ບົດທີ 81
ຄຳບັນລະຍາຍເທິງພູ
ຫຼັງຈາກເລືອກອັກຄະສາວົກ 12 ຄົນ ພະເຢຊູກໍໄປຫາຄົນກຸ່ມໃຫຍ່ທີ່ມາລວມໂຕກັນຢູ່ເທິງພູ. ເຂົາເຈົ້າມາຈາກແຂວງຄາລີເລ ແຂວງຢູດາຍ ເມືອງຕີເຣ ເມືອງຊີໂດນ ແຂວງຊີເຣຍ ແລະຈາກຟາກຕາເວັນອອກຂອງແມ່ນ້ຳຈໍແດນ. ເຂົາເຈົ້າພາຄົນປ່ວຍແລະຄົນທີ່ຖືກປີສາດສິງມາໃຫ້ພະເຢຊູປົວ ແລະເພິ່ນກໍປົວເຂົາເຈົ້າທຸກຄົນ. ຈາກນັ້ນ ເພິ່ນກໍນັ່ງລົງແລະເລີ່ມສອນວ່າເຮົາຕ້ອງເຮັດຫຍັງແດ່ຖ້າຢາກເປັນໝູ່ກັບພະເຈົ້າ. ພະເຢຊູສອນວ່າເຮົາຕ້ອງເພິ່ງພະເຢໂຫວາພະເຈົ້າແລະຮັກເພິ່ນ ແຕ່ເຮົາຈະຮັກພະເຈົ້າບໍ່ໄດ້ ຖ້າເຮົາບໍ່ຮັກຄົນອື່ນ. ເຮົາຕ້ອງເປັນຄົນຍຸຕິທຳແລະເຮັດດີກັບທຸກຄົນແມ່ນແຕ່ຄົນທີ່ເປັນສັດຕູກັບເຮົາ.
ພະເຢຊູເວົ້າວ່າ: ‘ການຮັກໝູ່ຢ່າງດຽວຍັງບໍ່ພໍ ເຈົ້າຕ້ອງຮັກສັດຕູແລະໃຫ້ອະໄພຄົນອື່ນຈາກໃຈ. ຖ້າມີຄົນຄຽດໃຫ້ເຈົ້າຢູ່ ກໍໃຫ້ຟ້າວໄປຂໍໂທດລາວ ແລະໃຫ້ເຈົ້າເຮັດກັບຄົນອື່ນຄືກັບທີ່ຢາກໃຫ້ຄົນອື່ນເຮັດກັບເຈົ້າ.’
ພະເຢຊູຍັງໃຫ້ຄຳແນະນຳທີ່ດີກ່ຽວກັບເລື່ອງວັດຖຸເງິນຄຳນຳ. ເພິ່ນບອກວ່າ: ‘ການເປັນໝູ່ກັບພະເຢໂຫວາດີກວ່າການມີເງິນຫຼາຍໆ. ໂຈນສາມາດລັກເງິນເຈົ້າໄດ້ ແຕ່ບໍ່ມີໃຜສາມາດລັກສາຍສຳພັນຂອງເຈົ້າກັບພະເຢໂຫວາໄດ້. ໃຫ້ເຊົາອຸກໃຈວ່າຊິກິນຫຍັງຫຼືຊິນຸ່ງຫຍັງ. ໄປເບິ່ງນົກແມ້ ພະເຈົ້າເບິ່ງແຍງພວກມັນໃຫ້ມີອາຫານພໍກິນຕະຫຼອດ. ຄວາມອຸກໃຈຈະບໍ່ຕໍ່ຊີວິດເຈົ້າໃຫ້ອາຍຸຍືນຂຶ້ນຈັກມື້ໜຶ່ງດອກ. ຂໍໃຫ້ຈື່ໄວ້ວ່າພະເຢໂຫວາຮູ້ວ່າເຈົ້າຕ້ອງການຫຍັງ.’
ປະຊາຊົນບໍ່ເຄີຍໄດ້ຍິນໃຜເວົ້າຄືກັບພະເຢຊູ. ພວກຟາຣີຊາຍກັບພວກຊາດູກາຍທີ່ເປັນຄູສອນສາສະໜາກໍບໍ່ໄດ້ສອນເລື່ອງນີ້. ເປັນຫຍັງພະເຢຊູຈຶ່ງເປັນຄູທີ່ຍິ່ງໃຫຍ່ແທ້ໆ? ຍ້ອນທຸກເລື່ອງທີ່ເພິ່ນສອນມາຈາກພະເຢໂຫວາ.
“ເອົາແອກຂອງຂ້ອຍໄປແບກແລະຮຽນຈາກຂ້ອຍ ຍ້ອນຂ້ອຍເປັນຄົນອ່ອນໂຍນແລະຖ່ອມໂຕ ແລ້ວພວກເຈົ້າຈະສົດຊື່ນ.”—ມັດທາຍ 11:29