ບົດ 116
ວິທີທີ່ເຮົາຈະມີຊີວິດຢູ່ໄດ້ຕະຫຼອດໄປ
ເຈົ້າບອກໄດ້ບໍວ່າເດັກຍິງນ້ອຍແລະເພື່ອນພວມອ່ານຫຍັງ? ແມ່ນອີ່ຫຼີ ຄືປຶ້ມເຫຼັ້ມນີ້ທີ່ເຈົ້າພວມອ່ານຢູ່ ໜັງສືຂອງຂ້ອຍກ່ຽວກັບເລື່ອງໃນພະຄຳພີໄບເບິນ. ເຂົາພວມອ່ານເລື່ອງດຽວກັນທີ່ເຈົ້າອ່ານຄື—“ວິທີທີ່ເຮົາຈະມີຊີວິດຢູ່ໄດ້ຕະຫຼອດໄປ.”
ເຈົ້າຮູ້ບໍວ່າເຂົາພວມຮຽນຫຍັງ? ສິ່ງທຳອິດຄື ພວກເຂົາຕ້ອງຮຽນຮູ້ກ່ຽວກັບພະເຢໂຫວາແລະພະບຸດຂອງພະອົງຄືພະເຍຊູຖ້າເຮົາຫວັງຈະມີຊີວິດຕະຫຼອດໄປ. ພະຄຳພີກ່າວວ່າ: ‘ອັນນີ້ເປັນທາງທີ່ຈະມີຊີວິດຢູ່ຕະຫຼອດໄປ. ຈົ່ງຮຽນຮູ້ເຖິງພະເຈົ້າທ່ຽງແທ້ອົງດຽວແລະພະເຍຊູຄລິດພະບຸດຜູ້ຊຶ່ງພະເຈົ້າໄດ້ສົ່ງມາເທິງແຜ່ນດິນໂລກ.’
ເຮົາຈະຮຽນຮູ້ເຖິງພະເຢໂຫວາແລະພະເຍຊູພະບຸດຂອງພະອົງໄດ້ຢ່າງໃດ? ວິທີນຶ່ງຄືອ່ານ ໜັງສືຂອງຂ້ອຍກ່ຽວກັບເລື່ອງໃນພະຄຳພີໄບເບິນ ຈາກໜ້າທຳອິດຈົນເຖິງໜ້າສຸດທ້າຍ. ປຶ້ມເຫຼັ້ມນີ້ບອກໃຫ້ຮູ້ຫຼາຍສິ່ງກ່ຽວກັບພະເຢໂຫວາແລະພະເຍຊູແມ່ນບໍ? ແລະໄດ້ບອກຫຼາຍສິ່ງຫຼາຍຢ່າງເຖິງສິ່ງທີ່ພະອົງທັງສອງໄດ້ກະທຳມາແລ້ວແລະເຖິງສິ່ງຊຶ່ງຍັງຈະກະທຳອີກ. ແຕ່ວ່າເຮົາຕ້ອງເຮັດຫຼາຍກວ່າພຽງແຕ່ອ່ານປຶ້ມເຫຼັ້ມນີ້ເທົ່ານັ້ນ.
ເຈົ້າເຫັນປຶ້ມອີກເຫຼັ້ມນຶ່ງທີ່ຢູ່ກັບພື້ນບໍ? ນັ້ນຄືຄຳພີໄບເບິນ. ຈົ່ງຂໍໃຫ້ຜູ້ໃດຜູ້ນຶ່ງອ່ານສ່ວນຕ່າງໆໃນພະຄຳພີໃຫ້ເຈົ້າຟັງຊຶ່ງຍົກມາສະໜັບສະຫນູນເລື່ອງຕ່າງໆໃນປຶ້ມເຫຼັ້ມນີ້. ຄຳພີໄບເບິນໃຫ້ຄວາມຮູ້ທີ່ຈຳເປັນຢ່າງຄົບຖ້ວນເພື່ອເຮົາທຸກຄົນຈະຮັບໃຊ້ພະເຢໂຫວາດ້ວຍວິທີທີ່ຖືກຕ້ອງແລະໄດ້ຊີວິດຕະຫຼອດໄປ. ດັ່ງນັ້ນເຮົາຄວນສຶກສາພະຄຳພີເລື້ອຍໆໃຫ້ເປັນນິດໄສ.
ແຕ່ການຮຽນຮູ້ກ່ຽວກັບພະເຢໂຫວາແລະພະເຍຊູເທົ່ານັ້ນຍັງບໍ່ພໍ. ເຮົາອາດມີຄວາມຮູ້ຫຼວງຫຼາຍກ່ຽວກັບພະອົງທັງສອງແລະຄຳສັ່ງສອນຕ່າງໆ ແຕ່ແລ້ວຈະບໍ່ໄດ້ຮັບຊີວິດຕະຫຼອດໄປກໍ່ໄດ້. ເຈົ້າຮູ້ບໍວ່າມີສິ່ງໃດອີກທີ່ຈຳເປັນ?
