+
5 ໃນຕອນທີ່ເບນຊັດຊາເຣເປັນກະສັດ+ ລາວໄດ້ຈັດງານລ້ຽງໃຫຍ່ໃຫ້ພວກຜູ້ປົກຄອງຂອງລາວ 1.000 ຄົນ. ລາວນັ່ງຢູ່ຕໍ່ໜ້າເຂົາເຈົ້າແລະກິນເຫຼົ້າແວງນຳກັນກັບເຂົາເຈົ້າ.+ 2 ຕອນທີ່ເບນຊັດຊາເຣເມົາ ລາວໄດ້ສັ່ງໃຫ້ເອົາຈອກເງິນກັບຈອກຄຳທີ່ເນບູກາດເນັດຊາພໍ່*ຂອງລາວເອົາມາຈາກວິຫານໃນເມືອງເຢຣູຊາເລັມອອກມາ+ ເພື່ອໃຫ້ລາວກັບພວກຜູ້ປົກຄອງ ແລະໃຫ້ພວກເມຍກັບພວກເມຍນ້ອຍ*ຂອງລາວໃສ່ເຫຼົ້າແວງກິນ. 3 ແລ້ວເຂົາເຈົ້າກໍເອົາຈອກຄຳທີ່ເອົາມາຈາກວິຫານຂອງພະເຈົ້າຢູ່ເມືອງເຢຣູຊາເລັມອອກມາ. ກະສັດກັບພວກຜູ້ປົກຄອງແລະພວກເມຍກັບພວກເມຍນ້ອຍຂອງລາວກໍເອົາຈອກເຫຼົ່ານັ້ນມາໃສ່ເຫຼົ້າແວງກິນ. 4 ເຂົາເຈົ້າກິນເຫຼົ້າແວງແລ້ວພາກັນສັນລະເສີນພະເຈົ້າຂອງເຂົາເຈົ້າທີ່ເຮັດຈາກເງິນ ຄຳ ເຫຼັກ ທອງແດງ ໄມ້ ແລະຫີນ.
5 ທັນໃດນັ້ນກໍມີມືຄົນປາກົດຂຶ້ນມາ ແລ້ວມືນັ້ນກໍເລີ່ມຂຽນໂຕໜັງສືໃສ່ຝາໃນວັງຂອງກະສັດທີ່ມີຕະກຽງຕັ້ງຢູ່ໃກ້ໆ. ກະສັດເຫັນມືທີ່ກຳລັງຂຽນຢູ່ນັ້ນ 6 ແລ້ວກະສັດກໍຢ້ານຈົນໜ້າຈືດ* ແລະຂາກໍສັ່ນຈົນຢືນເກືອບບໍ່ໄດ້.+
7 ກະສັດໄດ້ຮ້ອງດັງໆສັ່ງພວກໝໍມໍກັບພວກການເດອາທີ່ທຳນາຍໂດຍເບິ່ງດວງດາວໃຫ້ມາຫາ.+ ກະສັດເວົ້າກັບພວກທີ່ປຶກສາຂອງບາບີໂລນວ່າ: “ຖ້າໃຜອ່ານແລະແປຄວາມໝາຍຂອງໂຕໜັງສືເຫຼົ່ານີ້ໄດ້ ຂ້ອຍຈະເອົາຊຸດສີມ່ວງ*ກັບສາຍຄໍຄຳໃຫ້ລາວໃສ່+ ແລະຈະໃຫ້ລາວເປັນຜູ້ປົກຄອງອັນດັບທີ 3 ຂອງອານາຈັກນີ້.”+
8 ພວກທີ່ປຶກສາທຸກຄົນກໍເຂົ້າມາເບິ່ງໂຕໜັງສືທີ່ຂຽນຢູ່ຝາ ແຕ່ເຂົາເຈົ້າກໍອ່ານແລະແປຄວາມໝາຍບໍ່ໄດ້.+ 9 ກະສັດເບນຊັດຊາເຣຢ້ານຫຼາຍຈົນໜ້າຈືດ ແລະພວກຜູ້ປົກຄອງກໍພາກັນສັບສົນວຸ່ນວາຍ.+
10 ເມື່ອລາຊີນີ*ຮູ້ວ່າກະສັດແລະພວກຜູ້ປົກຄອງກຳລັງເວົ້າເລື່ອງຫຍັງກັນ. ລາວກໍເຂົ້າມາໃນຫ້ອງທີ່ເຂົາເຈົ້າກິນລ້ຽງແລະເວົ້າວ່າ: “ຂໍໃຫ້ກະສັດມີອາຍຸຍືນຍາວ. ທ່ານບໍ່ຕ້ອງຢ້ານຈົນໜ້າຈືດ. 11 ໃນອານາຈັກຂອງທ່ານມີຜູ້ຊາຍ*ຄົນໜຶ່ງທີ່ມີພະລັງອຳນາດຂອງພວກພະເຈົ້າທີ່ສັກສິດ. ໃນສະໄໝທີ່ພໍ່ຂອງທ່ານປົກຄອງ ຫຼາຍຄົນຍອມຮັບວ່າຜູ້ຊາຍຄົນນີ້ມີຄວາມຮູ້ ຄວາມເຂົ້າໃຈ ແລະມີສະຕິປັນຍາຄືກັບພະເຈົ້າ.+ ກະສັດເນບູກາດເນັດຊາພໍ່ຂອງທ່ານໄດ້ແຕ່ງຕັ້ງລາວໃຫ້ເປັນຫົວໜ້າຂອງພວກໝໍຄາຖາອາຄົມ ພວກໝໍມໍ ແລະພວກການເດອາທີ່ທຳນາຍໂດຍເບິ່ງດວງດາວ.+ ພໍ່ຂອງທ່ານໄດ້ເຮັດແນວນັ້ນແທ້ໆ. 12 ຜູ້ນັ້ນແມ່ນດານີເອນທີ່ກະສັດເນບູກາດເນັດຊາໄດ້ຕັ້ງຊື່ໃຫ້ວ່າເບນເຕຊັດຊາເຣ.+ ລາວມີສະຕິປັນຍາແລະຄວາມສາມາດພິເສດ ມີຄວາມຮູ້ແລະຄວາມເຂົ້າໃຈທີ່ຈະແປຄວາມຝັນ ແກ້ຄຳປິດສະໜາ ແລະແກ້ຄຳທີ່ເປັນບັນຫາຍາກໆໄດ້.*+ ຕອນນີ້ ຂໍໃຫ້ທ່ານເອີ້ນດານີເອນມາ ແລ້ວລາວຈະແປຄວາມໝາຍຂອງໂຕໜັງສືເຫຼົ່ານີ້ໃຫ້ທ່ານ.”
13 ຈາກນັ້ນ ດານີເອນກໍຖືກພາມາຫາກະສັດ. ກະສັດຖາມລາວວ່າ: “ເຈົ້າແມ່ນດານີເອນຜູ້ທີ່ພໍ່ຂ້ອຍເຄີຍຈັບມາເປັນຊະເລີຍຈາກຢູດາແມ່ນບໍ?+ 14 ຂ້ອຍໄດ້ຍິນວ່າເຈົ້າມີພະລັງອຳນາດຂອງພວກພະເຈົ້າຕ່າງໆ+ ມີຄວາມຮູ້ ຄວາມເຂົ້າໃຈ ແລະມີສະຕິປັນຍາຫຼາຍ.+ 15 ພວກທີ່ປຶກສາກັບພວກໝໍມໍຖືກພາມາຫາຂ້ອຍ ເພື່ອຈະອ່ານແລະແປຄວາມໝາຍຂອງໂຕໜັງສືເຫຼົ່ານີ້ ແຕ່ເຂົາເຈົ້າເຮັດບໍ່ໄດ້.+ 16 ແຕ່ຂ້ອຍໄດ້ຍິນວ່າເຈົ້າສາມາດແປຄວາມໝາຍເລື່ອງທີ່ເປັນຄວາມລັບ+ແລະແກ້ຄຳທີ່ເປັນບັນຫາຍາກໆໄດ້. ຖ້າເຈົ້າອ່ານແລະແປຄວາມໝາຍຂອງໂຕໜັງສືເຫຼົ່ານີ້ໃຫ້ຂ້ອຍໄດ້ ຂ້ອຍຊິເອົາຊຸດສີມ່ວງກັບສາຍຄໍຄຳໃຫ້ເຈົ້າໃສ່ ແລະຈະໃຫ້ເຈົ້າເປັນຜູ້ປົກຄອງອັນດັບທີ 3 ຂອງອານາຈັກນີ້.+
17 ດານີເອນຕອບກະສັດວ່າ: “ຂໍໃຫ້ທ່ານເອົາຂອງຂວັນນັ້ນໄວ້ແລະເອົາໃຫ້ຄົນອື່ນ ແຕ່ຂ້ອຍຈະອ່ານແລະແປຄວາມໝາຍຂອງໂຕໜັງສືເຫຼົ່ານີ້ໃຫ້ທ່ານ. 18 ພະເຈົ້າສູງສຸດໄດ້ເອົາອານາຈັກນີ້ ຄວາມຍິ່ງໃຫຍ່ ກຽດຕິຍົດ ແລະຄວາມນັບຖືໃຫ້ກະສັດເນບູກາດເນັດຊາພໍ່ຂອງທ່ານ.+ 19 ເພິ່ນເຮັດໃຫ້ກະສັດເນບູກາດເນັດຊາຍິ່ງໃຫຍ່ ຄົນໃນທຸກຊາດແລະທຸກພາສາຈຶ່ງຢ້ານລາວຈົນໂຕສັ່ນ.+ ລາວຢາກຂ້າຜູ້ໃດລາວກໍຂ້າໂລດ ແລະຢາກໃຫ້ຜູ້ໃດມີຊີວິດຢູ່ ລາວກໍປ່ອຍໃຫ້ຜູ້ນັ້ນມີຊີວິດຕໍ່ໄປ. ລາວຢາກຍົກຍ້ອງຫຼືເຮັດໃຫ້ຜູ້ໃດຂາຍໜ້າ ລາວກໍເຮັດຕາມໃຈໂລດ.+ 20 ແຕ່ເມື່ອລາວຍິ່ງຈອງຫອງແລະບໍ່ຍອມຟັງໃຜຈົນເຮັດເກີນສິດ+ ບັນລັງແລະກຽດຕິຍົດຂອງກະສັດກໍຖືກຍຶດໄປຈາກລາວ. 21 ລາວຖືກໄລ່ໜີບໍ່ໃຫ້ຢູ່ນຳຄົນ. ໃຈຂອງລາວຖືກປ່ຽນໃຫ້ເປັນຄືກັບໃຈຂອງສັດປ່າ ແລະລາວຕ້ອງຢູ່ກັບຝູງລາປ່າ. ລາວກິນຫຍ້າຄືກັບງົວ ແລະຕົນໂຕລາວປຽກແຕ່ນ້ຳຄ້າງຈົນກວ່າລາວຈະສຳນຶກວ່າພະເຈົ້າສູງສຸດເປັນຜູ້ປົກຄອງອານາຈັກຂອງມະນຸດ ແລະເພິ່ນຢາກເອົາອຳນາດການປົກຄອງໃຫ້ຜູ້ໃດ ເພິ່ນກໍໃຫ້ໄດ້ຕາມທີ່ເພິ່ນຕ້ອງການ.+
22 ສ່ວນທ່ານເບນຊັດຊາເຣລູກຊາຍ*ຂອງເນບູກາດເນັດຊາ ເຖິງວ່າທ່ານຮູ້ເລື່ອງທັງໝົດນີ້ແລ້ວ ແຕ່ທ່ານກໍບໍ່ໄດ້ຖ່ອມໃຈ. 23 ທ່ານບໍ່ໃຫ້ກຽດພະເຈົ້າທີ່ຢູ່ໃນສະຫວັນ+ ແລະສັ່ງໃຫ້ເອົາຈອກຂອງເພິ່ນທີ່ຢູ່ໃນວິຫານອອກມາໃຊ້.+ ທ່ານກັບພວກຜູ້ປົກຄອງແລະພວກເມຍກັບພວກເມຍນ້ອຍຂອງທ່ານໄດ້ເອົາຈອກເຫຼົ່ານັ້ນມາໃສ່ເຫຼົ້າແວງກິນ ແລ້ວພາກັນສັນລະເສີນພະເຈົ້າທີ່ເຮັດຈາກເງິນ ຄຳ ເຫຼັກ ທອງແດງ ໄມ້ ແລະຫີນ. ພະເຈົ້າເຫຼົ່ານັ້ນບໍ່ເຫັນຫຍັງ ບໍ່ໄດ້ຍິນຫຍັງ ແລະບໍ່ຮູ້ຈັກຫຍັງ.+ ທ່ານບໍ່ໄດ້ໃຫ້ກຽດພະເຈົ້າຜູ້ທີ່ໃຫ້ຊີວິດທ່ານ+ ເຊິ່ງເປັນຜູ້ທີ່ມີອຳນາດຄວບຄຸມທຸກສິ່ງທີ່ທ່ານເຮັດ. 24 ພະເຈົ້າຈຶ່ງໃຫ້ມີມືມາຂຽນໂຕໜັງສືທີ່ທ່ານເຫັນຢູ່ຝາ.+ 25 ໂຕໜັງສືເຫຼົ່ານີ້ອ່ານວ່າ ເມເນ ເມເນ ເທເຄນ ແລະປາສິນ.
26 ຕໍ່ໄປນີ້ແມ່ນຄວາມໝາຍຂອງຄຳເຫຼົ່ານີ້. ຄຳວ່າ “ເມເນ” ໝາຍຄວາມວ່າພະເຈົ້າໄດ້ນັບມື້ທີ່ທ່ານຈະປົກຄອງແລະເພິ່ນໄດ້ເຮັດໃຫ້ມັນສິ້ນສຸດລົງແລ້ວ.+
27 ຄຳວ່າ “ເທເຄນ” ໝາຍຄວາມວ່າພະເຈົ້າໄດ້ຊັ່ງທ່ານຢູ່ເທິງຊິງແລ້ວ ແຕ່ນ້ຳໜັກຂອງທ່ານບໍ່ຮອດ.
28 ຄຳວ່າ “ເປເຣັດ”* ໝາຍຄວາມວ່າພະເຈົ້າໄດ້ແບ່ງແຍກອານາຈັກຂອງທ່ານ ແລະເອົາໃຫ້ຄົນເມເດຍແລະເປີເຊຍແລ້ວ.+
29 ຈາກນັ້ນ ເບນຊັດຊາເຣກໍສັ່ງໃຫ້ເອົາຊຸດສີມ່ວງກັບສາຍຄໍຄຳມາໃສ່ໃຫ້ດານີເອນ. ແລ້ວເຂົາເຈົ້າກໍປະກາດວ່າດານີເອນເປັນຜູ້ປົກຄອງອັນດັບທີ 3 ຂອງອານາຈັກນີ້.+
30 ໃນຄືນນັ້ນ ເບນຊັດຊາເຣກະສັດຂອງພວກການເດອາກໍຖືກຂ້າ.+ 31 ແລ້ວດາຣິອຸດ+ຄົນເມເດຍກໍຖືກແຕ່ງຕັ້ງໃຫ້ປົກຄອງອານາຈັກນີ້. ຕອນນັ້ນ ລາວອາຍຸປະມານ 62 ປີ.
