ບົດສອງ
ການກຽມຕົວສຳລັບຊີວິດສົມລົດທີ່ປະສົບຜົນສຳເລັດ
1, 2. (ກ) ພະເຍຊູເນັ້ນຄວາມສຳຄັນຂອງການວາງແຜນຢ່າງໃດ? (ຂ) ໃນຂອບເຂດໃດໂດຍສະເພາະຊຶ່ງການວາງແຜນສຳຄັນຍິ່ງ?
ການສ້າງບ້ານຕ້ອງກຽມການຢ່າງຮອບຄອບ. ກ່ອນການວາງຮາກ ຕ້ອງໄດ້ທີ່ດິນແລະມີການຂຽນແຜນຜັງເສຍກ່ອນ. ຢ່າງໃດກໍຕາມ ມີສິ່ງອື່ນອີກທີ່ສຳຄັນ. ພະເຍຊູຕັດວ່າ “ໃນພວກທ່ານ ຖ້າຜູ້ໃດຢາກກໍ່ສ້າງປ້ອມ ຜູ້ນັ້ນຈະບໍ່ນັ່ງລົງກ່ອນແລະຄຶດລາຄາແລະນັບເບິ່ງວ່າ ຈະມີເຂົ້າຂອງພໍໄດ້ກະທຳໃຫ້ສຸດແລ້ວຫຼື?”—ລຶກາ 14:28.
2 ສິ່ງທີ່ເປັນຈິງໃນການສ້າງບ້ານກໍນຳມາໃຊ້ໄດ້ກັບການສ້າງຊີວິດແຕ່ງດອງທີ່ປະສົບຜົນສຳເລັດດ້ວຍ. ຫຼາຍຄົນກ່າວວ່າ “ຂ້ອຍຢາກແຕ່ງດອງ.” ແຕ່ມີຈັກຄົນຢຸດຄຶດເຖິງຂໍ້ໄດ້ຂໍ້ເສຍຈາກການແຕ່ງດອງ? ຂະນະທີ່ຄຳພີໄບເບິນເວົ້າເຖິງຊີວິດສົມລົດໃນດ້ານທີ່ດີ ພະຄຳພີຍັງຊີ້ໃຫ້ເອົາໃຈໃສ່ກັບການທ້າທາຍທີ່ຈະມີຂຶ້ນໃນຊີວິດສົມລົດດ້ວຍ. (ສຸພາສິດ 18:22; 1 ໂກລິນໂທ 7:28) ດັ່ງນັ້ນ ຄົນເຫຼົ່ານັ້ນທີ່ໄຕ່ຕອງຈະສົມລົດຕ້ອງມີທັດສະນະແບບທີ່ກົງກັບສະພາບຈິງກ່ຽວກັບທັງຄວາມສຸກແລະສິ່ງທີ່ຕ້ອງເສຍສະລະໃນຊີວິດສົມລົດ.
3. ເຫດໃດຄຳພີໄບເບິນເປັນເຄື່ອງຊ່ວຍອັນມີຄຸນຄ່າແກ່ຄົນເຫຼົ່ານັ້ນທີ່ວາງແຜນຈະແຕ່ງດອງ ແລະຄຳຖາມສາມປະການອັນໃດທີ່ພະຄຳພີຈະຊ່ວຍເຮົາຕອບໄດ້?
3 ຄຳພີໄບເບິນສາມາດຊ່ວຍໄດ້. ຄຳແນະນຳຂອງຄຳພີໄບເບິນມີຂຶ້ນໂດຍການດົນໃຈຈາກຜູ້ລິເລີ່ມການສົມລົດ ພະເຈົ້າເຢໂຫວາ. (ເອເຟດ 3:14, 15; 2 ຕີໂມເຕ 3:16) ໂດຍໃຊ້ຫຼັກການທີ່ມີໃນໜັງສືຄູ່ມືເກົ່າແກ່ແຕ່ຍັງທັນສະໄໝແທ້ໆ ເຫຼັ້ມນີ້ ໃຫ້ເຮົາຄົ້ນເບິ່ງວ່າ (1) ຄົນເຮົາຈະບອກໄດ້ຢ່າງໃດວ່າ ເຂົາພ້ອມສຳລັບຊີວິດສົມລົດ? (2) ຄວນມອງຫາສິ່ງໃດໃນຕົວຜູ້ຈະມາເປັນຄູ່ຄອງ? (3) ຈະເບິ່ງແຍງໃຫ້ຕອນທີ່ເປັນຄູ່ຮັກກັນນັ້ນເປັນທີ່ໜ້ານັບຖືໄດ້ຢ່າງໃດ?
ເຈົ້າພ້ອມສຳລັບຊີວິດສົມລົດແລ້ວບໍ?
4. ອັນໃດເປັນປັດໄຈສຳຄັນໃນການຮັກສາໄວ້ຊຶ່ງຊີວິດສົມລົດທີ່ປະສົບຜົນສຳເລັດ ແລະເພາະເຫດໃດ?
4 ການສ້າງບ້ານອາດໃຊ້ເງິນຫຼາຍ ແຕ່ການເອົາໃຈໃສ່ຕໍ່ການບຳລຸງຮັກສາບ້ານໃນໄລຍະຍາວກໍຕ້ອງເສຍຄ່າໃຊ້ຈ່າຍຫຼາຍເຊັ່ນກັນ. ນັ້ນກໍຄ້າຍກັບຊີວິດສົມລົດ. ການແຕ່ງດອງເບິ່ງຄືເປັນການທ້າທາຍພໍສົມຄວນ ຢ່າງໃດກໍດີ ຕ້ອງຄຳນຶງເຖິງການຮັກສາສາຍສຳພັນໃນຊີວິດສົມລົດປີແລ້ວປີອີກເຊັ່ນກັນ. ການຮັກສາຄວາມສຳພັນດັ່ງກ່າວຮຽກຮ້ອງອັນໃດແດ່? ປັດໄຈສຳຄັນຢ່າງໜຶ່ງແມ່ນການຮູ້ສຶກເຖິງພັນທະຜູກມັດຢ່າງສຸດຫົວໃຈ. ຄຳພີໄບເບິນພັນລະນາເຖິງຄວາມສຳພັນໃນຊີວິດສົມລົດວ່າ “ຜູ້ຊາຍຈະລາພໍ່ແມ່ແຫ່ງຕົນ ແລະຈະຕິດພັນຢູ່ກັບເມຍແຫ່ງຕົນ ແລະເຂົາທັງສອງຈະເປັນເນື້ອໜັງອັນດຽວກັນ.” (ຕົ້ນເດິມ 2:24) ພະເຍຊູຄລິດສະເໜີພື້ນຖານຢ່າງດຽວຕາມຫຼັກພະຄຳພີສຳລັບການຢ່າຮ້າງຢ່າງທີ່ຈະສົມລົດອີກໄດ້ ຄື “ການຜິດປະເວນີ” ນັ້ນແມ່ນ ເພດສຳພັນແບບລັກລອບນອກສາຍສົມລົດ. (ມັດທາຽ 19:9, ລ.ມ.) ຖ້າເຈົ້າພວມໄຕ່ຕອງເຖິງການສົມລົດຢູ່ ຈົ່ງຈື່ມາດຕະຖານຕາມຫຼັກພະຄຳພີເຫຼົ່ານີ້. ຫາກເຈົ້າບໍ່ພ້ອມສຳລັບພັນທະຜູກມັດທີ່ຈິງຈັງນີ້ແລ້ວ ເຈົ້າກໍບໍ່ພ້ອມສຳລັບຊີວິດສົມລົດ.—ພະບັນຍັດຕິທີ2 23:21; ຜູ້ເທສນາປ່າວປະກາດ 5:4, 5.
