ບົດ 2
ພະອົງໄດ້ຮັບກຽດກ່ອນປະສູດ
ຫຼັງຈາກທູດສະຫວັນຄາບລິເອນບອກກັບມາລີຍິງສາວວ່າ ນາງຈະໃຫ້ກຳເນີດບຸດຊາຍ ຜູ້ທີ່ຈະມາເປັນກະສັດອົງຕະຫຼອດໄປ ມາລີຖາມວ່າ “ການນີ້ຈະບັງເກີດມາຢ່າງໃດ ເຫດວ່າຂ້າພະເຈົ້າບໍ່ຮ່ວມຮູ້ຊາຍສັກຄົນ”?
ຄາບລິເອນອະທິບາຍວ່າ “ພະວິນຍານບໍລິສຸດຈະລົງມາເທິງນາງ ແລະລິດເດດແຫ່ງພະເຈົ້າອົງທີ່ສູງສຸດຈະປົກບັງນາງດ້ວຍເງົາຂອງພະອົງ ເຫດສັນນີ້ ສິ່ງບໍລິສຸດທີ່ຈະເກີດນັ້ນຈະເປັນທີ່ເອີ້ນຊື່ວ່າພະບຸດຂອງພະເຈົ້າ.”
ເພື່ອຊ່ວຍໃຫ້ມາລີຫາຍຄວາມຂ້ອງໃຈ ຄາບລິເອນກ່າວຕໍ່ໄປວ່າ “ຈົ່ງເບິ່ງ ນາງເອລີຊາເບດພີ່ນ້ອງຂອງເຈົ້າໄດ້ທົງຄັບທັງມວນເວລາເຖົ້າແລ້ວ ແລະດຽວນີ້ເປັນເດືອນທີຫົກຂອງຜູ້ຍິງນັ້ນ ທີ່ເຂົາເວົ້າວ່າເປັນຍິງໝັນ. ເຫດວ່າ ບໍ່ມີສິ່ງໜຶ່ງສິ່ງໃດທີ່ພະເຈົ້າຈະກະທຳບໍ່ໄດ້.”
ມາລີເຊື່ອຄາບລິເອນແລະນາງຕອບຮັບຢ່າງໃດ? ນາງກ່າວວ່າ “ຂ້າພະເຈົ້າເປັນຍິງໃຊ້ຂອງພະເຢໂຫວາ ຂໍໃຫ້ບັງເກີດແກ່ຂ້າພະເຈົ້າຕາມຖ້ອຍຄຳຂອງອົງ [“ທ່ານ,” ລ.ມ.].”
ຫຼັງຈາກຄາບລິເອນຈາກໄປບໍ່ດົນມາລີອອກໄປຢາມເອລີຊາເບດເຊິ່ງຢູ່ກັບສາມີໃນແຖບພູເຂົາຂອງແຂວງຢູດາ. ຈາກບ້ານຂອງມາລີໃນນາຊາເລດເປັນໄລຍະທາງໄກ ອາດຈະໃຊ້ເວລາເດີນທາງສາມສີ່ມື້.
ໃນທີ່ສຸດເມື່ອມາລີມາເຖິງບ້ານຂອງຊະຄາເລຍ ນາງເຂົ້າໄປແລະທັກທາຍ. ຂະນະນັ້ນເອລີຊາເບດເຕັມດ້ວຍພະວິນຍານບໍລິສຸດແລະເວົ້າກັບມາລີວ່າ “ນາງເປັນຜູ້ຮັບຄວາມພອນໃນທ່າມກາງພວກຍິງທັງປວງ ແລະລູກໃນທ້ອງຂອງນາງກໍເປັນທີ່ຮັບຄວາມພອນດ້ວຍ ແລະແມ່ຂອງພະອົງເຈົ້າຂອງຂ້າພະເຈົ້າຈະມາຫາຂ້າພະເຈົ້າ ການນີ້ໂປດແກ່ຂ້າພະເຈົ້າແຕ່ທີ່ໃດ. ເຫດວ່າ ຈົ່ງເບິ່ງ ຕັ້ງແຕ່ສຽງຄວາມຄຳນັບຂອງນາງໄດ້ເຖິງຫູຂ້າພະເຈົ້າ ລູກອ່ອນໃນທ້ອງຂ້າພະເຈົ້າໄດ້ດີ້ນດ້ວຍຄວາມຍິນດີ.”
