ຊີວິດຄລິດສະຕຽນ
ເຮັດຕາມມາດຕະຖານທາງດ້ານສິນລະທຳຂອງພະເຢໂຫວາ
ພະເຢໂຫວາຕັ້ງມາດຕະຖານສິນລະທຳໃຫ້ມະນຸດ. ຕົວຢ່າງເຊັ່ນ: ພະອົງໄດ້ໃຫ້ກົດໝາຍສຳລັບການແຕ່ງດອງແມ່ນການທີ່ຜົວເມຍຈະຢູ່ນຳກັນຕະຫຼອດໄປ. (ມັດ. 19:4-6, 9) ພະອົງກຽດຊັງການຜິດສິນທຳທາງເພດທຸກຮູບແບບ. (1 ໂກ. 6:9, 10) ພະອົງຈັດໃຫ້ມີຫຼັກການກ່ຽວກັບການນຸ່ງຖືແລະການແຕ່ງກາຍເພື່ອປະຊາຊົນຂອງພະອົງຈະຕ່າງຈາກຄົນອື່ນ—ບັນຍັດ. 22:5; 1 ຕີໂມ. 2:9, 10
ໃນປັດຈຸບັນນີ້ມີຄົນສ່ວນຫຼາຍປະຕິເສດມາດຕະຖານຂອງພະເຢໂຫວາ. (ໂລມ 1:18-32) ພວກເຂົາຍອມໃຫ້ຄວາມຄິດຂອງຄົນທົ່ວໄປມີອິດທິພົນຕໍ່ການນຸ່ງຖື ການແຕ່ງກາຍ ແລະການປະພຶດຂອງພວກເຂົາ. ຫຼາຍຄົນໂອ້ອວດການກະທຳແບບຜິດໆ ແລະວິພາກວິຈານຄົນທີ່ແຕກຕ່າງກັບຕົນເອງ—1 ເປ. 4:3, 4
ໃນຖານະທີ່ເປັນພະຍານພະເຢໂຫວາ ເຮົາຕ້ອງເຮັດຕາມມາດຕະຖານສິນລະທຳຂອງພະເຈົ້າຢ່າງກ້າຫານ. (ໂລມ 12:9) ແລ້ວຈະເຮັດແນວໃດ? ເຮົາຄວນຈະສະແດງໃຫ້ເຫັນແລະເຮັດໃຫ້ພະອົງພໍໃຈ. ເຮົາຕ້ອງຮັກສາມາດຕະຖານທີ່ສະອາດນີ້ໃນຊີວິດຂອງເຮົາ ຕົວຢ່າງເຊັ່ນ: ເມື່ອເລືອກເຄື່ອງນຸ່ງແລະການແຕ່ງກາຍ ເຮົາຕ້ອງຖາມຕົນເອງວ່າ: ການເລືອກຂອງຂ້ອຍສະທ້ອນເຖິງມາດຕະຖານຂອງພະເຢໂຫວາບໍ ຫຼືມາດຕະຖານຂອງໂລກ? ການນຸ່ງຖືຂອງຂ້ອຍໄດ້ພິສູດວ່າຂ້ອຍເປັນຄລິດສະຕຽນທີ່ຢ້ານຢຳພະເຈົ້າບໍ? ຫຼືເມື່ອເລືອກເບິ່ງລາຍການໂທລະພາບ ຫຼືຮູບເງົາ ເຮົາອາດຖາມຕົວເອງວ່າ: ພະເຢໂຫວາຢາກໃຫ້ຂ້ອຍເບິ່ງລາຍການນີ້ບໍ? ເຮົາຕ້ອງເຮັດຕາມມາດຕະຖານສິນລະທຳຂອງໃຜ? ຄວາມບັນເທີງທີ່ຂ້ອຍເລືອກຈະເຮັດໃຫ້ມາດຕະຖານທາງສິນລະທຳຂອງຂ້ອຍອ່ອນລົງບໍ? (ເພງ. 101:3) ຈະເຮັດໃຫ້ຄົນໃນຄອບຄົວ ຫຼືຄົນອື່ນສະດຸດບໍ?—1 ໂກ. 10:31-33
ເປັນຫຍັງການເຮັດຕາມມາດຕະຖານສິນລະທຳຂອງພະເຢໂຫວາຈຶ່ງສຳຄັນທີ່ສຸດ? ອີກບໍ່ດົນພະເຍຊູຄລິດຈະທຳລາຍຊາດຕ່າງໆແລະຄວາມຊົ່ວທັງໝົດ. (ເອເຊກ. 9:4-7) ມີພຽງແຕ່ຄົນທີ່ເຮັດຕາມໃຈປະສົງຂອງພະເຈົ້າເທົ່ານັ້ນທີ່ລອດຊີວິດ. (1 ໂຢ. 2:15-17) ຂໍໃຫ້ເຮົາຮັກສາມາດຕະຖານສິນລະທຳຂອງພະເຢໂຫວາໃຫ້ດີທີ່ສຸດ ຍ້ອນວ່າການປະພຶດຂອງເຮົາເປັນການສັນລະເສີນພະເຢໂຫວາ—1 ເປ. 2:11, 12
ການເລືອກເຄື່ອງນຸ່ງ ແລະການນຸ່ງຖືຂອງຂ້ອຍບອກໃຫ້ຮູ້ຫຍັງກ່ຽວກັບມາດຕະຖານດ້ານສິນລະທຳ?
ເບິ່ງວິດີໂອ ມາເປັນເພື່ອນກັບພະເຢໂຫວາກັນເຖາະ—ຜູ້ຊາຍຕ້ອງຄູ່ກັບຜູ້ຍິງ ແລະຕອບຄຳຖາມຕໍ່ໄປນີ້:
ເປັນຫຍັງຈຶ່ງສະຫຼາດທີ່ຈະໃຊ້ຊີວິດຕາມມາດຕະຖານຂອງພະເຢໂຫວາ?
ເປັນຫຍັງພໍ່ແມ່ຄວນເລີ່ມສອນມາດຕະຖານດ້ານສິນລະທຳຂອງພະເຢໂຫວາໃຫ້ລູກຂອງພວກເຂົາຕັ້ງແຕ່ຍັງນ້ອຍ?
ໄວໜຸ່ມແລະຜູ້ສູງອາຍຸຈະຊ່ວຍຄົນອື່ນໃຫ້ໄດ້ຮັບປະໂຫຍດຈາກຄວາມດີຂອງພະເຢໂຫວາແນວໃດ?