6 ດາຣິອຸດໄດ້ແຕ່ງຕັ້ງເຈົ້າແຂວງ 120 ຄົນໃຫ້ປົກຄອງທົ່ວອານາຈັກຂອງລາວ.+ 2 ກະສັດຍັງໄດ້ແຕ່ງຕັ້ງຂ້າລາຊະການລະດັບສູງ 3 ຄົນໃຫ້ເບິ່ງແຍງວຽກຂອງພວກເຈົ້າແຂວງ+ເພື່ອກະສັດຈະບໍ່ເສຍຜົນປະໂຫຍດ. ດານີເອນເປັນ 1 ໃນ 3 ຄົນນັ້ນ.+ 3 ດານີເອນເດັ່ນກວ່າພວກຂ້າລາຊະການອີກ 2 ຄົນກັບພວກເຈົ້າແຂວງທຸກຄົນຍ້ອນລາວມີສະຕິປັນຍາແລະຄວາມສາມາດພິເສດ+ ກະສັດຈຶ່ງຄິດທີ່ຈະເລື່ອນຕຳແໜ່ງໃຫ້ລາວເບິ່ງແຍງທົ່ວອານາຈັກ.
4 ໃນຕອນນັ້ນ ພວກຂ້າລາຊະການລະດັບສູງແລະພວກເຈົ້າແຂວງຊອກເລື່ອງທີ່ຈະກ່າວຫາ*ດານີເອນກ່ຽວກັບໜ້າທີ່ຂອງລາວ ແຕ່ກໍບໍ່ເຫັນມີຈັກເລື່ອງເລີຍ ຍ້ອນລາວເປັນຄົນສັດຊື່ ບໍ່ມີຂໍ້ບົກພ່ອງໃນໜ້າທີ່ ແລະບໍ່ຮັບສິນບົນ. 5 ເຂົາເຈົ້າລົມກັນວ່າ: “ພວກເຮົາຄືຊິຊອກເລື່ອງກ່າວຫາລາວບໍ່ໄດ້ຈັກແນວ ນອກຈາກຈະໃຊ້ເລື່ອງສາສະໜາຂອງລາວ.”*+
6 ດັ່ງນັ້ນ ພວກຂ້າລາຊະການລະດັບສູງກັບພວກເຈົ້າແຂວງຈຶ່ງຟ້າວເຂົ້າໄປຫາກະສັດ ແລະເວົ້າວ່າ: “ກະສັດດາຣິອຸດ ຂໍໃຫ້ທ່ານມີອາຍຸຍືນຍາວ. 7 ພວກຂ້າລາຊະການ ເຈົ້າເມືອງ ເຈົ້າແຂວງ ຂ້າລາຊະການລະດັບສູງ ແລະພວກຜູ້ປົກຄອງໄດ້ປຶກສາແລະຕົກລົງກັນທີ່ຈະສະເໜີໃຫ້ກະສັດອອກກົດໝາຍວ່າ ຫ້າມບໍ່ໃຫ້ໃຜຂໍຫຍັງຈາກພະເຈົ້າອົງໃດຫຼືມະນຸດຄົນໃດ ແຕ່ໃຫ້ຂໍຈາກກະສັດເທົ່ານັ້ນ. ຄຳສັ່ງນີ້ຈະມີຜົນບັງຄັບໃຊ້ 30 ມື້. ຖ້າຜູ້ໃດບໍ່ເຮັດຕາມກໍຈະຖືກຖິ້ມລົງໃນຂຸມທີ່ມີໂຕສິງ.+ 8 ຕອນນີ້ ຂໍໃຫ້ກະສັດອອກຄຳສັ່ງແລະເຊັນໃສ່+ເພື່ອບໍ່ໃຫ້ຄຳສັ່ງນີ້ຖືກປ່ຽນແປງຫຼືຖືກຍົກເລີກ+ ຕາມທີ່ກົດໝາຍຂອງຄົນເມເດຍແລະເປີເຊຍບອກໄວ້.”
9 ກະສັດດາຣີອຸດຈຶ່ງເຊັນໃສ່ຄຳສັ່ງຫ້າມນັ້ນ.
10 ເມື່ອດານີເອນຮູ້ວ່າກະສັດໄດ້ອອກຄຳສັ່ງຫ້າມ ລາວກໍເມືອເຮືອນ ແລະຂຶ້ນໄປຫ້ອງທີ່ຢູ່ເທິງດາດຟ້າເຊິ່ງມີປ່ອງຢ້ຽມທີ່ເປີດຢູ່. ປ່ອງຢ້ຽມນັ້ນປິ່ນໄປທາງເມືອງເຢຣູຊາເລັມ.+ ລາວຄູ້ເຂົ່າລົງອະທິດຖານແລະສັນລະເສີນພະເຈົ້າຂອງລາວ. ກ່ອນຈະມີຄຳສັ່ງອອກມາ ດານີເອນກໍອະທິດຖານແບບນີ້ມື້ລະ 3 ເທື່ອຢູ່ແລ້ວ. 11 ຕອນທີ່ລາວກຳລັງອະທິດຖານແລະອ້ອນວອນຫາພະເຈົ້າ ພວກນັ້ນກໍພາກັນໂຫ່ເຂົ້າມາ.
12 ຈາກນັ້ນ ເຂົາເຈົ້າກໍໄປຫາກະສັດແລະຖາມຄືນວ່າ: “ກະສັດໄດ້ເຊັນຄຳສັ່ງທີ່ວ່າ ຫ້າມບໍ່ໃຫ້ໃຜຂໍຫຍັງຈາກພະເຈົ້າອົງໃດຫຼືມະນຸດຄົນໃດ ແຕ່ໃຫ້ຂໍຈາກກະສັດເທົ່ານັ້ນ. ຄຳສັ່ງນີ້ຈະມີຜົນບັງຄັບໃຊ້ 30 ມື້ແມ່ນບໍ? ແລະຖ້າຜູ້ໃດບໍ່ເຮັດຕາມກໍຈະຖືກຖິ້ມລົງໃນຂຸມທີ່ມີໂຕສິງແມ່ນບໍ?” ກະສັດຕອບວ່າ “ແມ່ນແລ້ວ ຄຳສັ່ງນັ້ນປ່ຽນແປງແລະຍົກເລີກບໍ່ໄດ້ ຕາມກົດໝາຍຂອງຄົນເມເດຍແລະເປີເຊຍ.”+ 13 ເຂົາເຈົ້າຈຶ່ງຟ້າວບອກກະສັດວ່າ: “ກະສັດເອີ້ຍ ດານີເອນຊະເລີຍຈາກຢູດາຫັ້ນນະ.+ ລາວບໍ່ນັບຖືກະສັດແລະບໍ່ເຮັດຕາມຄຳສັ່ງທີ່ທ່ານໄດ້ເຊັນ. ລາວຍັງອະທິດຖານມື້ລະ 3 ເທື່ອຄືເກົ່າ.”+ 14 ເມື່ອກະສັດໄດ້ຍິນແບບນັ້ນລາວກໍອຸກໃຈຫຼາຍ ແລະພະຍາຍາມຊອກທຸກວິທີຈົນຮອດຄ່ຳເພື່ອຈະຊ່ວຍຊີວິດດານີເອນ. 15 ຕໍ່ມາ ພວກນັ້ນກໍເຂົ້າໄປຫາກະສັດແລະເວົ້າວ່າ: “ກະສັດ ທ່ານກໍຮູ້ວ່າຕາມກົດໝາຍຂອງຄົນເມເດຍແລະເປີເຊຍ ຄຳສັ່ງໃດກໍຕາມທີ່ກະສັດເຊັນແລ້ວຈະປ່ຽນແປງບໍ່ໄດ້.”+
16 ໃນທີ່ສຸດ ກະສັດກໍຈຳໃຈສັ່ງໃຫ້ຄົນເອົາດານີເອນໄປຖິ້ມລົງໃນຂຸມທີ່ມີໂຕສິງ.+ ກະສັດເວົ້າກັບດານີເອນວ່າ: “ຂໍໃຫ້ພະເຈົ້າທີ່ເຈົ້ານະມັດສະການມາຕະຫຼອດປົກປ້ອງເຈົ້າເດີ້.” 17 ຈາກນັ້ນ ເຂົາເຈົ້າກໍເອົາຫີນອັດປາກຂຸມໄວ້ ແລະກະສັດກັບພວກຜູ້ປົກຄອງກໍເອົາແຫວນຈ້ຳກາຂອງເຂົາເຈົ້າຈ້ຳໃສ່ຫີນນັ້ນ ເພື່ອບໍ່ໃຫ້ມີຫຍັງປ່ຽນແປງກ່ຽວກັບຄຳສັ່ງເລື່ອງດານີເອນ.
18 ແລ້ວກະສັດກໍກັບໄປວັງຂອງໂຕເອງ. ລາວບໍ່ກິນເຂົ້າແລະບໍ່ໃຫ້ຄົນມາຫຼິ້ນດົນຕີໃຫ້ຟັງຫຼືຟ້ອນໃຫ້ເບິ່ງ. ລາວນອນບໍ່ຫຼັບໝົດຄືນ. 19 ຕອນໃກ້ຊິແຈ້ງ ລາວກໍຟ້າວລຸກຂຶ້ນແລະໄປບ່ອນທີ່ມີຂຸມໂຕສິງ. 20 ຕອນທີ່ກະສັດເຂົ້າໄປໃກ້ຊິຮອດຂຸມ ລາວຮ້ອງຖາມດານີເອນດ້ວຍສຽງເສົ້າໆວ່າ: “ດານີເອນຜູ້ຮັບໃຊ້ຂອງພະເຈົ້າຜູ້ທີ່ມີຊີວິດຢູ່ ພະເຈົ້າທີ່ເຈົ້ານະມັດສະການມາຕະຫຼອດຊ່ວຍເຈົ້າໃຫ້ລອດຈາກໂຕສິງໄດ້ບໍ່?” 21 ແລ້ວດານີເອນກໍຕອບກະສັດທັນທີວ່າ: “ກະສັດ ຂໍໃຫ້ທ່ານມີອາຍຸຍືນຍາວ. 22 ພະເຈົ້າຂອງຂ້ອຍໄດ້ສົ່ງທູດສະຫວັນຂອງເພິ່ນມາອັດປາກໂຕສິງໄວ້+ ພວກມັນຈຶ່ງບໍ່ໄດ້ເຮັດຫຍັງໃຫ້ຂ້ອຍ+ ຍ້ອນພະເຈົ້າເຫັນວ່າຂ້ອຍບໍ່ມີຄວາມຜິດ ແລະຂ້ອຍກໍບໍ່ໄດ້ເຮັດຫຍັງຜິດຕໍ່ກະສັດຄືກັນ.”
23 ກະສັດດີໃຈຫຼາຍ ແລ້ວລາວກໍສັ່ງໃຫ້ຄົນເອົາດານີເອນຂຶ້ນມາຈາກຂຸມ. ເມື່ອດານີເອນຂຶ້ນມາກໍເຫັນວ່າຕົນໂຕລາວບໍ່ມີຮອຍຂູດຫຍັງເລີຍ. ລາວບໍ່ເປັນຫຍັງກໍຍ້ອນລາວໄວ້ວາງໃຈພະເຈົ້າຂອງລາວ.+
24 ຈາກນັ້ນ ກະສັດໄດ້ສັ່ງໃຫ້ເອົາພວກທີ່ກ່າວຫາດານີເອນກັບລູກກັບເມຍຂອງເຂົາເຈົ້າຖິ້ມລົງໃນຂຸມນັ້ນທີ່ມີໂຕສິງຢູ່. ເຂົາເຈົ້າຍັງບໍ່ທັນຕົກຮອດພື້ນຊ້ຳ ໂຕສິງກໍໂດດຄຸບເຂົາເຈົ້າຈົນກະດູກຫັກເປັນທ່ອນ.+
25 ກະສັດດາຣິອຸດໄດ້ຂຽນແຈ້ງການແລະສົ່ງໄປຫາຄົນໃນທຸກຊາດແລະທຸກພາສາຢູ່ທົ່ວໂລກວ່າ:+ “ຂໍໃຫ້ທຸກຄົນຢູ່ສຸກສະບາຍແລະຈະເລີນຮຸ່ງເຮືອງ! 26 ຂ້ອຍຂໍອອກຄຳສັ່ງໃຫ້ປະຊາຊົນຢູ່ທຸກເຂດໃນອານາຈັກຂອງຂ້ອຍວ່າ ໃຫ້ຢ້ານຢຳແລະນັບຖືພະເຈົ້າຂອງດານີເອນ.+ ເພິ່ນເປັນພະເຈົ້າທີ່ມີຊີວິດຢູ່ຕະຫຼອດໄປ. ການປົກຄອງຂອງເພິ່ນຈະບໍ່ຖືກໂຄ່ນລົ້ມ ແລະເພິ່ນມີສິດປົກຄອງຕະຫຼອດໄປທຸກຍຸກທຸກສະໄໝ.+ 27 ເພິ່ນປົກປ້ອງ+ແລະຊ່ວຍປະຊາຊົນຂອງເພິ່ນໃຫ້ລອດ. ເພິ່ນເຮັດການອັດສະຈັນແລະປາຕິຫານຢູ່ໃນສະຫວັນແລະຢູ່ໃນໂລກ.+ ເພິ່ນຍັງໄດ້ຊ່ວຍດານີເອນໃຫ້ລອດຈາກເລັບສິງ.”
28 ດານີເອນຈະເລີນກ້າວໜ້າໃນອານາຈັກຂອງດາຣິອຸດ+ ແລະໃນອານາຈັກຂອງໄຊຣັດຄົນເປີເຊຍ.+
7 ໃນປີທຳອິດທີ່ເບນຊັດຊາເຣເປັນກະສັດ+ປົກຄອງບາບີໂລນ ດານີເອນໄດ້ເຫັນນິມິດໃນຄວາມຝັນຕອນທີ່ລາວນອນຫຼັບຢູ່.+ ຈາກນັ້ນ ລາວກໍຂຽນເລື່ອງທັງໝົດນີ້ໄວ້.+ 2 ດານີເອນເລົ່າວ່າ:
“ໃນຕອນກາງຄືນຂ້ອຍໄດ້ເຫັນນິມິດ. ໃນນິມິດນັ້ນ ມີລົມພັດມາຈາກ 4 ທິດເຊິ່ງເຮັດໃຫ້ທະເລປັ່ນປ່ວນ.+ 3 ແລ້ວກໍມີສັດຮ້າຍທີ່ໃຫຍ່ໆ 4 ໂຕ+ຂຶ້ນມາຈາກທະເລ ແຕ່ລະໂຕບໍ່ຄືກັນ.
