ບົດທີ 28

ວິທີທີ່ຈະຮູ້ວ່າຄວນເຊື່ອຟັງຜູ້ໃດ

ບາງຄັ້ງເຮົາກໍຮູ້ສຶກວ່າຍາກທີ່ຈະຮູ້ວ່າຄວນເຊື່ອຟັງຜູ້ໃດ. ພໍ່ແມ່ອາດບອກລູກໃຫ້ເຮັດແນວນີ້. ແຕ່ນາຍຄູຢູ່ໂຮງຮຽນຫຼືຕຳຫຼວດອາດບອກລູກໃຫ້ເຮັດອີກແນວໜຶ່ງ. ຖ້າມີສິ່ງແບບນີ້ເກີດຂຶ້ນ ລູກຈະເຊື່ອຟັງໃຜ?—

ໃນບົດທີ 7 ຂອງປຶ້ມນີ້ເຮົາໄດ້ອ່ານຈາກຄຳພີໄບເບິນຢູ່ພະທຳເອເຟດ 6:1-3 (ລ.ມ.) ທີ່ບອກວ່າລູກຄວນເຊື່ອຟັງພໍ່ແມ່ຂອງຕົນ. ພະຄຳພີບອກວ່າ: “ຈົ່ງເຊື່ອຟັງພໍ່ແມ່ຢ່າງທີ່ປະສານກັບໃຈປະສົງຂອງພະເຈົ້າ.” ລູກຮູ້ບໍວ່າການ “ປະສານກັບໃຈປະສົງຂອງພະເຈົ້າ” ໝາຍຄວາມວ່າແນວໃດ?— ພໍ່ແມ່ທີ່ເຮັດປະສານກັບໃຈປະສົງຂອງພະເຈົ້າ ສອນລູກໃຫ້ເຊື່ອຟັງກົດໝາຍຕ່າງໆຂອງພະເຈົ້າ.

ແຕ່ຜູ້ໃຫຍ່ບາງຄົນບໍ່ໄດ້ມີຄວາມເຊື່ອໃນພະເຢໂຫວາ. ດັ່ງນັ້ນຈະວ່າແນວໃດຖ້າຜູ້ໃຫຍ່ບາງຄົນບອກວ່າ ມັນບໍ່ເປັນຫຍັງດອກທີ່ຈະລັກກ່າຍຕອນສອບເສັງຫຼືຈັບເອົາເຄື່ອງຢູ່ໃນຮ້ານຄ້າໄປໂດຍບໍ່ໄດ້ຈ່າຍເງິນ? ຖ້າເປັນເຊັ່ນນັ້ນ ມັນຖືກຕ້ອງບໍທີ່ເດັກນ້ອຍຈະລັກກ່າຍຫຼືລັກເຄື່ອງ?—

ຢ່າລືມວ່າກະສັດເນບຶກາດເນດຊາຣເຄີຍອອກຄຳສັ່ງໃຫ້ທຸກຄົນກົ້ມລົງຂາບຮູບປັ້ນຄຳທີ່ລາວໄດ້ຕັ້ງໄວ້. ແຕ່ວ່າທ້າວຊາດຣາກ ທ້າວເມຊາກ ກັບທ້າວອາເບດເນໂຄບໍ່ໄດ້ກົ້ມຂາບຮູບປັ້ນນັ້ນ. ລູກຮູ້ບໍວ່າເປັນຫຍັງ?— ເນື່ອງຈາກຄຳພີໄບເບິນບອກວ່າຄົນເຮົາຄວນນະມັດສະການພະເຢໂຫວາພຽງແຕ່ຜູ້ດຽວ.—ອົບພະຍົບ 20:3; ມັດທາຍ 4:10.

The apostle Peter speaks to High Priest Caiaphas and the rest of the Sanhedrin — ທ່ານເປໂຕເວົ້າຫຍັງກັບທ່ານກາອີເຟ?

ຫຼັງຈາກທີ່ພະເຍຊູສິ້ນຊີວິດ ພວກສາວົກຂອງພະອົງຖືກພາຕົວໄປຢູ່ຕໍ່ໜ້າສານຊັນເຮດຣິນເຊິ່ງເປັນສານສາສະໜາທີ່ສຳຄັນທີ່ສຸດຂອງຊາວຢິວ. ປະໂລຫິດໃຫຍ່ກາອີເຟເວົ້າວ່າ: “ພວກເຮົາໄດ້ຫ້າມທ່ານທັງຫຼາຍດ້ວຍແຂງແຮງແທ້ວ່າຢ່າສອນໃນນາມຊື່ນີ້ [ພະເຍຊູ] ແລະຈົ່ງເບິ່ງ ທ່ານທັງຫຼາຍໄດ້ກະທຳໃຫ້ເມືອງເຢຣຶຊາເລມເຕັມໄປດ້ວຍຄຳສອນຂອງທ່ານ.” ເປັນຫຍັງພວກອັກຄະສາວົກຈຶ່ງບໍ່ຍອມເຊື່ອຟັງສານຊັນເຮດຣິນ?— ໃນຖານະເປັນຕົວແທນຂອງອັກຄະສາວົກໝົດທຸກຄົນ ທ່ານເປໂຕຕອບທ່ານກາອີເຟວ່າ: “ພວກຂ້າພະເຈົ້າຈຳຕ້ອງຟັງພະເຈົ້າຫຼາຍກວ່າຟັງມະນຸດ.”—ກິດຈະການ 5:27-29.

