ໜຸ່ມສາວຖາມ
ເຮົາຮູ້ຈັກຕົວເອງດີສ່ຳໃດ?
ທ້າວ ອາຄົມເຫັນທ້າວກອນຍ່າງມາຫາກໍຄຶດຢ້ານໃນໃຈ. ທ້າວ ກອນເວົ້າວ່າ “ອາຄົມ ລອງອັນນີ້ແມ!” ທ້າວ ກອນແບມືອອກແລະມີກັນຊາສົດກອກໜຶ່ງໃນມືລາວ ເຊິ່ງເປັນແບບທີ່ອາຄົມຄຶດໄວ້. ອາຄົມບໍ່ຢາກເອົາ ແຕ່ກໍບໍ່ຢາກຖືກເບິ່ງວ່າເປັນຄົນອ່ອນແອ. ອາຄົມເວົ້າສຽງອ່ອນໆວ່າ “ເທື່ອໜ້າສະ.”
ນາງ ມີນາເຫັນທ້າວກອນຍ່າງມາຫາກໍກຽມພ້ອມໃນສິ່ງທີ່ຈະເກີດຂຶ້ນ. ທ້າວ ກອນເວົ້າວ່າ “ມີນາ ລອງອັນນີ້ແມ!” ທ້າວ ກອນແບມືອອກແລະມີກັນຊາສົດກອກໜຶ່ງໃນມືລາວ ເຊິ່ງເປັນແບບທີ່ມີນາຄຶດໄວ້. ມີນາຕອບຢ່າງໝັ້ນໃຈວ່າ “ບໍ່ ຂ້ອຍຍັງບໍ່ທັນຢາກຕາຍເທື່ອ. ບໍ່ຢາກເຊື່ອເລີຍວ່າຄົນສະຫຼາດແບບເຈົ້າຈະສູບກັນຊາ!”
ໃນເຫດການທີ່ສົມມຸດຂ້າງເທິງນັ້ນ ເປັນຫຍັງນາງມີນາສາມາດຕ້ານທານຄວາມກົດດັນໄດ້ດີກວ່າທ້າວອາຄົມ? ຍ້ອນລາວຮູ້ຈັກຕົວເອງ. ການຮູ້ຈັກຕົວເອງຄືການຮູ້ວ່າຕົວເຮົາເປັນໃຜແລະມີຈຸດຢືນແນວໃດ. ເມື່ອຮູ້ແບບນີ້ ເຮົາກໍມີຄວາມເຂັ້ມແຂງເພື່ອຈະຕ້ານທານແຮງກົດດັນທີ່ຈະເຮັດຜິດ ນັ້ນຄືຮູ້ທີ່ຈະຄວບຄຸມຊີວິດຂອງຕົວເອງແທນທີ່ຈະປ່ອຍໃຫ້ຄົນອື່ນຄວບຄຸມ. ເຮົາຈະສ້າງຄວາມໝັ້ນໃຈແບບນັ້ນໄດ້ແນວໃດ? ຄົງຈະດີຖ້າຈະເລີ່ມຕົ້ນດ້ວຍການຕອບຄຳຖາມຕໍ່ໄປນີ້.
1 ອັນໃດຄືຈຸດດີຂອງເຈົ້າ?
ເປັນຫຍັງຈຶ່ງສຳຄັນ: ການຮູ້ວ່າເຮົາມີຄວາມສາມາດແລະຈຸດດີອັນໃດແດ່ຈະຊ່ວຍເຮົາໃຫ້ມີຄວາມໝັ້ນໃຈໃນຕົວເອງ.
ຂໍໃຫ້ພິຈາລະນາ: ແຕ່ລະຄົນມີຄວາມສາມາດທີ່ແຕກຕ່າງກັນ. ຕົວຢ່າງເຊັ່ນ ບາງຄົນມີຄວາມສາມາດດ້ານສິລະປະຫຼືດົນຕີ ແຕ່ບາງຄົນຫຼິ້ນກິລາເກັ່ງ. ນາງ ນິດແປງລົດເກັ່ງ.a ລາວເວົ້າວ່າ “ຕອນອາຍຸ 15 ປີ ຂ້ອຍຢາກເປັນຊ່າງແປງລົດ.”
