ບົດ 86
ເລື່ອງຂອງລູກທີ່ຫຼົງຜິດ
ພະເຍຊູຫາກໍ່ເລົ່າອຸທາຫອນເລື່ອງການຊອກຫາແກະແລະເງິນບີ້ໜຶ່ງທີ່ເສຍໄປກັບຄືນມາໃຫ້ກັບພວກຟາລິຊຽນ. ຈາກນັ້ນພະເຍຊູຍົກເອົາອຸທາຫອນອີກເລື່ອງໜຶ່ງຂຶ້ນມາ. ເປັນເລື່ອງພໍ່ທີ່ປ່ຽມດ້ວຍຄວາມຮັກ ແລະວິທີທີ່ພໍ່ປະຕິບັດກັບລູກຊາຍສອງຄົນ ເຊິ່ງແຕ່ລະຄົນຕ່າງກໍມີຂໍ້ຜິດພາດອັນຮ້າຍແຮງ.
ກ່ອນອື່ນແມ່ນລູກຊາຍຄົນນ້ອຍເຊິ່ງເປັນຕົວເອກຂອງເລື່ອງ. ລາວຮີບໂຮມເອົາມໍລະດົກທີ່ຂໍຈາກພໍ່ເຊິ່ງໄດ້ຈັດແບ່ງໃຫ້ຢ່າງບໍ່ລໍຊ້າ. ແລ້ວກໍອອກຈາກບ້ານໄປໃຊ້ຊີວິດແບບສຳມະເລເທເມົາ. ບັດນີ້ຂໍໃຫ້ຕັ້ງໃຈຟັງພະເຍຊູເລົ່າເລື່ອງນີ້ ເບິ່ງວ່າເຈົ້າຈະບອກໄດ້ບໍວ່າບຸກຄົນທີ່ກ່າວເຖິງໃນອຸທາຫອນນັ້ນໝາຍເຖິງໃຜ.
ພະເຍຊູເລີ່ມເລື່ອງວ່າ “ຊາຍຄົນໜຶ່ງມີລູກຊາຍຢູ່ສອງຄົນ. ຜູ້ນ້ອງເວົ້າກັບພໍ່ວ່າ ‘ພໍ່ເອີຍ ຈົ່ງເອົາຊັບສິນສ່ວນທີ່ຈະຕົກເປັນຂອງລູກນັ້ນໃຫ້ລູກດຽວນີ້ສາ.’ ດັ່ງນັ້ນພໍ່ຈຶ່ງໄດ້ແບ່ງຊັບສິນໃຫ້ລູກຊາຍທັງສອງຂອງຕົນ.” (ທ.ປ.) ລູກຜູ້ນ້ອຍນີ້ເຮັດຈັ່ງໃດກັບຊັບສິນທີ່ຕົນໄດ້ມາ?
ພະເຍຊູຊີ້ແຈງວ່າ “ພາຍຫຼັງນັ້ນບໍ່ດົນເມື່ອໄດ້ໂຮມເອົາສັບພະເຂົ້າຂອງນັ້ນ ລູກຜູ້ນ້ອງໄດ້ໜີໄປໃນປະເທດໄກແທ້ໆ ແລະໃນທີ່ນັ້ນໄດ້ເສຍເຂົ້າຂອງແຫ່ງຕົນໄປໝົດດ້ວຍການໂຖງ.” ທີ່ຈິງແລ້ວ ລາວໃຊ້ເງິນຂອງຕົນເອງໄປຢູ່ກິນກັບຍິງແມ່ຈ້າງ. ຫຼັງຈາກນັ້ນຊີວິດກໍຕົກຕ່ຳລົງຕາມທີ່ພະເຍຊູເລົ່າວ່າ:
“ເມື່ອເພິ່ນໄດ້ເສຍໝົດແລ້ວ [“ໃຊ້ຈ່າຍຊັບເຫຼົ່ານັ້ນໝົດ,” ປ.ມ.] ຄວາມອຶດຢາກອັນໃຫຍ່ໄດ້ບັງເກີດມາໃນປະເທດນັ້ນ ແລະເພິ່ນໄດ້ຕັ້ງຢູ່ຫິວເຂົ້າ ແລະເພິ່ນໄດ້ໄປອາໄສຢູ່ກັບຊາວເມືອງນັ້ນຜູ້ໜຶ່ງ ແລະຜູ້ນີ້ໄດ້ໃຊ້ເພິ່ນໄປລ້ຽງຝູງຫມູໃນນາແຫ່ງຕົນ. ແລະເພິ່ນຢາກກິນໃຫ້ອີ່ມທ້ອງດ້ວຍເປືອກຜັກທີ່ຫມູກິນນັ້ນ ແລະບໍ່ມີຜູ້ໃດໃຫ້ເພິ່ນກິນ.”