ໃນສະໄໝນັ້ນ ພວກຫົວໜ້າສາສະໜາຂອງຊາວຢິວມີອິດທິພົນຫຼາຍ. ແນວໃດກໍຕາມ ປະເທດຂອງເຂົາເຈົ້າຢູ່ພາຍໃຕ້ການປົກຄອງຂອງລັດຖະບານປະເທດໂລມ. ປະມຸກຂອງລັດຖະບານນັ້ນເອີ້ນວ່າ ເຊຊາ. ເຖິງແມ່ນວ່າຊາວຢິວບໍ່ຕ້ອງການໃຫ້ເຊຊາປົກຄອງເຂົາເຈົ້າ ແຕ່ລັດຖະບານຂອງປະເທດໂລມກໍໄດ້ເຮັດສິ່ງດີຫຼາຍຢ່າງເພື່ອປະຊາຊົນ. ແລະລັດຖະບານຕ່າງໆໃນທຸກມື້ນີ້ກໍເຮັດສິ່ງທີ່ດີເພື່ອປະຊາຊົນຄືກັນ. ລູກຮູ້ບໍວ່າສິ່ງເຫຼົ່ານັ້ນມີຫຍັງແດ່?—

ລັດຖະບານສ້າງຖະໜົນຫົນທາງເພື່ອໃຊ້ໃນການເດີນທາງແລະໃຫ້ເງິນຕຳຫຼວດແລະເຈົ້າໜ້າທີ່ດັບເພີງເພື່ອປົກປ້ອງເຮົາ. ນອກຈາກນີ້ ລັດຖະບານອາດຈັດໃຫ້ມີການສຶກສາສຳລັບເດັກນ້ອຍແລະການເບິ່ງແຍງສຸຂະພາບສຳລັບຄົນສູງອາຍຸ. ລັດຖະບານຕ້ອງໃຊ້ເງິນເພື່ອເຮັດສິ່ງເຫຼົ່ານີ້. ລູກຮູ້ບໍວ່າລັດຖະບານໄດ້ເງິນມາຈາກໃສ?— ມາຈາກປະຊາຊົນ. ເງິນທີ່ປະຊາຊົນຈ່າຍໃຫ້ລັດຖະບານເອີ້ນວ່າພາສີ.

ຕອນທີ່ຄູຜູ້ຍິ່ງໃຫຍ່ຢູ່ເທິງແຜ່ນດິນໂລກ ຊາວຢິວຫຼາຍຄົນບໍ່ຢາກຈ່າຍພາສີໃຫ້ລັດຖະບານໂລມ. ດັ່ງນັ້ນ ມື້ໜຶ່ງພວກປະໂລຫິດໃຫຍ່ຈຶ່ງຈ້າງຄົນໃຫ້ໄປຖາມຄຳຖາມພະເຍຊູເພື່ອພະຍາຍາມເຮັດໃຫ້ພະອົງໄດ້ຮັບຄວາມເດືອດຮ້ອນ. ຄຳຖາມກໍຄື ‘ເຮົາຕ້ອງຈ່າຍພາສີໃຫ້ເຊຊາຫຼືບໍ່?’ ນີ້ເປັນຄຳຖາມທີ່ມີເລ່ຫຼ່ຽມ. ຖ້າພະເຍຊູຕອບວ່າ ‘ແມ່ນແລ້ວ ເຈົ້າຕ້ອງຈ່າຍ’ ຊາວຢິວຫຼາຍຄົນຄົງຈະບໍ່ມັກໃນສິ່ງທີ່ພະອົງເວົ້າ. ແຕ່ພະເຍຊູກໍບໍ່ອາດຕອບໄດ້ວ່າ ‘ບໍ່ ເຈົ້າບໍ່ຕ້ອງເສຍພາສີ.’ ຖືວ່າເປັນສິ່ງທີ່ຜິດທີ່ເວົ້າແບບນັ້ນ.