4 ສັດຮ້າຍໂຕທຳອິດມີຮູບຮ່າງຄືກັບສິງ+ ແລະມີປີກນົກອິນຊີ.+ ຂ້ອຍແນມເບິ່ງຈົນຮອດຕອນທີ່ປີກຂອງມັນຖືກດຶງອອກ. ມັນຖືກຍົກຂຶ້ນໃຫ້ຢືນ 2 ຂາຄືກັບຄົນ ແລະໃຈຂອງມັນຖືກປ່ຽນໃຫ້ເປັນໃຈຂອງຄົນ.
5 ສັດຮ້າຍໂຕທີ 2 ມີຮູບຮ່າງຄືກັບໝີ.+ ມັນຍົກຂາຂຶ້ນເບື້ອງໜຶ່ງ ແລະຄາບກະດູກຂ້າງຕ່ອນໜຶ່ງທີ່ມີ 3 ດູກຕິດກັນ. ມີສຽງບອກມັນວ່າ ‘ລຸກຂຶ້ນແລະກິນຊີ້ນໃຫ້ຫຼາຍໆໂລດ!’+
6 ຕໍ່ມາ ຂ້ອຍກໍເຫັນສັດຮ້າຍອີກໂຕໜຶ່ງມີຮູບຮ່າງຄືກັບເສືອດາວ.+ ມັນມີ 4 ຫົວ+ ແລະຢູ່ຫຼັງຂອງມັນມີປີກນົກ 4 ປີກ. ມັນໄດ້ຮັບອຳນາດໃຫ້ປົກຄອງ.
7 ໃນຄືນນັ້ນ ຂ້ອຍຍັງເຫັນນິມິດຕໍ່ອີກ. ຂ້ອຍເຫັນສັດຮ້າຍໂຕທີ 4. ມັນເປັນຕາຢ້ານ ໂຫດຮ້າຍ ແລະແຂງແຮງຫຼາຍ. ແຂ້ວຂອງມັນໃຫຍ່ແລະເປັນເຫຼັກ. ມັນທຳລາຍທຸກຢ່າງທີ່ຂວາງທາງມັນ ແລະອັນໃດທີ່ເຫຼືອມັນກໍຢຽບຈົນມຸ່ນ.+ ມັນມີເຂົາ 10 ເຂົາ. ສັດໂຕນີ້ຕ່າງຈາກສັດໂຕອື່ນໆທີ່ຂຶ້ນມາກ່ອນໜ້າມັນ. 8 ຕອນທີ່ຂ້ອຍກຳລັງແນມເບິ່ງເຂົາ 10 ເຂົານັ້ນກໍມີເຂົານ້ອຍໆອີກເຂົາໜຶ່ງ+ປົ່ງຂຶ້ນມາ. ມັນເຮັດໃຫ້ 3 ເຂົາໃນ 10 ເຂົານັ້ນຫຼຸດອອກ. ເຂົານ້ອຍໆນີ້ມີຕາຄືກັບຕາຄົນ ແລະມີປາກທີ່ເວົ້າອວດອົ່ງ.*+
9 ຕອນທີ່ຂ້ອຍເບິ່ງຢູ່ກໍມີການຕັ້ງບັນລັງຫຼາຍອັນຂຶ້ນ ແລະຜູ້ທີ່ມີຊີວິດຢູ່ແຕ່ດຶກດຳບັນ+ກໍນັ່ງຢູ່ເທິງບັນລັງຂອງເພິ່ນ.+ ເຄື່ອງນຸ່ງຂອງເພິ່ນຂາວຄືກັບຫິມະ+ ແລະຜົມຂອງເພິ່ນຂາວຄືກັບຂົນແກະທີ່ສະອາດ. ບັນລັງຂອງເພິ່ນເປັນຄືກັບແປວໄຟ ແລະກົງລໍ້ຂອງບັນລັງກໍມີໄຟລຸກຢູ່.+ 10 ມີໄຟເປັນສາຍໄຫຼອອກມາຈາກບັນລັງນັ້ນ+ ມີທູດສະຫວັນຫຼາຍພັນອົງຮັບໃຊ້ເພິ່ນ ແລະມີຫຼາຍລ້ານອົງຢືນຢູ່ຕໍ່ໜ້າເພິ່ນ.+ ສານ*+ເລີ່ມພິຈາລະນາຄະດີ ແລະປຶ້ມຫຼາຍຫົວກໍຖືກເປີດອອກ.
11 ຂ້ອຍແນມເບິ່ງຕໍ່ຍ້ອນໄດ້ຍິນສຽງເຂົານ້ອຍໆນັ້ນເວົ້າອວດອົ່ງ.+ ຂ້ອຍເບິ່ງຈົນຮອດຕອນທີ່ສັດຮ້າຍໂຕນັ້ນຖືກຂ້າ ແລະຖືກໂຍນເຂົ້າໄປໃນກອງໄຟຈົນບໍ່ເຫຼືອຫຍັງ. 12 ສ່ວນສັດຮ້າຍໂຕອື່ນໆ+ກໍໝົດອຳນາດໃນການປົກຄອງ ແຕ່ພວກມັນຍັງມີຊີວິດຢູ່ຕໍ່ໄປອີກໄລຍະໜຶ່ງ.
13 ເມື່ອຂ້ອຍເບິ່ງນິມິດຕໍ່ໄປໃນຄືນນັ້ນ ຂ້ອຍເຫັນຜູ້ໜຶ່ງທີ່ຄືກັບລູກມະນຸດ+ມາເທິງຂີ້ເຝື້ອ. ລາວໄດ້ຮັບອະນຸຍາດໃຫ້ເຂົ້າໄປຫາຜູ້ທີ່ມີຊີວິດຢູ່ແຕ່ດຶກດຳບັນ+ ແລະຖືກພາເຂົ້າໄປໃກ້ໆເພິ່ນ. 14 ລາວໄດ້ຮັບກຽດຕິຍົດ+ແລະອຳນາດໃນການປົກຄອງເປັນກະສັດ+ເພື່ອຄົນຈາກທຸກຊາດແລະທຸກພາສາຈະຮັບໃຊ້ລາວ.+ ການປົກຄອງຂອງລາວຈະຢູ່ຕະຫຼອດໄປ ແລະຈະບໍ່ຖືກໂຄ່ນລົ້ມຈັກເທື່ອ.+
15 ເມື່ອເຫັນນິມິດທັງໝົດນີ້ ຂ້ອຍດານີເອນກໍວຸ່ນວາຍໃຈຫຼາຍ ຍ້ອນສິ່ງນີ້ເຮັດໃຫ້ຂ້ອຍຢ້ານ.+ 16 ຂ້ອຍຈຶ່ງເຂົ້າໄປຫາທູດສະຫວັນອົງໜຶ່ງທີ່ຢືນຢູ່ຫັ້ນ ເພື່ອຖາມລາວວ່ານິມິດນີ້ມີຄວາມໝາຍແນວໃດແທ້ໆ. ລາວໄດ້ອະທິບາຍໃຫ້ຂ້ອຍຮູ້ຄວາມໝາຍຂອງສິ່ງເຫຼົ່ານັ້ນ.
17 ລາວບອກວ່າ ‘ສັດຮ້າຍທີ່ໃຫຍ່ໆ 4 ໂຕນີ້+ ໝາຍເຖິງກະສັດ 4 ອົງທີ່ຈະປົກຄອງຢູ່ໃນໂລກ.+ 18 ພວກທີ່ພະເຈົ້າສູງສຸດເລືອກໄວ້+ຈະໄດ້ຮັບອຳນາດການປົກຄອງ+ ແລະເຂົາເຈົ້າຈະປົກຄອງເປັນກະສັດ+ຕະຫຼອດໄປບໍ່ມີມື້ສິ້ນສຸດ.’
19 ຂ້ອຍຢາກຮູ້ຕື່ມອີກກ່ຽວກັບສັດຮ້າຍໂຕທີ 4 ທີ່ຕ່າງຈາກສັດຮ້າຍໂຕອື່ນໆ. ມັນເປັນຕາຢ້ານຫຼາຍ. ແຂ້ວຂອງມັນເປັນເຫຼັກແລະເລັບຂອງມັນເປັນທອງແດງ. ມັນກິນແລະທຳລາຍທຸກຢ່າງທີ່ຂວາງທາງມັນ ແລະອັນໃດທີ່ເຫຼືອມັນກໍຢຽບຈົນມຸ່ນ.+ 20 ຂ້ອຍຍັງຢາກຮູ້ກ່ຽວກັບເຂົາ 10 ເຂົາ+ທີ່ຢູ່ຫົວຂອງສັດຮ້າຍໂຕນັ້ນນຳ ແລະຢາກຮູ້ກ່ຽວກັບເຂົາອີກເຂົາໜຶ່ງທີ່ປົ່ງຂຶ້ນມາໃນ 10 ເຂົານັ້ນເຊິ່ງເຮັດໃຫ້ 3 ເຂົາຫຼຸດອອກ.+ ມັນມີຕາແລະມີປາກທີ່ເວົ້າອວດອົ່ງ. ເຂົານີ້ໃຫຍ່ກວ່າເຂົາອື່ນໆ.
21 ຕອນທີ່ຂ້ອຍເບິ່ງນິມິດ ຂ້ອຍເຫັນເຂົານ້ອຍໆນັ້ນເຮັດສົງຄາມກັບພວກທີ່ຖືກເລືອກ ແລະມັນກຳລັງຊະນະເຂົາເຈົ້າຢູ່+ 22 ຈົນຮອດຕອນທີ່ຜູ້ທີ່ມີຊີວິດຢູ່ແຕ່ດຶກດຳບັນທີ່ເປັນພະເຈົ້າສູງສຸດ+ມາ. ເພິ່ນໄດ້ຕັດສິນຄະດີໃຫ້ພວກທີ່ເພິ່ນເລືອກເປັນຝ່າຍຊະນະ+ ແລະຕອນນັ້ນກໍຮອດເວລາທີ່ພວກທີ່ຖືກເລືອກເລີ່ມປົກຄອງເປັນກະສັດ.+
23 ທູດສະຫວັນອະທິບາຍວ່າ ‘ສັດຮ້າຍໂຕທີ 4 ແມ່ນອານາຈັກທີ 4 ທີ່ຈະປົກຄອງໂລກ. ມັນຈະບໍ່ຄືກັບອານາຈັກອື່ນໆ. ມັນຈະກິນແລະທຳລາຍທຸກຢ່າງໃນໂລກນີ້ ແລະອັນໃດທີ່ເຫຼືອມັນກໍຈະຢຽບຈົນມຸ່ນ.+ 24 ເຂົາ 10 ເຂົາໝາຍເຖິງກະສັດ 10 ອົງທີ່ຈະປົກຄອງອານາຈັກນັ້ນ ແລະຈະມີກະສັດອີກອົງໜຶ່ງປົກຄອງນຳຫຼັງເຂົາເຈົ້າ. ລາວຈະບໍ່ຄືກັບກະສັດ 10 ອົງນັ້ນ ແລະລາວຈະຍຶດເອົາອຳນາດຂອງກະສັດ 3 ອົງ.+ 25 ລາວຈະເວົ້າຕໍ່ຕ້ານພະເຈົ້າສູງສຸດ+ ແລະຈະຂົ່ມເຫງພວກທີ່ຖືກເລືອກຂອງພະເຈົ້າສູງສຸດຕໍ່ໆໄປ. ລາວຈະພະຍາຍາມປ່ຽນເວລາກຳນົດແລະກົດໝາຍຂອງເພິ່ນ ແລະພວກທີ່ຖືກເລືອກຈະຕົກຢູ່ໃນມືລາວເປັນເວລາ 3 ປີເຄິ່ງ.*+ 26 ແຕ່ສານເລີ່ມຕັດສິນຄະດີແລະຍຶດເອົາການປົກຄອງຂອງລາວໄປ ແລ້ວລາວກໍຖືກທຳລາຍຈົນບໍ່ເຫຼືອຫຍັງ.+
27 ຈາກນັ້ນ ພວກທີ່ພະເຈົ້າສູງສຸດເລືອກໄວ້ກໍໄດ້ຮັບອຳນາດໃນການປົກຄອງເປັນກະສັດ ແລະໄດ້ຮັບຄວາມຍິ່ງໃຫຍ່ຂອງອານາຈັກຕ່າງໆທີ່ຢູ່ໃນໂລກ.+ ການປົກຄອງຂອງເຂົາເຈົ້າຈະຢູ່ຕະຫຼອດໄປ+ ແລະຊາດຕ່າງໆຈະຮັບໃຊ້ແລະເຊື່ອຟັງເຂົາເຈົ້າ.’
28 ນິມິດທີ່ຂ້ອຍເຫັນຈົບແບບນີ້. ສ່ວນຂ້ອຍດານີເອນ ເມື່ອຄິດເຖິງເລື່ອງນີ້ ຂ້ອຍກໍຢ້ານຈົນໜ້າຈືດ ແຕ່ຂ້ອຍກໍເກັບເລື່ອງນີ້ໄວ້ໃນໃຈ.”
8 ໃນປີທີ 3 ທີ່ເບນຊັດຊາເຣປົກຄອງເປັນກະສັດ+ ຂ້ອຍດານີເອນໄດ້ເຫັນນິມິດອີກເລື່ອງໜຶ່ງ.+ 2 ຕອນນັ້ນ ຂ້ອຍຢູ່ວັງໃນເມືອງຊູຊາ+ໃນແຂວງເອລາມ.+ ຂ້ອຍເຫັນນິມິດນີ້ໃກ້ກັບແມ່ນ້ຳ*ອູລາຍ. 3 ຕອນທີ່ແນມເບິ່ງ ຂ້ອຍເຫັນແກະໂຕຜູ້ໂຕໜຶ່ງ+ຢືນຢູ່ໃກ້ແມ່ນ້ຳນັ້ນ. ແກະໂຕນັ້ນມີເຂົາ 2 ເຂົາ+ທີ່ຍາວ ແຕ່ເຂົາໜຶ່ງຍາວກວ່າອີກເຂົາໜຶ່ງ. ເຂົາທີ່ຍາວກວ່າປົ່ງຂຶ້ນມານຳຫຼັງ.+ 4 ຂ້ອຍເຫັນແກະໂຕນັ້ນໂຈມຕີສັດຕູຢູ່ທາງທິດຕາເວັນຕົກ ທິດເໜືອ ແລະທິດໃຕ້. ສັດປ່າໂຕໃດກໍສູ້ມັນບໍ່ໄດ້ ແລະບໍ່ມີຜູ້ໃດຊ່ວຍສັດເຫຼົ່ານີ້ໃຫ້ລອດຈາກມັນໄດ້.+ ມັນເຮັດຕາມໃຈໂຕເອງແລະຕັ້ງໂຕເປັນໃຫຍ່.
