ບົດທີ 28
ການຮັກເພດດຽວກັນຜິດແທ້ໆບໍ?
“ໃນຊ່ວງໄວລຸ້ນ ຂ້ອຍມັກຜູ້ຊາຍນຳກັນ. ຂ້ອຍພະຍາຍາມຕໍ່ສູ້ກັບຄວາມຄິດແບບນັ້ນ ເພາະເລິກໆໃນໃຈຂ້ອຍຮູ້ວ່າມັນຜິດປົກກະຕິ.”—ໂອເລບ
“ຂ້ອຍກັບແຟນທີ່ເປັນຜູ້ຍິງເຄີຍຈູບກັນເທື່ອສອງເທື່ອ. ແຕ່ໃຈຂ້ອຍກໍຍັງມັກຜູ້ຊາຍຢູ່ ຂ້ອຍເລີຍສົງໄສວ່າຂ້ອຍອາດຈະມັກທັງສອງເພດກໍໄດ້.”—ຊາຣາ
ໃນທຸກມື້ນີ້ ມີການເວົ້າເຖິງເລື່ອງຮັກເພດດຽວກັນຢ່າງເປີດເຜີຍຫຼາຍກວ່າສິບປີກ່ອນ. ແລະຖ້າເຈົ້າບອກວ່າບໍ່ເຫັນດີກັບການຮັກເພດດຽວກັນ ເຈົ້າອາດຈະຖືກເວົ້າໃຫ້! ເອມີ້ອາຍຸ 16 ປີເລົ່າວ່າ: “ຜູ້ຍິງຄົນໜຶ່ງບອກວ່າຂ້ອຍຕ້ອງມີອະຄະຕິຕໍ່ຊາດອື່ນນຳແຫຼະ ເພາະຂະໜາດຄົນຮັກເພດດຽວກັນຂ້ອຍກໍຍັງມີອະຄະຕິນຳແລ້ວ!”
ຜູ້ຄົນໃນທຸກມື້ນີ້ມັກເຮັດຕາມໃຈໂຕເອງ ໜຸ່ມສາວຫຼາຍຄົນຈຶ່ງຢາກລອງມີເພດສຳພັນກັບຄົນເພດດຽວກັນ. ເບກກີ້ອາຍຸ 15 ປີບອກວ່າ: “ຜູ້ຍິງຫຼາຍຄົນໃນໂຮງຮຽນຂອງຂ້ອຍບອກວ່າເຂົາເຈົ້າເປັນເລດສະບຽນ (lesbian) ເປັນຄົນທີ່ມັກທັງສອງເພດ ຫຼືຢາກຮູ້ຢາກເຫັນກ່ຽວກັບທັງສອງເພດ.” ຄຣິສ໌ຕ້າອາຍຸ 18 ປີກໍເຈິສະຖານະການແບບດຽວກັນຢູ່ໂຮງຮຽນ. ລາວບອກວ່າ: “ໝູ່ສອງຄົນທີ່ຮຽນຢູ່ຫ້ອງດຽວກັນຂໍໃຫ້ຂ້ອຍມີເພດສຳພັນກັບເຂົາເຈົ້າ. ຄົນໜຶ່ງຂຽນໂນດຖາມຂ້ອຍວ່າ ຢາກຮູ້ບໍວ່າການມີເພດສຳພັນກັບຜູ້ຍິງມັນເປັນຈັ່ງໃດ.”
ເມື່ອການຮັກເພດດຽວກັນຖືກຍອມຮັບຢ່າງເປີດເຜີຍ ເຈົ້າອາດເລີ່ມສົງໄສວ່າ: ‘ການຮັກເພດດຽວກັນຜິດແທ້ໆບໍ? ຖ້າຂ້ອຍຮູ້ສຶກມັກຄົນເພດດຽວກັນ ສະແດງວ່າຂ້ອຍຖືກຈັດຢູ່ໃນກຸ່ມຄົນທີ່ຮັກເພດດຽວກັນບໍ?’
ພະເຈົ້າຄິດແນວໃດຕໍ່ການຮັກເພດດຽວກັນ?
