ບົດ 17
ການສອນນິໂກເດມ
ລະຫວ່າງພະເຍຊູເຂົ້າຮ່ວມການສະຫຼອງປັດສະຄາປີສາກົນສັກກະຫຼາດ 30 ພະອົງກະທຳການອັດສະຈັນອັນໜ້າປະຫຼາດຫຼາຍປະການ. ດ້ວຍເຫດນີ້ຫຼາຍຄົນຈຶ່ງເຊື່ອໃນພະອົງ. ນິໂກເດມ ສະມາຊິກສານສູງຂອງຊາດຢິວຮູ້ສຶກປະທັບໃຈແລະຢາກຮູ້ຫຼາຍຂຶ້ນ. ດັ່ງນັ້ນ ເຂົາມາຫາພະເຍຊູໃນຍາມຄ່ຳມືດເດິກດຶ່ນ ອາດເປັນເພາະຢ້ານຈະເສຍຊື່ສຽງໃນທ່າມກາງພວກຜູ້ນຳຊາວຢິວຫາກມີຄົນເຫັນເຂົາ.
ເຂົາທູນວ່າ “ພະອາຈານເຈົ້າຂ້າພວກຂ້າພະເຈົ້າຮູ້ວ່າທ່ານເປັນຄູສອນມາແຕ່ພະເຈົ້າ ເຫດວ່າບໍ່ມີຜູ້ໃດອາດກະທຳການສຳຄັນທີ່ທ່ານໄດ້ກະທຳນັ້ນໄດ້ ເວັ້ນໄວ້ພະເຈົ້າສະຖິດຢູ່ນຳຜູ້ນັ້ນ.” ພະເຍຊູຕອບນິໂກເດມວ່າ ເພື່ອຄົນເຮົາຈະເຂົ້າໃນລາຊະອານາຈັກຂອງພະເຈົ້າໄດ້ ເຂົາຕ້ອງ “ເກີດໃໝ່ມາອີກ.”
ແຕ່ວ່າຄົນຈະເກີດໃໝ່ໄດ້ຢ່າງໃດ? ນິໂກເດມຖາມວ່າ “ເພິ່ນຈະເຂົ້າໄປອີກໃນທ້ອງແມ່ແຫ່ງຕົນແລະເກີດໄດ້ຫຼື”?
ບໍ່ ການເກີດໃໝ່ມາອີກບໍ່ໄດ້ໝາຍຄວາມຢ່າງນັ້ນ. ພະເຍຊູຊີ້ແຈງວ່າ “ຖ້າຜູ້ໜຶ່ງຜູ້ໃດບໍ່ເກີດແຕ່ນ້ຳແລະແຕ່ພະວິນຍານ ຜູ້ນັ້ນຈະເຂົ້າໄປໃນແຜ່ນດິນ [“ລາຊະອານາຈັກ,” ລ.ມ.] ຂອງພະເຈົ້າບໍ່ໄດ້.” ເມື່ອພະເຍຊູຮັບບັບເຕມາແລະມີພະວິນຍານບໍລິສຸດລົງມາສະຖິດກັບພະອົງ ພະອົງຈຶ່ງເກີດ “ແຕ່ນ້ຳແລະແຕ່ພະວິນຍານ.” ໂດຍຄຳຖະແຫຼງຈາກສະຫວັນທີ່ວ່າ “ພະອົງນີ້ເປັນພະບຸດທີ່ຮັກຂອງເຮົາ ເຮົາຊອບໃຈຫຼາຍໃນພະອົງ” ພະເຈົ້າຈຶ່ງປະກາດວ່າ ພະອົງໄດ້ໃຫ້ກຳເນີດບຸດຝ່າຍວິນຍານ ເຊິ່ງມີຄວາມຫວັງຈະເຂົ້າໄປໃນລາຊະອານາຈັກຝ່າຍສະຫວັນ. ຕໍ່ມາ ໃນວັນເພນເຕກອດປີສາກົນສັກກະຫຼາດ 33 ຜູ້ອື່ນທີ່ຮັບບັບເຕມາແລ້ວຈະໄດ້ຮັບພະວິນຍານບໍລິສຸດ ແລະຈຶ່ງຈະບັງເກີດໃໝ່ເປັນບຸດຝ່າຍວິນຍານຂອງພະເຈົ້າ.
ແຕ່ບົດບາດຂອງບຸດອົງພິເສດນີ້ເຊິ່ງໄດ້ເກີດເປັນມະນຸດເປັນເລື່ອງສຳຄັນ. ພະເຍຊູບອກນິໂກເດມວ່າ “ທ່ານໂມເຊໄດ້ຍົກງູຂຶ້ນໃນປ່າດິນຊາຍຢ່າງໃດ ບຸດມະນຸດຕ້ອງເປັນທີ່ຍົກຍໍຂຶ້ນຢ່າງນັ້ນ. ເພື່ອຄົນທຸກຄົນທີ່ເຊື່ອໃນພະອົງຈະບໍ່ຈິບຫາຍ ແຕ່ວ່າຈະມີຊີວິດອັນຕະຫຼອດໄປເປັນນິດ.” ແມ່ນແລ້ວ ດັ່ງເຊັ່ນຊົນຊາດຍິດສະລາເອນທີ່ຖືກງູພິດຂົບຕ້ອງມອງເບິ່ງງູທອງແດງເພື່ອຈະລອດຊີວິດ ມະນຸດທັງປວງຈຳຕ້ອງສະແດງຄວາມເຊື່ອໃນພະບຸດຂອງພະເຈົ້າເພື່ອພົ້ນຈາກສະພາບທີ່ຕ້ອງຕາຍເຊັ່ນກັນ.