5 ຕອນທີ່ຂ້ອຍແນມເບິ່ງຢູ່ກໍມີແບ້ໂຕຜູ້ໂຕໜຶ່ງ+ແລ່ນຂ້າມໂລກມາຈາກທາງທິດຕາເວັນຕົກ. ມັນແລ່ນມາບັກໄວໆຈົນຕີນຂອງມັນບໍ່ຖືກພື້ນເລີຍ. ມັນມີເຂົາໃຫຍ່ອັນໜຶ່ງຢູ່ລະຫວ່າງຕາ 2 ເບື້ອງ.+ 6 ແບ້ໂຕນີ້ແລ່ນໄປທາງແກະໂຕຜູ້ທີ່ມີ 2 ເຂົາທີ່ຂ້ອຍເຫັນຢືນຢູ່ໃກ້ກັບແມ່ນ້ຳອູລາຍ. ມັນແລ່ນມາແບບໃຈຮ້າຍຫຼາຍ.
7 ຂ້ອຍເຫັນມັນແລ່ນໃສ່ແກະໂຕຜູ້ດ້ວຍຄວາມໃຈຮ້າຍຫຼາຍ. ມັນຊົນແກະຈົນເຂົາທັງ 2 ເບື້ອງຂອງແກະຫັກ ແລະແກະໂຕນັ້ນກໍບໍ່ມີແຮງທີ່ຈະສູ້ມັນໄດ້. ມັນຊົນແກະລົ້ມລົງພື້ນ ແລ້ວຢຽບໄປຢຽບມາ. ບໍ່ມີໃຜຊ່ວຍແກະໂຕນັ້ນໃຫ້ລອດຈາກມັນໄດ້.
8 ຈາກນັ້ນ ແບ້ໂຕຜູ້ໂຕນັ້ນກໍຕັ້ງໂຕເປັນໃຫຍ່. ແຕ່ເມື່ອມັນມີອຳນາດ ເຂົາໃຫຍ່ໆຂອງມັນກໍຫັກ ແລ້ວກໍມີເຂົາໃຫຍ່ໆ 4 ເຂົາປົ່ງຂຶ້ນມາແທນແລະຊີ້ໄປ 4 ທິດ.+
9 ຕໍ່ມາ ມີເຂົານ້ອຍໆອັນໜຶ່ງປົ່ງອອກມາຈາກ 1 ໃນ 4 ເຂົານັ້ນ. ເຂົານີ້ໃຫຍ່ອອກໄປທາງທິດໃຕ້ ທິດຕາເວັນອອກ ແລະທາງແຜ່ນດິນທີ່ສວຍງາມ.*+ 10 ເຂົານີ້ໃຫຍ່ຂຶ້ນຈົນຮອດກອງທັບທີ່ຢູ່ເທິງຟ້າ.* ມັນເຮັດໃຫ້ບາງສ່ວນຂອງກອງທັບນີ້ກັບດາວບາງດວງຕົກລົງມາໃນໂລກ ແລ້ວກໍຢຽບຈົນມຸ່ນ. 11 ມັນເຖິງຂັ້ນທ້າທາຍຫົວໜ້າຂອງກອງທັບນີ້ ແລະເຮັດໃຫ້ການເຜົາເຄື່ອງບູຊາໃຫ້ເພິ່ນໃນແຕ່ລະມື້ຢຸດລົງ. ມັນຍັງມ້າງບ່ອນບໍລິສຸດຂອງເພິ່ນທີ່ຖືກສ້າງຢ່າງດີຖິ້ມ.+ 12 ຍ້ອນມັນເຮັດຜິດ ມັນຈຶ່ງຍຶດເອົາກອງທັບກັບເຄື່ອງບູຊາທີ່ເຜົາເປັນປະຈຳໄດ້. ມັນຖິ້ມທຸກສິ່ງທີ່ກ່ຽວຂ້ອງກັບຄວາມຈິງລົງພື້ນຕໍ່ໆໄປ ແລະມັນກໍເຮັດໄດ້ສຳເລັດ.
13 ຂ້ອຍໄດ້ຍິນທູດສະຫວັນອົງໜຶ່ງເວົ້າ ແລະທູດສະຫວັນອີກອົງໜຶ່ງຖາມລາວວ່າ: “ສິ່ງທີ່ເຫັນໃນນິມິດກ່ຽວກັບເຄື່ອງບູຊາທີ່ເຜົາເປັນປະຈຳ ແລະການເຮັດຜິດທີ່ເຮັດໃຫ້ເກີດຄວາມຮ້າງເປົ່າ+ ເຊິ່ງກໍຄືການຢຽບກອງທັບກັບບ່ອນບໍລິສຸດ ທັງໝົດນີ້ຈະເກີດຂຶ້ນດົນປານໃດ?” 14 ລາວບອກຂ້ອຍວ່າ: “ເລື່ອງນີ້ຈະເກີດຂຶ້ນ 2.300 ມື້* ແລ້ວບ່ອນບໍລິສຸດຈະໄດ້ຮັບການຟື້ນຟູໃຫ້ຢູ່ໃນສະພາບທີ່ມັນຄວນເປັນແທ້ໆ.”
15 ຕອນທີ່ຂ້ອຍດານີເອນຍັງເບິ່ງນິມິດຢູ່ແລະພະຍາຍາມເຂົ້າໃຈເລື່ອງທີ່ເຫັນ ຂ້ອຍກໍເຫັນຜູ້ໜຶ່ງຄືກັບຄົນຢືນຢູ່ຕໍ່ໜ້າຂ້ອຍ. 16 ຈາກນັ້ນ ຂ້ອຍກໍໄດ້ຍິນສຽງຄືກັບສຽງຄົນຮ້ອງມາຈາກກາງແມ່ນ້ຳອູລາຍ+ວ່າ: “ຄັບຣີເອນ+ ໃຫ້ເຈົ້າອະທິບາຍຄວາມໝາຍຂອງສິ່ງທີ່ລາວເຫັນໃຫ້ລາວເຂົ້າໃຈແດ່.”+ 17 ຄັບຣີເອນເຂົ້າມາໃກ້ບ່ອນທີ່ຂ້ອຍຢືນຢູ່ ແຕ່ຕອນທີ່ລາວເຂົ້າມາ ຂ້ອຍຢ້ານຫຼາຍຈົນໝູບໜ້າລົງພື້ນ. ລາວເວົ້າກັບຂ້ອຍວ່າ: “ລູກມະນຸດ ໃຫ້ເຈົ້າເຂົ້າໃຈວ່ານິມິດນີ້ຈະເກີດຂຶ້ນແທ້ໃນສະໄໝສຸດທ້າຍ.”+ 18 ຕອນທີ່ລາວຍັງເວົ້ານຳຂ້ອຍ ຂ້ອຍກໍຫຼັບໄປເລີຍທັງໆທີ່ໝູບໜ້າຢູ່ພື້ນ. ລາວເອົາມືຈັບຂ້ອຍແລະໂຈມຂ້ອຍຂຶ້ນເພື່ອໃຫ້ມາຢືນຢູ່ບ່ອນເກົ່າ.+ 19 ແລ້ວລາວກໍເວົ້າວ່າ: “ຂ້ອຍຈະບອກເຈົ້າໃຫ້ຮູ້ວ່າຈະເກີດຫຍັງຂຶ້ນໃນສະໄໝສຸດທ້າຍ ເຊິ່ງເປັນເວລາທີ່ພະເຈົ້າຈະລົງໂທດ. ນິມິດນີ້ຈະເກີດຂຶ້ນແທ້ໃນສະໄໝສຸດທ້າຍຕາມເວລາທີ່ກຳນົດໄວ້.+
20 ແກະໂຕຜູ້ທີ່ມີ 2 ເຂົາທີ່ເຈົ້າເຫັນໝາຍເຖິງກະສັດຂອງເມເດຍແລະເປີເຊຍ.+ 21 ແບ້ໂຕຜູ້ທີ່ມີຂົນຫຼາຍໆໝາຍເຖິງກະສັດຂອງກຣີກ+ ແລະເຂົາໃຫຍ່ໆທີ່ຢູ່ລະຫວ່າງຕາ 2 ເບື້ອງໝາຍເຖິງກະສັດອົງທຳອິດຂອງກຣີກ.+ 22 ສ່ວນເຂົາທີ່ຫັກ ແລະເຂົາ 4 ເຂົາທີ່ປົ່ງຂຶ້ນມາແທນ+ໝາຍເຖິງ 4 ອານາຈັກທີ່ເກີດມາຈາກຊາດນີ້ ແຕ່ອານາຈັກເຫຼົ່ານີ້ຈະບໍ່ມີອຳນາດຫຼາຍສ່ຳກັບຊາດທີ່ມັນແຍກອອກມາ.
23 ໃນຕອນທີ່ການປົກຄອງຂອງອານາຈັກເຫຼົ່ານີ້ໃກ້ຈະສິ້ນສຸດລົງ ແລະພວກມັນເຮັດຜິດຈົນຮອດຂີດສູງສຸດແລ້ວ ກະສັດອົງໜຶ່ງທີ່ໂຫດຮ້າຍເຊິ່ງມີເລ່ລ່ຽມຫຼາຍ*ຈະຢືນຂຶ້ນ.* 24 ລາວຈະມີອຳນາດຫຼາຍ ແຕ່ບໍ່ແມ່ນດ້ວຍໂຕເອງ. ລາວຈະທຳລາຍຫຼາຍຢ່າງ*ຈົນຄົນທີ່ເຫັນຕົກໃຈ ແລະລາວຈະເຮັດໄດ້ສຳເລັດ. ລາວຈະສ້າງຄວາມເສຍຫາຍໃຫ້ພວກທີ່ມີອຳນາດແລະພວກທີ່ຖືກເລືອກ.+ 25 ລາວຈະໃຊ້ເລ່ລ່ຽມຫຼອກລວງຫຼາຍຄົນໄດ້ສຳເລັດ. ລາວຈະຍິ່ງຈອງຫອງ. ໃນໄລຍະທີ່ຄົນຮູ້ສຶກວ່າປອດໄພ* ລາວຈະທຳລາຍຫຼາຍຄົນ. ລາວຈະເຮັດເຖິງຂັ້ນວ່າຢືນຂຶ້ນຕໍ່ຕ້ານຫົວໜ້າຂອງພວກເຈົ້ານາຍ. ໃນທີ່ສຸດ ລາວຈະຖືກທຳລາຍ ແຕ່ບໍ່ແມ່ນຍ້ອນມະນຸດເຮັດ.
26 ເລື່ອງ 2.300 ມື້ໃນນິມິດນີ້*ຈະເກີດຂຶ້ນແທ້ ແຕ່ເຈົ້າຕ້ອງເກັບນິມິດນີ້ໄວ້ເປັນຄວາມລັບ ຍ້ອນວ່າຍັງອີກດົນເລື່ອງນີ້ຈຶ່ງຈະເກີດຂຶ້ນ.”+
27 ຍ້ອນເຫັນນິມິດນັ້ນ ຂ້ອຍດານີເອນຈຶ່ງໝົດແຮງແລະບໍ່ສະບາຍໄປຫຼາຍມື້.+ ເມື່ອຂ້ອຍລຸກໄດ້ ຂ້ອຍກໍໄປເຮັດວຽກຮັບໃຊ້ກະສັດຄືເກົ່າ.+ ແຕ່ຂ້ອຍຍັງສັບສົນກ່ຽວກັບສິ່ງທີ່ເຫັນ ແລະບໍ່ມີໃຜເຂົ້າໃຈນິມິດນັ້ນ.+
9 ເຫດການຕໍ່ໄປນີ້ເກີດຂຶ້ນໃນປີທຳອິດທີ່ດາຣິອຸດ+ລູກຊາຍຂອງອາຫະສຸເອຣັດຄົນເມເດຍ*ຖືກແຕ່ງຕັ້ງໃຫ້ເປັນກະສັດປົກຄອງຄົນການເດອາ.+ 2 ໃນປີທຳອິດທີ່ດາຣິອຸດປົກຄອງ ຂ້ອຍດານີເອນໄດ້ຄົ້ນຄວ້າປຶ້ມຕ່າງໆ*ແລະເຂົ້າໃຈກ່ຽວກັບຈຳນວນປີທີ່ເມືອງເຢຣູຊາເລັມຈະຮ້າງເປົ່າ. ເລື່ອງນີ້ເປັນໄປຕາມຄຳເວົ້າທີ່ພະເຢໂຫວາບອກຜ່ານທາງຜູ້ພະຍາກອນເຢເຣມີຢາທີ່ວ່າ ເມືອງເຢຣູຊາເລັມຈະຮ້າງເປົ່າ+ເປັນເວລາ 70 ປີ.+ 3 ເມື່ອເຂົ້າໃຈເລື່ອງນີ້ ຂ້ອຍຈຶ່ງຂໍໃຫ້ພະເຢໂຫວາພະເຈົ້າທ່ຽງແທ້ຊ່ວຍ. ຂ້ອຍອະທິດຖານອ້ອນວອນ ອົດເຂົ້າ+ ນຸ່ງຜ້າເນື້ອຫຍາບ ແລະເອົາຂີ້ເທົ່າໂຮຍໃສ່ຕົນໂຕ. 4 ຂ້ອຍອະທິດຖານຫາພະເຢໂຫວາພະເຈົ້າຂອງຂ້ອຍແລະຍອມຮັບວ່າພວກເຮົາໄດ້ເຮັດຜິດ. ຂ້ອຍເວົ້າວ່າ:
“ພະເຢໂຫວາພະເຈົ້າທ່ຽງແທ້ ພະອົງຍິ່ງໃຫຍ່ແລະສົມຄວນໄດ້ຮັບຄວາມນັບຖື. ພະອົງເຮັດຕາມສັນຍາສະເໝີ. ພະອົງມີຄວາມຮັກທີ່ໝັ້ນຄົງ+ຕໍ່ຄົນທີ່ຮັກພະອົງແລະເຮັດຕາມຄຳສັ່ງຂອງພະອົງ.+ 5 ພວກເຮົາໄດ້ເຮັດບາບ ເຮັດຜິດ ເຮັດຊົ່ວ ແລະກະບົດ.+ ພວກເຮົາບໍ່ໄດ້ເຮັດຕາມຄຳສັ່ງແລະກົດໝາຍຂອງພະອົງ. 6 ພະອົງໃຊ້ພວກຜູ້ພະຍາກອນທີ່ເປັນຜູ້ຮັບໃຊ້ຂອງພະອົງ+ໃຫ້ບອກພວກກະສັດ ພວກເຈົ້ານາຍ ປູ່ຍ່າຕານາຍຂອງພວກເຮົາ ແລະປະຊາຊົນທຸກຄົນໃນແຜ່ນດິນວ່າພະອົງຕ້ອງການໃຫ້ພວກເຮົາເຮັດຫຍັງ ແຕ່ພວກເຮົາພັດບໍ່ຟັງເຂົາເຈົ້າ ທັງໆທີ່ເຂົາເຈົ້າເວົ້າໃນນາມຂອງພະອົງ. 7 ພະເຢໂຫວາ ພະອົງເຮັດສິ່ງທີ່ຖືກຕ້ອງສະເໝີ ແຕ່ພວກເຮົາພັດເຮັດສິ່ງທີ່ເປັນຕາອາຍຈົນຮອດທຸກມື້ນີ້. ພະອົງເຮັດໃຫ້ຄົນຢູດາ ຄົນໃນເມືອງເຢຣູຊາເລັມ ແລະພວກອິດສະຣາເອນທຸກຄົນກະຈັດກະຈາຍກັນໄປຢູ່ທຸກດິນແດນທັງໃກ້ແລະໄກ ຍ້ອນເຂົາເຈົ້າບໍ່ສັດຊື່ຕໍ່ພະອົງ.+
