ບົດຮຽນ 11
ຄວາມເຊື່ອແລະປະເພນີທີ່ບໍ່ພໍພະໄທພະຜູ້ສ້າງ
ຄວາມເຊື່ອແລະປະເພນີແບບໃດທີ່ຜິດ? (1)
ຄລິດສະຕຽນຄວນເຊື່ອບໍວ່າພະເຈົ້າເປັນຕີເອການຸພາບ? (2)
ເປັນຫຍັງຄລິດສະຕຽນແທ້ບໍ່ສະຫຼອງບຸນໂນແອນຫຼືຄລິດສະມາດ, ບຸນອີສະເຕີ, ຫຼືວັນເກີດ? (3, 4)
ຄົນຕາຍຈະເຮັດອັນຕະລາຍແກ່ຜູ້ມີຊີວິດໄດ້ບໍ? (5)
ພະເຍຊູໄດ້ຕາຍເທິງໄມ້ກາງເຂນບໍ? (6)
ການເຮັດໃຫ້ພະເຈົ້າພໍພະໄທມີຄວາມສຳຄັນພຽງໃດ? (7)
1. ບໍ່ແມ່ນຄວາມເຊື່ອແລະປະເພນີທັງໝົດບໍ່ດີ. ແຕ່ພະເຈົ້າບໍ່ເຫັນຊອບຫາກວ່າປະເພນີເຫຼົ່ານັ້ນມາຈາກສາສະໜາປອມຫຼືຂັດກັບຄຳສອນໃນຄຳພີໄບເບິນ.—ມັດທາຍ 15:6.
2. ຕີເອການຸພາບ: ພະເຢໂຫວາເປັນຕີເອການຸພາບບໍ?—ສາມບຸກຄົນໃນພະເຈົ້າອົງດຽວບໍ? ບໍ່ແມ່ນເລີຍ! ພະເຢໂຫວາ ພະບິດາ ເປັນ “ພະເຈົ້າອົງດຽວທ່ຽງແທ້.” (ໂຍຮັນ 17:3; ມາລະໂກ 12:29) ພະເຍຊູເປັນພະບຸດຫົວປີຂອງພະອົງ ແລະພະອົງຢູ່ໃຕ້ອຳນາດພະເຈົ້າ. (1 ໂກລິນໂທ 11:3) ພະບິດາໃຫຍ່ກວ່າພະບຸດ. (ໂຍຮັນ 14:28) ພະວິນຍານບໍລິສຸດບໍ່ແມ່ນເປັນບຸກຄົນ; ແຕ່ເປັນພະລັງປະຕິບັດການຂອງພະເຈົ້າ.—ຕົ້ນເດິມ 1:2; ກິດຈະການ 2:18.
3. ບຸນໂນແອນຫຼືຄລິດສະມາດແລະບຸນອີສະເຕີ: ພະເຍຊູບໍ່ໄດ້ປະສູດໃນວັນທີ 25 ເດືອນທັນວາ. ພະອົງປະສູດປະມານວັນທີ 1 ເດືອນຕຸລາ ເປັນໄລຍະນຶ່ງຂອງປີຊຶ່ງເປັນຕອນທີ່ຜູ້ລ້ຽງແກະຮັກສາຝູງແກະຢູ່ຂ້າງນອກໃນເວລາກາງຄືນ. (ລຶກາ 2:8-12) ພະເຍຊູບໍ່ເຄີຍສັ່ງຄລິດສະຕຽນໃຫ້ສະຫຼອງວັນປະສູດຂອງພະອົງ. ແຕ່ພະອົງໄດ້ບອກເຫຼົ່າສາວົກຂອງພະອົງໃຫ້ສະຫຼອງວັນອະນຸສອນ ຫຼືເຮັດການລະນຶກເຖິງການຕາຍຂອງພະອົງ. (ລຶກາ 22:19, 20) ບຸນໂນແອນຫຼືຄລິດສະມາດແລະປະເພນີໂນແອນມາຈາກສາສະໜາປອມສະໄໝບູຮານ. ປະເພນີບຸນອີສະເຕີກໍ່ຄືກັນ ເຊັ່ນການໃຊ້ໄຂ່ແລະກະຕ່າຍ. ຄລິດສະຕຽນຮຸ່ນທຳອິດບໍ່ໄດ້ສະຫຼອງບຸນໂນແອນຫຼືບຸນອີສະເຕີ ແລະຄລິດສະຕຽນແທ້ທຸກມື້ນີ້ກໍ່ບໍ່ສະຫຼອງຄືກັນ.
