ບົດທີ 78
ພະເຢຊູປະກາດເລື່ອງການປົກຄອງຂອງພະເຈົ້າ
ຫຼັງຈາກພະເຢຊູຮັບບັບເຕມາໄດ້ບໍ່ດົນ ເພິ່ນກໍເລີ່ມປະກາດວ່າ: “ການປົກຄອງຂອງພະເຈົ້າໃກ້ຈະມາແລ້ວ.” ພວກລູກສິດຕິດຕາມເພິ່ນໄປທົ່ວແຂວງຄາລີເລແລະແຂວງຢູດາຍ. ຕອນທີ່ພະເຢຊູກັບໄປເມືອງນາຊາເຣັດບ້ານເກີດຂອງເພິ່ນ ເພິ່ນເຂົ້າໄປບ່ອນປະຊຸມຂອງຄົນຢິວ. ເພິ່ນມາຍມ້ວນໜັງສືຂອງເອຊາຢາແລະອ່ານສຽງດັງວ່າ: ‘ພະເຢໂຫວາໃຫ້ພະລັງບໍລິສຸດກັບຂ້ອຍເພື່ອໃຫ້ຂ້ອຍປະກາດຂ່າວດີ.’ ນີ້ໝາຍຄວາມວ່າແນວໃດ? ນີ້ໝາຍຄວາມວ່າເຖິງວ່າປະຊາຊົນຢາກເຫັນພະເຢຊູເຮັດການອັດສະຈັນ ແຕ່ເຫດຜົນຫຼັກທີ່ພະເຢຊູໄດ້ຮັບພະລັງບໍລິສຸດແມ່ນເພື່ອປະກາດຂ່າວດີ. ຈາກນັ້ນ ພະເຢຊູກໍບອກຄົນທີ່ຟັງຢູ່ວ່າ: ‘ມື້ນີ້ ຄຳພະຍາກອນຂໍ້ນີ້ເປັນຈິງແລ້ວ.’
ຫຼັງຈາກນັ້ນ ພະເຢຊູກໍໄປທະເລຄາລີເລ. ເພິ່ນເຈິຄົນທີ່ມີອາຊີບຫາປາ 4 ຄົນແລະໄດ້ຊວນເຂົາເຈົ້າໃຫ້ເຂົ້າມາເປັນລູກສິດ. ເພິ່ນເວົ້າວ່າ: “ມານຳຂ້ອຍແມ້ ຂ້ອຍຈະໃຫ້ພວກເຈົ້າໄປຊອກຫາຄົນແທນທີ່ຈະຫາປາ.” ພວກລູກສິດ 4 ຄົນນີ້ມີ ເປໂຕ ອັນເດອາ ຢາໂກໂບ ແລະໂຢຮັນ. ເຂົາເຈົ້າຖິ້ມທຸລະກິດຫາປາແລ້ວຕິດຕາມພະເຢຊູໄປທັນທີ. ເຂົາເຈົ້າປະກາດເລື່ອງການປົກຄອງຂອງພະເຈົ້າທົ່ວແຂວງຄາລີເລ ທັງໃນບ່ອນປະຊຸມຂອງຄົນຢິວ ຕາມຕະຫຼາດ ແລະຕາມຫົນທາງ. ມີຄົນຫຼາຍແທ້ຫຼາຍວ່າຕິດຕາມເຂົາເຈົ້າໄປບໍ່ວ່າເຂົາເຈົ້າຈະໄປໃສ. ຊື່ສຽງຂອງພະເຢຊູຖືກຊ່າລືໄປບັກໄກໆຈົນຮອດແຂວງຊີເຣຍ.
ຕໍ່ມາ ພະເຢຊູໃຫ້ພວກລູກສິດບາງຄົນມີລິດເດດເພື່ອປິ່ນປົວພະຍາດແລະໄລ່ປີສາດອອກຈາກຄົນທີ່ມັນສິງຢູ່. ຕອນທີ່ພະເຢຊູໄປປະກາດຕາມເມືອງແລະຕາມບ້ານຕ່າງໆ ພວກລູກສິດຄົນອື່ນໆກໍໄດ້ເດີນທາງໄປນຳເພິ່ນ. ມີຜູ້ຍິງທີ່ສັດຊື່ຈຳນວນໜຶ່ງ ເຊັ່ນ: ມາຣິອາມັກດາເລນ ໂຢຮັນນາ ຊູຊັນນາ ແລະຄົນອື່ນໆໄດ້ຊ່ວຍເບິ່ງແຍງພະເຢຊູກັບພວກລູກສິດ.
ຫຼັງຈາກພະເຢຊູຝຶກພວກລູກສິດແລ້ວ ເພິ່ນກໍສົ່ງເຂົາເຈົ້າໄປປະກາດທົ່ວແຂວງຄາລີເລ. ມີຫຼາຍຄົນເຂົ້າມາເປັນລູກສິດແລະຮັບບັບເຕມາ. ຕອນນັ້ນມີຄົນບັກຫຼາຍໆຢາກເຂົ້າມາເປັນລູກສິດຂອງພະເຢຊູ ເພິ່ນປຽບຄົນເຫຼົ່ານີ້ວ່າເປັນຄືກັບທົ່ງນາທີ່ພ້ອມຈະກ່ຽວແລະເວົ້າວ່າ: ‘ໃຫ້ຊ່ວຍກັນອະທິດຖານຂໍພະເຢໂຫວາສົ່ງຄົນອອກໄປເຮັດວຽກກ່ຽວຫຼາຍຂຶ້ນ.’ ຫຼັງຈາກນັ້ນ ພະເຢຊູກໍເລືອກລູກສິດ 70 ຄົນແລະສົ່ງເຂົາເຈົ້າໄປປະກາດເປັນຄູ່ທົ່ວແຂວງຢູດາຍ. ເຂົາເຈົ້າໄດ້ສອນຄົນທຸກປະເພດເລື່ອງການປົກຄອງຂອງພະເຈົ້າ. ຕອນທີ່ພວກລູກສິດກັບມາ ເຂົາເຈົ້າກໍມາເລົ່າໃຫ້ພະເຢຊູຟັງດ້ວຍຄວາມຕື່ນເຕັ້ນດີໃຈ ແມ່ນແຕ່ຊາຕານກໍບໍ່ສາມາດຂັດຂວາງວຽກປະກາດໄດ້.
ພະເຢຊູຢາກໃຫ້ພວກລູກສິດເຮັດວຽກທີ່ສຳຄັນນີ້ຕໍ່ໄປຫຼັງຈາກເພິ່ນກັບໄປສະຫວັນແລ້ວ ເພິ່ນຈຶ່ງສັ່ງເຂົາເຈົ້າວ່າ: ‘ໃຫ້ພວກເຈົ້າປະກາດຂ່າວດີໄປທົ່ວໂລກ. ສອນຄົນໃຫ້ຮູ້ຈັກຄຳສອນຂອງພະເຈົ້າ ແລະໃຫ້ເຂົາເຈົ້າຮັບບັບເຕມາ.’
“ຂ້ອຍຕ້ອງປະກາດຂ່າວດີເລື່ອງການປົກຄອງຂອງພະເຈົ້າໃນເມືອງອື່ນໆນຳ ຍ້ອນພະເຈົ້າສົ່ງຂ້ອຍມາເພື່ອເຮັດວຽກນີ້.”—ລູກາ 4:43