5. ແມ່ນວ່າພັນທະຜູກມັດທີ່ຈິງຈັງຂອງການສົມລົດເຮັດໃຫ້ລາງຄົນຫວາດຫວັ່ນກໍຕາມ ເຫດໃດຄົນເຫຼົ່ານັ້ນທີ່ຕັ້ງໃຈຈະສົມລົດໜ້າຈະຖືວ່າພັນທະຜູກມັດນັ້ນມີຄ່າຢ່າງຍິ່ງ?
5 ຄວາມຄຶດເລື່ອງພັນທະຜູກມັດທີ່ຈິງຈັງເຮັດໃຫ້ຫຼາຍຄົນຫວາດຫວັ່ນ. ຊາຍຫນຸ່ມຜູ້ໜຶ່ງສາລະພາບວ່າ “ການຮູ້ວ່າເຮົາທັງສອງຕ້ອງຜູກມັດກັນໄປຕະຫຼອດຊີວິດເຮັດໃຫ້ຂ້ອຍຮູ້ສຶກຖືກຈຳກັດ, ຖືກປິດລ້ອມ, ຖືກກັກຕົວໄວ້ຢ່າງເດັດຂາດ. ແຕ່ຖ້າເຈົ້າຮັກຜູ້ທີ່ເຈົ້າຕັ້ງໃຈຈະແຕ່ງດອງນຳແທ້ໆ ແລ້ວ ພັນທະຜູກມັດກໍຈະບໍ່ເບິ່ງຄືເປັນພາລະ. ແທນທີ່ຈະເປັນດັ່ງນັ້ນ ພັນທະຜູກມັດຈະຖືກຫຼິງເຫັນວ່າເປັນທີ່ມາຂອງຄວາມໝັ້ນຄົງ. ການສຳນຶກເຖິງພັນທະຜູກມັດທີ່ປາກົດຢູ່ໃນຊີວິດສົມລົດຈະເຮັດໃຫ້ຄູ່ສົມລົດຕ້ອງການຢູ່ນຳກັນທັງຍາມສຸກຍາມທຸກແລະສະໜັບສະຫນູນກັນບໍ່ວ່າຈະເກີດອັນໃດຂຶ້ນກໍຕາມ. ຄລິດສະຕຽນອັກຄະສາວົກໂປໂລຂຽນວ່າ ຄວາມຮັກແທ້ “ທົນຮັບເອົາທຸກສິ່ງ” ແລະ “ອົດທົນທຸກສິ່ງ.” (1 ໂກລິນໂທ 13:4, 7, ລ.ມ.) ຍິງຄົນໜຶ່ງກ່າວວ່າ “ພັນທະຜູກມັດຂອງການສົມລົດເຮັດໃຫ້ຂ້ອຍຮູ້ສຶກໝັ້ນຄົງຫຼາຍຂຶ້ນ. ຂ້ອຍມັກຄວາມອຸ່ນໃຈໃນການປະກາດຢ່າງເປີດເຜີຍວ່າ ເຮົາຕັ້ງໃຈຈະແນບແໜ້ນຢູ່ດ້ວຍກັນ.”—ຜູ້ເທສນາປ່າວປະກາດ 4:9-12.
6. ເຫດໃດຈຶ່ງດີທີ່ສຸດທີ່ຈະບໍ່ຟ້າວແຕ່ງດອງຕອນອາຍຸຍັງນ້ອຍຢູ່?
6 ການດຳເນີນຊີວິດຕາມພັນທະຜູກມັດດັ່ງກ່າວຮຽກຮ້ອງຄວາມເປັນຜູ້ໃຫຍ່. ດ້ວຍເຫດນີ້ ໂປໂລແນະນຳວ່າ ດີກວ່າຖ້າຄລິດສະຕຽນຈະບໍ່ແຕ່ງດອງຈົນກວ່າເຂົາ “ເລີຍຄວາມເບັ່ງບານຂອງໄວຫນຸ່ມສາວ,” ຊຶ່ງເປັນໄລຍະທີ່ຄວາມຮູ້ສຶກທາງເພດຄອບງຳແລະບິດເບືອນການຕັດສິນໃຈຂອງຄົນເຮົາໄດ້. (1 ໂກລິນໂທ 7:36, ລ.ມ.) ຄົນຫນຸ່ມສາວປ່ຽນແປງຢ່າງໄວຂະນະເຂົາໃຫຍ່ຂຶ້ນ. ຫຼາຍຄົນທີ່ແຕ່ງດອງເມື່ອອາຍຸຍັງນ້ອຍພົບວ່າພຽງບໍ່ຈັກປີຫຼັງນັ້ນ ຄວາມຕ້ອງການແລະຄວາມປາຖະໜາຂອງເຂົາເອງກັບຂອງຄູ່ສົມລົດໄດ້ປ່ຽນໄປ. ສະຖິຕິເຜີຍໃຫ້ເຫັນວ່າ ພວກໄວຮຸ່ນທີ່ແຕ່ງດອງເບິ່ງຄືຈະບໍ່ມີຄວາມສຸກແລະຫາທາງຢ່າຮ້າງຫຼາຍກວ່າຄົນເຫຼົ່ານັ້ນທີ່ຄ່ອຍແຕ່ງດອງຕອນອາຍຸຫຼາຍຂຶ້ນ. ດັ່ງນັ້ນ ຢ່າຟ້າວແຕ່ງດອງ. ການດຳເນີນຊີວິດໄລຍະໜຶ່ງຢູ່ເປັນໂສດຂະນະເປັນຜູ້ໃຫຍ່ອາດໃຫ້ປະສົບການທີ່ລ້ຳຄ່າແກ່ເຈົ້າຊຶ່ງຈະເຮັດໃຫ້ເຈົ້າເປັນຄົນອາວຸໂສຫຼາຍຂຶ້ນ ແລະມີຄຸນສົມບັດດີຂຶ້ນໃນການເປັນຄູ່ຄອງທີ່ເໝາະສົມ. ການຍືດເວລາກ່ອນຈະສົມລົດ ອາດຊ່ວຍໃຫ້ເຈົ້າເຂົ້າໃຈຕົວເອງດີຂຶ້ນ—ອັນເປັນສິ່ງຈຳເປັນຫາກເຈົ້າພັດທະນາຄວາມສຳພັນທີ່ປະສົບຜົນສຳເລັດໃນຊີວິດສົມລົດຂອງເຈົ້າ.
ຈົ່ງຮູ້ຈັກຕົວເອງກ່ອນ
7. ເຫດໃດຄົນເຫຼົ່ານັ້ນທີ່ວາງແຜນຈະແຕ່ງດອງຄວນກວດສອບຕົນເອງເສຍກ່ອນ?
