ບົດທີ 32
ວິທີທີ່ພະເຍຊູໄດ້ຮັບການປົກປ້ອງຄຸ້ມຄອງ
ບາງຄັ້ງພະເຢໂຫວາກໍເຮັດສິ່ງຕ່າງໆໃນວິທີທີ່ເປັນຕາງຶດງໍ້ເພື່ອປົກປ້ອງຜູ້ທີ່ເປັນເດັກນ້ອຍແລະຜູ້ທີ່ບໍ່ສາມາດປົກປ້ອງຕົນເອງໄດ້. ຖ້າລູກໄປຍ່າງຫຼິ້ນໃນແຖບຊົນນະບົດ ລູກອາດເຫັນວິທີໜຶ່ງທີ່ພະເຢໂຫວາເຮັດເຊັ່ນນີ້. ແຕ່ໃນຕອນທຳອິດລູກອາດຈະບໍ່ເຂົ້າໃຈແທ້ໆວ່າກຳລັງເກີດຫຍັງຂຶ້ນ.
ລູກເຫັນນົກບິນຮ່ອນລົງມາຢູ່ພື້ນດິນໃກ້ໆຕົວລູກ. ເບິ່ງຄືວ່າມັນບາດເຈັບ. ມັນລາກປີກຂ້າງໜຶ່ງແລະຍ່າງໜີເມື່ອລູກພະຍາຍາມເຂົ້າໄປໃກ້ມັນ. ເມື່ອລູກຍ່າງນຳກົ້ນມັນໄປ ມັນກໍຈະຍ່າງໜີໄປຈາກລູກ. ແລ້ວທັນທີທັນໃດ ນົກຕົວນັ້ນກໍບິນໜີໄປ. ປີກຂອງມັນບໍ່ໄດ້ເຈັບຈັກໜ້ອຍ! ລູກຮູ້ບໍວ່ານົກຕົວນັ້ນກຳລັງເຮັດຫຍັງ?—
ທີ່ຈິງ ຢູ່ໃກ້ໆກັບບ່ອນທີ່ນົກຮ່ອນລົງມາໃກ້ລູກ ມີລູກນົກເຊື່ອງຢູ່ໃນຟຸ່ມໄມ້. ແມ່ນົກຢ້ານວ່າລູກຈະເຫັນລູກນົກແລະທຳຮ້າຍລູກຂອງມັນ. ດັ່ງນັ້ນ ແມ່ນົກຈຶ່ງທຳທ່າວ່າບາດເຈັບແລະລໍ້ລູກໃຫ້ຫຍັບຫ່າງອອກໄປຈາກລູກຂອງມັນ. ລູກຮູ້ບໍວ່າໃຜສາມາດປົກປ້ອງເຮົາຄືກັບທີ່ແມ່ນົກປົກປ້ອງລູກຂອງມັນ?—ໃນຄຳພີໄບເບິນ ມີການສົມທຽບພະເຢໂຫວາວ່າເປັນຄືນົກອິນຊີ ເຊິ່ງຊ່ວຍເຫຼືອລູກນ້ອຍໆຂອງມັນ.—ພະບັນຍັດ 32:11, 12.
ແມ່ນົກຕົວນີ້ປົກປ້ອງລູກຂອງມັນແນວໃດ?
ເດັກນ້ອຍທີ່ມີຄ່າທີ່ສຸດສຳລັບພະເຢໂຫວາກໍຄືພະເຍຊູ ລູກຊາຍສຸດທີ່ຮັກຂອງພະອົງ. ເມື່ອພະເຍຊູຢູ່ໃນສະຫວັນ ພະອົງເປັນບຸກຄົນກາຍວິນຍານທີ່ມີລິດເດດຄືກັບພໍ່. ພະອົງສາມາດເບິ່ງແຍງຕົວເອງໄດ້. ແຕ່ເມື່ອພະເຍຊູມາເກີດເປັນແອນ້ອຍຢູ່ເທິງແຜ່ນດິນໂລກ ພະອົງຊ່ວຍເຫຼືອຕົວເອງບໍ່ໄດ້. ພະອົງຈຳເປັນຕ້ອງໄດ້ຮັບການປົກປ້ອງ.
