ອະນາຄົດທີ່ເປັນຕາງຶດງໍ້
ອີກບໍ່ດົນຊາຕານກັບພວກຜີປີສາດກໍຈະຖືກກຳຈັດ
ຊາຕານແລະພວກຜີປີສາດຂອງມັນຈະຫລອກລວງມະນຸດໄດ້ອີກບໍ່ດົນ. ພະເຢໂຫວາໄດ້ຖິ້ມພວກມັນອອກມາຈາກສະຫວັນແລ້ວ. (ຄຳປາກົດ 12:9) ໃນອະນາຄົດອັນໃກ້ນີ້ ພະເຈົ້າຈະຕໍ່ສູ້ຊາຕານແລະພວກຜີປີສາດຂອງມັນອີກເທື່ອຫນຶ່ງ. ອັກຄະສາວົກໂຢຮັນເຫັນນິມິດທີ່ມາຈາກພະເຈົ້າ ທ່ານໄດ້ກ່າວວ່າ “ເຮົາໄດ້ເຫັນທູດສະຫວັນອົງຫນຶ່ງລົງມາຈາກຟ້າສະຫວັນ ມີລູກກະແຈສຳລັບເຫວອັນເລິກນັ້ນແລະມືທູດນັ້ນຖືສາຍໂສ້ອັນໃຫຍ່. ແລະທູດສະຫວັນໄດ້ຈັບເອົາມັງກອນນັ້ນ ງູບູຮານທີ່ເປັນເດຍໂບໂລແລະຊາຕານ ແລະໄດ້ຜູກມັດມັນໄວ້ຢູ່ລະຫວ່າງພັນປີ. ແລະໄດ້ຖິ້ມມັນໄວ້ໃນເຫວອັນເລິກນັ້ນ ແລະລັ່ນກະແຈອັດ ຕີຕາປະທັບໄວ້ເທິງມັນເພື່ອຈະບໍ່ໃຫ້ມັນລໍ້ລວງພວກຕ່າງປະເທດທັງຫລາຍຕໍ່ໄປຈົນເຖິງພັນປີນັ້ນລ່ວງໄປແລ້ວ. ພາຍຫລັງນັ້ນຕ້ອງປ່ອຍມັນອອກໄປສັກເວລາຫນ້ອຍຫນຶ່ງ.” (ຄຳປາກົດ 20:1-3) ຫລັງຈາກນັ້ນ ພະຍາມານພ້ອມກັບຜີປີສາດຂອງມັນຈະຖືກທຳລາຍຕະຫລອດໄປ.—ຄຳປາກົດ 20:10.
ຄົນຊົ່ວທີ່ຢູ່ເທິງແຜ່ນດິນໂລກກໍຈະຖືກກຳຈັດຄືກັນ.—ຄຳເພງ 37:9, 10; ລືກາ 13:5.
ຄົນຕາຍແລ້ວຈະມີຊີວິດອີກ!
ຄົນຕາຍຈະກັບຄືນມາມີຊີວິດເທິງແຜ່ນດິນໂລກ
ພາຍຫລັງຊາຕານແລະພວກຜີປີສາດຖືກກຳຈັດອອກໄປແລ້ວ ພະເຢໂຫວາຈະນຳເອົາພະພອນຫລາຍຢ່າງມາສູ່ມະນຸດຊາດ. ເຈົ້າຄົງຈະຈື່ວ່າຄົນຕາຍບໍ່ມີຊີວິດ ບໍ່ເປັນຢູ່ບ່ອນໃດ. ພະເຍຊູສົມທຽບຄວາມຕາຍຄືກັບການນອນຫລັບ—ຫລັບສະຫນິດບໍ່ຝັນເລີຍ. (ໂຢຮັນ 11:11-14) ພະເຍຊູກ່າວເຊັ່ນນັ້ນເພາະພະອົງຮູ້ວ່າຈະມີເວລາຫນຶ່ງເຊິ່ງຄົນທີ່ຫລັບໄປໃນຄວາມຕາຍຈະໄດ້ຮັບການປຸກຂຶ້ນມາໃຫ້ມີຊີວິດອີກ. ພະອົງກ່າວວ່າ “ເວລາຈະມາເມື່ອບັນດາຜູ້ຊຶ່ງຢູ່ໃນອຸມົງລຳລຶກ . . . ຈະອອກມາ.”—ໂຢຮັນ 5:28, 29, ລ.ມ.; ທຽບກັບກິດຈະການ 24:15.
ເຂົາເຈົ້າຈະຖືກປຸກຂຶ້ນມາມີຊີວິດຢູ່ເທິງແຜ່ນດິນໂລກນີ້. ແທນທີ່ຈະມີການປະກາດວ່າຄົນນັ້ນຕາຍຄົນນີ້ຕາຍ ຈະມີການປະກາດຂ່າວດີວ່າໃຜໄດ້ຮັບການປຸກຈາກຕາຍແລ້ວ! ຈັ່ງແມ່ນເປັນຄວາມຊື່ນຊົມຍິນດີແທ້ທີ່ຈະໄດ້ຕ້ອນຮັບຄົນທີ່ເຮົາຮັກເຊິ່ງອອກມາຈາກຫລຸມຝັງສົບ!