ຕົວຢ່າງຈາກຄຳພີໄບເບິນ: ອັກຄະສາວົກໂປໂລຂຽນວ່າ: “ເຮົາບໍ່ເກັ່ງທາງດ້ານການເວົ້າຈາ ແຕ່ທາງດ້ານຄວາມຮູ້ແລ້ວບໍ່ແມ່ນຢ່າງນັ້ນດອກ.” (2 ໂກລິນໂທ 11:6, ທ.ປ.) ຍ້ອນເຂົ້າໃຈພະຄຳພີຢ່າງຖີ່ຖ້ວນ ໂປໂລຈຶ່ງສາມາດຢືນຢັດໄດ້ເມື່ອມີຄົນທ້າທາຍ. ໂປໂລບໍ່ໄດ້ຍອມໃຫ້ຄວາມຄຶດໃນແງ່ລົບຂອງເຂົາເຈົ້າສັ່ນຄອນຄວາມເຊື່ອໝັ້ນຂອງລາວ.—2 ໂກລິນໂທ 10:10; 11:5
ວິເຄາະເບິ່ງຕົວເອງ. ໃຫ້ຂຽນຄວາມສາມາດທີ່ເຈົ້າມີໃສ່ທາງລຸ່ມນີ້.
․․․․․
ບັດນີ້ໃຫ້ພັນລະນາຈຸດດີຂອງເຈົ້າ. (ຕົວຢ່າງເຊັ່ນ ເປັນຄົນຫ່ວງໃຍຄົນອື່ນບໍ? ເປັນຄົນໃຈກວ້າງບໍ? ເປັນຄົນທີ່ໄວ້ໃຈໄດ້ບໍ? ເປັນຄົນກົງຕໍ່ເວລາບໍ?)
․․․․․
“ຂ້ອຍພະຍາຍາມຈະຊ່ວຍຄົນອື່ນ. ຖ້າມີຄົນຂໍຄຳປຶກສາຕອນທີ່ຄາວຽກຢູ່ ຂ້ອຍຈະຢຸດຈາກສິ່ງທີ່ກຳລັງເຮັດແລະຟັງຜູ້ນັ້ນ.”—ນ. ບິຣແອນ.
ຖ້າບໍ່ຮູ້ວ່າຕົວເອງມີຄຸນລັກສະນະທີ່ດີອັນໃດ ໃຫ້ຄຶດຫາຈຸດດີທີ່ໄດ້ພັດທະນາຕັ້ງແຕ່ນ້ອຍຂຶ້ນມາ ແລ້ວຂຽນໃສ່ທາງລຸ່ມນີ້.—ເພື່ອເປັນຕົວຢ່າງ ໃຫ້ເບິ່ງຂອບທີ່ຊື່ວ່າ “ສິ່ງທີ່ຄົນໃນໄວດຽວກັນເວົ້າ.”
․․․․․
2 ອັນໃດຄືຈຸດອ່ອນຂອງເຈົ້າ?
ເປັນຫຍັງຈຶ່ງສຳຄັນ: ຕ່ອງໂສ້ຂໍ້ດຽວທີ່ບໍ່ແຂງແຮງພາໃຫ້ສາຍໂສ້ໝົດເສັ້ນໃຊ້ບໍ່ໄດ້ ເຊັ່ນດຽວກັນ ພາບພົດທັງໝົດຂອງເຮົາຈະເສຍຫາຍຖ້າເຮົາຍອມແພ້ຕໍ່ກັບຈຸດອ່ອນແອພຽງຢ່າງດຽວຂອງເຮົາ.