ເພື່ອເຮັດໃຫ້ໃຈປະສົງຂອງພະເຈົ້າສຳເລັດຢູ່ເທິງແຜ່ນດິນໂລກ ພະເຍຊູຕ້ອງເຕີບໂຕເປັນຜູ້ຊາຍທີ່ສົມບູນແບບແລະເປັນຜູ້ໃຫຍ່ເຕັມທີ. ແນວໃດກໍຕາມ ຊາຕານພະຍາຍາມຈະຂ້າພະເຍຊູກ່ອນທີ່ພະອົງຈະເຕີບໃຫຍ່. ຄວາມພະຍາຍາມທີ່ຈະຂ້າພະເຍຊູໃນຕອນທີ່ພະອົງເປັນເດັກນ້ອຍ ແລະວິທີທີ່ພະເຢໂຫວາປົກປ້ອງພະເຍຊູເປັນເລື່ອງທີ່ໜ້າຕື່ນເຕັ້ນ. ລູກຢາກຟັງບໍ?—
ບໍ່ດົນພາຍຫຼັງທີ່ພະເຍຊູເກີດ ຊາຕານເຮັດໃຫ້ມີດາວດວງໜຶ່ງສ່ອງແສງເຫຼື້ອມແຈ້ງໃນທ້ອງຟ້າທາງທິດຕາເວັນອອກ. ຄົນກຸ່ມໜຶ່ງທີ່ເອີ້ນວ່ານັກໂຫຼາສາດເຊິ່ງສຶກສາກ່ຽວກັບດວງດາວພາກັນຕິດຕາມດາວດວງນັ້ນໄປຫຼາຍຮ້ອຍກິໂລແມັດຈົນຮອດເມືອງເຢຣຶຊາເລມ. ຢູ່ເມືອງນັ້ນ ເຂົາເຈົ້າຖາມວ່າຜູ້ທີ່ຈະມາເປັນກະສັດຂອງຊາວຢິວຈະເກີດຢູ່ໃສ. ເມື່ອເຂົາເຈົ້າຖາມຄົນທີ່ຮູ້ວ່າຄຳພີໄບເບິນບອກແນວໃດກ່ຽວກັບເລື່ອງນີ້ ຄົນເຫຼົ່ານັ້ນກໍຕອບວ່າ: “ເມືອງເບດເລເຫມ.”—ມັດທາຍ 2:1-6.
ຫຼັງຈາກທີ່ພວກໂຫຼາສາດໄປຢາມພະເຍຊູແລ້ວ ພະເຈົ້າໃຫ້ຄຳເຕືອນອັນໃດແກ່ເຂົາເຈົ້າເຊິ່ງເປັນການຊ່ວຍຊີວິດພະເຍຊູ?
ຫຼັງຈາກທີ່ເຫໂລດກະສັດຊົ່ວເຊິ່ງຢູ່ໃນເມືອງເຢຣຶຊາເລມໄດ້ຍິນເລື່ອງກະສັດອົງໃໝ່ທີ່ຫາກໍເກີດໃນເມືອງເບດເລເຫມເຊິ່ງຢູ່ໃກ້ໆນັ້ນ ລາວບອກພວກໂຫຼາສາດວ່າ: “ຈົ່ງໄປສືບຖາມດ້ວຍເດັກນ້ອຍນັ້ນແລະເມື່ອຫາໄດ້ແລ້ວຈົ່ງໃຫ້ແຈ້ງຄວາມແກ່ເຮົາ.” ລູກຮູ້ບໍວ່າເປັນຫຍັງທ່ານເຫໂລດຈຶ່ງຢາກຮູ້ວ່າພະເຍຊູຢູ່ໃສ?— ຍ້ອນວ່າເຫໂລດອິດສາແລະຢາກຂ້າພະເຍຊູ!