7 ເຈົ້າຮູ້ສຶກວ່າເປັນເລື່ອງງ່າຍບໍທີ່ຈະເຮັດລາຍການຄຸນສົມບັດຊຶ່ງເຈົ້າຕ້ອງການໃນຕົວຄູ່ຄອງ? ຄົນສ່ວນຫຼາຍຄຶດວ່າງ່າຍ. ຢ່າງໃດກໍດີ ຈະວ່າແນວໃດກ່ຽວກັບຄຸນສົມບັດຂອງຕົວເຈົ້າເອງ? ເຈົ້າມີລັກສະນະນິດໄສອັນໃດແດ່ຊຶ່ງຈະຊ່ວຍສົ່ງເສີມຊີວິດສົມລົດທີ່ປະສົບຜົນສຳເລັດ? ເຈົ້າຈະເປັນສາມີຫຼືພັນລະຍາປະເພດໃດ? ຕົວຢ່າງເຊັ່ນ ເຈົ້າຍອມຮັບຄວາມຜິດພາດຂອງເຈົ້າຢ່າງເປີດເຜີຍແລະຮັບເອົາຄຳແນະນຳບໍ ຫຼືວ່າເຈົ້າປ້ອງກັນຕົວຢູ່ສະເໝີເມື່ອຖືກແກ້ໄຂ? ຕາມປົກກະຕິເຈົ້າເປັນຄົນມ່ວນຊື່ນແລະເບິ່ງໃນແງ່ດີບໍ ຫຼືວ່າເຈົ້າມັກບໍ່ເວົ້າບໍ່ຈາແລະມັກຈົ່ມຢູ່ສະເໝີ? (ສຸພາສິດ 8:33; 15:15) ຈົ່ງຈື່ວ່າ ການສົມລົດຈະບໍ່ປ່ຽນບຸກຄະລິກຂອງເຈົ້າ. ຫາກເຈົ້າເປັນຄົນຍິ່ງທະນົງ, ມີຄວາມຮູ້ສຶກໄວໂພດ, ຫຼືມອງໃນແງ່ຮ້າຍຫຼາຍເກີນໄປຕອນເປັນໂສດ ເຈົ້າກໍຈະເປັນແບບດຽວກັນເມື່ອສົມລົດແລ້ວ. ເນື່ອງຈາກເປັນເລື່ອງຍາກທີ່ຈະເບິ່ງຕົວເອງຢ່າງທີ່ຄົນອື່ນເບິ່ງເຮົາ ເຫດໃດບໍ່ຂໍຄວາມຄຶດເຫັນແລະຄຳແນະນຳຢ່າງເປີດເຜີຍຈາກພໍ່ແມ່ຫຼືເພື່ອນທີ່ໄວ້ໃຈໄດ້ແດ່? ຖ້າເຈົ້າຮັບຮູ້ເຖິງການປ່ຽນແປງທີ່ຈຳເປັນ ກໍຈົ່ງພະຍາຍາມເຮັດການປ່ຽນແປງນັ້ນກ່ອນວາງແຜນຈະແຕ່ງດອງ.
8-10. ຄຳພີໄບເບິນໃຫ້ຄຳແນະນຳອັນໃດທີ່ຈະຊ່ວຍຄົນເຮົາໃຫ້ກຽມຕົວສຳລັບຊີວິດສົມລົດ?
8 ຄຳພີໄບເບິນສະໜັບສະຫນູນເຮົາທີ່ຈະໃຫ້ພະວິນຍານບໍລິສຸດຂອງພະເຈົ້າດຳເນີນງານໃນຕົວເຮົາ ຊຶ່ງຈະກໍ່ໃຫ້ເກີດຄຸນລັກສະນະຕ່າງໆ ເຊັ່ນ “ຄວາມຮັກ, ຄວາມຍິນດີ, ສັນຕິສຸກ, ຄວາມອົດກັ້ນທົນນານ, ຄວາມກະລຸນາ, ຄວາມດີ, ຄວາມເຊື່ອ, ຄວາມອ່ອນໂຍນ, ການຮູ້ຈັກບັງຄັບຕົນ.” ພະຄຳພີຍັງບອກໃຫ້ເຮົາ “ຖືກປ່ຽນໃໝ່ໃນພະລັງທີ່ກະຕຸ້ນຈິດໃຈ [ຂອງເຮົາ]” ແລະໃຫ້ “ສວມໃສ່ບຸກຄະລິກພາບໃໝ່ຊຶ່ງໄດ້ຖືກສ້າງຂຶ້ນຕາມພະປະສົງຂອງພະເຈົ້າໃນຄວາມຊອບທຳແລະຄວາມຈົ່ງຮັກພັກດີແທ້ຈິງ” ດ້ວຍ. (ຄາລາຊີ 5:22, 23, ລ.ມ.; ເອເຟດ 4:23, 24, ລ.ມ.) ການເອົາຄຳແນະນຳນີ້ໄປໃຊ້ລະຫວ່າງທີ່ເຈົ້າຍັງເປັນໂສດຢູ່ຈະເປັນຄືການສະສົມເງິນໄວ້ໃນທະນາຄານ—ເປັນສິ່ງຊຶ່ງຈະປາກົດວ່າມີຄ່າຫຼວງຫຼາຍໃນອະນາຄົດ ຕອນເຈົ້າແຕ່ງດອງ.
9 ຕົວຢ່າງເຊັ່ນ ຫາກເຈົ້າເປັນຜູ້ຍິງ ຈົ່ງຮຽນທີ່ຈະເອົາໃຈໃສ່ຫຼາຍຂຶ້ນຕໍ່ “ບຸກຄົນທີ່ເຊື່ອງໄວ້ແຫ່ງຫົວໃຈ” ຍິ່ງກວ່າການເອົາໃຈໃສ່ຕໍ່ການປາກົດກາຍ. (1 ເປໂຕ 3:3, 4, ລ.ມ.) ຄວາມສະຫງົບສະຫງຽມແລະສຸຂະພາບຈິດດີຈະຊ່ວຍເຈົ້າໃຫ້ມີປັນຍາຊຶ່ງເປັນ “ມົງກຸດແຫ່ງຄວາມງາມ” ແທ້. (ສຸພາສິດ 4:9, ລ.ມ.; 31:10, 30; 1 ຕີໂມເຕ 2:9, 10) ຫາກເຈົ້າເປັນຜູ້ຊາຍ ຈົ່ງຮຽນທີ່ຈະປະຕິບັດກັບຜູ້ຍິງດ້ວຍທ່າທີກະລຸນາແລະນັບຖື. (1 ຕີໂມເຕ 5:1, 2) ຂະນະທີ່ຮຽນວິທີທຳການຕັດສິນໃຈແລະແບກໜ້າທີ່ຮັບຜິດຊອບຕ່າງໆ ຈົ່ງຮຽນທີ່ຈະເປັນຄົນຈຽມຕົວແລະຖ່ອມໃຈດ້ວຍ. ເຈຕະຄະຕິແບບມັກໃຊ້ອຳນາດບາດໃຫຍ່ຈະນຳໄປສູ່ຄວາມຫຍຸ້ງຍາກໃນຊີວິດສົມລົດ.—ສຸພາສິດ 29:23; ມີເກ 6:8; ເອເຟດ 5:28, 29.
