ບົດ 80
ປະຊາຊົນຂອງພະເຈົ້າອອກຈາກບາບີໂລນ
ເກືອບສອງປີຜ່ານໄປ ຕັ້ງແຕ່ບາບີໂລນຖືກຍຶດໂດຍຊາວແມດແລະຊາວເປເຣເຊ. ມີຫຍັງພວມເກີດຂຶ້ນໃນຕອນນີ້! ແມ່ນແລ້ວ ຊົນຍິດສະລາເອນພວມອອກເດີນທາງຈາກບາບີໂລນ. ພວກເຂົາໄດ້ຮັບການປົດປ່ອຍຢ່າງໃດ? ຜູ້ໃດໃຫ້ພວກເຂົາອອກໄປ?
ຊີຣຶເຊກະສັດແຫ່ງເປເຣເຊໄດ້ອະນຸຍາດໃຫ້ໄປ. ດົນກ່ອນທີ່ຊີຣຶເຊມາເກີດ ພະເຢໂຫວາໄດ້ໃຫ້ຜູ້ທຳນວາຍເອຊາອີບັນທຶກໄວ້ເຖິງທ່ານວ່າ: ‘ເຈົ້າຈະເຮັດຕາມທີ່ເຮົາຕ້ອງການໃຫ້ເຈົ້າເຮັດ. ປະຕູຈະຖືກເປີດປະໄວ້ສຳລັບເຈົ້າທີ່ຈະເຂົ້າໄປຍຶດເອົາເມືອງນັ້ນ.’ ແລະຊີຣຶເຊກໍ່ໄດ້ນຳໜ້າໃນການຍຶດເອົານະຄອນບາບີໂລນ. ຊາວແມດແລະຊາວເປເຣເຊເຂົ້າໄປໃນນະຄອນນັ້ນຕອນກາງຄືນຜ່ານທາງປະຕູທີ່ໄດ້ເປີດປະໄວ້ນັ້ນ.
ແຕ່ເອຊາອີຜູ້ທຳນວາຍຂອງພະເຢໂຫວາກໍ່ຍັງກ່າວດ້ວຍວ່າ ຊີຣຶເຊຈະອອກຄຳສັ່ງໃຫ້ສ້າງເຢຣຶຊາເລມແລະສ້າງວິຫານນັ້ນຂຶ້ນອີກ. ຊີຣຶເຊໄດ້ອອກຄຳສັ່ງນີ້ບໍ? ແມ່ນແລ້ວ. ຊີຣຶເຊບອກຊົນຍິດສະລາເອນວ່າ: ‘ບັດນີ້ຈົ່ງກັບໄປເຢຣຶຊາເລມແລະຈົ່ງສ້າງວິຫານຂອງພະເຢໂຫວາພະເຈົ້າຂອງທ່ານ.’ ແລະຊົນຍິດສະລາເອນເຫຼົ່ານີ້ພວມອອກເດີນທາງເພື່ອເຮັດສິ່ງນີ້.
ແຕ່ບໍ່ແມ່ນຊົນຍິດສະລາເອນໝົດທຸກຄົນໃນບາບີໂລນສາມາດເດີນທາງໄລຍະໄກເມືອເຢຣຶຊາເລມໄດ້. ມີໄລຍະທາງປະມານ 800 ກິໂລແມັດ ແລະຫຼາຍຄົນກໍ່ເຖົ້າແກ່ແລ້ວຫຼືເຈັບປ່ວຍເກີນກວ່າທີ່ຈະເດີນທາງໄປທາງໄກຢ່າງນັ້ນ. ແລະກໍ່ມີເຫດຜົນອື່ນໆທີ່ບາງຄົນບໍ່ໄປ. ແຕ່ຊີຣຶເຊປະກາດແກ່ຄົນເຫຼົ່ານັ້ນທີ່ບໍ່ໄປວ່າ: ‘ຈົ່ງຊ່ວຍເງິນແລະຄຳແລະຂອງຂວັນຕ່າງໆໃຫ້ພວກຄົນທີ່ຈະກັບໄປສ້າງເຢຣຶຊາເລມແລະວິຫານ.’
ດັ່ງນັ້ນ ມີການມອບຂອງຂວັນຕ່າງໆໃຫ້ຊົນຍິດສະລາເອນເຫຼົ່ານີ້ຜູ້ທີ່ພວມເດີນທາງໄປເຢຣຶຊາເລມ. ຊີຣຶເຊໄດ້ມອບພາຊະນະໃຊ້ເຊັ່ນຖ້ວຍແລະຈອກຕ່າງໆທີ່ກະສັດເນບຶກາດເນດຊາເຣໄດ້ຍຶດຈາກວິຫານຂອງພະເຢໂຫວາເມື່ອທ່ານໄດ້ທຳລາຍເຢຣຶຊາເລມ. ຜູ້ຄົນມີຫຼາຍສິ່ງຫຼາຍຢ່າງທີ່ຕ້ອງຂົນກັບເມືອນຳພວກເຂົາ.
ຫຼັງຈາກການເດີນທາງປະມານສີ່ເດືອນ ຊົນຍິດສະລາເອນກັບໄປເຖິງເຢຣຶຊາເລມຕາມເວລາກຳນົດ. ເປັນເວລາ 70 ປີນັບແຕ່ເມືອງຖືກທຳລາຍ ແລະແຜ່ນດິນກໍ່ເປັນທີ່ຖືກຖິ້ມໄວ້ວ່າງເປົ່າປັດສະຈາກຄົນອາໄສ. ແຕ່ເຖິງແມ່ນເວລານີ້ຊົນຍິດສະລາເອນໄດ້ກັບມາຢູ່ໃນປະເທດຂອງຕົນເອງແລ້ວກໍ່ຕາມພວກເຂົາກໍ່ຍັງຈະຕ້ອງໄດ້ຮັບຄວາມລຳບາກຫຼາຍຢ່າງດັ່ງທີ່ເຮົາຈະໄດ້ຮູ້ຕໍ່ໄປ.
ເອຊາອີ 44:28; 45:1-4; ເອເຊດຣາເຊ 1:1-11.