ບົດ 9
ໂນເອສ້າງນາວາຫຼືຫີບມະຫຶມາ
ໂນເອມີເມຍແລະລູກຊາຍສາມຄົນ. ລູກຊາຍຂອງເຂົາຊື່ ເຊມ ກຳແລະຢາເຟດ. ແລະລູກຊາຍແຕ່ລະຄົນມີເມຍແລ້ວ. ດັ່ງນັ້ນຈຶ່ງມີແປດຄົນໃນຄອບຄົວຂອງໂນເອ.
ບັດນີ້ພະເຈົ້າສັ່ງໃຫ້ໂນເອເຮັດສິ່ງທີ່ແປກຢ່າງນຶ່ງ. ພະອົງບອກໃຫ້ເຂົາສ້າງຫີບຂະໜາດໃຫຍ່. ຫີບນີ້ໃຫຍ່ໂຕເທົ່າກັບເຮືອ ແຕ່ວ່າເມື່ອແລເບິ່ງແລ້ວກໍ່ຄ້າຍກັບຫີບຍາວຂະໜາດໃຫຍ່. ພະເຈົ້າກ່າວວ່າ: ‘ຈົ່ງສ້າງໃຫ້ສູງສາມຊັ້ນ ແລະຂ້າງໃນໃຫ້ຂັ້ນເປັນຫ້ອງໆ.’ ຫ້ອງເຫຼົ່ານັ້ນສ້າງສຳລັບໂນເອແລະຄອບຄົວຂອງເຂົາ ສຳລັບສັດ ແລະເປັນບ່ອນເກັບອາຫານທຸກຢ່າງທີ່ຈຳເປັນ.
ພະເຈົ້າບອກໃຫ້ໂນເອເອົາຢາງຂີ້ຊີຈອດທາງໃນແລະທາງນອກຫີບເພື່ອປ້ອງກັນບໍ່ໃຫ້ນ້ຳຮົ່ວເຂົ້າໄປ. ພະເຈົ້າກ່າວວ່າ: ‘ເຮົາຈະເຮັດໃຫ້ເກີດນ້ຳຖ້ວມໃຫຍ່ ແລະຈະທຳລາຍສິ່ງທັງໝົດໃນໂລກ. ທຸກຄົນທີ່ບໍ່ຢູ່ໃນເຮືອນາວາຈະຕາຍ.’
ໂນເອແລະລູກຂອງເຂົາໄດ້ເຊື່ອຟັງພະເຢໂຫວາແລະໄດ້ເລີ່ມລົງມືສ້າງ. ແຕ່ສ່ວນຄົນອື່ນໆກໍ່ພາກັນຫົວຂວັນ. ພວກເຂົາຕັ້ງໜ້າເຮັດຊົ່ວຕໍ່ໄປ. ເມື່ອໂນເອບອກເຂົາເຖິງສິ່ງທີ່ພະເຈົ້າຈະກະທຳບໍ່ມີຜູ້ໃດໄດ້ເຊື່ອຟັງເຂົາເລີຍ.
ການສ້າງຫີບຫຼືເຮືອນາວາຕ້ອງໃຊ້ເວລາຍາວນານເພາະມັນມີຂະໜາດໃຫຍ່. ໃນທີ່ສຸດພາຍຫຼັງຫຼາຍປີຫີບນັ້ນກໍ່ສຳເລັດ. ບັດນີ້ພະເຈົ້າບອກໂນເອໃຫ້ນຳເອົາສັດເຂົ້າໃນເຮືອນາວານັ້ນ. ພະເຈົ້າບອກໃຫ້ນຳເອົາສັດບາງຊະນິດເຂົ້າມາຢ່າງລະຄູ່ທັງຕົວເຖິກແລະຕົວແມ່. ແຕ່ສັດຊະນິດອື່ນໆພະເຈົ້າບອກໂນເອໃຫ້ນຳເອົາເຂົ້າມາຢ່າງລະເຈັດຕົວ. ພະເຈົ້າບອກໂນເອໃຫ້ນຳເອົານົກທຸກຊະນິດເຂົ້າມາດ້ວຍ. ພະເຈົ້າບອກໃຫ້ໂນເອເຮັດຢ່າງໃດໂນເອກໍ່ເຮັດຢ່າງນັ້ນ.
ຕໍ່ມາໂນເອແລະຄອບຄົວຂອງເຂົາໄດ້ເຂົ້າໄປໃນຫີບຫຼືເຮືອນາວາດ້ວຍ. ແລ້ວພະເຈົ້າຈຶ່ງປິດປະຕູ. ໂນເອແລະຄອບຄົວຂອງເຂົາກໍ່ລໍຖ້າຢູ່ຂ້າງໃນ. ຈົ່ງລອງນຶກເບິ່ງວ່າເຈົ້າຢູ່ໃນເຮືອນາວານຳພວກເຂົາ ແລະລໍຖ້າ. ຈະມີນ້ຳຖ້ວມຕາມທີ່ພະເຈົ້າກ່າວໄວ້ແທ້ໆບໍ?