10 ເຖິງແມ່ນການປ່ຽນແປງຄວາມຄຶດຈິດໃຈໃນຂອບເຂດເຫຼົ່ານີ້ບໍ່ແມ່ນເລື່ອງງ່າຍກໍຕາມ ນັ້ນເປັນສິ່ງທີ່ຄລິດສະຕຽນທຸກຄົນຄວນພະຍາຍາມ. ແລະນັ້ນຈະຊ່ວຍໃຫ້ເຈົ້າເປັນຄູ່ສົມລົດທີ່ດີຂຶ້ນ.
ສິ່ງທີ່ຄວນມອງຫາໃນຜູ້ທີ່ຈະມາເປັນຄູ່ຄອງ
11, 12. ບຸກຄົນສອງຄົນອາດຈະກວດສອບເບິ່ງວ່າເຂົາເຂົ້າກັນໄດ້ຫຼືບໍ່ໂດຍວິທີໃດ?
11 ໃນທ້ອງຖິ່ນທີ່ເຈົ້າຢູ່ ເປັນທຳນຽມບໍທີ່ຄົນເຮົາຈະເລືອກຄູ່ຄອງເອງ? ຖ້າເຊັ່ນນັ້ນ ເຈົ້າຄວນດຳເນີນການຢ່າງໃດຫາກເຈົ້າພໍ້ໃຜຄົນໜຶ່ງໃນເພດກົງກັນຂ້າມທີ່ຕ້ອງຕາຕ້ອງໃຈ? ກ່ອນອື່ນ ຈົ່ງຖາມຕົວເອງວ່າ ‘ຂ້ອຍມີຄວາມຕັ້ງໃຈທີ່ຈະແຕ່ງດອງແທ້ຈິງບໍ?’ ນັບວ່າເປັນເລື່ອງທາລຸນທີ່ຈະຢອກຫຼິ້ນກັບຄວາມຮູ້ສຶກຂອງອີກຄົນໜຶ່ງໂດຍກໍ່ໃຫ້ເກີດຄວາມຄາດຫວັງຢ່າງຜິດໆ. (ສຸພາສິດ 13:12) ຄັນແລ້ວ ຈົ່ງຖາມຕົວເອງວ່າ ‘ຂ້ອຍຢູ່ໃນຖານະທີ່ຈະແຕ່ງດອງບໍ? ຫາກຄຳຕອບສຳລັບທັງສອງຄຳຖາມນັ້ນຄືແມ່ນແລ້ວ ຂັ້ນຕອນທີ່ເຈົ້າຈະດຳເນີນການຕໍ່ໄປຈະຕ່າງກັນສຸດແລ້ວແຕ່ທຳນຽມໃນທ້ອງຖິ່ນ. ໃນບາງປະເທດ ຫຼັງຈາກສັງເກດເບິ່ງຈັກໄລຍະໜຶ່ງແລ້ວ ໃນທີ່ສຸດເຈົ້າກໍອາດຈະຫາໂອກາດລົມກັບຄົນນັ້ນແລະສະແດງຄວາມປາຖະໜາຈະຄຸ້ນເຄີຍກັນຫຼາຍຂຶ້ນ. ຖ້າການຕອບສະໜອງເປັນໄປໃນເຊີງປະຕິເສດແລ້ວ ກໍຢ່າຢືນການຈົນເຖິງຈຸດທີ່ໜ້າລັງກຽດ. ຢ່າລືມວ່າ ອີກຝ່າຍໜຶ່ງມີສິດທີ່ຈະທຳການຕັດສິນໃຈໃນເລື່ອງນັ້ນດ້ວຍ. ຢ່າງໃດກໍດີ ຫາກມີການຕອບຮັບ ເຈົ້າອາດນັດໝາຍທີ່ຈະໃຊ້ເວລາຮ່ວມກັນໃນກິດຈະກຳບາງຢ່າງທີ່ດີງາມ. ນັ້ນຈະເຮັດໃຫ້ເຈົ້າມີໂອກາດທີ່ຈະພິຈາລະນາເບິ່ງວ່າການສົມລົດກັບບຸກຄົນນີ້ຈະເປັນການສະຫຼາດສຸຂຸມຫຼືບໍ່.a ໃນຂັ້ນຕອນນີ້ເຈົ້າຄວນມອງຫາອັນໃດ?
12 ເພື່ອຕອບຄຳຖາມນັ້ນ ຂໍໃຫ້ນຶກພາບເຄື່ອງດົນຕີສອງຢ່າງ ບາງທີອາດຈະເປັນປີອາໂນແລະກິຕາ. ຫາກມີການຕັ້ງສຽງເຄື່ອງດົນຕີທັງສອງນັ້ນຢ່າງຖືກຕ້ອງແລ້ວ ບໍ່ວ່າເຄື່ອງໃດກໍສາມາດໃຫ້ສຽງດົນຕີໄພເລາະໄດ້ເມື່ອບັນເລງດ່ຽວ. ແຕ່ ຈະເກີດອັນໃດຂຶ້ນ ຖ້າຫຼິ້ນເຄື່ອງດົນຕີທັງສອງອັນນີ້ພ້ອມກັນ? ຕອນນີ້ຕ້ອງປັບສຽງເຄື່ອງດົນຕີທັງສອງຢ່າງໃຫ້ເຂົ້າກັນ. ນັ້ນຈະຄ້າຍກັບເຈົ້າແລະຜູ້ທີ່ເຈົ້າຫວັງຈະໄດ້ເປັນຄູ່ຄອງ. ເຈົ້າທັງສອງອາດໄດ້ບາກບັ່ນພະຍາຍາມທີ່ຈະ “ປັບ” ບຸກຄະລິກລັກສະນະຂອງຕົນ. ແຕ່ຄຳຖາມໃນຕອນນີ້ຄື ເຈົ້າໄດ້ປັບຕົວໃຫ້ເຂົ້າປະສານກັນບໍ? ເວົ້າອີກຢ່າງໜຶ່ງແມ່ນ ເຈົ້າເຂົ້າກັນໄດ້ບໍ?
13. ເຫດໃດຈຶ່ງບໍ່ສະຫຼາດສຸຂຸມຫຼາຍທີ່ຈະເປັນຄູ່ຮັກກັບຄົນທີ່ບໍ່ມີຄວາມເຊື່ອຢ່າງດຽວກັນກັບເຈົ້າ?