ໃນທຸກມື້ນີ້ ຫຼາຍຄົນແມ່ນແຕ່ຄູບາຫຼືຜູ້ສອນສາສະໜາບາງຄົນກໍຖືວ່າການຮັກເພດດຽວກັນບໍ່ແມ່ນເລື່ອງຜິດ. ແຕ່ຄຳພີໄບເບິນທີ່ເປັນຄຳເວົ້າຂອງພະເຈົ້າໄດ້ເວົ້າເລື່ອງນີ້ຢ່າງຈະແຈ້ງແລະບໍ່ເຮັດໃຫ້ເຮົາສັບສົນ. ຄຳພີໄບເບິນບອກວ່າ ພະເຢໂຫວາພະເຈົ້າສ້າງຜູ້ຊາຍແລະຜູ້ຍິງ ແລະເພິ່ນຢາກໃຫ້ແຕ່ຜູ້ທີ່ເປັນຜົວເມຍກັນເທົ່ານັ້ນທີ່ຈະມີເພດສຳພັນກັນໄດ້. (ປະຖົມມະການ 1:27, 28; 2:24) ດັ່ງນັ້ນ ຈຶ່ງບໍ່ແປກທີ່ຄຳພີໄບເບິນຕຳໜິພຶດຕິກຳການຮັກເພດດຽວກັນ.—ໂຣມ 1:26, 27
ບາງຄົນອາດບອກວ່າຄຳພີໄບເບິນຫຼ້າສະໄໝ. ເປັນຫຍັງເຂົາເຈົ້າຈຶ່ງເວົ້າແບບນັ້ນ? ອາດເປັນຍ້ອນສິ່ງທີ່ຄຳພີໄບເບິນບອກຂັດກັບຄວາມຄິດຂອງເຂົາເຈົ້າບໍ? ຫຼາຍຄົນບໍ່ຍອມຮັບສິ່ງທີ່ຄຳພີໄບເບິນສອນຍ້ອນມັນບໍ່ກົງກັບສິ່ງທີ່ເຂົາເຈົ້າຢາກຈະເຊື່ອ. ທີ່ຈິງ ການທີ່ເຂົາເຈົ້າຄິດວ່າຄຳພີໄບເບິນຫຼ້າສະໄໝເປັນຄວາມຄິດທີ່ຄັບແຄບແລະມີອະຄະຕິ. ເຮົາຄວນລະວັງທີ່ຈະບໍ່ມີຄວາມຄິດແບບນັ້ນ!
ແຕ່ຖ້າເຈົ້າຮູ້ສຶກມັກເພດດຽວກັນເດ ສະແດງວ່າເຈົ້າເປັນຄົນທີ່ຮັກເພດດຽວກັນບໍ? ບໍ່. ຢ່າລືມວ່າ ເຈົ້າຢູ່ໃນຊ່ວງ “ໄວໜຸ່ມສາວ” ເຊິ່ງເປັນຊ່ວງທີ່ອາລົມທາງເພດຖືກກະຕຸ້ນໄດ້ງ່າຍ. (1 ໂກຣິນໂທ 7:36) ຖ້າບາງເທື່ອເຈົ້າຮູ້ສຶກມັກເພດດຽວກັນກໍບໍ່ໄດ້ໝາຍຄວາມວ່າເຈົ້າເປັນເກຫຼືເລດສະບຽນທີ່ຮັກເພດດຽວກັນ ເພາະຄວາມຮູ້ສຶກນີ້ຈະຢູ່ໄດ້ບໍ່ດົນແລະມັນຈະຄ່ອຍໆຫາຍໄປ. ແຕ່ຕອນທີ່ເຈົ້າຍັງຮູ້ສຶກແບບນັ້ນຢູ່ ເຈົ້າກໍຕ້ອງລະວັງທີ່ຈະບໍ່ໄປຫຍຸ້ງກ່ຽວກັບພຶດຕິກຳຂອງຄົນຮັກເພດດຽວກັນ. ອັນໃດຈະຊ່ວຍເຈົ້າໄດ້?