8 ພະເຢໂຫວາເອີ້ຍ ພວກເຮົາກັບພວກກະສັດ ພວກເຈົ້ານາຍ ແລະປູ່ຍ່າຕານາຍຂອງພວກເຮົາຕ້ອງອັບອາຍຂາຍໜ້າ ຍ້ອນພວກເຮົາໄດ້ເຮັດຜິດຕໍ່ພະອົງ. 9 ພະເຢໂຫວາພະເຈົ້າຂອງພວກເຮົາ ພະອົງມີຄວາມເມດຕາແລະພ້ອມທີ່ຈະໃຫ້ອະໄພ+ ເຖິງວ່າພວກເຮົາໄດ້ກະບົດຕໍ່ພະອົງ.+ 10 ພະເຢໂຫວາພະເຈົ້າຂອງພວກເຮົາ ພວກເຮົາບໍ່ໄດ້ເຊື່ອຟັງ ແລະບໍ່ໄດ້ເຮັດຕາມກົດໝາຍທີ່ພະອົງໃຫ້ຜ່ານທາງພວກຜູ້ພະຍາກອນທີ່ເປັນຜູ້ຮັບໃຊ້ຂອງພະອົງ.+ 11 ພວກອິດສະຣາເອນທຸກຄົນຝ່າຝືນກົດໝາຍຂອງພະອົງແລະບໍ່ສົນໃຈຟັງສິ່ງທີ່ພະອົງບອກ. ພວກເຮົາຖືກພະອົງສາບແຊ່ງ ຍ້ອນບໍ່ໄດ້ເຮັດຕາມຄຳສາບານທີ່ຂຽນໄວ້ໃນກົດໝາຍຂອງໂມເຊຜູ້ຮັບໃຊ້ຂອງພະເຈົ້າທ່ຽງແທ້.+ ມັນເປັນແບບນີ້ກໍຍ້ອນພວກເຮົາໄດ້ເຮັດຜິດຕໍ່ພະອົງ. 12 ພະອົງໃຫ້ພວກຜູ້ປົກຄອງ*ກັບພວກເຮົາຖືກໂທດໜັກໆຕາມທີ່ພະອົງໄດ້ບອກໄວ້.+ ສິ່ງທີ່ເກີດຂຶ້ນກັບເມືອງເຢຣູຊາເລັມບໍ່ເຄີຍເກີດຂຶ້ນມາກ່ອນໃນໂລກນີ້.+ 13 ພວກເຮົາເຈິຄວາມຈິບຫາຍແບບນີ້ຕາມທີ່ຂຽນໄວ້ໃນກົດໝາຍຂອງໂມເຊ.+ ແຕ່ເຖິງວ່າຈະເຈິເລື່ອງແບບນີ້ ພວກເຮົາກໍບໍ່ໄດ້ອ້ອນວອນຂໍໃຫ້ພະເຢໂຫວາພະເຈົ້າອີ່ຕົນ ບໍ່ເຊົາເຮັດຜິດ+ ແລະບໍ່ໄດ້ສຳນຶກວ່າພະອົງເຮັດຕາມຄຳເວົ້າສະເໝີ.*
14 ພະເຢໂຫວາ ພະອົງເຝົ້າເບິ່ງສິ່ງທີ່ພວກເຮົາເຮັດຕະຫຼອດ ແລະໃນທີ່ສຸດກໍໃຫ້ພວກເຮົາເຈິຄວາມຈິບຫາຍ. ພະເຢໂຫວາພະເຈົ້າ ພະອົງເຮັດສິ່ງທີ່ຖືກຕ້ອງສະເໝີ ແຕ່ພວກເຮົາບໍ່ເຊື່ອຟັງພະອົງ.+
15 ພະເຢໂຫວາພະເຈົ້າຂອງພວກເຮົາ ພະອົງເປັນຜູ້ພາປະຊາຊົນຂອງພະອົງອອກມາຈາກເອຢິບດ້ວຍລິດເດດຂອງພະອົງ+ ແລະເຮັດໃຫ້ພະອົງເອງມີຊື່ສຽງຈົນຮອດທຸກມື້ນີ້.+ ພວກເຮົາໄດ້ເຮັດຜິດແລະເຮັດຊົ່ວຕໍ່ພະອົງ. 16 ພະເຢໂຫວາ ພະອົງເຮັດສິ່ງທີ່ຖືກຕ້ອງສະເໝີ.+ ຂໍພະອົງເຊົາຄຽດແລະເຊົາໃຈຮ້າຍໃຫ້ເມືອງເຢຣູຊາເລັມທີ່ເປັນເມືອງຂອງພະອົງແລະເປັນພູທີ່ບໍລິສຸດຂອງພະອົງ. ຍ້ອນປູ່ຍ່າຕານາຍຂອງພວກເຮົາໄດ້ເຮັດຜິດ ທຸກຄົນທີ່ຢູ່ອ້ອມຂ້າງພວກເຮົາຈຶ່ງເຍາະເຍີ້ຍເມືອງເຢຣູຊາເລັມແລະປະຊາຊົນຂອງພະອົງ.+ 17 ພະເຢໂຫວາພະເຈົ້າຂອງພວກເຮົາ ຕອນນີ້ຂໍພະອົງຟັງຄຳອ້ອນວອນຂອງລູກທີ່ເປັນຜູ້ຮັບໃຊ້ຂອງພະອົງ. ຂໍພະອົງເຮັດສິ່ງດີໆສຳລັບບ່ອນບໍລິສຸດຂອງພະອົງ+ທີ່ຮ້າງເປົ່າຢູ່+ ເພື່ອເຫັນແກ່ສະຫງ່າລາສີຂອງພະອົງ. 18 ພະເຈົ້າຂອງລູກ ຂໍພະອົງຟັງລູກ ແລະແນມເບິ່ງສະພາບທີ່ຮ້າງເປົ່າຂອງເມືອງທີ່ຖືກເອີ້ນຕາມຊື່ຂອງພະອົງ. ພວກເຮົາອ້ອນວອນຫາພະອົງ ບໍ່ແມ່ນຍ້ອນຄວາມດີຂອງພວກເຮົາ ແຕ່ຍ້ອນພະອົງມີຄວາມເມດຕາຫຼາຍ.+ 19 ພະເຢໂຫວາເອີ້ຍ ຂໍພະອົງຟັງພວກເຮົາ. ພະເຢໂຫວາເອີ້ຍ ຂໍພະອົງຍົກໂທດໃຫ້ພວກເຮົາ.+ ພະເຢໂຫວາເອີ້ຍ ຂໍພະອົງສົນໃຈແລະຊ່ວຍພວກເຮົາ. ພະເຈົ້າຂອງລູກ ຂໍພະອົງຢ່າຊັກຊ້າຍ້ອນເຫັນແກ່ຊື່ຂອງພະອົງ ເພາະເມືອງນັ້ນກັບປະຊາຊົນຂອງພະອົງຖືກເອີ້ນຕາມຊື່ຂອງພະອົງ.”+
20 ຂ້ອຍໄດ້ອະທິດຖານເຖິງພະເຈົ້າແລະຍອມຮັບຄວາມຜິດຂອງໂຕເອງກັບຄວາມຜິດຂອງຄົນອິດສະຣາເອນຄົນຊາດດຽວກັນກັບຂ້ອຍ ແລະຂໍໃຫ້ພະເຢໂຫວາພະເຈົ້າຂອງຂ້ອຍອີ່ຕົນພູທີ່ບໍລິສຸດຂອງເພິ່ນ.+ 21 ແຕ່ຂ້ອຍອະທິດຖານຍັງບໍ່ທັນແລ້ວຊ້ຳ ຄັບຣີເອນ+ຜູ້ທີ່ຂ້ອຍເຫັນໃນນິມິດເທື່ອກ່ອນ+ກໍມາຫາຂ້ອຍຕອນທີ່ຂ້ອຍເມື່ອຍຫຼາຍແລະໝົດແຮງ. ຕອນນັ້ນເປັນເວລາເຜົາເຄື່ອງບູຊາຕອນແລງໃຫ້ພະເຈົ້າ. 22 ລາວອະທິບາຍໃຫ້ຂ້ອຍຟັງວ່າ:
“ດານີເອນເອີ້ຍ ເທື່ອນີ້ຂ້ອຍມາກໍເພື່ອຊ່ວຍເຈົ້າໃຫ້ຮູ້ແລະເຂົ້າໃຈໃນສິ່ງທີ່ຈະເກີດຂຶ້ນ. 23 ຕອນທີ່ເຈົ້າເລີ່ມອະທິດຖານ ພະເຈົ້າກໍສັ່ງຂ້ອຍໃຫ້ມາບອກເຈົ້າ ຍ້ອນເຈົ້າເປັນຄົນທີ່ມີຄ່າຫຼາຍ*ສຳລັບເພິ່ນ.+ ໃຫ້ເຈົ້າຕັ້ງໃຈຟັງແລະພະຍາຍາມເຂົ້າໃຈນິມິດນີ້.
24 ພະເຈົ້າກຳນົດ 70 ອາທິດ*ໄວ້ສຳລັບຄົນຊາດດຽວກັນກັບເຈົ້າແລະສຳລັບເມືອງທີ່ບໍລິສຸດຂອງເຈົ້າ+ ເພື່ອໃຫ້ການເຮັດຜິດສິ້ນສຸດລົງ ເພື່ອໃຫ້ບາບໝົດໄປ+ ເພື່ອຍົກໂທດຄວາມຜິດ+ ເພື່ອໃຫ້ມີຄວາມຖືກຕ້ອງຕະຫຼອດໄປ+ ເພື່ອຈ້ຳກາຢືນຢັນເລື່ອງນິມິດແລະຄຳພະຍາກອນ*+ ແລະເພື່ອອຸທິດຫ້ອງບໍລິສຸດທີ່ສຸດ*ໃຫ້ພະເຈົ້າ. 25 ໃຫ້ເຈົ້າຮູ້ແລະເຂົ້າໃຈວ່າ ນັບຕັ້ງແຕ່ມີຄຳສັ່ງໃຫ້ຟື້ນຟູແລະສ້າງເມືອງເຢຣູຊາເລັມຄືນໃໝ່+ ຈົນຮອດຕອນທີ່ເມຊີອາ*+ທີ່ເປັນຜູ້ນຳມາ+ ມັນຈະເປັນເວລາ 7 ອາທິດກັບ 62 ອາທິດ.+ ເມືອງນີ້ຈະໄດ້ຮັບການຟື້ນຟູໂດຍສ້າງຄືນໃໝ່ ພ້ອມທັງຈະມີເດີ່ນຂອງເມືອງກັບຮ່ອງອ້ອມເມືອງ ແຕ່ປະຊາຊົນຈະເຮັດສິ່ງເຫຼົ່ານີ້ໃນເວລາທີ່ຫຍຸ້ງຍາກລຳບາກຫຼາຍ.
26 ຫຼັງຈາກ 62 ອາທິດ ເມຊີອາຈະຖືກຂ້າ+ ແລະລາວຈະບໍ່ມີຫຍັງເຫຼືອເລີຍ.+
ຜູ້ນຳຄົນໜຶ່ງຈະມາກັບກອງທັບຂອງລາວ ແລະເຂົາເຈົ້າຈະທຳລາຍເມືອງກັບບ່ອນບໍລິສຸດ.+ ການທຳລາຍນັ້ນຈະເປັນຄືກັບນ້ຳຖ້ວມແລະຈະມີສົງຄາມຕະຫຼອດ ຈົນຮອດເວລາທີ່ພະເຈົ້າກຳນົດໄວ້ແລ້ວວ່າມັນຈະຮ້າງເປົ່າ.+
27 ລາວ*ຈະເຮັດໃຫ້ສັນຍາມີຜົນບັງຄັບໃຊ້ຕໍ່ໄປອີກ 1 ອາທິດເພື່ອປະໂຫຍດຂອງຫຼາຍຄົນ. ເມື່ອຜ່ານໄປໄດ້ເຄິ່ງອາທິດ ລາວຈະບໍ່ໃຫ້ມີການເຜົາເຄື່ອງບູຊາທີ່ເປັນສັດແລະເຄື່ອງບູຊາອື່ນໆ.+
ຜູ້ທີ່ເຮັດໃຫ້ເກີດຄວາມຮ້າງເປົ່າຈະຂີ່ປີກຂອງສິ່ງທີ່ເປັນຕາຂີ້ດຽດມາ+ ແລະບ່ອນທີ່ຮ້າງເປົ່າຈະໄດ້ຮັບຜົນຕາມທີ່ພະເຈົ້າຕັດສິນ ຈົນຮອດເວລາທີ່ຈະຖືກທຳລາຍຈົນໝົດ.”
10 ໃນປີທີ 3 ທີ່ໄຊຣັດ+ເປັນກະສັດປົກຄອງເປີເຊຍ ດານີເອນເຊິ່ງມີອີກຊື່ໜຶ່ງວ່າເບນເຕຊັດຊາເຣໄດ້ຮັບຂ່າວສານເລື່ອງໜຶ່ງຈາກພະເຈົ້າ.+ ເລື່ອງນີ້ກ່ຽວກັບການຕໍ່ສູ້ທີ່ຮຸນແຮງເຊິ່ງຈະເກີດຂຶ້ນແທ້. ດານີເອນເຂົ້າໃຈເລື່ອງທີ່ລາວໄດ້ເຫັນຍ້ອນມີການອະທິບາຍໃຫ້ລາວ.
2 ໃນໄລຍະນັ້ນ ຂ້ອຍດານີເອນທຸກໃຈຫຼາຍ+ເປັນເວລາ 3 ອາທິດ. 3 ຂ້ອຍບໍ່ກິນອາຫານດີໆ ບໍ່ກິນຊີ້ນ ບໍ່ກິນເຫຼົ້າແວງ ແລະບໍ່ເອົານ້ຳມັນທາໂຕເປັນເວລາ 3 ອາທິດ. 4 ໃນວັນທີ 24 ຂອງເດືອນທີ 1 ຕອນທີ່ຂ້ອຍຢູ່ແຄມແມ່ນ້ຳໃຫຍ່ເຊິ່ງແມ່ນແມ່ນ້ຳຕິກຣິດ.*+ 5 ຂ້ອຍເຫັນຜູ້ໜຶ່ງນຸ່ງເຄື່ອງທີ່ເປັນຜ້າລີນິນ+ ແລະສາຍຄາດແອວຂອງລາວເປັນຄຳຈາກອຸຟາດ. 6 ຕົນໂຕຂອງລາວມີແສງອອກມາຄືກັບແກ້ວຄຣິດໂຊໄລທ໌+ ໜ້າຂອງລາວເຫຼື້ອມຄືກັບຟ້າແມບ ຕາຂອງລາວເປັນຄືກັບແປວໄຟ ແລະແຂນຂາຂອງລາວເຫຼື້ອມຄືກັບທອງແດງທີ່ຂັດແລ້ວ.+ ເມື່ອລາວເວົ້າສຽງຂອງລາວເປັນຄືກັບສຽງຂອງຫຼາຍໆຄົນທີ່ເວົ້ານຳກັນ. 7 ຂ້ອຍດານີເອນເຫັນນິມິດນີ້ ແຕ່ຄົນທີ່ຢູ່ນຳຂ້ອຍພັດບໍ່ເຫັນ.+ ແຕ່ເຂົາເຈົ້າຮູ້ສຶກຢ້ານຫຼາຍຈຶ່ງແລ່ນໄປລີ້.