ຈັ່ງແມ່ນຕົກຕ່ຳແທ້ໆ ທີ່ລາວຕ້ອງຈຳໃຈກາຍເປັນຄົນລ້ຽງຫມູ ເນື່ອງຈາກຫມູເປັນສັດປະເພດທີ່ບໍ່ສະອາດຕາມພະບັນຍັດ! ແຕ່ທີ່ທໍລະມານໃຈລາວຫຼາຍທີ່ສຸດແມ່ນຄວາມຫິວແສບໄສ້ຈົນຢາກກິນອາຫານທີ່ເອົາມາລ້ຽງຫມູ. ເນື່ອງຈາກປະສົບກັບຄວາມເດືອດຮ້ອນຢ່າງຮ້າຍແຮງ ພະເຍຊູກ່າວວ່າເຂົາ “ໄດ້ຮູ້ເມື່ອແລ້ວ.”
ເມື່ອກ່າວອຸທາຫອນຕໍ່ໄປ ພະເຍຊູຊີ້ແຈງວ່າ “ລາວເວົ້າກັບຕົນເອງວ່າ ‘ລູກຈ້າງທຸກຄົນຂອງພໍ່ຂ້ອຍກໍຍັງມີອາຫານກິນຈົນເຫຼືອເຟືອ ສ່ວນຂ້ອຍພວມຕາຍຫິວຢູ່ທີ່ນີ້! ຂ້ອຍຈະລຸກຂຶ້ນເມືອຫາພໍ່ຂອງຂ້ອຍແລະເວົ້າວ່າ “ພໍ່ເອີຍ ລູກໄດ້ເຮັດບາບຕໍ່ສູ້ພະເຈົ້າແລະຕໍ່ສູ້ພໍ່ແລ້ວ. ລູກບໍ່ສົມຄວນທີ່ມີຊື່ວ່າເປັນລູກຂອງພໍ່ອີກຕໍ່ໄປ; ຈົ່ງເຮັດກັບລູກຄືລູກຈ້າງຄົນໜຶ່ງຂອງພໍ່.”’ ດັ່ງນັ້ນລາວຈຶ່ງລຸກຂຶ້ນຄືນເມືອຫາພໍ່ຂອງຕົນ.” (ທ.ປ.)
ຕອນນີ້ມີບາງຈຸດທີ່ຄວນຈະພິຈາລະນາ: ຖ້າຫາກພໍ່ສະແດງອາການໃຈຮ້າຍແລ້ວຊີ້ໜ້າດ່າວ່າຕອນທີ່ລາວອອກຈາກບ້ານ ລູກນັ້ນກໍຄົງຈະບໍ່ມີໃຈມຸ່ງໝັ້ນວ່າຄວນຈະເຮັດແນວໃດ. ລາວອາດຈະຕັດສິນໃຈເມືອບ້ານ ແລ້ວລອງຫາເຮັດວຽກບ່ອນອື່ນຢູ່ບ້ານເກີດຂອງຕົນເອງ ເພື່ອຈະບໍ່ຕ້ອງພົບເຫັນພໍ່. ຢ່າງໃດກໍດີ ລາວບໍ່ມີຄວາມຄິດເຊັ່ນນັ້ນເລີຍ. ຄິດແຕ່ຈະໄປໃຫ້ເຖິງບ້ານເທົ່ານັ້ນ!