13 ນັບວ່າສຳຄັນທີ່ເຈົ້າທັງສອງມີຄວາມເຊື່ອແລະຫຼັກການຮ່ວມກັນ. ອັກຄະສາວົກໂປໂລໄດ້ຂຽນວ່າ “ຢ່າເຂົ້າທຽມແອກກັບຄົນບໍ່ມີຄວາມເຊື່ອ.” (2 ໂກລິນໂທ 6:14, ລ.ມ. 1 ໂກລິນໂທ 7:39) ການແຕ່ງດອງກັບຄົນທີ່ບໍ່ຮ່ວມຄວາມເຊື່ອໃນພະເຈົ້າກັບເຈົ້ານັ້ນຄົງຈະເປັນໄປໄດ້ຫຼາຍກວ່າທີ່ຈະມີຄວາມບໍ່ລົງຮອຍກັນຢ່າງຮຸນແຮງ. ກົງກັນຂ້າມ ການທີ່ສອງຝ່າຍມີຄວາມເຫຼື້ອມໃສຕໍ່ພະເຢໂຫວາພະເຈົ້ານັ້ນເປັນຮາກຖານແຂງແຮງທີ່ສຸດສຳລັບເອກະພາບ. ພະເຢໂຫວາປະສົງໃຫ້ເຈົ້າມີຄວາມສຸກແລະມີຄວາມຜູກພັນແໜ້ນແຟ້ນທີ່ສຸດເທົ່າທີ່ເປັນໄປໄດ້ກັບຄົນທີ່ເຈົ້າແຕ່ງດອງດ້ວຍ. ພະອົງປະສົງໃຫ້ເຈົ້າທັງສອງຜູກພັນກັບພະອົງແລະຕໍ່ກັນແລະກັນດ້ວຍເຊືອກສາມກຽວແຫ່ງຄວາມຮັກ.—ຜູ້ເທສນາປ່າວປະກາດ 4:12.
14, 15. ການມີຄວາມເຊື່ອຢ່າງດຽວກັນເປັນປັດໄຈດຽວທໍ່ນັ້ນເພື່ອຈະມີເອກະພາບໃນຊີວິດສົມລົດບໍ? ຈົ່ງອະທິບາຍ.
14 ຂະນະທີ່ການນະມັດສະການພະເຈົ້າຮ່ວມກັນເປັນປັດໄຈສຳຄັນທີ່ສຸດຂອງເອກະພາບ ມີຫຼາຍກວ່ານັ້ນທີ່ພົວພັນຢູ່ດ້ວຍ. ເພື່ອຈະປັບໃຫ້ເຂົ້າປະສານກັນ ເຈົ້າແລະຄູ່ທີ່ເຈົ້າຫວັງເອົາໄວ້ນັ້ນຄວນມີເປົ້າປະສົງຄ້າຍກັນ. ເປົ້າປະສົງຂອງເຈົ້າແມ່ນຫຍັງ? ຕົວຢ່າງເຊັ່ນ ເຈົ້າທັງສອງຄຶດຢ່າງໃດເລື່ອງການມີລູກ? ສິ່ງໃດມີຄວາມສຳຄັນອັນດັບທຳອິດໃນຊີວິດຂອງເຈົ້າ?b (ມັດທາຽ 6:33) ໃນຊີວິດສົມລົດທີ່ປະສົບຜົນສຳເລັດຢ່າງແທ້ຈິງນັ້ນ ທັງສາມີພັນລະຍາເປັນເພື່ອນທີ່ດີຕໍ່ກັນແລະເພີດເພີນກັບການຢູ່ຮ່ວມກັນ. (ສຸພາສິດ 17:17) ເພື່ອໃຫ້ເປັນເຊັ່ນນັ້ນ ເຂົາທັງສອງຕ້ອງມີຄວາມສົນໃຈຮ່ວມກັນ. ເມື່ອບໍ່ເປັນຢ່າງນັ້ນແລ້ວ ກໍນັບວ່າຍາກທີ່ຈະຮັກສາມິດຕະພາບທີ່ສະໜິດແໜ້ນໄວ້—ຢ່າວ່າເຖິງຊີວິດສົມລົດເລີຍ. ແຕ່ວ່າ ຫາກຄົນທີ່ເຈົ້າຫວັງຈະໄດ້ເປັນຄູ່ຄອງນັ້ນມັກກິດຈະກຳບາງຢ່າງໂດຍສະເພາະ ເຊັ່ນ ການທັດສະນາຈອນທາງໄກດ້ວຍການຍ່າງ ແລະເຈົ້າບໍ່ມັກ ນັ້ນໝາຍຄວາມວ່າ ເຈົ້າທັງສອງບໍ່ຄວນແຕ່ງດອງກັນບໍ? ບໍ່ຕ້ອງເປັນດັ່ງນັ້ນກໍໄດ້. ບາງທີເຈົ້າອາດມີຄວາມສົນໃຈຮ່ວມກັນໃນສິ່ງອື່ນໆ ຊຶ່ງສຳຄັນກວ່າ. ນອກຈາກນີ້ ເຈົ້າອາດໃຫ້ຄວາມສຸກແກ່ຄົນທີ່ເຈົ້າຫວັງວ່າຈະເປັນຄູ່ຄອງນັ້ນໂດຍການມີສ່ວນຮ່ວມໃນກິດຈະກຳທີ່ດີງາມເນື່ອງຈາກອີກຝ່າຍໜຶ່ງມັກກິດຈະກຳນັ້ນ.—ກິດຈະການ 20:35.
15 ແທ້ຈິງ ສ່ວນໃຫຍ່ແລ້ວ ການເຂົ້າກັນໄດ້ນັ້ນຂຶ້ນຢູ່ກັບການທີ່ເຈົ້າທັງສອງປັບຕົວເຂົ້າກັນໄດ້ດີພຽງໃດແທນທີ່ຈະວ່າເຈົ້າເໝືອນກັນພຽງໃດ. ແທນທີ່ຈະຖາມວ່າ “ເຮົາເຫັນພ້ອມກັນໃນທຸກສິ່ງບໍ?” ອາດຈະດີກວ່າຫາກຖາມວ່າ “ຈະຈັດການແນວໃດເມື່ອເຮົາບໍ່ເຫັນພ້ອມກັນ? ເຮົາສາມາດພິຈາລະນາເລື່ອງຕ່າງໆ ຢ່າງໃຈເຢັນ ດ້ວຍຄວາມນັບຖືແລະນຶກເຖິງສັກສີຂອງທັງສອງຝ່າຍບໍ? ຫຼືວ່າການຫາລືກັນມັກກາຍເປັນການຜິດຖຽງກັນຢ່າງເຜັດຮ້ອນເລື້ອຍໄປ? (ເອເຟດ 4:29, 31) ຫາກເຈົ້າຢາກແຕ່ງດອງ ຈົ່ງລະວັງຜູ້ໃດທີ່ເຍີ້ຍິ່ງແລະຖືຄວາມເຫັນຂອງຕົນເປັນໃຫຍ່ ບໍ່ເຄີຍເຕັມໃຈປະນີປະນອມ ຫຼືຜູ້ຊຶ່ງມັກຮຽກຮ້ອງແລະວາງແຜນຢູ່ເລື້ອຍໆ ເພື່ອໃຫ້ຄົນອື່ນເຮັດຕາມໃຈເຂົາ.
ກວດສອບເບິ່ງກ່ອນ
16, 17. ຊາຍຫຼືຍິງອາດຈະມອງຫາອັນໃດເມື່ອພິຈາລະນາເບິ່ງຄົນທີ່ຫວັງຈະເອົາເປັນຄູ່ຄອງ?
