ບົດຮຽນ 2
ພະເຈົ້າເພື່ອນດີທີ່ສຸດທີ່ທ່ານສາມາດມີໄດ້
ການເປັນເພື່ອນຂອງພະເຈົ້າແມ່ນສິ່ງດີທີ່ສຸດທີ່ທ່ານຈະປະສົບໄດ້. ພະອົງຈະສອນທ່ານເຖິງວິທີທີ່ຈະມີຄວາມສຸກແລະຄວາມປອດໄພ; ພະອົງຈະປົດປ່ອຍທ່ານຈາກຄວາມເຊື່ອທີ່ຜິດແລະການປະຕິບັດທີ່ເປັນອັນຕະລາຍຫຼາຍຢ່າງ. ພະອົງຈະຟັງການອະທິດຖານຂອງທ່ານ. ພະອົງຈະຊ່ວຍທ່ານໃຫ້ມີຄວາມສະຫງົບໃຈແລະຄວາມໝັ້ນໃຈ. (ຄຳເພງ 71:5; 73:28) ພະເຈົ້າຈະຊ່ວຍເຫຼືອທ່ານໃນເວລາທີ່ທ່ານປະສົບຄວາມຫຍຸ້ງຍາກ. (ຄຳເພງ 18:18) ແລະພະເຈົ້າສະເໜີຂອງປະທານຈາກພະອົງໃຫ້ທ່ານຄືຊີວິດຕະຫຼອດໄປເປັນນິດ.—ໂລມ 6:23.
ເມື່ອທ່ານເຂົ້າໃກ້ພະເຈົ້າ ທ່ານກໍຈະເຂົ້າໃກ້ເພື່ອນຂອງພະອົງ. ພວກເຂົາຈະກາຍເປັນເພື່ອນຂອງທ່ານຄືກັນ. ທີ່ແທ້ຈິງ ພວກເຂົາຈະເປັນຄືກັນກັບພີ່ນ້ອງຊາຍແລະຍິງຂອງທ່ານ. ພວກເຂົາຈະຍິນດີສອນທ່ານກ່ຽວກັບພະເຈົ້າທັງຊ່ວຍເຫຼືອທ່ານແລະຫນູນກຳລັງໃຈທ່ານ.
ພວກເຮົາບໍ່ເທົ່າທຽມກັບພະເຈົ້າ. ເມື່ອທ່ານສະແຫວງຫາມິດຕະພາບກັບພະເຈົ້າ ທ່ານຕ້ອງເຂົ້າໃຈຄວາມຈິງທີ່ສຳຄັນປະການໜຶ່ງ. ມິດຕະພາບກັບພະເຈົ້າບໍ່ແມ່ນມິດຕະພາບລະຫວ່າງບຸກຄົນທີ່ມີຖານະເທົ່າທຽມກັນ. ພະອົງມີພະຊົນຢູ່ນານກວ່າເຮົາ ມີສະຕິປັນຍາຫຼາຍກວ່າແລະມີອຳນາດຫຼາຍກວ່າພວກເຮົາ. ພະອົງເປັນຜູ້ປົກຄອງຂອງເຮົາໂດຍສິດທິອັນຊອບທຳ. ສະນັ້ນ ຖ້າເຮົາຕ້ອງການເປັນເພື່ອນຂອງພະອົງ ເຮົາຕ້ອງຮັບຟັງພະອົງແລະເຮັດໃນສິ່ງທີ່ພະອົງບອກໃຫ້ພວກເຮົາເຮັດ. ການເຮັດແນວນີ້ຈະເຮັດໃຫ້ເກີດຜົນດີແກ່ເຮົາສະເໝີ.—ເອຊາອີ 48:18.