8 ຈາກນັ້ນ ຂ້ອຍຖືກປະໃຫ້ຢູ່ຄົນດຽວ. ຕອນທີ່ເຫັນນິມິດທີ່ຍິ່ງໃຫຍ່ນີ້ ຂ້ອຍກໍໝົດເຫື່ອໝົດແຮງແລະໜ້າຈືດ.+ 9 ແລ້ວຜູ້ນັ້ນກໍເລີ່ມເວົ້າກັບຂ້ອຍ ແຕ່ຕອນທີ່ກຳລັງຟັງລາວເວົ້າ ຂ້ອຍກໍລົ້ມລົງແລ້ວຫຼັບໄປທັງໆທີ່ໝູບໜ້າຢູ່ພື້ນ.+ 10 ແຕ່ລາວເອົາມືມາຈັບຂ້ອຍ+ແລະປຸກຂ້ອຍໃຫ້ຕື່ນ. ລາວຊ່ວຍໂຈມຂ້ອຍໃຫ້ເອົາຫົວເຂົ່າກັບມືຄ້ຳພື້ນໄວ້. 11 ລາວເວົ້າກັບຂ້ອຍວ່າ:
“ດານີເອນເອີ້ຍ ເຈົ້າເປັນຄົນທີ່ມີຄ່າຫຼາຍ*ສຳລັບພະເຈົ້າ+ ໃຫ້ເຈົ້າຕັ້ງໃຈຟັງເລື່ອງທີ່ຂ້ອຍກຳລັງຈະເວົ້າ. ຕອນນີ້ ໃຫ້ເຈົ້າລຸກຂຶ້ນ. ພະເຈົ້າໄດ້ສົ່ງຂ້ອຍໃຫ້ມາຫາເຈົ້າ.”
ເມື່ອລາວເວົ້າແບບນີ້ ຂ້ອຍກໍຢືນຂຶ້ນແລະໂຕສັ່ນ.
12 ລາວບອກຂ້ອຍວ່າ: “ດານີເອນເອີ້ຍ ບໍ່ຕ້ອງຢ້ານ.+ ພະເຈົ້າໄດ້ຍິນຄຳອະທິດຖານຂອງເຈົ້າຕັ້ງແຕ່ມື້ທຳອິດທີ່ເຈົ້າຖ່ອມໂຕອະທິດຖານເພື່ອຈະເຂົ້າໃຈຄວາມໝາຍຂອງເລື່ອງທັງໝົດນີ້. ຍ້ອນແນວນີ້ ພະເຈົ້າຈຶ່ງສົ່ງຂ້ອຍມາຫາເຈົ້າ.+ 13 ແຕ່ຫົວໜ້າ+ຂອງອານາຈັກເປີເຊຍມາຢືນຂວາງທາງຂ້ອຍໄວ້ 21 ມື້ ແລ້ວມີກາເອນ*+ທີ່ເປັນຫົວໜ້າຂອງພວກເຈົ້ານາຍໄດ້ມາຊ່ວຍຂ້ອຍ. ຕອນນັ້ນ ຂ້ອຍຢູ່ຫັ້ນກັບພວກກະສັດຂອງເປີເຊຍ. 14 ຂ້ອຍມາກໍເພື່ອຊ່ວຍເຈົ້າໃຫ້ຮູ້ວ່າຈະເກີດຫຍັງຂຶ້ນກັບຄົນຊາດດຽວກັນກັບເຈົ້າໃນສະໄໝສຸດທ້າຍ.+ ນິມິດນີ້ຍັງອີກດົນຈຶ່ງຈະເກີດຂຶ້ນ.+
15 ຫຼັງຈາກໄດ້ຟັງສິ່ງທີ່ລາວເວົ້າ ຂ້ອຍກໍກົ້ມໜ້າລົງພື້ນແລະເວົ້າຫຍັງບໍ່ອອກ. 16 ຈາກນັ້ນກໍມີຜູ້ໜຶ່ງທີ່ຄືກັບຄົນຫຍັບເຂົ້າມາໃກ້ຂ້ອຍແລະບາຍສົບຂ້ອຍ+ ຂ້ອຍຈຶ່ງເວົ້າໄດ້. ຂ້ອຍເວົ້າກັບຜູ້ທີ່ຢືນຢູ່ຕໍ່ໜ້າຂ້ອຍວ່າ: “ທ່ານເອີ້ຍ ນິມິດນັ້ນເຮັດໃຫ້ຂ້ອຍຢ້ານຫຼາຍຈົນໝົດເຫື່ອໝົດແຮງ.+ 17 ຂ້ອຍທີ່ເປັນຜູ້ຮັບໃຊ້ຂອງທ່ານເວົ້າກັບທ່ານບໍ່ໄດ້+ ຍ້ອນວ່າຕອນນີ້ຂ້ອຍໝົດແຮງແລ້ວ ແມ່ນແຕ່ຊິຫາຍໃຈກໍຍັງບໍ່ມີແຮງ.”+
18 ແລ້ວຜູ້ທີ່ຄືກັບຄົນໄດ້ບາຍຂ້ອຍອີກເທື່ອໜຶ່ງ ແລະຂ້ອຍກໍມີແຮງຂຶ້ນ.+ 19 ລາວເວົ້າກັບຂ້ອຍວ່າ: “ບໍ່ຕ້ອງຢ້ານ+ ເຈົ້າເປັນຄົນທີ່ມີຄ່າຫຼາຍສຳລັບພະເຈົ້າ.+ ບໍ່ຕ້ອງອຸກໃຈ+ ໃຫ້ເຈົ້າເຂັ້ມແຂງແລະກ້າຫານ.” ເມື່ອລາວເວົ້າກັບຂ້ອຍ ຂ້ອຍກໍມີແຮງແລະເວົ້າວ່າ: “ທ່ານເອີ້ຍ ເວົ້າໂລດ ເພາະທ່ານເຮັດໃຫ້ຂ້ອຍມີແຮງແລ້ວ.”
20 ລາວເວົ້າວ່າ: “ຕອນນີ້ ຂ້ອຍຈະກັບໄປຕໍ່ສູ້ກັບເຈົ້ານາຍຂອງເປີເຊຍ.+ ເມື່ອຂ້ອຍກັບໄປ ເຈົ້ານາຍຂອງກຣີກກໍຈະມາຕໍ່ສູ້ກັບຂ້ອຍຄືກັນ. ແຕ່ເຈົ້າຮູ້ບໍ່ວ່າເປັນຫຍັງຂ້ອຍມາຫາເຈົ້າ? 21 ຂ້ອຍມາກໍເພື່ອບອກເຈົ້າກ່ຽວກັບສິ່ງທີ່ຂຽນໄວ້ໃນປຶ້ມທີ່ເປັນຄວາມຈິງ. ບໍ່ມີໃຜຊ່ວຍຂ້ອຍໄດ້ໃນເລື່ອງຕ່າງໆ ນອກຈາກມີກາເອນ+ທີ່ເປັນເຈົ້ານາຍຂອງເຈົ້າ.”+
11 “ໃນປີທຳອິດທີ່ດາຣິອຸດ+ຄົນເມເດຍປົກຄອງ ຂ້ອຍໄດ້ມາຊ່ວຍແລະເສີມກຳລັງມີກາເອນ.* 2 ສິ່ງທີ່ຂ້ອຍຈະບອກເຈົ້າຕອນນີ້ຈະເກີດຂຶ້ນແທ້.
ຈະມີກະສັດອີກ 3 ອົງຂຶ້ນມາປົກຄອງເປີເຊຍ ແລະກະສັດອົງທີ 4 ຈະລວຍກວ່າກະສັດທຸກອົງ. ເມື່ອລາວເຂັ້ມແຂງຂຶ້ນຍ້ອນຄວາມລວຍຂອງລາວ ລາວຈະລວບລວມກອງທະຫານທັງໝົດໄປຕໍ່ສູ້ກັບອານາຈັກກຣີກ.+
3 ແລ້ວຈະມີກະສັດອົງໜຶ່ງຂຶ້ນມາປົກຄອງ. ລາວຈະປົກຄອງດ້ວຍອຳນາດທີ່ຍິ່ງໃຫຍ່.*+ ລາວຢາກເຮັດຫຍັງ ລາວກໍຈະເຮັດຕາມໃຈໂຕເອງໂລດ. 4 ແຕ່ເມື່ອມີອຳນາດຫຼາຍແລ້ວ ອານາຈັກຂອງລາວຈະຖືກແບ່ງເປັນ 4 ສ່ວນໄປຕາມ 4 ທິດ+ ແຕ່ຈະບໍ່ໄດ້ແບ່ງໃຫ້ລູກຫຼານຂອງລາວ. ອານາຈັກຂອງລາວຈະສິ້ນສຸດລົງ ແລະມັນຈະຕົກເປັນຂອງຄົນອື່ນ.
5 ແລ້ວຫົວໜ້າກອງທັບຜູ້ໜຶ່ງຂອງລາວຈະກາຍເປັນກະສັດທິດໃຕ້. ກະສັດຜູ້ນີ້ຈະເຂັ້ມແຂງຂຶ້ນເລື້ອຍໆ ແຕ່ຈະມີຜູ້ໜຶ່ງ*ມາຕໍ່ສູ້ກັບລາວ. ຜູ້ນັ້ນຈະປົກຄອງດ້ວຍອຳນາດທີ່ຍິ່ງໃຫຍ່ກວ່າລາວ.
6 ຫຼາຍປີຕໍ່ມາ ເຂົາເຈົ້າຈະເປັນພັນທະມິດກັນ ແລະລູກສາວຂອງກະສັດທິດໃຕ້ຈະໄປຫາກະສັດທິດເໜືອເພື່ອເຮັດຂໍ້ຕົກລົງກັນ. ແຕ່ລູກສາວຂອງກະສັດທິດໃຕ້ຈະສູນເສຍອຳນາດ ແລະກະສັດເອງກໍຈະສູນເສຍອຳນາດຄືກັນ. ຜູ້ທີ່ເປັນລູກສາວ ລວມທັງຜູ້ທີ່ພາລາວມາ ພໍ່ຂອງລາວ ແລະຜູ້ທີ່ເຮັດໃຫ້ລາວເຂັ້ມແຂງໃນໄລຍະນັ້ນຈະຖືກມອບໂຕໃຫ້ອີກຝ່າຍໜຶ່ງ. 7 ແລ້ວຜູ້ໜຶ່ງໃນຄອບຄົວຂອງລູກສາວຈະຂຶ້ນມາແທນຕຳແໜ່ງລາວ.* ຜູ້ນີ້ຈະມາຕໍ່ສູ້ກັບກອງທັບແລະໂຈມຕີເມືອງທີ່ເຂັ້ມແຂງຂອງກະສັດທິດເໜືອ ແລະລາວຈະຊະນະ. 8 ລາວຈະເອົາຮູບພະ ຮູບບູຊາ ເຄື່ອງຂອງທີ່ມີຄ່າທີ່ເຮັດຈາກເງິນຈາກຄຳ ແລະພວກຊະເລີຍກັບໄປເອຢິບນຳ. ລາວຈະບໍ່ຫຍຸ້ງກ່ຽວກັບກະສັດທິດເໜືອເປັນເວລາຫຼາຍປີ. 9 ຕໍ່ມາ ກະສັດທິດເໜືອຈະມາໂຈມຕີອານາຈັກຂອງກະສັດທິດໃຕ້ ແຕ່ລາວຈະຕ້ອງກັບໄປແຜ່ນດິນຂອງໂຕເອງ.
10 ສ່ວນພວກລູກຊາຍຂອງລາວ*ຈະກຽມເຮັດສົງຄາມແລະລວບລວມກອງທັບໃຫຍ່. ລູກຊາຍຜູ້ໜຶ່ງຂອງລາວ*ຈະມາກວາດລ້າງແຜ່ນດິນຄືກັບນ້ຳມາຖ້ວມ. ແລ້ວລາວຈະກັບໄປແລະຈະເຮັດສົງຄາມໄປຕະຫຼອດເສັ້ນທາງຈົນຮອດປ້ອມຂອງລາວ.
11 ກະສັດທິດໃຕ້ຈະຄຽດແຄ້ນແລະອອກໄປຕໍ່ສູ້ກັບກະສັດທິດເໜືອ. ລາວ*ຈະລວບລວມທະຫານຈຳນວນຫຼາຍ ແຕ່ພວກທະຫານເຫຼົ່ານັ້ນຈະຕົກເປັນຂອງກະສັດອີກຝ່າຍໜຶ່ງ.* 12 ກະສັດອົງນີ້ຈະຈັບພວກທະຫານໄປ. ລາວຈະຍິ່ງຈອງຫອງ ແລະເຮັດໃຫ້ຫຼາຍສິບພັນຄົນຕ້ອງຕາຍ. ລາວຈະມີອຳນາດຫຼາຍ ແຕ່ຈະບໍ່ຮູ້ຈັກໃຊ້ອຳນາດນັ້ນ.
13 ແລ້ວກະສັດທິດເໜືອຈະກັບໄປແລະລວບລວມທະຫານຫຼາຍກວ່າເທື່ອທຳອິດ. ເມື່ອຫຼາຍປີຜ່ານໄປ ລາວຈະມາພ້ອມກັບກອງທັບໃຫຍ່ທີ່ມີອາຫານແລະອາວຸດຄົບຊຸດ. 14 ໃນໄລຍະນັ້ນຈະມີຫຼາຍຄົນຕໍ່ສູ້ກັບກະສັດທິດໃຕ້.