ຂໍໃຫ້ພິຈາລະນາ: ບໍ່ມີໃຜດີເລີດ. (ໂລມ 3:23) ທຸກຄົນມີນິດໄສບາງຢ່າງທີ່ຢາກຈະປ່ຽນແປງ. ຍິງສາວທີ່ຊື່ເຊຈາຖາມວ່າ “ເປັນຫຍັງຂ້ອຍຈຶ່ງເຈັບຫົວຍ້ອນເລື່ອງໄຮ້ສາລະ. ແມ່ນແຕ່ເລື່ອງເລັກໆນ້ອຍໆກໍເຮັດໃຫ້ຂ້ອຍໃຈຮ້າຍແລະຄວບຄຸມອາລົມໄວ້ບໍ່ໄດ້!”
ຕົວຢ່າງຈາກຄຳພີໄບເບິນ: ໂປໂລຮູ້ຈັກຈຸດອ່ອນຂອງຕົວເອງ. ລາວຂຽນວ່າ: “ເພາະວ່າຕາມຄົນພາຍໃນເຮົາ ເຮົາຊອບໃຈໃນພະບັນຍັດຂອງພະເຈົ້າ ແຕ່ວ່າເຮົາເຫັນມີບັນຍັດອື່ນຢູ່ໃນສ່ວນອາການຂອງເຮົາທີ່ເລວກັນກັບບັນຍັດແຫ່ງຈິດໃຈເຮົາ ແລະຊັກນຳເຮົາໃຫ້ຢູ່ໃຕ້ບັງຄັບບັນຍັດຄວາມບາບ.”—ໂລມ 7:22, 23
ວິເຄາະເບິ່ງຕົວເອງ. ມີຈຸດອ່ອນຫຍັງແດ່ທີ່ຂ້ອຍຈຳເປັນຕ້ອງໄດ້ແກ້ໄຂ?
․․․․․
“ຂ້ອຍສັງເກດວ່າຫຼັງຈາກທີ່ເບິ່ງເລື່ອງກ່ຽວກັບຄວາມຮັກຈົບແລ້ວ ຂ້ອຍຮູ້ສຶກເສົ້າໜ້ອຍໜຶ່ງແລະຢາກໃຫ້ມີຄົນມາມັກຂ້ອຍ. ຕອນນີ້ຂ້ອຍຈຶ່ງຮູ້ວ່າຕ້ອງລະວັງຄວາມບັນເທີງແບບນັ້ນ.”—ນ. ບຣິເກັດ.
3 ເປົ້າໝາຍຂອງຂ້ອຍແມ່ນຫຍັງ?
ເປັນຫຍັງຈຶ່ງສຳຄັນ: ເມື່ອມີເປົ້າໝາຍ ເຮົາກໍຮູ້ວ່າຊີວິດຄວນມຸ່ງໄປທາງໃດແລະມີຈຸດມຸ່ງໝາຍອັນໃດ. ນອກຈາກນັ້ນ ເຮົາຈະບໍ່ຫຍຸ້ງກ່ຽວກັບຄົນແລະສະຖານະການທີ່ອາດຂັດຂວາງເປົ້າໝາຍໃນຊີວິດຂອງເຮົາ.
ຂໍໃຫ້ພິຈາລະນາ: ເຮົາຈະຂີ່ລົດຈັກອ້ອມປະຕູໄຊຈົນນ້ຳມັນລົດໝົດບໍ? ນັ້ນເປັນເລື່ອງທີ່ບໍ່ສະຫຼາດແລະເປືອງເງິນລ້າໆ! ການມີເປົ້າໝາຍໃນຊີວິດຈະບໍ່ເຮັດໃຫ້ເຮົາວົນວຽນຢູ່ບ່ອນເກົ່າ. ເຮົາຮູ້ວ່າຈະໄປໃສແລະວາງແຜນໄວ້ແລ້ວວ່າຈະໄປຮອດຈຸດນັ້ນໄດ້ແນວໃດ.