ອະທິດຖານກ່ຽວກັບເລື່ອງນີ້. ໃຫ້ເຮັດຄືກັບດາວິດທີ່ອ້ອນວອນພະເຢໂຫວາວ່າ: “ພະເຈົ້າເອີ້ຍ ຂໍພະອົງກວດເບິ່ງຫົວໃຈຂອງລູກແລະເບິ່ງວ່າລູກເປັນຄົນແນວໃດແທ້ໆ. ຂໍພະອົງກວດເບິ່ງລູກແລະເບິ່ງວ່າລູກມີຄວາມອຸກໃຈຫຍັງແດ່. ຂໍພະອົງເບິ່ງວ່າລູກມີແນວບໍ່ດີຫຍັງບໍ່. ຂໍພະອົງພາລູກໄປໃນທາງທີ່ຈະມີຢູ່ຕະຫຼອດໄປ.” (ເພງສັນລະເສີນ 139:23, 24) ພະເຢໂຫວາສາມາດຊ່ວຍເຈົ້າໃຫ້ມີສັນຕິສຸກ “ທີ່ເກີນຄວາມເຂົ້າໃຈທຸກຢ່າງ.” ສິ່ງນີ້ຈະຊ່ວຍ ‘ປົກປ້ອງຫົວໃຈແລະຄວາມຄິດຂອງເຈົ້າ’ ແລະເຮັດໃຫ້ເຈົ້າມີ “ກຳລັງທີ່ຫຼາຍກວ່າປົກກະຕິ” ເພື່ອຈະບໍ່ເຮັດຕາມຄວາມຕ້ອງການທີ່ຜິດໆ.—ຟີລິບປອຍ 4:6, 7; 2 ໂກຣິນໂທ 4:7
ຄິດແຕ່ສິ່ງດີໆທີ່ເສີມສ້າງ. (ຟີລິບປອຍ 4:8) ອ່ານຄຳພີໄບເບິນທຸກໆມື້. ຢ່າລືມວ່າຄຳພີໄບເບິນມີພະລັງທີ່ສາມາດປັບຄວາມຄິດແລະຈິດໃຈຂອງເຈົ້າໃຫ້ດີຂຶ້ນໄດ້. (ເຮັບເຣີ 4:12) ໄວລຸ້ນຊາຍຄົນໜຶ່ງຊື່ເຈສັນບອກວ່າ: “ຄຳພີໄບເບິນມີພະລັງແລະຊ່ວຍຂ້ອຍໄດ້ຫຼາຍ. ທຸກເທື່ອທີ່ຂ້ອຍມີຄວາມຕ້ອງການຜິດໆ ຂ້ອຍຈະອ່ານຂໍ້ຄຳພີບາງຂໍ້ເຊັ່ນ 1 ໂກຣິນໂທ 6:9, 10 ແລະເອເຟໂຊ 5:3.”
ຢ່າເບິ່ງສື່ລາມົກແລະສິ່ງທີ່ສົ່ງເສີມການຮັກເພດດຽວກັນ. (ໂກໂລຊາຍ 3:5) ຫຼີກລ່ຽງທຸກສິ່ງທີ່ກະຕຸ້ນໃຫ້ຢາກເຮັດຜິດສິນລະທຳ ເຊັ່ນ: ສື່ລາມົກ ໜັງຫຼືລາຍການໂທລະທັດທີ່ກະຕຸ້ນອາລົມທາງເພດ ແລະວາລະສານທີ່ມີຮູບຂອງນາຍແບບນາງແບບທີ່ແຕ່ງໂຕໂປ້. ເມື່ອຄວາມຄິດທີ່ບໍ່ດີຜຸດຂຶ້ນມາ ໃຫ້ພະຍາຍາມຄິດແຕ່ສິ່ງດີໆ. ໄວລຸ້ນຊາຍຄົນໜຶ່ງບອກວ່າ: “ຕອນທີ່ຂ້ອຍມີຄວາມຕ້ອງການທາງເພດກັບຄົນເພດດຽວກັນ ຂ້ອຍກໍຈະຄິດຕຶກຕອງເຖິງຂໍ້ຄຳພີທີ່ຂ້ອຍມັກ.”
