ບົດຮຽນ 17
ເພື່ອຮັກສາເພື່ອນໄວ້ ທ່ານຕ້ອງເປັນເພື່ອນ
ມິດຕະພາບແມ່ນອີງໃສ່ຮາກຖານຂອງຄວາມຮັກ. ຍິ່ງທ່ານຮຽນຮູ້ຫຼາຍຂຶ້ນກ່ຽວກັບພະເຢໂຫວາ ຄວາມຮັກຂອງທ່ານຈະມີຫຼາຍຂຶ້ນຕໍ່ພະອົງ. ຂະນະທີ່ຄວາມຮັກຂອງທ່ານຕໍ່ພະເຈົ້າເພີ່ມພູນຂຶ້ນ ຄວາມປາຖະໜາຂອງທ່ານທີ່ຈະຮັບໃຊ້ພະອົງກໍຈະເພີ່ມຂຶ້ນດ້ວຍ. ສິ່ງນີ້ຈະກະຕຸ້ນທ່ານໃຫ້ເຂົ້າມາເປັນສາວົກຂອງພະເຍຊູຄລິດ. (ມັດທາຍ 28:19) ໂດຍການເຂົ້າຮ່ວມກັບຄອບຄົວທີ່ເຕັມໄປດ້ວຍຄວາມສຸກຂອງພະຍານພະເຢໂຫວາ ທ່ານຈະສາມາດມີມິດຕະພາບກັບພະເຈົ້າຕະຫຼອດການ. ທ່ານຕ້ອງເຮັດຫຍັງ?
ທ່ານຕ້ອງສະແດງຄວາມຮັກຂອງທ່ານຕໍ່ພະເຈົ້າໂດຍການເຊື່ອຟັງກົດໝາຍຂອງພະອົງ. “ເພາະວ່າອັນນີ້ເປັນຄວາມຮັກແກ່ພະເຈົ້າ ຄືວ່າ ໃຫ້ເຮົາທັງຫຼາຍຖືຮັກສາຄຳສັ່ງທັງຫຼາຍແຫ່ງພະອົງ ແລະຄຳສັ່ງທັງຫຼາຍແຫ່ງພະອົງກໍບໍ່ຍາກ.”—1 ໂຍຮັນ 5:3.
ນຳສິ່ງທີ່ທ່ານຮຽນຮູ້ມາໃຊ້. ພະເຍຊູໄດ້ເລົ່າອຸທາຫອນທີ່ສະແດງໃຫ້ເຫັນປະເດັນນີ້. ຄົນສະຫຼາດໄດ້ກໍ່ສ້າງເຮືອນຂອງຕົນຢູ່ເທິງຫີນດານ. ຄົນໂງ່ໄດ້ກໍ່ສ້າງເຮືອນຂອງຕົນຢູ່ເທິງດິນຊາຍ. ເມື່ອພາຍຸໃຫຍ່ມາ ເຮືອນທີ່ກໍ່ສ້າງຢູ່ເທິງຫີນດານບໍ່ໄດ້ລົ້ມລົງ ແຕ່ວ່າເຮືອນທີ່ກໍ່ສ້າງຢູ່ເທິງດິນຊາຍກໍລົ້ມລົງແລະຫັກແຕກ. ພະເຍຊູກ່າວວ່າ ຄົນເຫຼົ່ານັ້ນທີ່ໄດ້ຍິນຄຳສັ່ງສອນຂອງພະອົງແລະເຮັດຕາມຄຳສັ່ງສອນນັ້ນກໍຄືກັນກັບຄົນສະຫຼາດທີ່ກໍ່ສ້າງເຮືອນຢູ່ເທິງຫີນດານ. ແຕ່ວ່າຄົນເຫຼົ່ານັ້ນທີ່ຟັງຄຳສັ່ງສອນຂອງພະອົງແລະບໍ່ໄດ້ເຮັດຕາມຄຳສອນນັ້ນກໍຄືກັນກັບຄົນໂງ່ທີ່ກໍ່ສ້າງເຮືອນຢູ່ເທິງດິນຊາຍ. ທ່ານຢາກເປັນຄືຄົນໃດ?—ມັດທາຍ 7:24-27.
ການອຸທິດຕົວ. ນີ້ໝາຍຄວາມວ່າທ່ານເຂົ້າຫາພະເຢໂຫວາໂດຍການອະທິດຖານແລະບອກພະອົງວ່າທ່ານຕ້ອງການເຮັດຕາມພະໄທປະສົງຂອງພະເຈົ້າຕະຫຼອດໄປ. ການເຮັດຕາມພະໄທປະສົງຂອງພະເຈົ້າສະແດງວ່າທ່ານເປັນສາວົກຂອງພະເຍຊູຄລິດ.—ມັດທາຍ 11:29.
ການຮັບບັບເຕມາ. “ຈົ່ງ . . . ຮັບບັບເຕມາແລະລ້າງບາບຂອງທ່ານອອກເສຍ ໂດຍການທີ່ທ່ານຮ້ອງອອກນາມຊື່ຂອງພະອົງ.”—ກິດຈະການ 22:16, ລ.ມ.
ເຂົ້າຮ່ວມຢ່າງເຕັມທີໃນການຮັບໃຊ້ພະເຈົ້າ. “ສິ່ງໃດໆທີ່ດີທີ່ທ່ານທັງຫຼາຍກະທຳ ຈົ່ງກະທຳດ້ວຍສິ້ນສຸດຈິດວິນຍານເໝືອນໜຶ່ງກະທຳແດ່ພະເຢໂຫວາແລະບໍ່ແມ່ນແກ່ມະນຸດ.”—ໂກໂລດ 3:23, ລ.ມ.