ດັ່ງນັ້ນ ພະເຍຊູເຮັດແນວໃດ? ພະອົງກ່າວວ່າ: ‘ຈົ່ງເອົາເງິນຫຼຽນໜຶ່ງມາໃຫ້ເຮົາເບິ່ງ.’ ເມື່ອເຂົາເຈົ້າເອົາເງິນຫຼຽນມາໃຫ້ພະອົງແລ້ວ ພະເຍຊູຖາມເຂົາເຈົ້າວ່າ: “ເປັນຮູບແລະເປັນໜັງສື [“ຊື່,” ລ.ມ.] ຂອງຜູ້ໃດ?” ເຂົາເຈົ້າໄດ້ຕອບວ່າ “ເປັນຂອງກະສັດເຊຊາ.” ດັ່ງນັ້ນ ພະເຍຊູຈຶ່ງໄດ້ກ່າວແກ່ເຂົາເຈົ້າວ່າ: “ເຫດສັນນີ້ສິ່ງຂອງກະສັດເຊຊາຈົ່ງສົ່ງໃຫ້ຄືນແກ່ກະສັດເຊຊາ ແລະສິ່ງຂອງພະເຈົ້າຈົ່ງສົ່ງໃຫ້ຄືນແກ່ພະເຈົ້າເຖີ້ນ.”—ລືກາ 20:19-26.

Men ask Jesus a trick question about paying taxes — ພະເຍຊູຕອບຄຳຖາມທີ່ມີເລ່ຫຼ່ຽມຂອງຄົນເຫຼົ່ານີ້ແນວໃດ?

ບໍ່ມີໃຜຈັບຜິດຄຳຕອບນັ້ນ. ຖ້າເຊຊາເຮັດສິ່ງຕ່າງໆເພື່ອປະຊາຊົນ ກໍຖືວ່າມັນຖືກຕ້ອງທີ່ຈະເອົາເງິນທີ່ເຊຊາເຮັດຂຶ້ນມານັ້ນຈ່າຍຄືນໃຫ້ເຊຊາສຳລັບສິ່ງເຫຼົ່ານີ້. ໂດຍວິທີນີ້ ພະເຍຊູສະແດງໃຫ້ເຫັນວ່າເປັນສິ່ງທີ່ຖືກຕ້ອງທີ່ຈະເສຍພາສີໃຫ້ລັດຖະບານສຳລັບສິ່ງທີ່ເຮົາໄດ້ຮັບນັ້ນ.

ຕອນນີ້ລູກຍັງບໍ່ທັນເຖິງອາຍຸທີ່ຕ້ອງເສຍພາສີ. ແຕ່ກໍມີບາງສິ່ງທີ່ລູກຄວນໃຫ້ແກ່ລັດຖະບານ. ລູກຮູ້ບໍວ່າສິ່ງນັ້ນແມ່ນຫຍັງ?— ການເຊື່ອຟັງກົດໝາຍຂອງລັດຖະບານ. ຄຳພີໄບເບິນກ່າວວ່າ: ‘ຈົ່ງເຊື່ອຟັງອຳນາດທີ່ສູງກວ່າ.’ ອຳນາດເຫຼົ່ານີ້ກໍຄືຜູ້ທີ່ມີອຳນາດໃນລັດຖະບານ. ດັ່ງນັ້ນ ພະເຈົ້າເປັນຜູ້ທີ່ບອກວ່າເຮົາຄວນເຊື່ອຟັງກົດໝາຍຕ່າງໆຂອງລັດຖະບານ.—ໂລມ 13:1, 2.

ອາດມີກົດໝາຍທີ່ບໍ່ໃຫ້ຖິ້ມເຈ້ຍຫຼືສິ່ງອື່ນໆໃສ່ຫົນທາງ. ລູກຄວນເຊື່ອຟັງກົດໝາຍນັ້ນບໍ?— ແມ່ນແລ້ວ ພະເຈົ້າຕ້ອງການໃຫ້ລູກເຊື່ອຟັງ. ລູກຄວນເຊື່ອຟັງຕຳຫຼວດນຳບໍ?— ລັດຖະບານຈ່າຍເງິນໃຫ້ຕຳຫຼວດເພື່ອປົກປ້ອງປະຊາຊົນ. ການເຊື່ອຟັງເຂົາເຈົ້າກໍຄືກັນກັບການເຊື່ອຟັງລັດຖະບານ.

ດັ່ງນັ້ນ ຖ້າລູກກຳລັງຈະຂ້າມຫົນທາງແລະຕຳຫຼວດບອກວ່າ “ຖ້າກ່ອນ!” ລູກຄວນເຮັດຫຍັງ?— ຖ້າຄົນອື່ນພາກັນແລ່ນຂ້າມຫົນທາງ ລູກຄວນເຮັດບໍ?— ລູກຄວນລໍຖ້າກ່ອນ ເຖິງແມ່ນວ່າຈະເຫຼືອແຕ່ລູກພຽງຄົນດຽວກໍຕາມ. ພະເຈົ້າບອກລູກໃຫ້ເຊື່ອຟັງ.