ບາງຄົນບອກວ່າບໍ່ຈຳເປັນຕ້ອງຝືນ ໃຫ້ຍອມຮັບສິ່ງທີ່ເຈົ້າເປັນໂລດ. ແຕ່ຄຳພີໄບເບິນບອກວ່າເຈົ້າສາມາດປ່ຽນແປງໂຕເອງໄດ້. ໃນຄຳພີໄບເບິນກໍເວົ້າເຖິງຄລິດສະຕຽນໃນສະຕະວັດທຳອິດວ່າ ບາງຄົນເຄີຍເປັນຄົນຮັກເພດດຽວກັນ ແຕ່ເຂົາເຈົ້າກໍສາມາດປ່ຽນແປງໂຕເອງໄດ້. (1 ໂກຣິນໂທ 6:9-11) ດັ່ງນັ້ນ ບໍ່ວ່າເຈົ້າຈະມີພຶດຕິກຳຮັກເພດດຽວກັນ ຫຼືພຽງແຕ່ຮູ້ສຶກມັກເພດດຽວກັນຊື່ໆ ເຈົ້າເອງກໍສາມາດເອົາຊະນະມັນໄດ້ແນ່ນອນ.
ຖ້າເຈົ້າພະຍາຍາມແລ້ວແຕ່ຍັງຮູ້ສຶກຮັກເພດດຽວກັນຢູ່ເດ ຈະເຮັດແນວໃດ? ຢ່າຍອມແພ້ ໃຫ້ສູ້ຕໍ່ໆໄປ! ພະເຢໂຫວາຕຳໜິພຶດຕິກຳຂອງຄົນທີ່ຮັກເພດດຽວກັນ. ສະນັ້ນ ຄົນທີ່ຮູ້ສຶກແບບນີ້ຕ້ອງຕັ້ງເປົ້າໝາຍທີ່ຈະເອົາຊະນະມັນໃຫ້ໄດ້. ລາວສາມາດເລືອກໄດ້ວ່າຈະບໍ່ເຮັດຕາມຄວາມຮູ້ສຶກນັ້ນ.
ຕົວຢ່າງເຊັ່ນ ຄົນໜຶ່ງອາດເປັນຄົນທີ່ “ມັກໃຈຮ້າຍແຮງ.” (ສຸພາສິດ 29:22) ແຕ່ກີ້ລາວອາດເປັນຄົນໃຈຮ້າຍງ່າຍ ແຕ່ຫຼັງຈາກສຶກສາຄຳພີໄບເບິນແລ້ວ ລາວຮູ້ວ່າລາວຕ້ອງພະຍາຍາມຄວບຄຸມໂຕເອງ. ນີ້ໝາຍຄວາມວ່າລາວຈະບໍ່ຮູ້ສຶກໃຈຮ້າຍເລີຍບໍ? ບໍ່ແມ່ນແບບນັ້ນ. ແຕ່ຍ້ອນລາວຮູ້ວ່າຄຳພີໄບເບິນເວົ້າແນວໃດກ່ຽວກັບຄວາມໃຈຮ້າຍທີ່ບໍ່ໄດ້ຄວບຄຸມ ລາວຈຶ່ງຕ້ອງອອກຄວາມພະຍາຍາມຫຼາຍທີ່ຈະບໍ່ລະເບີດອາລົມອອກມາ.
ຄ້າຍຄືກັນກັບຄົນທີ່ຮັກເພດດຽວກັນ ເຖິງເຂົາເຈົ້າຈະໄດ້ຮຽນຮູ້ແລ້ວວ່າຄຳພີໄບເບິນເວົ້າແນວໃດກ່ຽວກັບການກະທຳຂອງຄົນຮັກເພດດຽວກັນ ແຕ່ບາງເທື່ອຄວາມຕ້ອງການທີ່ຜິດໆແບບນັ້ນກໍຍັງຜຸດຂຶ້ນມາຢູ່. ຖ້າລາວເບິ່ງເລື່ອງນີ້ແບບທີ່ພະເຢໂຫວາເບິ່ງ ລາວກໍຈະພະຍາຍາມຢ່າງໜັກທີ່ຈະບໍ່ເຮັດຕາມຄວາມຕ້ອງການນັ້ນ.
ຢ່າຍອມແພ້!