ປາກົດແຈ້ງວ່າ ພໍ່ໃນອຸທາຫອນຂອງພະເຍຊູໝາຍເຖິງພະເຢໂຫວາພະເຈົ້າ ພະບິດາທາງພາກສະຫວັນອົງປ່ຽມດ້ວຍຄວາມຮັກຄວາມເມດຕາ. ເຮົາອາດເຂົ້າໃຈດ້ວຍວ່າລູກທີ່ຫຼົງຜິດ ຫຼືເກເລຄົນນີ້ຈະຕ້ອງໝາຍເຖິງຄົນບາບທີ່ລືຊື່ສຽງ. ພວກຟາລິຊຽນທີ່ພະເຍຊູເວົ້ານຳນັ້ນ ກໍເຄີຍຕິຕຽນພະເຍຊູກ່ອນໜ້ານີ້ວ່າ ພະອົງຮັບປະທານອາຫານກັບຄົນຜິດບາບຈຳພວກນີ້. ແຕ່ລູກຜູ້ໃຫຍ່ໝາຍເຖິງໃຜ?
ເມື່ອລູກທີ່ຫຼົງຜິດກັບຄືນມາ
ເມື່ອລູກທີ່ຫຼົງຜິດ ຫຼືເກເລໃນອຸທາຫອນຂອງພະເຍຊູໄດ້ກັບມາບ້ານຂອງພໍ່ ລາວໄດ້ຮັບການຕ້ອນຮັບແບບໃດ? ເຊີນຟັງພະເຍຊູພັນລະນາເລື່ອງນັ້ນ:
“ເມື່ອເພິ່ນຍັງໄກ ພໍ່ແຫ່ງຕົນໄດ້ເຫັນເພິ່ນແລະໄດ້ອີດູ ຈຶ່ງແລ່ນໄປກອດຄໍແລະຈູບເພິ່ນຫຼາຍ.” ລາວເປັນບິດາທີ່ເມດຕາແລະອົບອຸ່ນ ຖືເປັນຕົວຢ່າງທີ່ສະແດງເຖິງພະເຢໂຫວາ ພະບິດາທາງພາກສະຫວັນຂອງເຮົາໄດ້ດີອີ່ຫຼີ!
ພໍ່ຄົງຈະໄດ້ຍິນຂ່າວການດຳເນີນຊີວິດແບບສຳມະເລເທເມົາຂອງລູກແລ້ວ. ແຕ່ລາວຕ້ອນຮັບລູກເຂົ້າບ້ານໂດຍບໍ່ຖ້າໃຫ້ບອກເລົ່າລາຍລະອຽດ. ພະເຍຊູເອງກໍມີນ້ຳໃຈຕ້ອນຮັບເຊັ່ນກັນ ໂດຍທີ່ພະອົງເປັນຝ່າຍລິເລີ່ມເຂົ້າໄປຄົບຫາຄົນຜິດບາບແລະຄົນເກັບພາສີ ເຊິ່ງເປັນເຊັ່ນລູກເກເລໃນອຸທາຫອນ.
