ບຸກຄົນທີ່ຄວນຮຽນແບບ—ໂຢເຊັບ
ໂຢເຊັບຕ້ອງເຈິບັນຫາທີ່ໜັກໜ່ວງ. ເມຍຂອງເຈົ້ານາຍໄດ້ຍົວະລາວໃຫ້ມີເພດສຳພັນນຳຫຼາຍເທື່ອ. ເທື່ອນີ້ເມຍຂອງເຈົ້ານາຍກໍພະຍາຍາມອີກ ແຕ່ໂຢເຊັບກໍຍັງປະຕິເສດ. ລາວຕອບຢ່າງໜັກແໜ້ນວ່າ: “ຂ້ອຍຈະເຮັດຊົ່ວແບບນີ້ແລະເຮັດບາບຕໍ່ພະເຈົ້າບໍ່ໄດ້.” ເມຍຂອງເຈົ້ານາຍບໍ່ສົນໃຈທີ່ໂຢເຊັບປະຕິເສດ ແລະພະຍາຍາມຈະດຶງໂຕໂຢເຊັບໄວ້ ແຕ່ໂຢເຊັບກໍກ້າໜີອອກມາ. ທີ່ຈິງ ລາວແລ່ນອອກຈາກບ່ອນນັ້ນເລີຍ! ໂຢເຊັບສະແດງໃຫ້ເຫັນວ່າລາວຍຶດໝັ້ນກັບຫຼັກການດ້ານສິນລະທຳຂອງພະເຈົ້າ.—ປະຖົມມະການ 39:7-12
ເຈົ້າເອງກໍອາດເຈິຄົນທີ່ຍົວະເຈົ້າໃຫ້ເຮັດຜິດສິນລະທຳທາງເພດ. ການມີແຕ່ຄວາມຕັ້ງໃຈຢ່າງດຽວບໍ່ແມ່ນວ່າຈະຕ້ານທານໄດ້. ເຈົ້າຕ້ອງຢາກເຮັດໃຫ້ພະເຢໂຫວາພະເຈົ້າທີ່ເປັນຜູ້ສ້າງພໍໃຈນຳ. ໂຢເຊັບກໍມີຄວາມຕ້ອງການທາງເພດແບບເຈົ້າຄືກັນ. ແຕ່ຍ້ອນລາວຮູ້ວ່າຈະເຮັດໃຫ້ພະເຈົ້າບໍ່ພໍໃຈ ລາວຈຶ່ງບໍ່ເຮັດຕາມຄວາມຕ້ອງການນັ້ນ. ຄ້າຍຄືກັນ ເຈົ້າຕ້ອງໝັ້ນໃຈວ່າການເຮັດຜິດສິນລະທຳທາງເພດຈະເຮັດໃຫ້ພະເຈົ້າບໍ່ພໍໃຈແລະເຮັດໃຫ້ໂຕເຈົ້າເອງທຸກໃຈ. ດັ່ງນັ້ນ ຂໍໃຫ້ພະຍາຍາມຍຶດໝັ້ນກັບຫຼັກສິນລະທຳຕໍ່ໄປຄືກັບໂຢເຊັບ.