ພະເຈົ້າປົກປ້ອງຄຸ້ມຄອງລູກຊາຍຂອງພະອົງແນວໃດ?— ເມື່ອພວກໂຫຼາສາດພົບພະເຍຊູເຂົາເຈົ້າໄດ້ເອົາຂອງຂວັນໃຫ້ພະອົງ. ຈາກນັ້ນ ພະເຈົ້າເຕືອນພວກໂຫຼາສາດເຫຼົ່ານັ້ນໃນຄວາມຝັນວ່າຢ່າກັບໄປຫາເຫໂລດ. ດັ່ງນັ້ນ ເຂົາເຈົ້າຈຶ່ງກັບເມືອເຮືອນອີກທາງໜຶ່ງໂດຍບໍ່ໄດ້ກັບຄືນໄປເມືອງເຢຣຶຊາເລມ. ເມື່ອທ່ານເຫໂລດຮູ້ວ່າພວກໂຫຼາສາດໜີໄປແລ້ວ ລາວກໍຄຽດຮ້າຍຫຼາຍ. ດ້ວຍຄວາມພະຍາຍາມທີ່ຈະຂ້າພະເຍຊູ ເຫໂລດຈຶ່ງສັ່ງໃຫ້ຂ້າເດັກນ້ອຍຜູ້ຊາຍທຸກຄົນທີ່ອາຍຸຕ່ຳກວ່າສອງປີທີ່ຢູ່ໃນເມືອງເບດເລເຫມ! ແຕ່ໃນເວລານັ້ນພະເຍຊູບໍ່ໄດ້ຢູ່ຫັ້ນແລ້ວ.
ລູກຮູ້ບໍວ່າພະເຍຊູໜີໄປແນວໃດ?— ຫຼັງຈາກທີ່ພວກໂຫຼາສາດພາກັນກັບເມືອເຮືອນແລ້ວ ພະເຢໂຫວາກໍເຕືອນທ້າວໂຢເຊບຜົວຂອງນາງມາລີວ່າໃຫ້ລຸກຂຶ້ນແລະໜີໄປໄກຈົນຮອດປະເທດເອຢິບ. ຢູ່ທີ່ນັ້ນ ພະເຍຊູປອດໄພຈາກເຫໂລດຜູ້ຊົ່ວຮ້າຍ. ຫຼາຍປີຕໍ່ມາ ເມື່ອມາລີແລະໂຢເຊບພາພະເຍຊູກັບມາຈາກປະເທດເອຢິບ ພະເຈົ້າເຕືອນໂຢເຊບອີກຄັ້ງໜຶ່ງ. ພະອົງໄດ້ບອກໂຢເຊບໃນຄວາມຝັນວ່າໃຫ້ຍ້າຍໄປເມືອງນາຊາເລດ ເຊິ່ງເປັນບ່ອນທີ່ພະເຍຊູຈະປອດໄພ.—ມັດທາຍ 2:7-23.
ແອນ້ອຍເຍຊູລອດຊີວິດອີກເທື່ອໄດ້ແນວໃດ?
ລູກເຫັນວິທີທີ່ພະເຢໂຫວາປົກປ້ອງຄຸ້ມຄອງລູກຊາຍຂອງພະອົງບໍ?— ລູກຄິດວ່າໃຜເປັນຄືກັບລູກນົກທີ່ຖືກແມ່ຂອງມັນເຊື່ອງໄວ້ໃນຟຸ່ມໄມ້ຫຼືເປັນຄືກັບພະເຍຊູຕອນທີ່ພະອົງເປັນເດັກນ້ອຍໆ? ລູກເປັນຄືລູກນົກແລະພະເຍຊູແມ່ນບໍ?— ມີຜູ້ທີ່ຕ້ອງການທຳຮ້າຍລູກເຊັ່ນກັນ. ລູກຮູ້ບໍວ່າຜູ້ນັ້ນແມ່ນໃຜ?—
ຄຳພີໄບເບິນບອກວ່າຊາຕານເປັນຄືກັບໂຕສິງທີ່ຮ້ອງຫະນາດເຊິ່ງຕ້ອງການຈະກິນເຮົາ. ແລະເຊັ່ນດຽວກັບທີ່ໂຕສິງມັກເລືອກທຳຮ້າຍສັດຕົວນ້ອຍແບບໃດ ຊາຕານແລະພວກຜີປີສາດຂອງມັນກໍມັກເລືອກທຳຮ້າຍເດັກນ້ອຍແບບນັ້ນ. (1 ເປໂຕ 5:8) ແຕ່ພະເຢໂຫວາມີກຳລັງຫຼາຍກວ່າຊາຕານ. ພະເຢໂຫວາສາມາດປົກປ້ອງຄຸ້ມຄອງເດັກນ້ອຍແລະແກ້ໄຂສິ່ງຊົ່ວຮ້າຍໃດໆກໍຕາມທີ່ຊາຕານເຮັດໃຫ້ເກີດຂຶ້ນກັບເດັກນ້ອຍ.