ເຮົາຈຳຕ້ອງດຳເນີນຊີວິດໃຫ້ປະສານກັນກັບສິ່ງທີ່ໄດ້ຮຽນມານັ້ນດ້ວຍ. ເຈົ້າຈື່ຢູດາອີດສະກາລີໂອດໄດ້ບໍ? ເຂົາເປັນຄົນນຶ່ງໃນ 12 ຄົນທີ່ພະເຍຊູໄດ້ເລືອກໃຫ້ເປັນອັກຄະສາວົກຂອງພະອົງ. ຢູດາມີຄວາມຮູ້ຫຼາຍກ່ຽວກັບພະເຢໂຫວາແລະພະເຍຊູ. ແຕ່ມີຫຍັງເກີດຂຶ້ນກັບເຂົາ? ຕໍ່ມາບໍ່ດົນເຂົາໄດ້ກາຍເປັນຄົນເຫັນແກ່ຕົວ ແລະເຂົາໄດ້ທໍລະຍົດຂາຍພະເຍຊູໃຫ້ແກ່ພວກສັກຕູຂອງພະອົງເພື່ອເງິນ 30 ແຜ່ນ. ດັ່ງນັ້ນຢູດາຈຶ່ງຈະບໍ່ໄດ້ຮັບຊີວິດຕະຫຼອດໄປ.
ເຈົ້າຈື່ເຄຫາຊີໄດ້ບໍຊາຍຜູ້ທີ່ເຮົາໄດ້ຮຽນຮູ້ມາແລ້ວໃນເລື່ອງທີ 69? ເຂົາຢາກໄດ້ເສື້ອຜ້າແລະເງິນຊຶ່ງບໍ່ແມ່ນຂອງເຂົາ. ດັ່ງນັ້ນເຂົາຈຶ່ງເວົ້າຕົວະເພື່ອທີ່ຈະໄດ້ສິ່ງຂອງເຫຼົ່ານີ້. ແຕ່ພະເຢໂຫວາໄດ້ລົງໂທດເຂົາ. ແລະຖ້າເຮົາບໍ່ເຊື່ອຟັງກົດໝາຍຂອງພະເຈົ້າ ພະອົງກໍ່ຈະລົງໂທດເຮົາຄືກັນ.
ແຕ່ຄົນດີກໍ່ມີຫຼາຍຢູ່ຄືຜູ້ທີ່ໄດ້ຮັບໃຊ້ພະເຢໂຫວາຢ່າງສັດຊື່ຕະຫຼອດມາ. ເຮົາຢາກເປັນຄືກັນກັບເຂົາແມ່ນບໍ? ເດັກນ້ອຍຊາເມິອນເປັນຕົວຢ່າງທີ່ດີທີ່ເຮົາຄວນຈະປະຕິບັດຕາມ. ຈື່ໄດ້ບໍ ດັ່ງທີ່ເຮົາໄດ້ເຫັນໃນເລື່ອງທີ 55 ເຂົາມີອາຍຸພຽງແຕ່ສີ່ຫຼືຫ້າປີເທົ່ານັ້ນ ເມື່ອເຂົາເລີ່ມຮັບໃຊ້ພະເຢໂຫວາທີ່ກະໂຈມຫຼືຈຳໜັກອາໄສຂອງພະອົງ. ສະນັ້ນບໍ່ວ່າເຈົ້າຈະຍັງຫນຸ່ມນ້ອຍເທົ່າໃດກໍ່ຕາມ ເຈົ້າກໍ່ບໍ່ນ້ອຍເກີນໄປທີ່ຈະຮັບໃຊ້ພະເຢໂຫວາ.
ແນ່ນອນ ຜູ້ຊຶ່ງເຮົາທຸກຄົນຕ້ອງການຈະປະຕິບັດຕາມນັ້ນຄືພະເຍຊູຄລິດ. ແມ່ນແຕ່ເມື່ອພະອົງຍັງເປັນເດັກນ້ອຍຢູ່ ພະອົງໄດ້ໄປທີ່ວິຫານສົນທະນາກັບຄົນອື່ນໆເຖິງພະບິດາຂອງພະອົງທາງພາກສະຫວັນ ດັ່ງທີ່ສະແດງໃນເລື່ອງທີ 87. ຂໍໃຫ້ເຮົາປະຕິບັດຕາມຕົວຢ່າງຂອງພະອົງເຖີດ. ຂໍໃຫ້ເຮົາພາກັນບອກຫຼາຍໆຄົນເທົ່າທີ່ເຮັດໄດ້ເຖິງພະເຢໂຫວາພະເຈົ້າອົງຍິ່ງໃຫຍ່ຂອງເຮົາ ແລະພະເຍຊູຄລິດພະບຸດຂອງພະອົງ. ຖ້າເຮົາເຮັດສິ່ງເຫຼົ່ານີ້ ເຮົາກໍ່ຈະມີຊີວິດອັນຕະຫຼອດໄປໃນອຸດທະຍານໃໝ່ຂອງພະເຈົ້າເທິງແຜ່ນດິນໂລກ.