ຈິງຢູ່ ພໍ່ຜູ້ມີຄວາມສັງເກດເຂົ້າໃຈໃນອຸທາຫອນຂອງພະເຍຊູນັ້ນຍ່ອມໄດ້ແນວຄິດວ່າລູກຂອງຕົນສຳນຶກຜິດດ້ວຍການສັງເກດສີໜ້າອັນເສົ້າໝອງແລະຍ່າງຄໍຕົກຕອນເມືອບ້ານ. ເນື່ອງຈາກພໍ່ເລີ່ມສະແດງຄວາມຮັກກ່ອນ ຈຶ່ງງ່າຍຂຶ້ນທີ່ລູກຈະສາລະພາບຄວາມຜິດຕໍ່ພໍ່ ດັ່ງທີ່ພະເຍຊູເລົ່າວ່າ “ຜູ້ເປັນລູກຈຶ່ງເວົ້າວ່າ ‘ພໍ່ເອີຍ ລູກໄດ້ເຮັດບາບຕໍ່ສູ້ພະເຈົ້າແລະຕໍ່ສູ້ພໍ່ແລ້ວ. ລູກບໍ່ສົມຄວນທີ່ມີຊື່ວ່າ ເປັນລູກຂອງພໍ່ອີກຕໍ່ໄປ.’” (ທ.ປ.) ແລະລາວຂໍເປັນລູກຈ້າງຄົນໜຶ່ງຂອງພໍ່ເທົ່ານັ້ນ.
ຂະນະທີ່ລູກຍັງເວົ້າບໍ່ຂາດຄຳ ພໍ່ກໍເລີ່ມສັ່ງຂ້າໃຊ້ຂອງຕົນວ່າ “ຈົ່ງເອົາເສື້ອອັນດີງາມທີ່ສຸດອອກມາໃຫ້ເພິ່ນຫົ່ມ ແລະເອົາແຫວນມາສຸບໃສ່ມື ກັບເກີບມາສຸບໃສ່ຕີນຂອງເພິ່ນ. ແລະເອົາລູກງົວຕົວຕຸ້ຍພີນັ້ນມາຂ້າເສຍ ແລະເຮົາທັງຫຼາຍ ຈົ່ງກິນແລະຊົມຊື່ນຍິນດີ. ເຫດວ່າລູກຂອງເຮົາຜູ້ນີ້ທີ່ໄດ້ຕາຍແລ້ວ ກໍໄດ້ຄືນມາແລ້ວ ເພິ່ນເສຍແລ້ວແລະເພິ່ນເປັນທີ່ພົບແລ້ວ.” ແລະເຂົາທັງຫຼາຍ “ໄດ້ຕັ້ງຕົ້ນຊົມຊື່ນຍິນດີ.”
ໃນລະຫວ່າງນັ້ນ “ລູກກົກ“ ຂອງພໍ່ຄົນນັ້ນ “ຢູ່ກາງທົ່ງນາ” ເຈົ້າຈະບອກໄດ້ບໍວ່າ ລູກຄົນນີ້ເປັນພາບເລັງເຖິງຜູ້ໃດ ເມື່ອຟັງເລື່ອງໃຫ້ຈົບ. ພະເຍຊູເລົ່າເລື່ອງລູກກົກວ່າ “ເມື່ອພວມຫຼົບມາແລະຫຍັບເຂົ້າໃກ້ເຮືອນ ເພິ່ນໄດ້ຍິນສຽງເສບແລະການຟ້ອນເຕັ້ນ. ແລະເມື່ອໄດ້ເອີ້ນຂ້າໃຊ້ຜູ້ໜຶ່ງມາ ເພິ່ນໄດ້ຖາມເປັນການໃດ ແລະຂ້າໃຊ້ໄດ້ກ່າວແກ່ທ່ານວ່າ ນ້ອງຂອງທ່ານໄດ້ມາແລ້ວ ແລະພໍ່ຂອງທ່ານໄດ້ຂ້າລູກງົວຕົວຕຸ້ຍພີນັ້ນເພາະໄດ້ຮັບລູກສຳບາຍຢູ່ ແລະຜູ້ອ້າຍໄດ້ຄຽດຮ້າຍ ແລະບໍ່ຢາກເຂົ້າໄປທາງໃນ ແລະພໍ່ແຫ່ງຕົນໄດ້ອອກໄປເຊີນເພິ່ນ ແຕ່ວ່າເພິ່ນໄດ້ຕອບແລະກ່າວແກ່ພໍ່ວ່າ ເຮົາໄດ້ເປັນຂ້າໃຊ້ຂອງທ່ານໄດ້ຫຼາຍປີແລ້ວ ແລະບໍ່ຫ່ອນລ່ວງຄຳສັ່ງຂອງທ່ານສັກເທື່ອ ແລະທ່ານບໍ່ຫ່ອນປະທານລູກແພະຕົວໜຶ່ງໃຫ້ເຮົາສັກເທື່ອ ເພື່ອເຮົາຈະໄດ້ຊົມຊື່ນຍິນດີກັບຫມູ່ສ່ຽວຂອງເຮົາ ແຕ່ວ່າເວລາຜູ້ນີ້ລູກຂອງທ່ານທີ່ໄດ້ກິນເຂົ້າຂອງແຫ່ງທານກັບຫມູ່ຍິງແມ່ຈ້າງໄດ້ມາແລ້ວ ທ່ານໄດ້ຂ້າລູກງົວຕົວຕຸ້ຍພີສຳລັບເພິ່ນ.”
ໃຜຄືກັບລູກກົກຄົນນີ້ທີ່ກ່າວຕິຕຽນເມື່ອຄົນບາບໄດ້ຮັບຄວາມເມດຕາແລະເອົາໃຈໃສ່? ພວກສະໝຽນແລະຟາລິຊຽນເຫຼົ່ານັ້ນບໍ່ແມ່ນບໍ? ເນື່ອງຈາກເຂົາເຈົ້າພາກັນຕຳໜິພະເຍຊູຍ້ອນພະອົງຕ້ອນຮັບຄົນຜິດບາບຈຶ່ງເຮັດໃຫ້ມີອຸທາຫອນເລື່ອງນີ້ ລູກກົກໃນອຸທາຫອນຕ້ອງໝາຍເຖິງພວກນີ້ຢ່າງຊັດເຈນ.
ພະເຍຊູລົງທ້າຍອຸທາຫອນດ້ວຍຄຳວິ່ງວອນຂອງພໍ່ຕໍ່ລູກກົກວ່າ “ລູກເອີຍເຈົ້າຢູ່ນຳເຮົາເລື້ອຍ ແລະສັບພະທຸກສິ່ງຂອງເຮົາເປັນຂອງເຈົ້າ ແຕ່ວ່າສົມຄວນຈະໄດ້ຊົມຊື່ນຍິນດີ ເຫດວ່າຜູ້ນີ້ນ້ອງຂອງເຈົ້າໄດ້ຕາຍແລ້ວ ແລະໄດ້ຄືນມາແລ້ວ ເພິ່ນເສຍແລ້ວ ແລະເພິ່ນເປັນທີ່ພົບແລ້ວ.”
ພະເຍຊູປະເລື່ອງຂອງລູກກົກພຽງນີ້ເທົ່ານັ້ນ. ທີ່ຈິງ ໃນເວລາຕໍ່ມາ ຫຼັງຈາກພະເຍຊູສິ້ນພະຊົນແລະຟື້ນຄືນພະຊົນແລ້ວ “ປະໂລຫິດເປັນຝູງໃຫຍ່ໄດ້ຍອມຟັງແກ່ຄວາມເຊື່ອ.” ບາງທີລາງຄົນອາດຈະເຄີຍຖືກນັບເປັນຈຳພວກ “ລູກກົກ” ທີ່ພະເຍຊູກ່າວເຖິງໃນອຸທາຫອນນີ້.