16 ໃນປະຊາຄົມຄລິດສະຕຽນ ຄົນເຫຼົ່ານັ້ນທີ່ໄດ້ຮັບມອບໜ້າທີ່ຮັບຜິດຊອບຕ້ອງຖືກ ‘ທົດລອງເບິ່ງຄວາມເໝາະສົມກ່ອນ.’ (1 ຕີໂມເຕ 3:10, ລ.ມ.) ເຈົ້າສາມາດໃຊ້ຫຼັກການອັນນີ້ໄດ້ດ້ວຍ. ຕົວຢ່າງເຊັ່ນ ຜູ້ຍິງອາດຖາມວ່າ “ຜູ້ຊາຍຄົນນີ້ມີຊື່ສຽງແບບໃດ? ໃຜເປັນເພື່ອນຂອງເຂົາ? ເຂົາສະແດງການຮູ້ຈັກບັງຄັບຕົນບໍ? ເຂົາປະຕິບັດຕໍ່ຜູ້ສູງອາຍຸຢ່າງໃດ? ເຂົາມາແຕ່ຄອບຄົວແບບໃດ? ເຂົາປະຕິບັດກັບຄອບຄົວຂອງເຂົາຢ່າງໃດ? ເຈຕະຄະຕິຂອງເຂົາຕໍ່ເລື່ອງເງິນເປັນຢ່າງໃດ? ເຂົາໃຊ້ເຄື່ອງດື່ມປະເພດເຫຼົ້າໃນທາງຜິດບໍ? ເຂົາເປັນຄົນເຈົ້າອາລົມ ເຖິງກັບຂີ້ໂມໂຫບໍ? ເຂົາມີໜ້າທີ່ຮັບຜິດຊອບອັນໃດໃນປະຊາຄົມ ແລະເຂົາປະຕິບັດໜ້າທີ່ນັ້ນຢ່າງໃດ? ຂ້ອຍຈະສາມາດນັບຖືເຂົາຢ່າງສຸດຊຶ້ງໄດ້ບໍ?”—ລະບຽບການພວກເລວີ 19:32; ສຸພາສິດ 22:29; 31:23; ເອເຟດ 5:3-5, 33; 1 ຕີໂມເຕ 5:8; 6:10; ຕິໂຕ 2:6, 7.
17 ຜູ້ຊາຍອາດຈະຖາມວ່າ “ຜູ້ຍິງຄົນນີ້ສະແດງຄວາມຮັກແລະຄວາມນັບຖືຕໍ່ພະເຈົ້າບໍ? ນາງສາມາດເອົາໃຈໃສ່ເບິ່ງແຍງຢ້າວເຮືອນໄດ້ບໍ? ຄອບຄົວຂອງນາງຈະຄາດໝາຍອັນໃດຈາກເຮົາ? ນາງເປັນຄົນສຸຂຸມ, ໝັ່ນພຽນ, ປະຢັດບໍ? ນາງສົນທະນາເລື່ອງອັນໃດແດ່? ນາງຫ່ວງໃຍຢ່າງແທ້ຈິງໃນສະຫວັດດີພາບຂອງຄົນອື່ນ ຫຼືວ່ານາງເປັນຄົນມຸ່ງແຕ່ຕົວເອງ, ມັກຫຍຸ້ງທຸລະຂອງຄົນອື່ນ? ນາງເປັນຄົນໄວ້ໃຈໄດ້ບໍ? ນາງເຕັມໃຈຍອມຢູ່ໃຕ້ຕຳແໜ່ງປະມຸກບໍ, ຫຼືວ່ານາງດື້ດຶງ ບາງທີແຂງຂໍ້ຂັດຂືນອີກດ້ວຍ?”—ສຸພາສິດ 31:10-31; ລຶກາ 6:45; ເອເຟດ 5:22, 23; 1 ຕີໂມເຕ 5:13; 1 ເປໂຕ 4:15.
18. ຫາກມອງເຫັນຈຸດບົກພ່ອງເລັກໆ ນ້ອຍໆ ລະຫວ່າງຕອນເປັນຄູ່ຮັກກັນ ຄວນມອງເບິ່ງເລື່ອງນີ້ຢ່າງໃດ?
18 ຢ່າລືມວ່າ ເຈົ້າພວມຕິດຕໍ່ກ່ຽວຂ້ອງກັບລູກຫຼານທີ່ບໍ່ສົມບູນຂອງອາດາມ ບໍ່ແມ່ນກັບພະເອກຫຼືນາງເອກໃນອຸດົມຄະຕິຈາກນະວະນິຍາຍຮັກ. ທຸກຄົນມີຂໍ້ບົກພ່ອງ ແລະຈະຕ້ອງມອງຂ້າມຂໍ້ເຫຼົ່ານີ້ບາງຢ່າງ—ທັງຂອງເຈົ້າແລະຂອງຜູ້ທີ່ເຈົ້າຄາດຫວັງຈະເປັນຄູ່ຄອງ. (ໂລມ 3:23; ຍາໂກໂບ 3:2) ນອກຈາກນີ້ ຄວາມອ່ອນແອທີ່ປາກົດອອກມານັ້ນອາດເປີດໂອກາດໃຫ້ອາວຸໂສຂຶ້ນ. ຕົວຢ່າງເຊັ່ນ ສົມມຸດວ່າ ລະຫວ່າງຕອນທີ່ເປັນຄູ່ຮັກກັນເຈົ້າມີການຜິດຖຽງກັນ. ຈົ່ງລອງຄຶດເບິ່ງວ່າ ແມ່ນແຕ່ຄົນທີ່ຮັກແລະນັບຖືກັນກໍຍັງບໍ່ເຫັນພ້ອມກັນບາງເທື່ອ. (ປຽບທຽບຕົ້ນເດິມ 30:2; ກິດຈະການ 15:39.) ຈະເປັນໄດ້ບໍວ່າເຈົ້າທັງສອງພຽງແຕ່ຕ້ອງ ‘ຫັກຫ້າມໃຈຂອງເຈົ້າເອງ’ ຫຼາຍຂຶ້ນອີກຈັກນ້ອຍແລະຮຽນຮູ້ວິທີຈັດການກັບເລື່ອງຕ່າງໆ ຢ່າງສັນຕິຫຼາຍຂຶ້ນ? (ສຸພາສິດ 25:28) ຄົນທີ່ເຈົ້າຫວັງຈະເປັນຄູ່ຄອງນັ້ນສະແດງຄວາມປາຖະໜາທີ່ຈະປັບປຸງຕົນໃຫ້ດີຂຶ້ນບໍ? ຕົວເຈົ້າເດ? ເຈົ້າຮຽນຮູ້ທີ່ຈະເປັນຄົນມີຄວາມຮູ້ສຶກໄວນ້ອຍລົງ ອາລົມເສຍນ້ອຍລົງໄດ້ບໍ? (ຜູ້ເທສນາປ່າວປະກາດ 7:9) ການຮຽນຮູ້ທີ່ຈະແກ້ບັນຫາສາມາດວາງແບບຂອງການສື່ຄວາມຢ່າງກົງໄປກົງມາຊຶ່ງສຳຄັນຍິ່ງຫາກເຈົ້າທັງສອງໄດ້ແຕ່ງດອງກັນແທ້ໆ.—ໂກໂລດ 3:13.