ພວກຫົວຮຸນແຮງ*ທີ່ເປັນຄົນຊາດດຽວກັນກັບເຈົ້າຈະພະຍາຍາມເຮັດໃຫ້ຄຳພະຍາກອນຕ່າງໆຂອງເຂົາເຈົ້າເກີດຂຶ້ນແທ້ ແຕ່ເຂົາເຈົ້າຈະເຮັດບໍ່ສຳເລັດ.*
15 ຕໍ່ມາ ກະສັດທິດເໜືອຈະມາໂຈມຕີແລະເຮັດໂນນຈຸກຳແພງເພື່ອຍຶດເອົາເມືອງທີ່ມີກຳແພງອ້ອມ ແຕ່ກອງທັບກັບພວກທະຫານທີ່ເກັ່ງໆຂອງກະສັດທິດໃຕ້ຈະສູ້ບໍ່ໄຫວ. ເຂົາເຈົ້າບໍ່ມີກຳລັງເຂັ້ມແຂງພໍທີ່ຈະຕ້ານທານໄດ້. 16 ຜູ້ທີ່ມາ*ຕໍ່ສູ້ກັບກະສັດທິດໃຕ້ຈະເຮັດຕາມໃຈໂຕເອງ ແລະບໍ່ມີໃຜຈະສູ້ລາວໄດ້. ລາວຈະເຂົ້າໄປຍຶດເອົາແຜ່ນດິນທີ່ສວຍງາມ+ແລະຈະມີອຳນາດໃນການທຳລາຍ. 17 ລາວຈະມຸ່ງໜ້າມາພ້ອມກັບກອງທັບໃຫຍ່ທັງໝົດຂອງອານາຈັກຂອງລາວ ແຕ່ລາວຈະເຮັດຂໍ້ຕົກລົງກັບກະສັດອົງນັ້ນ ແລະລາວຈະເຮັດຕາມແຜນການຂອງລາວ. ລາວຈະໄດ້ຮັບອະນຸຍາດໃຫ້ທຳຮ້າຍລູກສາວຂອງກະສັດອົງນັ້ນ ແຕ່ຜູ້ເປັນລູກສາວຈະບໍ່ຍອມແລະບໍ່ເຂົ້າຂ້າງລາວ. 18 ລາວຈະປ່ຽນທິດທາງມຸ່ງໜ້າໄປແຖວແຄມຝັ່ງທະເລ ແລ້ວຈະມີຫົວໜ້າກອງທັບຜູ້ໜຶ່ງມາຈັດການກັບນິດໄສທີ່ຍິ່ງຈອງຫອງຂອງລາວ ເພື່ອບໍ່ໃຫ້ລາວດູຖູກຄົນອື່ນອີກຕໍ່ໄປ. ຫົວໜ້າກອງທັບຜູ້ນີ້ຈະເຮັດໃຫ້ລາວຖືກດູຖູກແທນ. 19 ຫຼັງຈາກນັ້ນ ລາວຈະກັບໄປເມືອງທີ່ເຂັ້ມແຂງໃນແຜ່ນດິນຂອງໂຕເອງ. ລາວຈະລົ້ມລົງແລະຈະບໍ່ມີໃຜເຫັນລາວອີກເລີຍ.
20 ແລ້ວຈະມີຜູ້ໜຶ່ງຂຶ້ນມາແທນຕຳແໜ່ງລາວ. ຜູ້ນັ້ນຈະສົ່ງຄົນເກັບພາສີ*ໄປທົ່ວອານາຈັກທີ່ງົດງາມ ແຕ່ບໍ່ດົນຫຼັງຈາກນັ້ນ ລາວ*ຈະຕາຍ ແຕ່ບໍ່ໄດ້ຕາຍຍ້ອນຖືກຂ້າຫຼືຕາຍໃນສົງຄາມ.
21 ຫຼັງຈາກນັ້ນຈະມີຜູ້ໜຶ່ງຂຶ້ນມາແທນຕຳແໜ່ງຂອງລາວ ແຕ່ຄົນຈະດູຖູກຜູ້ນີ້. ເຂົາເຈົ້າຈະບໍ່ໃຫ້ກຽດລາວໃນຖານະເປັນກະສັດ. ລາວຈະມາໃນໄລຍະທີ່ຫຼາຍຄົນຮູ້ສຶກວ່າປອດໄພ* ແລະລາວຈະໃຊ້ເລ່ລ່ຽມເພື່ອຍຶດເອົາອານາຈັກ. 22 ລາວຈະປາບກອງທັບທີ່ມາຄືກັບນ້ຳຖ້ວມແລະກອງທັບເຫຼົ່ານັ້ນຈະຖືກທຳລາຍ ແລ້ວຜູ້ນຳ+ຕາມສັນຍາກໍຈະຖືກຂ້າ.+ 23 ຍ້ອນຫຼາຍຄົນຈະເຂົ້າມາເປັນພັນທະມິດກັບລາວ ລາວຈຶ່ງໃຊ້ເລ່ລ່ຽມຫຼອກລວງ ແລະຂຶ້ນມາມີອຳນາດໂດຍການຊ່ວຍເຫຼືອຈາກຄົນກຸ່ມນ້ອຍໆກຸ່ມໜຶ່ງ.* 24 ໃນໄລຍະທີ່ຫຼາຍຄົນຮູ້ສຶກວ່າປອດໄພ ລາວຈະເຂົ້າໄປໃນເຂດທີ່ອຸດົມສົມບູນທີ່ສຸດຂອງແຜ່ນດິນທີ່ລາວປົກຄອງ ແລະເຮັດສິ່ງທີ່ປູ່ຍ່າຕານາຍຂອງລາວບໍ່ເຄີຍເຮັດມາກ່ອນ. ລາວເອົາເຄື່ອງຂອງທີ່ປຸ້ນມາໄດ້ປັນໃຫ້ທຸກຄົນ. ລາວຈະວາງແຜນໂຈມຕີເມືອງຕ່າງໆທີ່ມີກຳແພງອ້ອມ ແຕ່ຈະເຮັດໄດ້ໃນໄລຍະສັ້ນໆເທົ່ານັ້ນ.
25 ຈາກນັ້ນ ລາວຈະລວບລວມກຳລັງກັບຄວາມກ້າແລະກອງທັບໃຫຍ່ເພື່ອໄປຕໍ່ສູ້ກັບກະສັດທິດໃຕ້. ສ່ວນກະສັດທິດໃຕ້ກໍກຽມກອງທັບທີ່ໃຫຍ່ໆແລະເຂັ້ມແຂງຫຼາຍເພື່ອເຮັດສົງຄາມກັບລາວ. ລາວ*ຈະຢູ່ໄດ້ບໍ່ດົນ ຍ້ອນຈະມີຫຼາຍຄົນວາງແຜນຂ້າລາວ. 26 ພວກທີ່ກິນອາຫານແຊບໆໂຕະດຽວກັນກັບລາວຈະຂ້າລາວ.
ກອງທັບຂອງລາວຈະຖືກກວາດລ້າງ ແລະຫຼາຍຄົນຈະຖືກຂ້າ.
27 ກະສັດ 2 ອົງນີ້ຈະນັ່ງລົມກັນຢູ່ໂຕະ ແຕ່ເຂົາເຈົ້າຈະມີຈຸດປະສົງທີ່ບໍ່ດີ. ເຂົາເຈົ້າຈະເວົ້າຕົວະກັນ ແຕ່ແຜນການຂອງເຂົາເຈົ້າຈະບໍ່ສຳເລັດ ຍ້ອນຍັງບໍ່ຮອດເວລາກຳນົດຂອງຈຸດຈົບເທື່ອ.*+
28 ແລ້ວກະສັດທິດເໜືອຈະກັບໄປແຜ່ນດິນຂອງລາວພ້ອມກັບເຄື່ອງຂອງບັກຫຼາຍໆ ແລະລາວຄິດທີ່ຈະຕໍ່ຕ້ານສັນຍາທີ່ພະເຈົ້າເຮັດກັບປະຊາຊົນຂອງເພິ່ນ. ລາວຈະເຮັດຕາມທີ່ຕັ້ງໃຈໄວ້ ແລ້ວກໍກັບໄປແຜ່ນດິນຂອງໂຕເອງ.
29 ເມື່ອຮອດເວລາກຳນົດ ລາວຈະກັບມາຕໍ່ສູ້ກັບກະສັດທິດໃຕ້. ແຕ່ເທື່ອນີ້ຈະຕ່າງຈາກເທື່ອກ່ອນ 30 ຍ້ອນເຮືອຈາກກິດຕີມ+ຈະມາຕໍ່ສູ້ກັບລາວ ແລະລາວຈະຕ້ອງຍອມແພ້.
ລາວຈະກັບໄປແລະລະບາຍຄວາມໃຈຮ້າຍໃສ່ສັນຍາທີ່ພະເຈົ້າເຮັດກັບປະຊາຊົນຂອງເພິ່ນ.+ ລາວຈະປ່ຽນໄປສົນໃຈພວກທີ່ປະຖິ້ມສັນຍານັ້ນ. 31 ກອງທັບຂອງລາວຈະເຮັດໃຫ້ບ່ອນບໍລິສຸດເຊິ່ງເປັນບ່ອນທີ່ປອດໄພຄືກັບເມືອງທີ່ມີກຳແພງອ້ອມນັ້ນບໍ່ສະອາດ.+ ເຂົາເຈົ້າຈະເຮັດໃຫ້ການເຜົາເຄື່ອງບູຊາໃນແຕ່ລະມື້ຢຸດລົງ.+
ແລ້ວເຂົາເຈົ້າຈະເອົາສິ່ງທີ່ເປັນຕາຂີ້ດຽດທີ່ເຮັດໃຫ້ເກີດຄວາມຮ້າງເປົ່າມາຕັ້ງໄວ້.+
32 ກະສັດທິດເໜືອຈະໃຊ້ຄຳເວົ້າຫຼອກລວງເພື່ອພາຄົນທີ່ເຮັດຜິດຕໍ່ສັນຍາຂອງພະເຈົ້າໄປຜິດທາງ ແລະເຮັດໃຫ້ເຂົາເຈົ້າກະບົດຕໍ່ພະເຈົ້າ. ແຕ່ຄົນທີ່ຮູ້ຈັກພະເຈົ້າຈະເຂັ້ມແຂງແລະບໍ່ຍອມແພ້. 33 ສ່ວນຄົນທີ່ມີຄວາມເຂົ້າໃຈດີ+ຈະຊ່ວຍຫຼາຍຄົນໃຫ້ມີຄວາມເຂົ້າໃຈຄືກັນ. ເຂົາເຈົ້າຈະລົ້ມລົງໄລຍະໜຶ່ງຍ້ອນດາບ ຍ້ອນແປວໄຟ ຍ້ອນຖືກຈັບໄປເປັນຊະເລີຍ ແລະຍ້ອນຖືກປຸ້ນ. 34 ແຕ່ເມື່ອລົ້ມລົງ ເຂົາເຈົ້າຈະໄດ້ຮັບຄວາມຊ່ວຍເຫຼືອໜ້ອຍໜຶ່ງ ແລະຫຼາຍຄົນຈະສະໜັບສະໜູນເຂົາເຈົ້າດ້ວຍຄຳເວົ້າທີ່ບໍ່ຈິງໃຈ. 35 ບາງຄົນທີ່ມີຄວາມເຂົ້າໃຈດີຈະລົ້ມລົງ ແລະຍ້ອນແນວນັ້ນ ຜູ້ຄົນຈະຖືກເຮັດໃຫ້ບໍລິສຸດແລະສະອາດ+ຈົນຮອດເວລາທີ່ກຳນົດໄວ້. ແຕ່ເວລານັ້ນຍັງບໍ່ທັນມາຮອດເທື່ອ.
36 ກະສັດທິດເໜືອຈະເຮັດຕາມໃຈໂຕເອງ. ລາວຈະຕັ້ງໂຕເປັນໃຫຍ່ແລະຍົກໂຕໃຫ້ສູງກວ່າພະເຈົ້າທຸກອົງ. ລາວຈະດູຖູກພະເຈົ້າອົງສູງສຸດ*+ໃນແບບທີ່ເຮັດໃຫ້ຫຼາຍຄົນຕົກໃຈ. ລາວຈະເຮັດສຳເລັດຈົນຮອດມື້ທີ່ພະເຈົ້າຈະລົງໂທດລາວ ຍ້ອນພະເຈົ້າຕັ້ງໃຈໄວ້ແລ້ວວ່າຈະເຮັດແບບນັ້ນ. 37 ລາວຈະບໍ່ນັບຖືພະເຈົ້າຂອງປູ່ຍ່າຕານາຍຂອງລາວ ບໍ່ສົນໃຈຄວາມຕ້ອງການຂອງພວກຜູ້ຍິງ ແລະບໍ່ສົນໃຈພະເຈົ້າອົງອື່ນໆ ແຕ່ລາວຈະຍົກໂຕເອງໃຫ້ສູງກວ່າທຸກຄົນ. 38 ລາວຈະຍົກຍ້ອງພະເຈົ້າຂອງປ້ອມຕ່າງໆແທນ ເຊິ່ງເປັນພະເຈົ້າທີ່ປູ່ຍ່າຕານາຍຂອງລາວບໍ່ຮູ້ຈັກ. ລາວຈະເອົາເງິນ ຄຳ ເພັດນິນຈິນດາ ແລະສິ່ງຕ່າງໆທີ່ມີຄ່າໃຫ້ພະເຈົ້າອົງນັ້ນ. 39 ລາວຈະໂຈມຕີປ້ອມທີ່ແຂງແຮງທີ່ສຸດໄດ້ສຳເລັດຍ້ອນພະເຈົ້າອົງໃໝ່ນັ້ນຊ່ວຍລາວ. ລາວຈະຍົກຍ້ອງຄົນທີ່ໃຫ້ກຽດລາວ ແລະລາວຈະໃຫ້ເຂົາເຈົ້າປົກຄອງຄົນຈຳນວນຫຼາຍ. ລາວຈະແບ່ງດິນຂາຍໃຫ້ຄົນອື່ນ.
40 ໃນສະໄໝສຸດທ້າຍກະສັດທິດໃຕ້ກັບກະສັດທິດເໜືອຈະຕໍ່ສູ້ກັນ. ກະສັດທິດເໜືອຈະລວບລວມລົດຮົບ ທະຫານມ້າ ແລະເຮືອຫຼາຍລຳເພື່ອໂຈມຕີກະສັດທິດໃຕ້. ລາວຈະເຂົ້າໄປດິນແດນຕ່າງໆແລະກວາດລ້າງຄືກັບ ທີ່ນ້ຳມາຖ້ວມ. 41 ລາວຈະເຂົ້າໄປໃນແຜ່ນດິນທີ່ສວຍງາມ+ ແລະລາວຈະເອົາຊະນະຫຼາຍດິນແດນ. ແຕ່ເອໂດມ ໂມອາບ ແລະພວກຄົນສຳຄັນຂອງຄົນອຳໂມນຈະໜີລອດຈາກລາວໄດ້. 42 ລາວຈະໃຊ້ອຳນາດຂອງລາວຕໍ່ໆໄປເພື່ອໂຈມຕີດິນແດນຕ່າງໆ ແມ່ນແຕ່ເອຢິບກໍຈະບໍ່ລອດ. 43 ລາວຈະຄອບຄອງເງິນ ຄຳ ແລະທຸກສິ່ງທີ່ມີຄ່າເຊິ່ງເປັນຊັບສົມບັດຂອງເອຢິບທີ່ຖືກເຊື່ອງໄວ້. ຄົນລີເບຍກັບຄົນເອທິໂອເປຍຈະເຮັດຕາມທີ່ລາວສັ່ງ.*
44 ແຕ່ຈະມີຂ່າວມາຈາກທິດຕາເວັນອອກແລະທິດເໜືອທີ່ເຮັດໃຫ້ລາວວຸ່ນວາຍໃຈ. ແລ້ວລາວຈະອອກໄປດ້ວຍຄວາມໃຈຮ້າຍຫຼາຍເພື່ອຂ້າແລະທຳລາຍຫຼາຍຄົນ. 45 ລາວຈະຕັ້ງເຕັ້ນຂອງກະສັດຢູ່ລະຫວ່າງທະເລໃຫຍ່ກັບພູບໍລິສຸດໃນແຜ່ນດິນທີ່ສວຍງາມ.+ ແຕ່ໃນທີ່ສຸດ ລາວກໍຈະຖືກທຳລາຍ ແລະຈະບໍ່ມີໃຜຊ່ວຍລາວໄດ້.”
