ບົດ 14
ພະເຈົ້າທົດລອງຄວາມເຊື່ອຂອງອັບລາຫາມ
ເຈົ້າເຫັນບໍວ່າອັບລາຫາມພວມເຮັດຫຍັງຢູ່ທີ່ນີ້? ເຂົາມີມີດດວງນຶ່ງ ແລະເບິ່ງຄືວ່າເຂົາພວມຈະຂ້າລູກຊາຍຂອງເຂົາ. ເປັນຫຍັງເຂົາຈຶ່ງຈະເຮັດເຊັ່ນນັ້ນ? ກ່ອນອື່ນ ໃຫ້ເຮົາພິຈາລະນາເບິ່ງວ່າອັບລາຫາມແລະຊາລາໄດ້ລູກຊາຍໂດຍວິທີໃດ?
ຢ່າລືມ ພະເຈົ້າໄດ້ສັນຍາວ່າພວກເຂົາຈະມີລູກຊາຍ. ແຕ່ເລື່ອງນັ້ນເບິ່ງຄືວ່າເປັນໄປບໍ່ໄດ້ ເພາະອັບລາຫາມແລະຊາລາກໍ່ເຖົ້າຫຼາຍແລ້ວ. ຢ່າງໃດກໍ່ດີ ອັບລາຫາມເຊື່ອວ່າພະເຈົ້າສາມາດກະທຳໄດ້ແມ່ນເບິ່ງຄືວ່າເປັນສິ່ງທີ່ເປັນໄປບໍ່ໄດ້. ດັ່ງນັ້ນມີອັນໃດເກີດຂຶ້ນ?
ປີນຶ່ງຜ່ານໄປຫຼັງຈາກພະເຈົ້າໄດ້ສັນຍາ. ຄັນອັບລາຫາມອາຍຸໄດ້ 100 ປີແລະຊາລາອາຍຸໄດ້ 90 ປີພວກເຂົາໄດ້ລູກຊາຍຊື່ວ່າອີຊາກ. ພະເຈົ້າໄດ້ຮັກສາຄຳສັນຍາຂອງພະອົງ!
ແຕ່ເມື່ອອີຊາກໂຕຂຶ້ນ ພະເຢໂຫວາໄດ້ທົດລອງເບິ່ງຄວາມເຊື່ອຂອງອັບລາຫາມ. ພະອົງເອີ້ນ ‘ອັບລາຫາມ!’ ແລະອັບລາຫາມຂານຕອບວ່າ: ‘ຂ້າພະເຈົ້າຢູ່ທີ່ນີ້!’ ແລ້ວພະເຈົ້າກ່າວວ່າ: ‘ຈົ່ງພາອີຊາກລູກຊາຍຄົນດຽວຂອງເຈົ້າໄປເທິງພູເຂົາແຫ່ງນຶ່ງທີ່ເຮົາຈະຊີ້ໃຫ້ເຈົ້າ. ຈົ່ງຂ້າລູກຊາຍຂອງເຈົ້າແລະຖວາຍເປັນເຄື່ອງບູຊາເຜົາທີ່ນັ້ນ.’
ຄຳຕັດເຫຼົ່ານັ້ນເຮັດໃຫ້ອັບລາຫາມເສົ້າໃຈເຖິງຂະໜາດໃດ ເພາະວ່າອັບລາຫາມກໍ່ຮັກລູກຊາຍຫຼາຍທີ່ສຸດ. ແລະຈົ່ງຈື່ໄວ້ວ່າ ພະເຈົ້າໄດ້ສັນຍາທີ່ວ່າລູກຫຼານຂອງອັບລາຫາມຈະໄດ້ທີ່ຢູ່ອາໄສໃນແຜ່ນດິນການາອານ. ແຕ່ການນັ້ນຈະເປັນໄດ້ຢ່າງໃດຫາກວ່າອີຊາກຕາຍ? ອັບລາຫາມບໍ່ເຂົ້າໃຈ ແຕ່ທ່ານກໍ່ຍັງເຊື່ອຟັງພະເຈົ້າ.
ເມື່ອເຂົາໄປເຖິງພູເຂົາແລ້ວ ອັບລາຫາມຜູກມັດອີຊາກແລະວາງເຂົາໄວ້ເທິງແທ່ນບູຊາທີ່ເຂົາໄດ້ກໍ່ໄວ້ນັ້ນ. ແລ້ວຈັບເອົາມີດອອກມາຈະຂ້າລູກຂອງຕົນ. ພໍດີໃນຂະນະນັ້ນເອງທູດສະຫວັນຂອງພະເຈົ້າເອີ້ນວ່າ: ‘ອັບລາຫາມ ອັບລາຫາມ!’ ແລະອັບລາຫາມຂານຕອບວ່າ: ‘ຂ້າພະເຈົ້າຢູ່ທີ່ນີ້!’
ພະເຈົ້າກ່າວວ່າ: ‘ຢ່າເຮັດອັນຕະລາຍຕໍ່ລູກຊາຍຫຼືຢ່າເຮັດອັນນຶ່ງອັນໃດແກ່ເຂົາເລີຍ. ບັດນີ້ເຮົາຮູ້ແລ້ວວ່າເຈົ້າມີຄວາມເຊື່ອໃນເຮົາ ເພາະວ່າເຈົ້າບໍ່ໄດ້ຫວງລູກຊາຍຂອງເຈົ້າ ລູກຊາຍຄົນດຽວຂອງເຈົ້າໄວ້ຈາກເຮົາ.’
ອັບລາຫາມມີຄວາມເຊື່ອໃນພະເຈົ້າຢ່າງໃຫຍ່ຫຼວງ. ເຂົາເຊື່ອວ່າບໍ່ມີສິ່ງໃດເປັນໄປບໍ່ໄດ້ສຳລັບພະເຢໂຫວາ ແລະເຊື່ອວ່າພະເຢໂຫວາສາມາດເຖິງກັບປຸກອີຊາກໃຫ້ຄືນມາຈາກຕາຍໄດ້. ແຕ່ວ່າບໍ່ແມ່ນນ້ຳພະໄທແທ້ໆຂອງພະເຈົ້າທີ່ຈະໃຫ້ອັບລາຫາມຂ້າອີຊາກ. ດັ່ງນັ້ນພະເຈົ້າໄດ້ບັນດານໃຫ້ມີແກະຕົວນຶ່ງຖືກກ່ຽວຕິດກັບພຸ່ມໄມ້ໃກ້ໆນັ້ນ ແລະພະອົງບອກອັບລາຫາມໃຫ້ເອົາແກະນັ້ນມາຖວາຍເປັນເຄື່ອງບູຊາແທນລູກຂອງເຂົາ.