ເມື່ອໄດ້ຍິນດັ່ງນັ້ນ ມາລີຕອບດ້ວຍຄວາມຂອບຄຸນຈາກໃຈຈິງວ່າ “ຈິດໃຈຂອງຂ້າພະເຈົ້າສັນລະເສີນຍົກຍໍພະເຢໂຫວາ. ແລະຈິດວິນຍານຂອງຂ້າພະເຈົ້າໄດ້ຊົມຊື່ນຍິນດີໃນພະເຈົ້າຜູ້ຊ່ວຍຂອງຂ້າພະເຈົ້າ. ເຫດວ່າພະເຈົ້າໄດ້ເບິ່ງທີ່ຍາກຕ່ຳແຫ່ງຍິງໃຊ້ຂອງພະອົງ ເຫດວ່າຈົ່ງເບິ່ງ ຕັ້ງແຕ່ນີ້ໄປ ເຊື້ອຊາດທັງປວງຈະກ່າວວ່າ ຂ້າພະເຈົ້າເປັນສຸກຫຼາຍ ເພາະວ່າພະເຈົ້າອົງທີ່ມີລິດເດດໄດ້ກະທຳການອັນໃຫຍ່ສຳລັບຂ້າພະເຈົ້າ.” ເຖິງ ແມ່ນວ່າມາລີໄດ້ຮັບຄວາມໂປດປານຫຼາຍ ນາງໃຫ້ກຽດທັງສິ້ນແດ່ພະເຈົ້າ. ນາງກ່າວວ່າ “ນາມຊື່ຂອງພະອົງເປັນບໍລິສຸດ ແລະຄວາມອີດູຂອງພະອົງມີແກ່ຄົນທັງຫຼາຍທີ່ຢ້ານຢຳພະເຈົ້າ ແຕ່ເຊື້ອຊາດນີ້ເຖິງເຊື້ອຊາດນັ້ນສືບໆ ໄປ.”
ມາລີສັນລະເສີນພະເຈົ້າຕໍ່ໄປດ້ວຍຄຳເພງເຊີງພະຍາກອນຈາກການດົນໃຈນາງກ່າວວ່າ “ພະອົງໄດ້ສຳແດງລິດເດດດ້ວຍແຂນຂອງພະອົງ ແລະຄົນທັງຫຼາຍທີ່ມີຄວາມຄິດຈອງຫອງໃນໃຈ ພະອົງໄດ້ກະທຳໃຫ້ພັດພາກຈາກກັນ. ຄົນທັງຫຼາຍທີ່ມີອຳນາດ ພະອົງໄດ້ກະທຳໃຫ້ລົງຈາກພະທີ່ນັ່ງຂອງເຂົາ ແລະຜູ້ເລັກນ້ອຍ ພະອົງໄດ້ຍົກຂຶ້ນ. ຜູ້ທີ່ມີຄວາມອຶດຢາກ ພະອົງໄດ້ໃຫ້ເຕັມໄປດ້ວຍຂອງດີ ແລະຜູ້ມັ່ງມີ ພະອົງໄດ້ໃຫ້ອອກໄປມືເປົ່າ. ພະອົງໄດ້ຊ່ອຍພວກຍິດສະລາເອນຂ້າໃຊ້ຂອງພະອົງ ເພື່ອຈະໄດ້ຈື່ຄວາມອີດູຂອງພະອົງ. ສຳລັບອັບລາຫາມແລະເຊື້ອສາຍຂອງທ່ານສືບໆ ໄປເປັນນິດ ຕາມພະອົງໄດ້ປາກແກ່ພວກປູ່ຍ່າຕານາຍຂອງຫມູ່ເຮົາ.”
ມາລີພັກເຊົານຳເອລີຊາເບດປະມານສາມເດືອນ ແລະນາງຄົງໄດ້ໃຫ້ຄວາມຊ່ອຍເຫຼືອຫຼາຍໃນຕອນເອລີຊາເບດຄັນແກ່ໃກ້ຈະຄອດ. ນັບວ່າເປັນການດີອີ່ຫຼີທີ່ຍິງຜູ້ສັດຊື່ສອງຄົນນີ້ເຊິ່ງຕັ້ງຄັນດ້ວຍລິດເດດຂອງພະເຈົ້າມີໂອກາດຢູ່ນຳກັນໃນໄລຍະທີ່ຊີວິດທັງສອງຄົນໄດ້ຮັບພະພອນ.
ເຈົ້າສັງເກດວ່າພະເຍຊູໄດ້ຮັບກຽດແມ່ນແຕ່ກ່ອນພະອົງປະສູດເສຍອີກບໍ? ເອລີຊາເບດເອີ້ນພະອົງວ່າ “ພະອົງເຈົ້າຂອງຂ້າພະເຈົ້າ” ແລະລູກໃນທ້ອງຂອງນາງດີ້ນດ້ວຍຄວາມຍິນດີເມື່ອມາລີມາຮອດ. ໃນທາງກົງກັນຂ້າມ ຄົນອື່ນໆ ປະຕິບັດຕໍ່ມາລີແລະບຸດທີ່ພວມຈະເກີດນັ້ນຢ່າງຂາດຄວາມນັບຖື ດັ່ງທີ່ເຮົາຈະເຫັນ. ລຶກາ 1:26-56.
▪ ເພື່ອຊ່ອຍມາລີໃຫ້ເຂົ້າໃຈວ່ານາງຈະຕັ້ງຄັນໄດ້ຢ່າງໃດ ຄາບລິເອນຈຶ່ງເວົ້າຫຍັງ?
▪ ພະເຍຊູໄດ້ຮັບກຽດຢ່າງໃດກ່ອນພະອົງປະສູດ?
▪ ມາລີກ່າວຢ່າງໃດໃນຄຳເພງເຊີງພະຍາກອນເພື່ອສັນລະເສີນພະເຈົ້າ?
▪ ມາລີພັກເຊົານຳເອລີຊາເບດດົນປານໃດ ແລະເພາະເຫດໃດຈຶ່ງເໝາະທີ່ມາລີຢູ່ກັບເອລີຊາເບດໃນໄລຍະນັ້ນ?