ເພື່ອເນັ້ນເຖິງບົດບາດທີ່ສະທ້ອນເຖິງຄວາມຮັກຂອງພະເຢໂຫວາ ພະເຍຊູບອກນິໂກເດມຕໍ່ໄປວ່າ “ພະເຈົ້າໄດ້ຮັກມະນຸດສະໂລກຫຼາຍປານນັ້ນ ຈົນໄດ້ປະທານໃຫ້ພະບຸດອົງດຽວຂອງພະອົງ ເພື່ອຄົນທຸກຄົນທີ່ເຊື່ອໃນພະບຸດນັ້ນຈະບໍ່ຈິບຫາຍ ແຕ່ວ່າຈະມີຊີວິດອັນຕະຫຼອດໄປເປັນນິດ.” ສະນັ້ນ ທີ່ກຸງເຢຣຶຊາເລມນີ້ແຫຼະ ພຽງແຕ່ຫົກເດືອນຕັ້ງແຕ່ພະອົງໄດ້ເລີ່ມງານຮັບໃຊ້ ພະເຍຊູສະແດງໃຫ້ເຫັນຊັດເຈນວ່າ ພະອົງເປັນຜູ້ທີ່ພະເຈົ້າຈັດໄວ້ເພື່ອຊ່ອຍມະນຸດໃຫ້ລອດ.
ພະເຍຊູຊີ້ແຈງກັບນິໂກເດມຕໍ່ໄປວ່າ “ເພາະວ່າພະເຈົ້າໄດ້ໃຊ້ພະບຸດຂອງພະອົງມາໃນໂລກ ບໍ່ໃຊ່ຈະຕັດສິນມະນຸດສະໂລກ” ນັ້ນບໍ່ແມ່ນການພິພາກສາຢ່າງໃຫ້ຜົນຮ້າຍ ຫຼືຕັດສິນວ່າມີໂທດ ຕັດສິນມະນຸດຊາດໃຫ້ພິນາດໄປ. ແທນທີ່ຈະເປັນດັ່ງນັ້ນ ດັ່ງທີ່ພະເຍຊູກ່າວໄວ້ ພະອົງຖືກໃຊ້ມາ “ເພື່ອມະນຸດສະໂລກຈະໄດ້ພົ້ນດ້ວຍພະບຸດນັ້ນ.”
ນິໂກເດມມາຫາພະເຍຊູໃນຕອນຄ່ຳມືດດ້ວຍຄວາມຢ້ານ. ດັ່ງນັ້ນຈຶ່ງໜ້າສົນໃຈທີ່ພະເຍຊູຈົບການສົນທະນາກັບເຂົາໂດຍກ່າວວ່າ “ອັນໜຶ່ງການຕັດສິນເປັນອັນນີ້ ວ່າແຈ້ງໄດ້ລົງມາໃນໂລກ ແລະຄົນທັງຫຼາຍໄດ້ຮັກມືດຫຼາຍກວ່າແຈ້ງ ເຫດວ່າກິດຈະການຂອງເຂົາເປັນອັນຊົ່ວຮ້າຍ. ເພາະວ່າຄົນທຸກຄົນທີ່ກະທຳການອັນຊົ່ວຮ້າຍ ກໍກຽດຊັງແຈ້ງ ແລະບໍ່ມາຫາແຈ້ງຢ້ານວ່າກິດຈະການແຫ່ງຕົນຈະຖືກຕິຕຽນ. ແຕ່ວ່າຜູ້ທີ່ກະທຳຄວາມຈິງ ກໍມາຫາແຈ້ງ ເພື່ອກິດຈະການແຫ່ງຕົນຈະປາກົດວ່າ ເປັນຕາມພະເຈົ້າ.” ໂຍຮັນ 2:23–3:21; ມັດທາຽ 3:16, 17; ກິດຈະການ 2:1-4; ຈົດເຊັນບັນຊີ 21:9.
▪ ມີອັນໃດກະຕຸ້ນໃຫ້ນິໂກເດມໄປຫາພະເຍຊູ ແລະເຫດໃດເຂົາຈຶ່ງໄປໃນຍາມຄ່ຳມືດແລ້ວ?
▪ ການ “ເກີດໃໝ່ມາອີກ” ໝາຍຄວາມວ່າຢ່າງໃດ?
▪ ພະເຍຊູຊີ້ແຈງຢ່າງໃດເຖິງບົດບາດຂອງພະອົງໃນການໃຫ້ຄວາມລອດແກ່ເຮົາ?
▪ ທີ່ວ່າພະເຍຊູບໍ່ໄດ້ມາເພື່ອພິພາກສາໂລກນັ້ນໝາຍຄວາມຢ່າງໃດ?