ບົດ 107
ເອຕຽນຖືກເຂົາເອົາຫີນຄວ່າງໃສ່
ຊາຍທີ່ພວມຄູ້ເຂົ່າທີ່ນີ້ຄືເອຕຽນ. ເພິ່ນເປັນສາວົກທີ່ສັດຊື່ຂອງພະເຍຊູ. ແຕ່ເບິ່ງມີຫຍັງເກີດຂຶ້ນກັບເພິ່ນຂະນະນີ້ແດ່! ຄົນເຫຼົ່ານີ້ພວມຄວ່າງຫີນກ້ອນໃຫຍ່ໃສ່ເພິ່ນ. ເປັນຫຍັງເຂົາຈຶ່ງຊັງເອຕຽນຫຼາຍແທ້ຈົນເຖິງເຂົາເຮັດສິ່ງຮ້າຍກາດແບບນີ້? ໃຫ້ເຮົາເບິ່ງຕໍ່ໄປ.
ພະເຈົ້າໄດ້ຊ່ວຍເອຕຽນໃຫ້ເຮັດການອັດສະຈັນອັນໜ້າພິດສະຫວົງຫຼາຍຢ່າງ. ພວກນີ້ບໍ່ມັກການເຮັດຢ່າງນີ້ ແລະດັ່ງນັ້ນເຂົາຈຶ່ງໄດ້ໂຕ້ຖຽງກັບເພິ່ນເຖິງການທີ່ເພິ່ນສັ່ງສອນຄວາມຈິງແກ່ຜູ້ຄົນ. ແຕ່ພະເຈົ້າປະທານສະຕິປັນຍາໃຫ້ເອຕຽນ ແລະເອຕຽນເຜີຍໃຫ້ເຫັນວ່າ ພວກເຫຼົ່ານີ້ສອນເລື່ອງບໍ່ຈິງຕ່າງໆເລື້ອຍມາ. ເລື່ອງນີ້ເຮັດໃຫ້ພວກເຂົາເຄືອງແຄ້ນຂຶ້ນອີກ. ດັ່ງນັ້ນເຂົາຈຶ່ງຄວ້າເອົາເອຕຽນແລ້ວເອີ້ນຜູ້ຄົນເຂົ້າມາເພື່ອໃຫ້ຄຳພະຍານບໍ່ຈິງກ່ຽວກັບເພິ່ນ.
ມະຫາປະໂລຫິດຖາມເອຕຽນວ່າ: ‘ການນີ້ເປັນສັນນັ້ນແທ້ບໍ?’ ເອຕຽນຕອບໂດຍໃຫ້ຄຳບັນລະຍາຍຢ່າງດີຈາກຄຳພີໄບເບິນ. ຕອນທ້າຍຂອງຄຳບັນລະຍາຍ ເພິ່ນບອກວ່າດົນມາແລ້ວພວກຄົນຊົ່ວໄດ້ກຽດຊັງຜູ້ພະຍາກອນຂອງພະເຢໂຫວາ ແລ້ວກ່າວວ່າ: ‘ພວກທ່ານກໍ່ຄືກັນກັບຄົນເຫຼົ່ານັ້ນ. ພວກທ່ານໄດ້ຂ້າພະເຍຊູຜູ້ຮັບໃຊ້ຂອງພະເຈົ້າ ແລະທ່ານບໍ່ໄດ້ເຊື່ອຟັງກົດໝາຍຂອງພະເຈົ້າ.’
ເລື່ອງນີ້ເຮັດໃຫ້ຫົວໜ້າສາສະໜາເຫຼົ່ານີ້ຄຽດແຄ້ນຫຼາຍ! ເຂົາຂົບແຂ້ວດ້ວຍຄວາມຂຸ່ນເຄືອງ. ແລ້ວເອຕຽນເງີຍໜ້າຂຶ້ນ ແລະກ່າວວ່າ: ‘ຈົ່ງເບິ່ງເຮົາເຫັນພະເຍຊູຢືນຢູ່ທີ່ເບື້ອງຂວາແຫ່ງພະເຈົ້າໃນສະຫວັນ.’ ຕອນນີ້ ຄົນເຫຼົ່ານີ້ກໍ່ເອົາມືອັດຫູຂອງເຂົາແລະຮີບແລ່ນເຂົ້າໄປໃສ່ເອຕຽນ. ເຂົາຄວ້າຕົວເພິ່ນລາກໄປນອກເມືອງ.
ທີ່ນີ້ເຂົາຖອດເສື້ອຊັ້ນນອກອອກຝາກໄວ້ກັບຊາຍຫນຸ່ມຊື່ວ່າໂຊໂລ. ເຈົ້າເຫັນໂຊໂລບໍ? ແລ້ວມີບາງຄົນໃນພວກເຂົາເລີ່ມຄວ່າງກ້ອນຫີນໃສ່ເອຕຽນ. ເພິ່ນຄູ້ເຂົ່າລົງ ດັ່ງທີ່ເຈົ້າເຫັນແລະເພິ່ນອະທິດຖານເຖິງພະເຈົ້າວ່າ: ‘ພະເຢໂຫວາເຈົ້າຂ້າ ຂໍຢ່າລົງໂທດພວກເຂົາເພາະການຊົ່ວນີ້.’ ເພິ່ນຮູ້ວ່າມີບາງຄົນໃນພວກນັ້ນຖືກຫົວໜ້າສາສະໜາຫຼອກລວງ. ຫຼັງຈາກນັ້ນເອຕຽນກໍ່ຕາຍ.
ເມື່ອມີຄົນໃດຄົນນຶ່ງເຮັດບໍ່ດີແກ່ເຈົ້າ ເຈົ້າຈະພະຍາຍາມແກ້ແຄ້ນຕອບເຂົາບໍ ຫຼືວ່າຂໍໃຫ້ພະເຈົ້າລົງໂທດເຂົາ? ເອຕຽນແລະພະເຍຊູບໍ່ໄດ້ເຮັດແນວນັ້ນ. ເພິ່ນທັງສອງມີໃຈເມດຕາແມ່ນວ່າກັບຄົນເຫຼົ່ານັ້ນທີ່ບໍ່ມີຄວາມເມດຕາຕໍ່ຕົນ. ຂໍໃຫ້ເຮົາພະຍາຍາມເຮັດຕາມແບບຢ່າງຂອງເພິ່ນທັງສອງເຖີດ.