ຕົວຢ່າງຈາກຄຳພີໄບເບິນ: ໂປໂລຂຽນວ່າ: “ເຮົາແລ່ນເສັງເອົາຊະນະເປັນແນ່ [ແທ້].” (1 ໂກລິນໂທ 9:26) ແທນທີ່ຈະໃຊ້ຊີວິດແບບໄຮ້ຈຸດມຸ່ງໝາຍ ໂປໂລຕັ້ງເປົ້າໝາຍແລະເຮັດຕາມເປົ້າໝາຍນັ້ນ.—ຟິລິບ 3:12-14
ວິເຄາະເບິ່ງຕົວເອງ. ໃຫ້ຂຽນເປົ້າໝາຍສາມຢ່າງທີ່ເຈົ້າຢາກເຮັດໃຫ້ສຳເລັດພາຍໃນປີໜ້າໃສ່ທາງລຸ່ມນີ້.
․․․․․
․․․․․
․․․․․
ບັດນີ້ໃຫ້ເລືອກເປົ້າໝາຍຢ່າງໜຶ່ງທີ່ສຳຄັນທີ່ສຸດຈາກຂ້າງເທິງນັ້ນ ແລະຂຽນວ່າເຈົ້າຈະເຮັດແນວໃດໃນຕອນນີ້ເພື່ອເປົ້າໝາຍນັ້ນຈະສຳເລັດ.
․․․․․
“ຖ້າຂ້ອຍບໍ່ເຮັດຫຍັງ ຂ້ອຍກໍຢູ່ພໍແລ້ວມື້ແລ້ວເວັນໄປຊື່ໆ. ດີກວ່າທີ່ຈະມີເປົ້າໝາຍແລະເຮັດໃຫ້ສຳເລັດ.”—ທ. ໂຈເຊ.
4 ຂ້ອຍມີຄວາມເຊື່ອໝັ້ນແນວໃດ?
ເປັນຫຍັງຈຶ່ງສຳຄັນ: ຖ້າບໍ່ມີຄວາມເຊື່ອໝັ້ນ ເຮົາຈະເປັນຄົນທີ່ບໍ່ກ້າຕັດສິນໃຈ. ເຮົາຈະເປັນຄືໂຕກະປອມເຊິ່ງປ່ຽນສີເພື່ອໃຫ້ເຂົ້າກັບໝູ່ຮຸ່ນດຽວກັນ ນັ້ນເປັນສິ່ງຊີ້ບອກຊັດເຈນວ່າເຮົາບໍ່ຮູ້ຈັກຕົວເອງ.
ຂໍໃຫ້ພິຈາລະນາ: ຄຳພີໄບເບິນແນະນຳຄລິດສະຕຽນໃຫ້ “ລອງເບິ່ງ [ເພື່ອ] ຮູ້ວ່ານ້ຳໃຈຂອງພະເຈົ້າເປັນອັນດີແລະທີ່ຊອບໃຈແລະສຳເລັດດີທີ່ສຸດ.” (ໂລມ 12:2) ຖ້າເຮົາເຮັດຕາມສິ່ງທີ່ເຮົາເຊື່ອໝັ້ນ ເຮົາກໍຈະມີຈຸດຢືນຂອງຕົວເອງບໍ່ວ່າຄົນອື່ນຈະເຮັດແນວໃດກໍຕາມ.
ຕົວຢ່າງຈາກຄຳພີໄບເບິນ: ເມື່ອເປັນໄວຮຸ່ນ ຜູ້ພະຍາກອນດານຽນ “ຕັ້ງໃຈ” ທີ່ຈະເຮັດຕາມກົດໝາຍຂອງພະເຢໂຫວາ ເຖິງວ່າຖືກແຍກຈາກຄອບຄົວແລະເພື່ອນຮ່ວມການນະມັດສະການ. (ດານຽນ 1:8) ຍ້ອນການຕັ້ງໃຈແນວນັ້ນ ດານຽນຈຶ່ງມີຈຸດຢືນຂອງຕົວເອງ ແລະໃຊ້ຊີວິດສອດຄ່ອງກັບຄວາມເຊື່ອຂອງຕົນ.
ວິເຄາະເບິ່ງຕົວເອງ. ຂ້ອຍມີຄວາມເຊື່ອແນວໃດ? ຕົວຢ່າງເຊັ່ນ:
ຂ້ອຍເຊື່ອວ່າມີພະເຈົ້າບໍ? ຖ້າເຊື່ອ ຍ້ອນຫຍັງຈຶ່ງເຊື່ອ? ຫຼັກຖານອັນໃດທີ່ເຮັດໃຫ້ຂ້ອຍເຊື່ອວ່າພະເຈົ້າມີແທ້?