ອາດຈະມີເຫດການວຸ່ນວາຍເກີດຂຶ້ນໃນແຖວບ້ານ ແລະຕຳຫຼວດອາດຈະບອກວ່າ: “ຢ່າອອກມາທາງນອກເຮືອນ.” ແຕ່ລູກອາດໄດ້ຍິນສຽງຮ້ອງແລະຢາກຮູ້ວ່າກຳລັງເກີດຫຍັງຂຶ້ນ. ລູກຄວນອອກໄປເບິ່ງບໍ?— ມັນເປັນການເຊື່ອຟັງ ‘ອຳນາດທີ່ສູງກວ່າ’ ບໍ?—

ໃນຫຼາຍບ່ອນ ລັດຖະບານຍັງສ້າງໂຮງຮຽນແລະຈ່າຍເງິນໃຫ້ນາຍຄູນຳ. ດັ່ງນັ້ນ ລູກຄິດວ່າພະເຈົ້າຕ້ອງການໃຫ້ລູກເຊື່ອຟັງນາຍຄູບໍ?— ຄິດເບິ່ງດູ. ລັດຖະບານຈ່າຍເງິນໃຫ້ນາຍຄູເພື່ອສອນໜັງສື ຄືກັບທີ່ຈ່າຍເງິນໃຫ້ຕຳຫຼວດເພື່ອປົກປ້ອງປະຊາຊົນ. ດັ່ງນັ້ນ ການເຊື່ອຟັງຕຳຫຼວດແລະນາຍຄູກໍຄືກັບການເຊື່ອຟັງລັດຖະບານ.

A policeman tells boys to wait before crossing a street — ເປັນຫຍັງເຮົາຄວນເຊື່ອຟັງຕຳຫຼວດ?

ແຕ່ຈະວ່າແນວໃດຖ້ານາຍຄູບອກວ່າລູກຕ້ອງກົ້ມລົງຂາບຮູບປັ້ນບາງແນວ? ລູກຈະເຮັດແນວໃດ?— ຊາວເຫບເລີສາມຄົນບໍ່ຍອມກົ້ມລົງຂາບຮູບປັ້ນ ເຖິງແມ່ນວ່າກະສັດເນບຶກາດເນດຊາຣອອກຄຳສັ່ງໃຫ້ເຂົາເຈົ້າເຮັດກໍຕາມ. ລູກຈື່ບໍວ່າເປັນຫຍັງ?— ເພາະວ່າເຂົາເຈົ້າຕ້ອງການທີ່ຈະເຊື່ອຟັງພະເຈົ້າ.

ທ້າວ ວິວ ດູແຣນ ນັກປະຫວັດສາດໄດ້ຂຽນກ່ຽວກັບຄລິດສະຕຽນຮຸ່ນທຳອິດແລະກ່າວວ່າ ‘ຄວາມຈົງຮັກພັກດີສູງສຸດຂອງເຂົາເຈົ້າບໍ່ໄດ້ໃຫ້ແກ່ເຊຊາ.’ ແມ່ນແລ້ວ ສິ່ງນັ້ນຕ້ອງໃຫ້ແກ່ພະເຢໂຫວາ! ດັ່ງນັ້ນ ຂໍໃຫ້ຈື່ໄວ້ວ່າພະເຈົ້າຄວນມາເປັນອັນດັບທຳອິດໃນຊີວິດຂອງພວກເຮົາ.

ພວກເຮົາເຊື່ອຟັງລັດຖະບານເພາະນັ້ນເປັນສິ່ງທີ່ພະເຈົ້າຕ້ອງການໃຫ້ເຮົາເຮັດ. ແຕ່ຖ້າເຮົາໄດ້ຮັບຄຳສັ່ງໃຫ້ເຮັດບາງສິ່ງທີ່ພະເຈົ້າບອກວ່າເຮົາບໍ່ຄວນເຮັດ ເຮົາຈະເວົ້າແນວໃດ?— ເຮົາຄວນເວົ້າແບບທີ່ພວກອັກຄະສາວົກເວົ້າກັບປະໂລຫິດໃຫຍ່ທີ່ວ່າ: “ພວກຂ້າພະເຈົ້າຈຳຕ້ອງຟັງພະເຈົ້າຫຼາຍກວ່າຟັງມະນຸດ.”—ກິດຈະການ 5:29.

ຄຳພີໄບເບິນສອນເຮົາໃຫ້ເຄົາລົບກົດໝາຍ. ຂໍໃຫ້ອ່ານສິ່ງທີ່ຂຽນໄວ້ຢູ່ພະທຳມັດທາຍ 5:41; ຕິໂຕ 3:1; ແລະ 1 ເປໂຕ 2:12-14.