ລູກຈື່ໄດ້ບໍໃນບົດທີ 10 ຂອງປຶ້ມນີ້ທີ່ບອກວ່າ ພະຍາມານແລະພວກຜີປີສາດຂອງມັນພະຍາຍາມຈະໃຫ້ເຮົາເຮັດຫຍັງ?— ແມ່ນແລ້ວ ພວກມັນພະຍາຍາມຈະໃຫ້ເຮົາມີເພດສຳພັນໃນແບບທີ່ພະເຈົ້າບອກວ່າມັນຜິດ. ແຕ່ວ່າໃຜເທົ່ານັ້ນທີ່ມີເພດສຳພັນໄດ້?— ແມ່ນແລ້ວ ຜູ້ຊາຍແລະຜູ້ຍິງທີ່ເປັນຜູ້ໃຫຍ່ເຊິ່ງໄດ້ແຕ່ງດອງກັນແລ້ວເທົ່ານັ້ນ.
ແຕ່ໜ້າເສົ້າໃຈທີ່ຜູ້ໃຫຍ່ບາງຄົນມັກມີເພດສຳພັນກັບເດັກນ້ອຍ. ເມື່ອຜູ້ໃຫຍ່ເຮັດແບບນັ້ນ ເດັກນ້ອຍຜູ້ຊາຍແລະເດັກນ້ອຍຜູ້ຍິງຫຼາຍຄົນອາດເລີ່ມເຮັດສິ່ງທີ່ຊົ່ວຮ້າຍເຊິ່ງເຂົາເຈົ້າໄດ້ຮຽນຮູ້ຈາກຜູ້ໃຫຍ່ພວກນັ້ນ. ເດັກນ້ອຍເຫຼົ່ານັ້ນຍັງເລີ່ມໃຊ້ອະໄວຍະວະເພດໃນທາງທີ່ຜິດອີກດ້ວຍ. ນັ້ນຄືສິ່ງທີ່ເກີດຂຶ້ນດົນນານມາແລ້ວໃນເມືອງຊໍດົມ. ຄຳພີໄບເບິນບອກວ່າຄົນໃນເມືອງນັ້ນ “ທັງຜູ້ແກ່ທັງຜູ້ຫນຸ່ມ” ພະຍາຍາມຈະມີເພດສຳພັນກັບຜູ້ຊາຍທີ່ມາຢາມທ່ານໂລດ.—ຕົ້ນເດີມ 19:4, 5.
ເຊັ່ນດຽວກັບທີ່ພະເຍຊູຕ້ອງໄດ້ຮັບການປົກປ້ອງຄຸ້ມຄອງແນວໃດ ລູກກໍຕ້ອງໄດ້ຮັບການປົກປ້ອງຄຸ້ມຄອງແນວນັ້ນ ທັງຈາກຜູ້ໃຫຍ່ແລະແມ່ນກະທັ່ງຈາກເດັກນ້ອຍຄົນອື່ນໆ ເຊິ່ງອາດພະຍາຍາມຈະມີເພດສຳພັນກັບລູກ. ຕາມປົກກະຕິແລ້ວ ຄົນເຫຼົ່ານີ້ຈະທຳທ່າເຮັດເປັນຫມູ່ເພື່ອນກັບລູກ. ເຂົາເຈົ້າອາດເຖິງຂັ້ນບອກວ່າຈະໃຫ້ບາງສິ່ງບາງຢ່າງແກ່ລູກ ຖ້າລູກສັນຍາວ່າຈະບໍ່ບອກຄົນອື່ນໆກ່ຽວກັບສິ່ງທີ່ເຂົາເຈົ້າຕ້ອງການເຮັດກັບລູກ. ແຕ່ຄົນເຫຼົ່ານີ້ເຫັນແກ່ຕົວຄືກັບຊາຕານແລະພວກຜີປີສາດຂອງມັນ ແລະເຂົາເຈົ້າພຽງແຕ່ຕ້ອງການຄວາມເພີດເພີນສຳລັບຕົວເອງເທົ່ານັ້ນ. ແລະເຂົາເຈົ້າພະຍາຍາມທີ່ຈະໄດ້ຄວາມເພີດເພີນນີ້ດ້ວຍການມີເພດສຳພັນກັບເດັກນ້ອຍ. ນີ້ເປັນສິ່ງທີ່ຜິດແທ້ໆ!
