ບົດ 115
ການໂຕ້ຖຽງພຸ່ງເກີດຂຶ້ນ
ໃນຕອນຫົວຄ່ຳ ພະເຍຊູສອນບົດຮຽນທີ່ມີຄຸນຄ່າໃນເລື່ອງການຮັບໃຊ້ດ້ວຍໃຈຖ່ອມໂດຍການລ້າງຕີນໃຫ້ອັກຄະສາວົກ. ຫຼັງຈາກນັ້ນ ພະອົງແນະນຳໃຫ້ເຂົາເຈົ້າລະນຶກເຖິງຄວາມຕາຍຂອງພະອົງເຊິ່ງໃກ້ເຂົ້າມາແລ້ວ. ບັດນີ້ ໂດຍສະເພາະເມື່ອຄຳນຶງເຖິງສິ່ງທີ່ຫາກໍ່ຜ່ານໄປ ມີເລື່ອງທີ່ບໍ່ຄາດຄິດເກີດຂຶ້ນ. ພວກອັກຄະສາວົກກຳລັງຖຽງກັນຢ່າງດຸເດືອດວ່າໃຜໃນກຸ່ມເຂົາເຈົ້າຄວນຈະເປັນຜູ້ໃຫຍ່ທີ່ສຸດ! ປາກົດວ່າເລື່ອງນີ້ເປັນສ່ວນໜຶ່ງຂອງການຜິດຖຽງກັນມາຕະຫຼອດ.
ຈົ່ງຫວນນຶກເບິ່ງວ່າພາຍຫຼັງພະເຍຊູແປງກາຍທີ່ພູເຂົາ ພວກອັກຄະສາວົກກໍຖຽງກັນເລື່ອງໃຜຈະເປັນຜູ້ໃຫຍ່ທີ່ສຸດໃນຫມູ່ເຂົາ. ນອກຈາກນັ້ນ ຍາໂກໂບແລະໂຍຮັນໄດ້ຂໍຕຳແໜ່ງສຳຄັນໃນລາຊະອານາຈັກ ເຊິ່ງເຮັດໃຫ້ເກີດການໂຕ້ແຍ່ງໃນຫມູ່ອັກຄະສາວົກອີກ. ຕອນນີ້ ເຊິ່ງເປັນຄືນສຸດທ້າຍທີ່ພະອົງຢູ່ກັບເຂົາ ພະເຍຊູຕ້ອງເສົ້າໃຈສ່ຳໃດເມື່ອເຫັນເຂົາໂຕ້ຖຽງກັນອີກເທື່ອໜຶ່ງ! ພະອົງຈະເຮັດຢ່າງໃດ?
ແທນທີ່ຈະດ່າວ່າພວກອັກຄະສາວົກຍ້ອນການປະພຶດເຊັ່ນນັ້ນ ພະເຍຊູໄດ້ຫາເຫດຜົນນຳເຂົາເຈົ້າຢ່າງອົດທົນອີກເທື່ອໜຶ່ງວ່າ “ກະສັດທັງຫຼາຍແຫ່ງພວກຕ່າງປະເທດກໍບັງຄັບເຂົາ ແລະຜູ້ທີ່ຄຸ້ມຄອງເຂົາກໍເປັນທີ່ເອີ້ນຊື່ວ່າເຈົ້າບຸນຄຸນ ແຕ່ວ່າໃນທ່າມກາງພວກທ່ານຈະບໍ່ເປັນຢ່າງນັ້ນ. . . . ເຫດວ່າຜູ້ໃຫຍ່ທີ່ສຸດເປັນຜູ້ໃດ ຜູ້ທີ່ນັ່ງໂຕະ ຫຼືຜູ້ບົວລະບັດ ບໍ່ແມ່ນຜູ້ທີ່ນັ່ງໂຕະຫຼື”? ແລະເພື່ອເຕືອນໃຫ້ເຂົາຄິດເຖິງຕົວຢ່າງທີ່ພະອົງໄດ້ວາງໄວ້ຈຶ່ງກ່າວວ່າ “ແຕ່ວ່າເຮົາຢູ່ໃນທ່າມກາງພວກທ່ານເໝືອນດັ່ງຜູ້ບົວລະບັດ.”
ເຖິງວ່າພວກອັກຄະສາວົກມີຂໍ້ບົກພ່ອງ ເຂົາເຈົ້າຕິດຕາມພະເຍຊູຕະຫຼອດເວລາທີ່ພະອົງຖືກທົດລອງ. ພະອົງຈຶ່ງກ່າວວ່າ “ຝ່າຍເຮົາ ເຮົາຕັ້ງແຜ່ນດິນ [ລາຊະອານາຈັກ] ໜຶ່ງສຳລັບທ່ານທັງຫຼາຍ ເໝືອນດັ່ງພະບິດາຂອງເຮົາໄດ້ຕັ້ງແຜ່ນດິນ [ລາຊະອານາຈັກ] ໜຶ່ງສຳລັບເຮົາ.” ສັນຍາໄມຕີທີ່ພະເຍຊູເຮັດໄວ້ເປັນສ່ວນຕົວລະຫວ່າງພະອົງແລະຜູ້ຕິດຕາມທີ່ສັດຊື່ເຮັດໃຫ້ເຂົາເຈົ້າມີສ່ວນຮ່ວມໃນການປົກຄອງກັບພະອົງ. ໃນທີ່ສຸດ ມີແຕ່ 144,000 ຄົນເທົ່ານັ້ນ ເຊິ່ງຈະເຂົ້າມີສ່ວນໃນສັນຍາໄມຕີແຫ່ງລາຊະອານາຈັກ.
