ບົດ 28
ຖືກສອບຖາມເລື່ອງອົດອາຫານ
ເກືອບໜຶ່ງປີຜ່ານໄປຕັ້ງແຕ່ພະເຍຊູຮ່ວມການສະຫຼອງປັດສະຄາໃນປີສາກົນສັກກະຫຼາດ 30. ຕອນນີ້ ໂຍຮັນຜູ້ໃຫ້ບັບເຕມາຖືກຈຳຄຸກໄດ້ຫຼາຍເດືອນແລ້ວ. ເຖິງວ່າໂຍຮັນຢາກໃຫ້ສາວົກຂອງທ່ານເຂົ້າມາເປັນສາວົກຂອງພະເຍຊູກໍຕາມ ບໍ່ແມ່ນໝົດທຸກຄົນເຮັດຕາມ.
ດຽວນີ້ ໃນເວລາທີ່ໂຍຮັນຕິດຄຸກຢູ່ ລູກສິດຂອງລາວລາງຄົນມາຫາພະເຍຊູແລະຖາມວ່າ “ເຫດສັນໃດພວກຂ້າພະເຈົ້າແລະພວກຟາລິຊຽນເຄີຍຖືສິນອົດອາຫານຢູ່ເລື້ອຍ ແຕ່ວ່າພວກລູກສິດຂອງພະອົງບໍ່ຖື.” ພວກຟາລິຊຽນອົດອາຫານອາທິດລະສອງເທື່ອເປັນພິທີທາງສາສະໜາຂອງເຂົາ. ແລະລູກສິດຂອງໂຍຮັນຄົງຈະຕິດຕາມທຳນຽມຄ້າຍໆ ກັນ. ອາດເປັນໄປໄດ້ທີ່ເຂົາອາໄລເຖິງໂຍຮັນຜູ້ຈຳຄຸກຢູ່ ແລະແປກໃຈທີ່ສາວົກຂອງພະເຍຊູບໍ່ຮ່ວມທຸກໂສກນຳເຂົາ.
ພະເຍຊູຊີ້ແຈງວ່າ “ຫມູ່ສ່ຽວຂອງເຈົ້າບ່າວຈະເປັນທຸກໂສກເມື່ອເວລາເຈົ້າບ່າວຢູ່ນຳເຂົາໄດ້ຫຼື ແຕ່ວ່າເວລາຈະມາເມື່ອເຈົ້າບ່າວຈະເປັນທີ່ຍົກເອົາໄປແລ້ວຈາກເຂົາແລະເມື່ອນັ້ນເຂົາຈະຖືສິນອົດອາຫານ.”
ລູກສິດຂອງໂຍຮັນຄົງນຶກເຖິງຄຳກ່າວຂອງໂຍຮັນເອງວ່າພະເຍຊູເປັນເຈົ້າບ່າວ. ດັ່ງນັ້ນຕອນທີ່ພະເຍຊູຍັງຢູ່ນຳ ໂຍຮັນຄົງຖືວ່າບໍ່ສົມຄວນທີ່ຈະຖືສິນອົດອາຫານ ແລະສາວົກຂອງພະເຍຊູກໍເຊັ່ນກັນ. ຕໍ່ມາ ເມື່ອພະເຍຊູສິ້ນພະຊົນ ສາວົກຂອງພະອົງໂສກເສົ້າແລະອົດອາຫານ. ແຕ່ເມື່ອພະເຍຊູຟື້ນຈາກຕາຍແລະຂຶ້ນສູ່ສະຫວັນ ເຂົາບໍ່ມີເຫດຜົນທີ່ຈະອົດອາຫານແລະທຸກໂສກອີກຕໍ່ໄປ.
ຕໍ່ຈາກນັ້ນ ພະເຍຊູຍົກຄຳອຸປະມາວ່າ “ບໍ່ມີຜູ້ໃດຈະເອົາຕ່ອນແພໃໝ່ຫຍິບຕາບເສື້ອເກົ່າ ເຫດວ່າຕ່ອນແພໃໝ່ນັ້ນຈະກະທຳໃຫ້ເສື້ອເກົ່າຂາດອອກ ແລະບ່ອນຂາດນັ້ນຈະກວ້າງກວ່າອີກ. ອັນດຽວກັນ ເຂົາບໍ່ເອົານ້ຳອະງຸ່ນໃໝ່ມາໃສ່ໄວ້ໃນກະຖັງໜັງເກົ່າ ຖ້າກະທຳຢ່າງນັ້ນກະຖັງໜັງຈະຂາດໄປ ແລະນ້ຳອະງຸ່ນຈະໄຫຼອອກ ແລະກະຖັງໜັງຈະເສຍໄປດ້ວຍ ແຕ່ວ່າເຂົາເອົານ້ຳອະງຸ່ນໃໝ່ໃສ່ໄວ້ໃນກະຖັງໜັງໃໝ່ ແລະເຂົາທັງສອງຮັກສາກັນໄວ້.” ອຸປະມາເລື່ອງນີ້ກັບການອົດອາຫານກ່ຽວຂ້ອງກັນຢ່າງໃດ?
ພະເຍຊູຊ່ອຍລູກສິດຂອງໂຍຮັນໃຫ້ເຂົ້າໃຈວ່າບໍ່ຄວນຄາດໝາຍໃຫ້ສາວົກຂອງພະອົງເຮັດຕາມກິດປະຕິບັດເກົ່າແກ່ຂອງລັດທິຢູເດ ເຊັ່ນ ພິທີຖືສິນອົດອາຫານ. ພະອົງບໍ່ໄດ້ມາເພື່ອເສີມແລະຍືດລະບົບການນະມັດສະການເກົ່າເຊິ່ງຈະຖິ້ມຢູ່ແລ້ວ. ສາສະໜາຄລິດບໍ່ໄດ້ຖືກຕັ້ງຂຶ້ນເພື່ອປະສານກັບລັດທິຢູເດໃນຍຸກນັ້ນພ້ອມດ້ວຍທຳນຽມຕ່າງໆ ຂອງມະນຸດ. ສາສະໜານັ້ນຈະບໍ່ເປັນຜ້າໃໝ່ຕາບໃສ່ເສື້ອເກົ່າ ຫຼືນ້ຳອະງຸ່ນໃໝ່ໃນຖົງໜັງເກົ່າ. ມັດທາຽ 9:14-17; ມາລະໂກ 2:18-22; ລຶກາ 5:33-39; ໂຍຮັນ 3:27-29.
▪ ໃຜຖືສິນອົດອາຫານ ພ້ອມດ້ວຍຈຸດມຸ່ງໝາຍຫຍັງ?
▪ ເປັນຫຍັງສາວົກຂອງພະເຍຊູບໍ່ຖືສິນອົດອາຫານລະຫວ່າງທີ່ພະອົງຢູ່ນຳເຂົາ ແລະຫຼັງຈາກນັ້ນ ສາເຫດຂອງການອົດອາຫານຈະໝົດໄປໃນບໍ່ຊ້າໄດ້ຢ່າງໃດ?
▪ ພະເຍຊູໄດ້ຍົກອຸປະມາຫຍັງແດ່ຂຶ້ນມາ ແລະສອງເລື່ອງນັ້ນມີຄວາມໝາຍຢ່າງໃດ?