4. ວັນເກີດ: ມີການສະຫຼອງວັນເກີດຂອງສອງຄົນເທົ່ານັ້ນທີ່ມີກ່າວເຖິງໃນຄຳພີໄບເບິນ ແຕ່ເປັນການຈັດຂຶ້ນໂດຍຄົນທີ່ບໍ່ນະມັດສະການພະເຢໂຫວາ. (ຕົ້ນເດິມ 40:20-22; ມາລະໂກ 6:21, 22, 24-27) ຄລິດສະຕຽນຮຸ່ນທຳອິດບໍ່ໄດ້ສະຫຼອງວັນເກີດ. ປະເພນີສະຫຼອງວັນເກີດມາຈາກສາສະໜາປອມສະໄໝບູຮານ. ຄລິດສະຕຽນແທ້ໃຫ້ຂອງຂວັນແລະມີໂອກາດສະຫນຸກສະໜານມ່ວນຊື່ນດ້ວຍກັນໃນເວລາອື່ນໆ ຕະຫຼອດປີ.
5. ການຢ້ານຄົນຕາຍ: ຄົນຕາຍບໍ່ສາມາດເຮັດສິ່ງນຶ່ງສິ່ງໃດຫຼືຮູ້ສຶກສິ່ງນຶ່ງສິ່ງໃດ. ເຮົາບໍ່ສາມາດຊ່ວຍເຂົາໄດ້ ແລະເຂົາກໍ່ບໍ່ສາມາດເຮັດອັນຕະລາຍແກ່ເຮົາໄດ້. (ຄຳເພງ 146:4; ຜູ້ເທສະໜາປະກາດ 9:5, 10) ຈິດວິນຍານຕາຍ, ຈິດວິນຍານບໍ່ມີຊີວິດຕໍ່ໄປຫຼັງຄວາມຕາຍ. (ເອເຊກຽນ 18:4) ແຕ່ລາງເທື່ອພວກທູດສະຫວັນຊົ່ວ ທີ່ເອີ້ນວ່າພູດຜີສາດ ປອມຕົວເປັນວິນຍານຄົນຕາຍ. ປະເພນີໃດກໍ່ຕາມທີ່ກ່ຽວຂ້ອງກັບຄວາມຢ້ານຫຼືການບູຊາຄົນຕາຍແລ້ວນັ້ນຜິດ.—ເອຊາອີ 8:19.
6. ໄມ້ກາງເຂນ: ພະເຍຊູບໍ່ໄດ້ຕາຍເທິງໄມ້ກາງເຂນ. ພະອົງຕາຍເທິງເສົາໄມ້ ຫຼືທ່ອນໄມ້. ຄຳພາສາກຣີກທີ່ຖືກແປ “ໄມ້ກາງເຂນ” ໃນຄຳພີໄບເບິນຫຼາຍເຫຼັ້ມມີຄວາມໝາຍພຽງແຕ່ໄມ້ທ່ອນນຶ່ງທໍ່ນັ້ນ. ເຄື່ອງໝາຍໄມ້ກາງເຂນມາຈາກສາສະໜາປອມແຫ່ງສະໄໝບູຮານ. ຄລິດສະຕຽນຮຸ່ນທຳອິດບໍ່ໄດ້ໃຊ້ຫຼືບູຊາໄມ້ກາງເຂນ. ສະນັ້ນ ທ່ານຄຶດວ່າຈະເປັນການຖືກຕ້ອງບໍທີ່ຈະໃຊ້ໄມ້ກາງເຂນໃນການນະມັດສະການ?—ພະບັນຍັດຕິທີ2 7:26; 1 ໂກລິນໂທ 10:14.
7. ນັ້ນອາດຈະຍາກທີ່ຈະປະຖິ້ມຄວາມເຊື່ອແລະປະເພນີເຫຼົ່ານີ້ບາງຢ່າງ. ຍາດພີ່ນ້ອງແລະເພື່ອນຝູງອາດພະຍາຍາມຊັກຈູງທ່ານບໍ່ໃຫ້ປ່ຽນຄວາມເຊື່ອ. ແຕ່ການເຮັດໃຫ້ພະເຈົ້າພໍພະໄທສຳຄັນກວ່າການເຮັດໃຫ້ມະນຸດພໍໃຈ.—ສຸພາສິດ 29:25; ມັດທາຍ 10:36, 37.
[ຮູບພາບໜ້າ 22]
ພະເຈົ້າບໍ່ແມ່ນຕີເອການຸພາບ
[ຮູບພາບໜ້າ 23]
ບຸນໂນແອນແລະບຸນອີສະເຕີມາຈາກສາສະໜາປອມສະໄໝບູຮານ
[ຮູບພາບໜ້າ 23]
ບໍ່ມີເຫດຜົນທີ່ຈະບູຊາຄົນຕາຍຫຼືຢ້ານພວກເຂົາ