12 “ໃນເວລານັ້ນ ມີກາເອນ*+ເຈົ້ານາຍອົງຍິ່ງໃຫຍ່+ຈະລຸກຂຶ້ນ*ແລະເຮັດໜ້າທີ່ຂອງລາວເພື່ອຄົນຊາດດຽວກັນກັບເຈົ້າ. ເລື່ອງນີ້ຈະເກີດຂຶ້ນໃນເວລາທີ່ທຸກຍາກລຳບາກ ເຊິ່ງບໍ່ເຄີຍເກີດຂຶ້ນມາກ່ອນນັບຕັ້ງແຕ່ເລີ່ມມີຊາດໜຶ່ງຈົນຮອດປັດຈຸບັນນີ້. ໃນຕອນນັ້ນ ຄົນຊາດດຽວກັນກັບເຈົ້າທີ່ມີຊື່ຂຽນໄວ້ໃນປຶ້ມຂອງພະເຈົ້າຈະລອດ.+ 2 ຫຼາຍຄົນທີ່ຕາຍໄປແລ້ວຈະຟື້ນຄືນມາ. ບາງຄົນຈະຟື້ນຄືນມາເພື່ອມີຊີວິດຕະຫຼອດໄປ ແຕ່ບາງຄົນຈະຟື້ນຄືນມາເພື່ອຮັບຄວາມອັບອາຍຕະຫຼອດໄປ.
3 ຄົນທີ່ມີຄວາມເຂົ້າໃຈດີຈະສ່ອງແສງຄືກັບທ້ອງຟ້າທີ່ແຈ້ງໆໃນຕອນກາງເວັນ ແລະຄົນທີ່ຊ່ວຍຫຼາຍຄົນໃຫ້ເຮັດສິ່ງທີ່ຖືກຕ້ອງຈະສ່ອງແສງຕະຫຼອດໄປຄືກັບດາວ.
4 ສ່ວນເຈົ້າດານີເອນ ໃຫ້ຈ້ຳກາປິດປຶ້ມນີ້ໄວ້ ແລະເກັບເລື່ອງນີ້ໄວ້ເປັນຄວາມລັບຈົນຮອດສະໄໝສຸດທ້າຍ.+ ຫຼາຍຄົນຈະຄົ້ນຄວ້າປຶ້ມນັ້ນຢ່າງລະອຽດ ແລະຄວາມຮູ້ແທ້ຈະມີຫຼາຍແທ້ຫຼາຍວ່າ.+
5 ຈາກນັ້ນ ຂ້ອຍດານີເອນກໍເຫັນອີກ 2 ຄົນຢືນຢູ່ໃກ້ໆແມ່ນ້ຳ. ຜູ້ໜຶ່ງຢືນຢູ່ແຄມຝັ່ງເບື້ອງນີ້ ແລະອີກຜູ້ໜຶ່ງຢືນຢູ່ແຄມຝັ່ງເບື້ອງນັ້ນ.+ 6 ແລ້ວຜູ້ໜຶ່ງກໍຖາມຜູ້ທີ່ນຸ່ງເຄື່ອງທີ່ເປັນຜ້າລີນິນ+ເຊິ່ງຢືນຢູ່ເທິງໜ້ານ້ຳວ່າ “ເລື່ອງທີ່ໜ້າງຶດງໍ້ນີ້ຈະຈົບລົງຕອນໃດ?” 7 ຜູ້ທີ່ນຸ່ງເຄື່ອງທີ່ເປັນຜ້າລີນິນເຊິ່ງຢືນຢູ່ເທິງໜ້ານ້ຳໄດ້ຍົກມື 2 ເບື້ອງຂຶ້ນຟ້າ ແລະຂ້ອຍກໍໄດ້ຍິນລາວສາບານຕໍ່ພະເຈົ້າຜູ້ມີຊີວິດຢູ່ຕະຫຼອດໄປວ່າ+ “ເຫດການທັງໝົດນີ້ຈະຈົບລົງເມື່ອຄົບ 3 ປີເຄິ່ງ* ຫຼັງຈາກທີ່ມີການທຳລາຍອຳນາດຂອງພວກທີ່ຖືກເລືອກ.”+
8 ຂ້ອຍໄດ້ຍິນສິ່ງທີ່ລາວເວົ້າ ແຕ່ກໍບໍ່ເຂົ້າໃຈຄວາມໝາຍ.+ ຂ້ອຍຈຶ່ງຖາມລາວວ່າ “ທ່ານເອີ້ຍ ເລື່ອງນີ້ຈະຈົບລົງແນວໃດ?”
9 ລາວຕອບວ່າ “ດານີເອນເອີ້ຍ ສິ່ງທີ່ຂຽນໄວ້ໃນປຶ້ມນີ້ຈະຕ້ອງຈ້ຳກາປິດໄວ້ ແລະເກັບໄວ້ເປັນຄວາມລັບຈົນຮອດສະໄໝສຸດທ້າຍ.+ 10 ຫຼາຍຄົນຈະເຮັດໃຫ້ໂຕເອງສະອາດແລະບໍລິສຸດ+ ແຕ່ຄົນຊົ່ວຈະເຮັດຊົ່ວຕໍ່ໄປ. ຄົນຊົ່ວຈະບໍ່ເຂົ້າໃຈເລື່ອງເຫຼົ່ານີ້ ແຕ່ຄົນທີ່ຮູ້ຈັກຄິດຈະເຂົ້າໃຈ.+
11 ມັນຈະເປັນເວລາ 1.290 ມື້ ນັບຕັ້ງແຕ່ຕອນທີ່ເຊົາເຜົາເຄື່ອງບູຊາໃນແຕ່ລະມື້+ແລະຕອນທີ່ເອົາສິ່ງທີ່ເປັນຕາຂີ້ດຽດເຊິ່ງເຮັດໃຫ້ເກີດຄວາມຮ້າງເປົ່າມາຕັ້ງໄວ້.+
12 ຄົນທີ່ອົດທົນລໍຖ້າຈົນຮອດ 1.335 ມື້ຈະມີຄວາມສຸກ.
13 ສ່ວນເຈົ້າດານີເອນ ໃຫ້ເຈົ້າສັດຊື່ຈົນຮອດມື້ຕາຍ. ເຈົ້າຈະໄປພັກຜ່ອນ ແຕ່ເຈົ້າຈະລຸກຂຶ້ນມາຮັບສ່ວນແບ່ງ*ຂອງເຈົ້າເມື່ອຮອດເວລາ.”+
ແປຕາມໂຕວ່າ “ຊີນາ”
ແປຕາມໂຕວ່າ “ອາຫານດີໆແບບດຽວກັບທີ່ກະສັດກິນ”
ຫຼືອາດແປວ່າ “ລ້ຽງດູ”
ແປວ່າ “ພະເຈົ້າເປັນຜູ້ຕັດສິນຂອງຂ້ອຍ”
ແປວ່າ “ພະເຢໂຫວາພໍໃຈ”
ອາດແປວ່າ “ໃຜຈະເປັນຄືກັບພະເຈົ້າ?”
ແປວ່າ “ພະເຢໂຫວາຊ່ວຍ”
ໝາຍເຖິງຊື່ໃນພາສາຂອງຄົນບາບີໂລນ
ໃນພາສາເຮັບເຣີອາດໝາຍເຖິງອາຫານເຈ
ອາດໝາຍເຖິງປີທຳອິດທີ່ໄຊຣັດເປັນຜູ້ປົກຄອງບາບີໂລນ
ໃນຕົ້ນສະບັບຕັ້ງແຕ່ ດນອ 2:4ຂ ຫາ 7:28 ຂຽນເປັນພາສາອາຣາເມອິກ
ຫຼືອາດແປວ່າ “ບ່ອນຖິ້ມຂີ້ເຫຍື້ອ; ກອງຂີ້ສັດ”
26,7 ແມັດ. ເບິ່ງພາກຜະໜວກ ຂ14.
2,67 ແມັດ
ຫຼື “ຄວາມຮູ້ສຶກດີໆທີ່ມີຕໍ່ເຂົາເຈົ້າກໍໝົດໄປ”
ຫຼືອາດແປວ່າ “ບ່ອນຖິ້ມຂີ້ເຫຍື້ອ; ກອງຂີ້ສັດ”
ແປຕາມໂຕວ່າ “ຜູ້ເຝົ້າເບິ່ງ”
ແປຕາມໂຕວ່າ “7 ວາລະ”
ອາດແປວ່າ “ພໍ່ຕູ້; ຜູ້ທີ່ປົກຄອງກ່ອນໜ້າ”
ເບິ່ງສ່ວນອະທິບາຍຄຳສັບ
ຫຼື “ສີໜ້າຂອງກະສັດກໍປ່ຽນໄປ”
ສີມ່ວງເປັນສີຂອງກະສັດແລະຍັງສະແດງເຖິງຄວາມຮັ່ງມີແລະກຽດຕິຍົດ
ອາດໝາຍເຖິງແມ່ຂອງກະສັດ
ຫຼື “ຄົນທີ່ມີຄວາມສາມາດ”
ແປຕາມໂຕວ່າ “ແກ້ຂອດໄດ້”
ອາດແປວ່າ “ຫຼານຊາຍ; ຜູ້ສືບທອດບັນລັງ”
ໃນພາສາອາຣາເມອິກຄຳວ່າ “ເປເຣັດ” ເປັນຮູບແບບຄຳທີ່ມີຈຳນວນໜ້ອຍຂອງຄຳວ່າ “ປາສິນ” ໃນຂໍ້ 25
ຫຼື “ໃສ່ຮ້າຍ”
ແປຕາມໂຕວ່າ “ໃຊ້ກົດໝາຍຂອງພະເຈົ້າຂອງລາວ”
ຫຼື “ເວົ້າຂີ້ໂມ້”
ໝາຍເຖິງສານໃນສະຫວັນ
ຫຼື “1 ວາລະ ແລະ 2 ວາລະ ແລະເຄິ່ງວາລະ”
ຫຼື “ຮ່ອງ”
ຫຼື “ແຜ່ນດິນທີ່ຕົກແຕ່ງງາມ”
ອາດໝາຍເຖິງສະຫວັນ
ແປຕາມໂຕວ່າ “ຕອນແລງກັບຕອນເຊົ້າ”
ຫຼື “ເກັ່ງໃນການວາງແຜນຊົ່ວ”
ຫຼື “ຂຶ້ນມາປົກຄອງ”
ຫຼື “ເຮັດໃຫ້ເກີດຄວາມຈິບຫາຍ”
ຫຼືອາດແປວ່າ “ບໍ່ໄດ້ເຕືອນກ່ອນ”
ແປຕາມໂຕວ່າ “ນິມິດກ່ຽວກັບຕອນແລງແລະຕອນເຊົ້າ”
ແປຕາມໂຕວ່າ “ລູກຫຼານຂອງຄົນເມເດຍ”
ໝາຍເຖິງມ້ວນໜັງສືສັກສິດຫຼາຍມ້ວນ
ແປຕາມໂຕວ່າ “ພວກຜູ້ຕັດສິນ”
ຫຼື “ພະອົງສັດຊື່ສະເໝີ”
ຫຼື “ເປັນຕານັບຖືຫຼາຍ”
ໃນນີ້ 1 ອາທິດເທົ່າກັບ 7 ປີ
ແປຕາມໂຕວ່າ “ຜູ້ພະຍາກອນ”
ອາດໝາຍເຖິງບ່ອນຢູ່ຂອງພະເຈົ້າໃນສະຫວັນ
ຫຼື “ຜູ້ຖືກເລືອກ.” ເບິ່ງຄຳວ່າ “ເມຊີອາ” ໃນສ່ວນອະທິບາຍຄຳສັບ.
ໝາຍເຖິງເມຊີອາ
ແປຕາມໂຕວ່າ “ຮິດເດເຄນ”
ຫຼື “ເປັນຕານັບຖືຫຼາຍ”
ແປວ່າ “ໃຜຈະຄືກັບພະເຈົ້າ?”
ແປຕາມໂຕວ່າ “ລາວ”
ຫຼື “ລາວຈະປົກຄອງອານາຈັກທີ່ກວ້າງໃຫຍ່”
ໝາຍເຖິງກະສັດທິດເໜືອ
ໝາຍເຖິງກະສັດທິດໃຕ້
ໝາຍເຖິງກະສັດທິດໃຕ້
ແປຕາມໂຕວ່າ “ລາວ”
ໝາຍເຖິງກະສັດທິດເໜືອ
ໝາຍເຖິງກະສັດທິດໃຕ້
ຫຼື “ພວກລູກຊາຍຂອງໂຈນ”
ແປຕາມໂຕວ່າ “ສະດຸດ”
ໝາຍເຖິງກະສັດທິດເໜືອ
ຫຼື “ຫົວໜ້າຄົນງານ”
ໝາຍເຖິງກະສັດທິດເໜືອ
ຫຼືອາດແປວ່າ “ບໍ່ໄດ້ເຕືອນກ່ອນ”
ແປຕາມໂຕວ່າ “ຊາດນ້ອຍໆຊາດໜຶ່ງ”
ອາດໝາຍເຖິງກະສັດທິດເໜືອ
ຫຼື “ຍ້ອນຈຸດຈົບຈະມາພາຍຫຼັງຕາມເວລາທີ່ກຳນົດໄວ້.” ແປຕາມໂຕວ່າ “ຍ້ອນຈຸດຈົບຍັງບໍ່ມາຮອດຕາມທີ່ກຳນົດໄວ້.”
ແປຕາມໂຕວ່າ “ພະເຈົ້າຂອງພະເຈົ້າທັງໝົດ”
ຫຼື “ຈະຕິດຕາມລາວ”
ແປວ່າ “ໃຜຈະຄືກັບພະເຈົ້າ?”
ຫຼື “ປົກຄອງ”
ຫຼື “1 ວາລະ ແລະ 2 ວາລະ ແລະເຄິ່ງວາລະ”
ຫຼື “ລາງວັນ”