19. ຖ້າຂໍ້ບົກພ່ອງຮ້າຍແຮງປາກົດອອກມາລະຫວ່າງຕອນເປັນຄູ່ຮັກກັນ ແນວທາງປະຕິບັດທີ່ສຸຂຸມແມ່ນຫຍັງ?
19 ແຕ່ວ່າຈັ່ງໃດ ຫາກເຈົ້າສັງເກດສິ່ງທີ່ເຮັດໃຫ້ເຈົ້າບໍ່ສະບາຍໃຈຢ່າງຍິ່ງ? ຄວນພິຈາລະນາຂໍ້ສົງໄສເຫຼົ່ານີ້ຢ່າງຖີ່ຖ້ວນ. ບໍ່ວ່າເຈົ້າອາດຮູ້ສຶກຮັກແພງກັນປານໃດຫຼືເຈົ້າອາດປາຖະໜາຈະແຕ່ງດອງຫຼາຍຊ່ຳໃດກໍຕາມ ຢ່າຫຼັບຫູຫຼັບຕາຕໍ່ຂໍ້ບົກພ່ອງທີ່ຮ້າຍແຮງ. (ສຸພາສິດ 22:3; ຜູ້ເທສນາປ່າວປະກາດ 2:14) ຖ້າເຈົ້າມີຄວາມສຳພັນກັບຜູ້ທີ່ເຈົ້າມີຂໍ້ສົງໄສບໍ່ນ້ອຍໃນຕົວເຂົາ ເປັນເລື່ອງສຸຂຸມທີ່ຈະຍຸດຕິຄວາມສຳພັນນັ້ນແລະບໍ່ເຮັດການຜູກມັດຢ່າງຖາວອນກັບບຸກຄົນນັ້ນ.
ຈົ່ງຮັກສາຕອນເປັນຄູ່ຮັກກັນໃຫ້ເປັນທີ່ໜ້ານັບຖື
20. ຄົນທີ່ຢູ່ໃນຕອນທີ່ເປັນຄູ່ຮັກກັນຈະຮັກສາຄວາມປະພຶດດ້ານສິນທຳໃຫ້ປັດສະຈາກຄຳຕິຕຽນໄດ້ຢ່າງໃດ?
20 ເຈົ້າຈະຮັກສາຕອນເປັນຄູ່ຮັກກັນໃຫ້ເປັນທີ່ໜ້ານັບຖືໄດ້ຢ່າງໃດ? ປະການທຳອິດ ຈົ່ງເຮັດໃຫ້ແນ່ໃຈວ່າ ຄວາມປະພຶດດ້ານສິນທຳຂອງເຈົ້າປັດສະຈາກການຕິຕຽນ. ໃນທ້ອງຖິ່ນທີ່ເຈົ້າຢູ່ ການຈັບມືຖືແຂນກັນ, ການຈູບ, ຫຼືການໂອບກອດກັນຖືວ່າເປັນພຶດຕິກຳທີ່ເໝາະສົມສຳລັບຄູ່ຮັກທີ່ຍັງບໍ່ແຕ່ງດອງກັນບໍ? ເຖິງແມ່ນວ່າການສະແດງຄວາມຮັກໄຄ່ເຊັ່ນນັ້ນບໍ່ມີໃຜວ່າກໍຕາມ ຄວນຍອມໃຫ້ກັບພຶດຕິກຳເຊັ່ນນັ້ນສະເພາະແຕ່ເມື່ອຄວາມສຳພັນມາເຖິງຂັ້ນທີ່ມີການວາງແຜນການແຕ່ງດອງຢ່າງແນ່ນອນແລ້ວ. ຈົ່ງລະວັງເພື່ອທີ່ການສະແດງຄວາມຮັກໄຄ່ແນວນັ້ນຈະບໍ່ຫຼາຍຂຶ້ນຈົນກາຍເປັນຄວາມປະພຶດທີ່ບໍ່ສະອາດຫຼືກະທັງຜິດປະເວນີ. (ເອເຟດ 4:18, 19; ປຽບທຽບບົດລຳເພງ 1:2; 2:6; 8:5, 9, 10.) ເນື່ອງຈາກຫົວໃຈທໍລະຍົດ ເປັນການສະຫຼາດສຸຂຸມທີ່ເຈົ້າທັງສອງຈະຫຼີກການຢູ່ດ້ວຍກັນສອງຕໍ່ສອງໃນບ້ານ, ຫ້ອງຊຸດ, ລົດຍົນທີ່ຈອດຢູ່, ຫຼືບ່ອນໃດທີ່ຈະເປີດໂອກາດໃຫ້ມີການປະພຶດຜິດໄດ້. (ເຢເຣມີ 17:9) ການຮັກສາສິນທຳໃຫ້ສະອາດໃນຕອນການເປັນຄູ່ຮັກກັນໃຫ້ຫຼັກຖານຊັດແຈ້ງວ່າ ເຈົ້າມີການຮູ້ຈັກບັງຄັບຕົນແລະເຈົ້າເອົາຄວາມຫ່ວງໃຍຢ່າງບໍ່ເຫັນແກ່ຕົວຕໍ່ສະຫວັດດີພາບຂອງຜູ້ອື່ນມາກ່ອນຄວາມປາຖະໜາຂອງຕົນເອງ. ສຳຄັນທີ່ສຸດ ຕອນການເປັນຄູ່ຮັກທີ່ບໍ່ມີມົນທິນຈະເປັນທີ່ພໍພະໄທພະເຢໂຫວາພະເຈົ້າ ຜູ້ບັນຊາໃຫ້ຜູ້ຮັບໃຊ້ຂອງພະອົງລະເວັ້ນຈາກຄວາມບໍ່ສະອາດແລະການຜິດປະເວນີ.—ຄາລາຊີ 5:19-21.
21. ການສື່ຄວາມຢ່າງກົງໄປກົງມາໃນເລື່ອງໃດອາດຈຳເປັນເພື່ອຮັກສາຕອນການເປັນຄູ່ຮັກນັ້ນໃຫ້ເປັນທີ່ໜ້ານັບຖື?