ເປັນຫຍັງຂ້ອຍຈຶ່ງເຊື່ອວ່າຫຼັກສິນລະທຳຂອງພະເຢໂຫວາເປັນປະໂຫຍດແກ່ຂ້ອຍ? ຖ້າເຊື່ອ ຍ້ອນຫຍັງຈຶ່ງເຊື່ອ? ຕົວຢ່າງເຊັ່ນ ອັນໃດພາໃຫ້ຂ້ອຍເຊື່ອວ່າການເຮັດຕາມກົດໝາຍຂອງພະເຢໂຫວາໃນເລື່ອງເພດສຳພັນ ຈະເຮັດໃຫ້ຂ້ອຍມີຄວາມສຸກຫຼາຍກວ່າການເຮັດຕາມຄົນຮຸ່ນດຽວກັນເຊິ່ງໃຊ້ຊີວິດແບບ “ເສລີ”?
ບໍ່ຕ້ອງຟ້າວຕອບຄຳຖາມເຫຼົ່ານີ້ ໃຫ້ຄຶດຫາເຫດຜົນກ່ອນ. ການເຮັດແນວນັ້ນຈະຊ່ວຍປົກປ້ອງຄວາມເຊື່ອຂອງຕົນເອງໄດ້ດີກວ່າ.—ສຸພາສິດ 14:15; 1 ເປໂຕ 3:15
“ຢູ່ໂຮງຮຽນ ໝູ່ຈະມັກເວົ້າກວນຖ້າເຫັນວ່າຂ້ອຍຂາດຄວາມເຊື່ອໝັ້ນ ແລະຂ້ອຍບໍ່ຢາກເປັນຄົນທີ່ຂາດຄວາມເຊື່ອໝັ້ນໃນເລື່ອງຄວາມເຊື່ອຂອງຕົນເອງ. ຂ້ອຍຈຶ່ງພະຍາຍາມຊອກຫາເຫດຜົນທີ່ຈະແຈ້ງແລະໜັກແໜ້ນເພື່ອປົກປ້ອງຄວາມເຊື່ອຂອງຕົນເອງ ແທນທີ່ຈະບອກຄົນອື່ນວ່າ ‘ຂ້ອຍເຮັດບໍ່ໄດ້ດອກ ຍ້ອນວ່າສາສະໜາຂອງຂ້ອຍຫ້າມບໍ່ໃຫ້ເຮັດ’ ຂ້ອຍຈະບອກວ່າ ‘ຂ້ອຍຄຶດວ່າການເຮັດແບບນັ້ນບໍ່ຖືກຕ້ອງ.’ ນີ້ແມ່ນຄວາມເຊື່ອຂອງຂ້ອຍ.”—ນ. ດານີແອນ.
ໃນທີ່ສຸດ ເຈົ້າຢາກຈະເປັນຄືກັບຫຍັງ ເປັນຄືໃບໄມ້ທີ່ປິວໄປມາຕາມລົມຫຼືເປັນຄືຕົ້ນໄມ້ທີ່ທົນທານຢູ່ໄດ້ເຖິງວ່າຈະມີພາຍຸທີ່ຮຸນແຮງ. ໃຫ້ພະຍາຍາມຮູ້ຈັກຕົວເອງໃຫ້ຫຼາຍຂຶ້ນ ແລະເຈົ້າຈະເປັນຄືກັບຕົ້ນໄມ້ນັ້ນ.
ຖ້າຮູ້ຈັກຕົວເອງດີ ເຮົາກໍຈະເປັນຄືຕົ້ນໄມ້ທີ່ມີຮາກແຂງແຮງເຊິ່ງຕ້ານທານພາຍຸທີ່ຮຸນແຮງໄດ້
a ຊື່ບາງຄົນໃນບົດຄວາມນີ້ເປັນຊື່ສົມມຸດ.