ບົດ 6
ລູກຊາຍທີ່ດີ ແລະລູກຊາຍທີ່ບໍ່ດີ
ບັດນີ້ຂໍແລເບິ່ງກາອີນແລະອາເບນ. ເຂົາທັງສອງເຕີບໂຕເປັນຜູ້ໃຫຍ່ແລ້ວ. ກາອີນເປັນຄົນເຮັດໄຮ່ເຮັດນາ. ເຂົາເພາະປູກເຂົ້າແລະຕົ້ນໝາກໄມ້ແລະພືດຜັກຕ່າງໆ.
ອາເບນເປັນຄົນລ້ຽງແກະ. ເຂົາມັກເບິ່ງແຍງລ້ຽງດູແກະນ້ອຍໆ. ລູກແກະເຕີບໂຕຂຶ້ນເປັນແກະໃຫຍ່ ແລະດັ່ງນັ້ນບໍ່ຊ້າອາເບນກໍ່ມີຝູງແກະທີ່ຈະດູແລເອົາໃຈໃສ່.
ມື້ນຶ່ງກາອີນແລະອາເບນນຳເອົາຂອງຂວັນມາຖວາຍແກ່ພະເຈົ້າ. ກາອີນໄດ້ນຳເອົາພືດຜົນບາງຢ່າງທີ່ເຂົາໄດ້ປູກມາຖວາຍ. ແລະອາເບນນຳເອົາແກະທີ່ດີທີ່ສຸດທີ່ເຂົາມີມາຖວາຍ. ພະເຢໂຫວາພໍໃຈກັບອາເບນແລະຂອງຖວາຍຂອງເຂົາ. ແຕ່ພະເຢໂຫວາບໍ່ພໍໃຈກັບກາອີນແລະຂອງຖວາຍຂອງເຂົາ. ເປັນຫຍັງເຈົ້າຮູ້ບໍ?
ບໍ່ແມ່ນພຽງແຕ່ເພາະຂອງຖວາຍຂອງອາເບນນັ້ນດີກວ່າຂອງຖວາຍຂອງກາອີນ. ແຕ່ເພາະວ່າອາເບນເປັນຄົນດີ. ເຂົາຮັກພະເຢໂຫວາແລະຮັກອ້າຍຂອງເຂົາ. ສ່ວນກາອີນເປັນຄົນບໍ່ດີ; ເຂົາບໍ່ຮັກນ້ອງຊາຍຂອງເຂົາ.
ດັ່ງນັ້ນ ພະເຈົ້າຈຶ່ງບອກໃຫ້ກາອີນປ່ຽນນິດໄສຂອງຕົນ. ແຕ່ກາອີນບໍ່ຟັງ. ເຂົາຄຽດຫຼາຍເພາະວ່າພະເຈົ້າພໍໃຈອາເບນຫຼາຍກວ່າ. ເຊັ່ນນັ້ນ ກາອີນຈຶ່ງເວົ້າກັບອາເບນວ່າ: ‘ໃຫ້ເຮົາໄປທີ່ທົ່ງນານຳກັນ.’ ຂະນະທີ່ເຂົາທັງສອງຢູ່ທີ່ນັ້ນຕາມລຳພັງ ກາອີນຈຶ່ງທຸບຕີອາເບນນ້ອງຊາຍຂອງຕົນ. ເຂົາທຸບຕີສຸດແຮງຈົນເຖິງອາເບນຕາຍ. ການທີ່ກາອີນເຮັດເຊັ່ນນັ້ນເປັນສິ່ງຮ້າຍຂາດແມ່ນບໍ?
ເຖິງແມ່ນວ່າອາເບນຕາຍໄປກໍ່ຕາມ ພະເຈົ້າຍັງຄົງລະລຶກເຖິງເຂົາຢູ່. ອາເບນເປັນຄົນດີ ແລະພະເຢໂຫວາບໍ່ລືມຄົນຢ່າງນັ້ນຈັກເທື່ອ. ຈະມີມື້ນຶ່ງຊຶ່ງພະເຢໂຫວາຈະນຳອາເບນໃຫ້ກັບຄືນມີຊີວິດອີກ. ສະໄໝນັ້ນອາເບນຈະບໍ່ຕ້ອງຕາຍອີກເລີຍ. ເຂົາຈະສາມາດມີຊີວິດຢູ່ເທິງແຜ່ນດິນໂລກຕະຫຼອດໄປ. ຈະເປັນການດີຫຼາຍປານໃດທີ່ຈະຮູ້ຈັກກັບຄົນເຊັ່ນອາເບນ?
ແຕ່ພະເຈົ້າບໍ່ພໍໃຈກັບຄົນແບບກາອີນ. ຫຼັງຈາກກາອີນຂ້ານ້ອງຊາຍຂອງຕົນ ພະເຈົ້າລົງໂທດເຂົາໂດຍສົ່ງເຂົາໄປຢູ່ຫ່າງໄກຈາກຄອບຄົວຂອງເຂົາ. ເມື່ອກາອີນໄປຢູ່ອີກສ່ວນນຶ່ງຂອງໂລກ ເຂົານຳນ້ອງສາວຂອງຕົນໄປດ້ວຍແລະນາງໄດ້ກາຍເປັນເມຍຂອງເຂົາ.
ເວລາຕໍ່ມາກາອີນແລະເມຍຂອງເຂົາກໍ່ມີລູກ. ຝ່າຍລູກຊາຍແລະລູກຍິງອື່ນໆຂອງອາດາມແລະເອວາຕ່າງກໍ່ໄດ້ແຕ່ງດອງກັນ ແລະພວກເຂົາກໍ່ມີລູກໆເຊັ່ນກັນ. ບໍ່ຊ້າບໍ່ນານຈຶ່ງມີຜູ້ຄົນຫຼາຍເທິງແຜ່ນດິນໂລກ. ໃຫ້ເຮົາມາຮຽນຮູ້ກ່ຽວກັບບາງຄົນໃນພວກເຂົາ.
ຕົ້ນເດິມ 4:2-26; 1 ໂຍຮັນ 3:11, 12; ໂຍຮັນ 11:25.