21 ປະການທີສອງ ຕອນການເປັນຄູ່ຮັກທີ່ໜ້ານັບຖືລວມເອົາການສື່ຄວາມກັນຢ່າງກົງໄປກົງມາ. ຂະນະທີ່ການເປັນຄູ່ຮັກກັນຄືບໜ້າໄປສູ່ການແຕ່ງດອງ ມີບາງເລື່ອງຈະຕ້ອງສົນທະນາກັນຢ່າງເປີດເຜີຍ. ເຈົ້າຈະຢູ່ບ່ອນໃດ? ເຈົ້າທັງສອງຈະທຳງານອາຊີບບໍ? ເຈົ້າຕ້ອງການມີລູກບໍ? ນອກຈາກນີ້ ເປັນການຖືກຕ້ອງທີດຽວທີ່ຈະເປີດເຜີຍເລື່ອງຕ່າງໆ ບາງທີເປັນເລື່ອງໃນອະດີດຂອງຄົນເຮົາ ຊຶ່ງອາດມີຜົນກະທົບຕໍ່ຊີວິດສົມລົດ. ເລື່ອງເຫຼົ່ານີ້ອາດໝາຍລວມເຖິງໜີ້ສິນຈຳນວນຫຼາຍຫຼືພັນທະຮັບຜິດຊອບ ຫຼືເລື່ອງສຸຂະພາບ ເຊັ່ນ ໂລກຫຼືພາວະຮ້າຍແຮງໃດໆ ທີ່ເຈົ້າອາດມີຢູ່ນັ້ນ. ເນື່ອງຈາກຫຼາຍຄົນຊຶ່ງຕິດເຊື້ອເອຊໄອວີ (ໄວຣັສທີ່ກໍ່ໂລກເອດສ໌) ບໍ່ໄດ້ສະແດງອາການຂອງໂລກທັນທີ ຄົງຈະບໍ່ຜິດທີ່ເຮົາຫຼືພໍ່ແມ່ຜູ້ຫ່ວງໃຍຈະຂໍຮ້ອງມີການໃຫ້ກວດເລືອດຫາເຊື້ອເອດສ໌ຂອງຜູ້ທີ່ໃນອະດີດເຄີຍສຳສ່ອນທາງເພດຫຼືເປັນຜູ້ໃຊ້ຢາເສບຕິດໂດຍຊັກເຂົ້າເສັ້ນເລືອດ. ຫາກການກວດເລືອດໄດ້ຜົນບວກ ຜູ້ທີ່ຕິດເຊື້ອນັ້ນບໍ່ຄວນບັງຄັບຄົນທີ່ເຂົາມຸ່ງໝາຍຈະໄດ້ເປັນຄູ່ຄອງນັ້ນດຳເນີນຄວາມສຳພັນຕໍ່ໄປຫາກຄົນນັ້ນຢາກຈະໃຫ້ຄວາມສຳພັນນັ້ນຍຸດຕິໃນຕອນນີ້. ທີ່ຈິງ ຄົນໃດຊຶ່ງເຄີຍດຳເນີນຊີວິດແບບທີ່ມີຄວາມສ່ຽງຕໍ່ການຕິດເຊື້ອສູງໜ້າຈະຍອມກວດເລືອດຫາເຊື້ອເອດສ໌ເບິ່ງດ້ວຍຄວາມສະໝັກໃຈກ່ອນເລີ່ມການເປັນຄູ່ຮັກກັນ.
ການເບິ່ງໄປໄກກວ່າວັນສົມລົດ
22, 23. (ກ) ອາດສູນເສຍຄວາມສົມດຸນໄດ້ຢ່າງໃດເມື່ອກຽມການສຳລັບງານແຕ່ງດອງ? (ຂ) ຄວນຮັກສາໄວ້ຊຶ່ງທັດສະນະທີ່ສົມດຸນອັນໃດເມື່ອຄຳນຶງເຖິງງານແຕ່ງດອງແລະຊີວິດສົມລົດ?
22 ລະຫວ່າງເດືອນທ້າຍໆ ກ່ອນການສົມລົດ ເຈົ້າທັງສອງຄົງຈະມີວຽກຫຼາຍກັບການຈັດກຽມງານແຕ່ງດອງ. ເຈົ້າອາດລົດຄວາມຕຶງຄຽດຫຼວງຫຼາຍລົງໄດ້ໂດຍການເປັນຄົນຮູ້ຈັກປະມານຕົນເອງ. ງານແຕ່ງດອງທີ່ຈັດຂຶ້ນຢ່າງພິຖີພິຖັນອາດເຮັດໃຫ້ຍາດພີ່ນ້ອງແລະຫມູ່ຄູ່ພໍໃຈ ແຕ່ນັ້ນອາດເຮັດໃຫ້ຜູ້ທີ່ເພິ່ງຈະແຕ່ງດອງໃໝ່ກັບຄອບຄົວຂອງເຂົາອິດເມື່ອຍແລະສິ້ນເປືອງເງິນຄຳ. ການຍຶດໝັ້ນກັບປະເພນີທ້ອງຖິ່ນບາງຢ່າງນັ້ນມີເຫດຜົນ ແຕ່ການເຮັດຕາມແບບບໍ່ໃຊ້ຄວາມຄຶດແລະບາງທີແຂ່ງຂັນກັນສາມາດບົດບັງຄວາມໝາຍຂອງໂອກາດນັ້ນແລະອາດເຮັດໃຫ້ເຈົ້າສູນເສຍຄວາມຍິນດີທີ່ເຈົ້າໜ້າຈະມີ. ຂະນະທີ່ຕ້ອງຄຳນຶງເຖິງຄວາມຮູ້ສຶກຂອງຜູ້ອື່ນ ເຈົ້າບ່າວເປັນຜູ້ຮັບຜິດຊອບອັນດັບທຳອິດໃນການຕັດສິນສິ່ງທີ່ຈະດຳເນີນຕໍ່ໃນງານລ້ຽງສະຫຼອງສົມລົດ.—ໂຍຮັນ 2:9.
23 ຈົ່ງຈື່ໄວ້ວ່າງານແຕ່ງດອງຂອງເຈົ້າມີແຕ່ມື້ດຽວ ແຕ່ຊີວິດສົມລົດຂອງເຈົ້າຍືນນານຊົ່ວຊີວິດ. ຈົ່ງໃຫ້ຫຼີກເວັ້ນການເພ່ງເລັງເກີນໄປໃນສິ່ງທີ່ເຮັດໃນງານແຕ່ງດອງ. ແທນທີ່ຈະເປັນແນວນັ້ນ ຈົ່ງໝາຍເພິ່ງພະເຢໂຫວາພະເຈົ້າເພື່ອການນຳທາງ ແລະວາງແຜນລ່ວງໜ້າສຳລັບຊີວິດສົມລົດ. ຄັນແລ້ວເຈົ້າຈະໄດ້ກຽມຕົວເປັນຢ່າງດີສຳລັບຊີວິດແຕ່ງດອງທີ່ປະສົບຜົນສຳເລັດ.
a ການເຮັດແບບນີ້ໃຊ້ໄດ້ໃນປະເທດທີ່ຖືວ່າການນັດພົບເປັນເລື່ອງເໝາະສຳລັບຄລິດສະຕຽນ.
b ແມ່ນແຕ່ໃນປະຊາຄົມຄລິດສະຕຽນ ມີບາງຄົນຊຶ່ງເວົ້າໄດ້ວ່າມີສ່ວນຮ່ວມໃນກິດຈະກຳຕ່າງໆ ຂອງປະຊາຄົມນ້ອຍຫຼາຍແທ້ໆ ບໍ່ມີໃຈຝັກໃຝ່ສິ່ງຝ່າຍວິນຍານເລີຍ. ແທນທີ່ຈະເປັນຜູ້ຮັບໃຊ້ຂອງພະເຈົ້າຢ່າງສຸດຫົວໃຈ ເຂົາອາດໄດ້ຮັບອິດທິພົນຈາກເຈຕະຄະຕິແລະຄວາມປະພຶດຂອງໂລກ.—ໂຍຮັນ 17:16; ຍາໂກໂບ 4:4.