“ຄລິດສະຕຽນ” ທຸກຄົນເປັນຄລິດສະຕຽນບໍ?
ມີຈັກຄົນໃນໂລກນີ້ທີ່ເປັນຄລິດສະຕຽນ? ປຶ້ມແຜນທີ່ສາສະໜາຄລິດສະຕຽນທົ່ວໂລກ (ພາສາອັງກິດ) ລາຍງານວ່າໃນປີ 2010 ຕະຫຼອດທົ່ວໂລກມີຄລິດສະຕຽນເກືອບ 2,3 ພັນລ້ານຄົນ. ແຕ່ປຶ້ມເຫຼັ້ມດຽວກັນຍັງບອກນຳວ່າຄລິດສະຕຽນເຫຼົ່ານີ້ແບ່ງເປັນກຸ່ມແລະນິກາຍຕ່າງໆຫຼາຍກວ່າ 41.000 ກຸ່ມ ແລະແຕ່ລະກຸ່ມຕ່າງກໍມີຫຼັກຄຳສອນແລະແນວປະຕິບັດຂອງຕົວເອງ. ເມື່ອມີສາສະໜາ “ຄລິດສະຕຽນ” ຫຼາຍປານນີ້ກໍເປັນເລື່ອງທຳມະດາທີ່ຫຼາຍຄົນຈະຮູ້ສຶກສັບສົນແລະເຖິງກັບຜິດຫວັງດ້ວຍຊ້ຳ. ລາວເຈົ້າອາດສົງໄສວ່າ ‘ທຸກຄົນທີ່ອ້າງວ່າເປັນຄລິດສະຕຽນເປັນຄລິດສະຕຽນແທ້ໆບໍ?’
ໃຫ້ເຮົາມາພິຈາລະນາເລື່ອງນີ້ໃນອີກມຸມໜຶ່ງ. ຕາມປົກກະຕິແລ້ວ ນັກທ່ອງທ່ຽວທີ່ເດີນທາງໄປຕ່າງປະເທດຈະຕ້ອງແຈ້ງເຈົ້າໜ້າທີ່ກວດຄົນເຂົ້າເມືອງວ່າລາວເປັນພົນລະເມືອງປະເທດໃດ. ນອກຈາກນັ້ນ ລາວຍັງຕ້ອງສະແດງໜັງສືເດີນທາງໃຫ້ກັບເຈົ້າໜ້າທີ່ເພື່ອເປັນຫຼັກຖານຢືນຢັນຄຳເວົ້າຂອງລາວ. ໃນທຳນອງດຽວກັນ ຄລິດສະຕຽນແທ້ຕ້ອງບໍ່ພຽງບອກວ່າລາວເຊື່ອໃນພະຄລິດ ແຕ່ລາວຕ້ອງໃຫ້ຫຼັກຖານອື່ນໆເພີ່ມເຕີມນຳ. ຫຼັກຖານເຫຼົ່ານັ້ນມີຫຍັງແດ່?
ຄຳວ່າ “ຄລິດສະຕຽນ” ຖືກນຳມາໃຊ້ເທື່ອທຳອິດຫຼັງປີ 44. ລາຍງານຂອງລູກາ ນັກປະຫວັດສາດດ້ານຄຳພີໄບເບິນບອກວ່າ: “ພວກລູກສິດຈຶ່ງຖືກເອີ້ນວ່າຄລິດສະຕຽນເປັນເທື່ອທຳອິດໃນເມືອງອັນຕີໂອເຂຍ.” (ກິດຈະການ 11:26) ຂໍໃຫ້ສັງເກດວ່າ ຄົນທີ່ຖືກເອີ້ນວ່າຄລິດສະຕຽນຄືພວກລູກສິດຂອງພະຄລິດ. ການເປັນລູກສິດຂອງພະເຢຊູຄລິດໝາຍຄວາມວ່າແນວໃດ? ວັດຈະນານຸກົມນານາຊາດສະບັບໃໝ່ກ່ຽວກັບເທວະວິທະຍາແຫ່ງພັນທະສັນຍາໃໝ່ (ພາສາອັງກິດ) ອະທິບາຍວ່າ: “ການເປັນລູກສິດຂອງພະເຢຊູໝາຍເຖິງການອຸທິດຊີວິດທັງສິ້ນໃຫ້ພະອົງ. . .ແລະຮັບເອົາທຸກສິ່ງໃນຊີວິດຂອງພະອົງມາເປັນຂອງຕົນໂດຍບໍ່ມີຂໍ້ແມ້.” ດັ່ງນັ້ນ ຄລິດສະຕຽນແທ້ແມ່ນຄົນທີ່ເຮັດຕາມຄຳແນະນຳສັ່ງສອນທຸກຢ່າງຂອງພະເຢຊູຜູ້ກໍ່ຕັ້ງສາສະໜາຄລິດສະຕຽນໂດຍບໍ່ມີຂໍ້ແມ້.
ເປັນໄປໄດ້ບໍທີ່ຈະພົບຄລິດສະຕຽນແທ້ທ່າມກາງຜູ້ຄົນຫຼາຍໆທີ່ອ້າງວ່າເປັນຄລິດສະຕຽນໃນທຸກມື້ນີ້? ພະເຢຊູເອງໄດ້ບອກໄວ້ແນວໃດກ່ຽວກັບຫຼັກຖານທີ່ລະບຸຕົວລູກສິດແທ້ຂອງເພິ່ນ? ໃຫ້ມາເບິ່ງວ່າຄຳພີໄບເບິນຕອບຄຳຖາມເຫຼົ່ານີ້ແນວໃດ. ໃນບົດຄວາມຕໍ່ຈາກນີ້ ເຮົາຈະພິຈາລະນາລັກສະນະສຳຄັນ 5 ຢ່າງທີ່ພະເຢຊູບອກວ່າຈະເປັນຫຼັກຖານລະບຸຕົວລູກສິດແທ້ຂອງເພິ່ນ. ແລ້ວເຮົາຈະພິຈາລະນາວ່າຄລິດສະຕຽນໃນສະຕະວັດທຳອິດສະແດງຫຼັກຖານເຫຼົ່ານີ້ແນວໃດ. ຈາກນັ້ນ ເຮົາຈະມາເບິ່ງວ່າຄລິດສະຕຽນກຸ່ມໃດໃນທຸກມື້ນີ້ກຳລັງເຮັດແບບດຽວກັນ.