ລູກຮູ້ບໍວ່າເຂົາເຈົ້າອາດເຮັດຫຍັງເພື່ອເຮັດໃຫ້ຕົວເອງໄດ້ຮັບຄວາມເພີດເພີນ?— ເຂົາເຈົ້າອາດພະຍາຍາມລູບບາຍອະໄວຍະວະເພດຂອງລູກ ຫຼືເຂົາເຈົ້າອາດຈະເອົາອະໄວຍະວະເພດຂອງຕົນມາຖູກັບອະໄວຍະວະເພດຂອງລູກ. ແຕ່ລູກຕ້ອງບໍ່ຍອມໃຫ້ໃຜເຮັດແບບນັ້ນກັບອະໄວຍະວະເພດຂອງລູກເດັດຂາດ. ແມ່ນແຕ່ອ້າຍເອື້ອຍນ້ອງຫຼືພໍ່ແມ່ກໍບໍ່ໃຫ້ເຮັດ. ອະໄວຍະວະສ່ວນນີ້ເປັນສິ່ງທີ່ສະຫງວນໄວ້.
ລູກຄວນເວົ້າຫຍັງແລະເຮັດຫຍັງຖ້າມີຄົນພະຍາຍາມຈັບບາຍລູກແບບບໍ່ເໝາະສົມ?
ລູກຈະປົກປ້ອງຕົວເອງໃຫ້ພົ້ນຈາກຜູ້ທີ່ເຮັດສິ່ງຊົ່ວຮ້າຍແບບນີ້ໄດ້ແນວໃດ?— ຂໍ້ທຳອິດ ຢ່າໃຫ້ຜູ້ໃດລູບບາຍອະໄວຍະວະເພດຂອງລູກ. ຖ້າມີຄົນພະຍາຍາມເຮັດເຊັ່ນນັ້ນ ລູກຕ້ອງເວົ້າຢ່າງໜັກແໜ້ນດ້ວຍສຽງດັງວ່າ “ຢ່າເຮັດໄດ໋! ຂ້ອຍຈະບອກຄົນອື່ນວ່າເຈົ້າເຮັດແບບນີ້!” ແລະຖ້າຜູ້ນັ້ນບອກວ່າສິ່ງທີ່ເກີດຂຶ້ນເປັນຄວາມຜິດຂອງລູກ ຢ່າເຊື່ອລາວ. ນັ້ນບໍ່ແມ່ນຄວາມຈິງ. ລູກຕ້ອງບອກຄົນອື່ນບໍ່ວ່າລາວຈະເປັນຜູ້ໃດກໍຕາມ! ລູກຄວນໄປບອກຄົນອື່ນເຖິງແມ່ນລາວຈະເວົ້າວ່າສິ່ງທີ່ກຳລັງເຮັດນຳກັນນັ້ນເປັນຄວາມລັບລະຫວ່າງລູກກັບລາວເທົ່ານັ້ນ. ເຖິງແມ່ນລາວສັນຍາວ່າຈະເອົາຂອງຂວັນທີ່ງາມໆຫຼືຂົ່ມຂູ່ວ່າຈະທຳຮ້າຍລູກ ລູກຕ້ອງແລ່ນໜີຈາກລາວແລ້ວໄປບອກຄົນອື່ນ.
ລູກບໍ່ຕ້ອງຢ້ານ ແຕ່ລູກຕ້ອງລະມັດລະວັງຕົວ. ເມື່ອພໍ່ (ແມ່) ເຕືອນລູກກ່ຽວກັບຜູ້ຄົນຫຼືສະຖານທີ່ທີ່ອາດເປັນອັນຕະລາຍ ລູກຕ້ອງເຊື່ອຟັງ. ຖ້າລູກເຊື່ອຟັງ ຄົນຊົ່ວຈະບໍ່ມີໂອກາດທຳຮ້າຍລູກໄດ້.
ຂໍໃຫ້ອ່ານເລື່ອງການປົກປ້ອງຕົວເອງຈາກການປະພຶດຜິດທາງເພດ ຢູ່ພະທຳຕົ້ນເດີມ 39:7-12; ສຸພາສິດ 4:14-16; 14:15, 16; 1 ໂກລິນໂທ 6:18; ແລະ 2 ເປໂຕ 2:14.