ຊີວິດຄລິດສະຕຽນ
ການຟື້ນຄືນມາຈາກຕາຍເປັນໄປໄດ້ໂດຍທາງຄ່າໄຖ່
ວັນອະນຸສອນເຮັດໃຫ້ເຮົາມີໂອກາດທີ່ຈະຄິດເຖິງພະພອນໃນອະນາຄົດທີ່ເປັນໄປໄດ້ໂດຍທາງຄ່າໄຖ່ ເຊັ່ນ: ການຟື້ນຄືນມາຈາກຕາຍ. ພະເຢໂຫວາບໍ່ຢາກໃຫ້ຄົນເຮົາຕາຍ. ດັ່ງນັ້ນ ການເສຍຊີວິດຂອງຄົນທີ່ເຮົາຮັກຈຶ່ງເປັນປະສົບການທີ່ເຈັບປວດທີ່ສຸດຢ່າງໜຶ່ງຂອງມະນຸດ. (1 ໂກ. 15:26) ພະເຍຊູເຈັບປວດໃຈຫຼາຍທີ່ເຫັນລູກສິດຂອງທ່ານໂສກເສົ້າເມື່ອເຫັນລາຊະໂລຕາຍ. (ໂຢ. 11:33-35) ເນື່ອງຈາກພະເຍຊູສະທ້ອນຄຸນລັກສະນະຂອງພະເຢໂຫວາພໍ່ຂອງທ່ານໄດ້ຢ່າງສົມບູນແບບ ເຮົາຈຶ່ງໝັ້ນໃຈໄດ້ວ່າພະເຢໂຫວາເຈັບປວດຄືກັນເມື່ອເຫັນເຮົາໂສກເສົ້າໃນຕອນຄົນທີ່ເຮົາຮັກເສຍຊີວິດ. (ໂຢ. 14:7) ພະເຢໂຫວາຄອຍຖ້າທີ່ຈະປຸກຜູ້ຮັບໃຊ້ທີ່ສັດຊື່ຂອງພະອົງໃຫ້ຟື້ນຄືນມາຈາກຕາຍອີກ ເຮົາກໍຄອຍຖ້າຄືກັນ.—ໂຢບ 14:14, 15
ເນື່ອງຈາກພະເຢໂຫວາເປັນພະເຈົ້າທີ່ມີລະບຽບຈຶ່ງມີເຫດຜົນທີ່ຈະເຊື່ອວ່າການຟື້ນຄືນມາຈາກຕາຍຈະເປັນລະບຽບ (1 ໂກ. 14:33, 40) ຈະບໍ່ມີງານສົບ ແຕ່ຈະມີການຕ້ອນຮັບຄົນທີ່ຟື້ນຄືນມາຈາກຕາຍ. ເມື່ອຄົນທີ່ເຈົ້າຮັກເສຍຊີວິດ ເຈົ້າໄດ້ຄິດຕຶກຕອງເຖິງການຟື້ນຄືນມາຈາກຕາຍເປັນພິເສດບໍ? (2 ໂກ. 4:17, 18) ເຈົ້າຂອບໃຈພະເຢໂຫວາບໍທີ່ໄດ້ຈັດກຽມໃຫ້ມີຄ່າໄຖ່ແລະເປີດເຜີຍໃຫ້ເຮົາຮູ້ໃນຄຳພີໄບເບິນວ່າຄົນທີ່ຕາຍຈະມີຊີວິດອີກ?—ໂກໂລ. 3:15
ໝູ່ຫຼືຍາດພີ່ນ້ອງຂອງເຈົ້າຄົນໃດທີ່ເຈົ້າຄອຍຖ້າຈະພົບເຂົາເຈົ້າອີກ?
ໃຜໃນຄຳພີໄບເບິນທີ່ເຈົ້າຢາກພົບແລະລົມກັບເຂົາເຈົ້າເປັນພິເສດ?