ເຖິງແມ່ນວ່າພະຄລິດໄດ້ສະເໜີຄວາມຫວັງອັນວິເສດໃຫ້ແກ່ເຫຼົ່າອັກຄະສາວົກເພື່ອເຂົາເຈົ້າຈະຮ່ວມປົກຄອງໃນລາຊະອານາຈັກກັບພະອົງກໍຕາມ ໃນຕອນນີ້ເຂົາເຈົ້າຍັງບໍ່ແຂງແຮງດ້ານຝ່າຍວິນຍານ. ພະເຍຊູກ່າວແກ່ເຂົາເຈົ້າວ່າ “ທ່ານທັງຫຼາຍຈະຊູນສະດຸດໃຈເພາະເຮົາໃນຄືນວັນນີ້ທຸກຄົນ.” ຢ່າງໃດກໍດີ ເມື່ອບອກເປໂຕວ່າພະອົງໄດ້ອະທິດຖານເພື່ອເຂົາເຈົ້າ ພະອົງກ່າວເຕືອນວ່າ “ເວລາທ່ານຈະໄດ້ຫຼົບຕັ້ງໃຈໃໝ່ມາແລ້ວ ທ່ານຈົ່ງຊູແຮງພີ່ນ້ອງຂອງທ່ານເທີ້ນ.”
ພະເຍຊູອະທິບາຍວ່າ “ລູກທັງຫຼາຍເອີຍ ເຮົາຍັງຢູ່ນຳພວກທ່ານສັກເວລາໜ້ອຍ. ທ່ານທັງຫຼາຍຈະຊອກຫາເຮົາ ແລະຕາມເຮົາໄດ້ກ່າວແກ່ພວກຢູເດແລ້ວ ເຮົາກ່າວແກ່ທ່ານທັງຫຼາຍດຽວນີ້ວ່າ ບ່ອນນັ້ນເຮົາໄປທ່ານທັງຫຼາຍໄປບໍ່ໄດ້. ເຮົາປະທານຄຳສັ່ງໃໝ່ຂໍ້ໜຶ່ງໃຫ້ແກ່ທ່ານທັງຫຼາຍວ່າ ຈົ່ງຮັກກັນແລະກັນ. ເຮົາໄດ້ຮັກທ່ານທັງຫຼາຍສັນໃດທ່ານຈົ່ງຮັກກັນແລະກັນສັນນັ້ນ. ຄົນທັງປວງຈະຮູ້ຈັກວ່າ ທ່ານທັງຫຼາຍເປັນລູກສິດຂອງເຮົາດ້ວຍການນີ້ ຄືວ່າຖ້າທ່ານທັງຫຼາຍມີຄວາມຮັກ ໃນທ່າມກາງພວກທ່ານ.”
ເປໂຕຖາມວ່າ “ພະອົງເຈົ້າຂ້າ ພະອົງໄປໃສ”?
ພະເຍຊູຕອບວ່າ “ບ່ອນທີ່ເຮົາໄປທ່ານຕາມເຮົາໄປບໍ່ໄດ້ດຽວນີ້ ແຕ່ວ່າພາຍຫຼັງທ່ານຈະຕາມເຮົາໄປ.”
ເປໂຕຢາກຮູ້ຈຶ່ງຖາມວ່າ “ພະອົງເຈົ້າຂ້າ ເປັນສັນໃດຂ້າພະເຈົ້າຕາມພະອົງໄປບໍ່ໄດ້ດຽວນີ້. ຂ້າພະເຈົ້າຈະປົງຊີວິດຂອງຂ້າພະເຈົ້າເພາະເຫັນແກ່ພະອົງ.”
ພະເຍຊູຖາມວ່າ “ທ່ານຈະປົງຊີວິດຂອງທ່ານເພາະເຫັນແກ່ເຮົາຫຼື”? ແລ້ວພະອົງກ່າວຕໍ່ອີກວ່າ “ເຮົາບອກທ່ານຕາມຈິງວ່າ ໃນຄືນນີ້ແຫຼະ ກ່ອນໄກ່ຈະຂັນສອງເທື່ອ ທ່ານຈະປະຕິເສດເຮົາເຖິງສາມເທື່ອ.” (ປ.ມ.)
ເປໂຕຄັດຄ້ານວ່າ “ເຖິງແມ່ນຂ້ານ້ອຍຈະຕ້ອງຕາຍກັບທ່ານ ຂ້ານ້ອຍຈະບໍ່ປະຕິເສດທ່ານຈັກເທື່ອ.” (ປ.ມ.) ແລະຕອນທີ່ອັກຄະສາວົກຄົນອື່ນໆ ເວົ້າແບບນັ້ນຄືກັນ ເປໂຕເວົ້າອວດຂຶ້ນມາວ່າ “ຖ້າແມ່ນຄົນທັງປວງຈະຊູນສະດຸດໃຈເພາະພະອົງ ຝ່າຍຂ້າພະເຈົ້າຈະບໍ່ຊູນສະດຸດໃຈສັກເທື່ອ.”
ພະອົງໄດ້ເອີ່ຍເຖິງຕອນທີ່ສົ່ງເຫຼົ່າອັກຄະສາວົກອອກໄປປະກາດທົ່ວເມືອງຄາລິເລ ໂດຍບໍ່ໃຫ້ເອົາກະເປົາເງິນຫຼືຖົງໃສ່ຂອງກິນໄປນຳ ແລ້ວພະເຍຊູຖາມວ່າ “ພວກທ່ານໄດ້ຂາດເຂີນສິ່ງໃດແດ່?” (ທ.ປ.)
ເຂົາຕອບວ່າ “ບໍ່ໄດ້ຂາດເຂີນສິ່ງໃດເລີຍ!” (ທ.ປ.)
ພະອົງຈຶ່ງກ່າວວ່າ “ແຕ່ວ່າດຽວນີ້ຖ້າຜູ້ໃດມີຖົງເງິນ ຈົ່ງຖືເອົາໄປເທີ້ນ ແລະຜູ້ທີ່ມີກະເປົາຈົ່ງກະທຳດັ່ງນັ້ນ ແລະຜູ້ທີ່ບໍ່ມີດາບຈົ່ງຂາຍເສື້ອຜ້າແຫ່ງຕົນ ແລະຊື້ເອົາດາບດວງໜຶ່ງເທີ້ນ. ເຫດວ່າເຮົາກ່າວແກ່ທ່ານທັງຫຼາຍວ່າ ຄຳນີ້ທີ່ຂຽນໄວ້ຕ້ອງຈະສຳເລັດໃນເຮົາວ່າ ພະອົງເປັນທີ່ນັບເຂົ້າດ້ວຍກັນກັບຫມູ່ຄົນຮ້າຍ. ເຫດວ່າການທັງຫຼາຍຝ່າຍເຮົານັ້ນຈະເຖິງທີ່ສຸດແລ້ວ.”
ພະເຍຊູກຳລັງຊີ້ເຖິງຕອນທີ່ພະອົງຈະຖືກຕອກໄວ້ພ້ອມກັບຜູ້ຮ້າຍຫຼືພວກຝ່າຝືນກົດໝາຍ. ພະອົງຍັງບອກວ່າ ຕໍ່ຈາກນີ້ສາວົກຂອງພະອົງຈະປະເຊີນກັບການກົດຂີ່ຂົ່ມເຫງຢ່າງໜັກໜ່ວງ. ເຂົາເຈົ້າຕອບວ່າ “ພະອົງເຈົ້າຂ້າ ຈົ່ງເບິ່ງ ມີດາບສອງດວງຢູ່ທີ່ນີ້.”
ພະອົງຕອບເຂົາວ່າ “ພໍແລ້ວ.” ດັ່ງທີ່ເຮົາຈະເຫັນໃນບໍ່ດົນວ່າ ການມີດາບຕິດຕົວເຊັ່ນນັ້ນ ເປັນໂອກາດທີ່ພະເຍຊູຈະສອນບົດຮຽນສຳຄັນອີກອັນໜຶ່ງ. ມັດທາຽ 26:31-35; ມາລະໂກ 14:27-31; ລຶກາ 22:24-38; ໂຍຮັນ 13:31-38; ຄຳປາກົດ 14:1-3.
▪ ເປັນຫຍັງການໂຕ້ຖຽງກັນໃນຫມູ່ອັກຄະສາວົກຈຶ່ງເປັນເລື່ອງທີ່ແປກແທ້?
▪ ພະເຍຊູຈັດການກັບການໂຕ້ຖຽງນັ້ນຢ່າງໃດ?
▪ ສັນຍາໄມຕີທີ່ພະເຍຊູເຮັດໄວ້ກັບສາວົກຂອງພະອົງນັ້ນເຮັດໃຫ້ສິ່ງໃດບັນລຸຜົນສຳເລັດ?
▪ ພະເຍຊູປະທານຂໍ້ບັນຍັດໃໝ່ຫຍັງ ແລະຂໍ້ນັ້ນສຳຄັນພຽງໃດ?
▪ ເປໂຕສະແດງວ່າຕົນໝັ້ນໃຈເກີນໄປໃນເລື່ອງໃດ ແລະພະເຍຊູກ່າວຢ່າງໃດ?
▪ ເປັນຫຍັງການທີ່ພະເຍຊູບອກໃຫ້ເອົາກະເປົາ ແລະຖົງໃສ່ຂອງກິນຕິດໂຕໄປນຳຈຶ່ງຕ່າງຈາກຄຳສັ່ງທີ່ພະອົງເຄີຍໃຫ້ໄວ້ກ່ອນໜ້ານັ້ນ?