ແຕ່ສະໄໝນີ້ລູກທັງສອງພາດພິງເຖິງໃຜ? ຄົງຕ້ອງເປັນຄົນເຫຼົ່ານັ້ນທີ່ມາຮຽນຮູ້ ແລະເຂົ້າໃຈຈຸດປະສົງຂອງພະເຢໂຫວາຫຼາຍພໍຈົນມີພື້ນຖານທີ່ຈະເຂົ້າມາຮ່ວມສຳພັນທະພາບກັບພະອົງ. ລູກກົກນັ້ນແມ່ນພາດພິງເຖິງສະມາຊິກບາງຄົນແຫ່ງ “ແກະຝູງນ້ອຍ” ຫຼື “ພວກຊຸມນຸມແຫ່ງລູກກົກທັງຫຼາຍທີ່ມີນາມຊື່ຂຽນໄວ້ໃນຟ້າສະຫວັນ.” ຄົນພວກນີ້ເຄີຍມີທັດສະນະຄ້າຍຄືກັນກັບລູກກົກ. ເຂົາເຈົ້າບໍ່ຢາກຕ້ອນຮັບກຸ່ມຊົນທີ່ຈະຢູ່ທາງແຜ່ນດິນໂລກ “ແກະອີກຝູງໜຶ່ງ” ເຊິ່ງເຂົາເຈົ້າຄິດວ່າຄົນພວກນີ້ໄດ້ຮັບການເອົາໃຈໃສ່ຫຼາຍໂພດ.
ສ່ວນລູກໂຖງນັ້ນພາດພິງເຖິງຄົນເຫຼົ່ານັ້ນໃນໄພ່ເມືອງຂອງພະເຈົ້າທີ່ອອກໄປຫາຄວາມສະຫນຸກສະໜານທີ່ໂລກສະເໜີໃຫ້. ແຕ່ພໍເຖິງເວລາ ຄົນເຫຼົ່ານີ້ສຳນຶກຜິດ ກັບໃຈແລະເຂົ້າມາເປັນຜູ້ຮັບໃຊ້ທີ່ກະຕືລືລົ້ນຂອງພະເຈົ້າອີກ. ທີ່ຈິງ ພະບິດາປ່ຽມດ້ວຍຄວາມຮັກແລະເມດຕາພຽງໃດຕໍ່ຄົນເຫຼົ່ານັ້ນເຊິ່ງຍອມຮັບໃນເລື່ອງຄວາມຈຳເປັນທີ່ຕົນຕ້ອງໄດ້ຮັບການຍົກໂທດແລະກັບມາຫາພະອົງ! ລຶກາ 15:11-32; ພວກເລວີ 11:7, 8; ກິດຈະການ 6:7; ລຶກາ 12:32; ເຫບເລີ 12:23; ໂຍຮັນ 10:16.
▪ ພະເຍຊູຍົກອຸທາຫອນເລື່ອງນີ້ກັບໃຜ ແລະເພາະເຫດໃດ?
▪ ໃຜເປັນຕົວເອກໃນເລື່ອງນີ້ ແລະມີຫຍັງເກີດຂຶ້ນກັບເຂົາ?
▪ ໃນສະໄໝຂອງພະເຍຊູ ພໍ່ແລະລູກຄົນນ້ອຍພາດພິງເຖິງໃຜ?
▪ ພະເຍຊູເອົາແບບຢ່າງພໍ່ຜູ້ມີຄວາມເມດຕາກະລຸນາໃນອຸທາຫອນທີ່ພະອົງໄດ້ເລົ່ານັ້ນຢ່າງໃດ?
▪ ລູກກົກມີທັດສະນະຕໍ່ການສະແດງຄວາມຍິນດີໃນການຕ້ອນຮັບນ້ອງຊາຍຢ່າງໃດ ແລະພວກຟາລິຊຽນໄດ້ປະພຶດແບບດຽວກັນກັບລູກກົກນັ້ນຢ່າງໃດ?
▪ ອຸທາຫອນຂອງພະເຍຊູພາດພິງເຖິງຫຍັງໃນສະໄໝຂອງເຮົາ?