ຖ້າເຈົ້າກຳລັງພະຍາຍາມເອົາຊະນະຄວາມຮູ້ສຶກມັກເພດດຽວກັນ ເຈົ້າອາດຮູ້ສຶກຄືກັບໄວລຸ້ນຊາຍຄົນໜຶ່ງທີ່ເວົ້າວ່າ: “ຂ້ອຍພະຍາຍາມບັງຄັບໂຕເອງທີ່ຈະບໍ່ຮູ້ສຶກແບບນັ້ນ. ຂ້ອຍໄດ້ອະທິດຖານຂໍໃຫ້ພະເຢໂຫວາຊ່ວຍ ອ່ານຄຳພີໄບເບິນແລະຟັງຄຳບັນລະຍາຍກ່ຽວກັບເລື່ອງນີ້ ແຕ່ກໍບໍ່ເຫັນວ່າຈະດີຂຶ້ນເລີຍ ບໍ່ຮູ້ວ່າຕ້ອງເຮັດແນວໃດຕໍ່.”
ຖ້າເຈົ້າຮູ້ສຶກຄືກັບຜູ້ຊາຍຄົນນີ້ ເຈົ້າຄືຈະຕໍ່ສູ້ຢ່າງໜັກ. ບັນຫາບໍ່ແມ່ນວ່າຈະໝົດໄປງ່າຍໆ. ທຸກຄົນທີ່ຢາກເຮັດໃຫ້ພະເຈົ້າພໍໃຈຕ້ອງເຮັດຕາມມາດຕະຖານຂອງເພິ່ນແລະເຊົາເຮັດຜິດສິນລະທຳເຖິງວ່າມັນຈະຍາກສ່ຳໃດກໍຕາມ. ຂໍໃຫ້ຈື່ໄວ້ວ່າ ພະເຈົ້າຮູ້ວ່າເຈົ້າອອກຄວາມພະຍາຍາມຫຼາຍຂະໜາດໃດແລະເພິ່ນກໍເຫັນໃຈເຈົ້າ.a (1 ໂຢຮັນ 3:19, 20) ເມື່ອເຈົ້າເຊື່ອຟັງເພິ່ນ ເພິ່ນກໍຈະອວຍພອນເຈົ້າ ແລະຄົນທີ່ເຮັດຕາມຄຳສັ່ງຂອງເພິ່ນກໍ “ຈະໄດ້ລາງວັນໃຫຍ່.” (ເພງສັນລະເສີນ 19:11) ນີ້ເປັນວິທີທີ່ດີທີ່ສຸດທີ່ຈະຊ່ວຍໃຫ້ເຈົ້າມີຄວາມສຸກໃນໂລກທີ່ຫຍຸ້ງຍາກນີ້.
ດັ່ງນັ້ນ ຂໍໃຫ້ເຈົ້າໄວ້ໃຈພະເຢໂຫວາ ແລະຕໍ່ສູ້ກັບແຮງກະຕຸ້ນທີ່ບໍ່ຖືກຕ້ອງ. (ຄາລາເຕຍ 6:9) ພະຍາຍາມ “ຊັງສິ່ງທີ່ຊົ່ວ” ແລະ “ຍຶດໝັ້ນກັບສິ່ງທີ່ດີ.” (ໂຣມ 12:9) ຖ້າເຈົ້າພະຍາຍາມຢ່າງຈິງຈັງ ອີກບໍ່ດົນຄວາມຕ້ອງການທີ່ຜິດໆຈະຄ່ອຍໆຫຼຸດໜ້ອຍລົງ. ແລະຖ້າເຈົ້າບໍ່ເຂົ້າໄປຫຍຸ້ງກ່ຽວກັບການຮັກເພດດຽວກັນ ເຈົ້າກໍຈະມີຄວາມຫວັງທີ່ຈະໄດ້ຢູ່ໃນໂລກໃໝ່ທີ່ມີແຕ່ຄວາມຖືກຕ້ອງຂອງພະເຈົ້າຕະຫຼອດໄປ.
ຈະເຮັດແນວໃດຖ້າຂ້ອຍຄິດຫາແຕ່ເພດກົງກັນຂ້າມຕະຫຼອດເວລາ?
[ຂໍ້ຄວາມໄຂເງື່ອນ]
a ຄລິດສະຕຽນທີ່ເຮັດຜິດສິນລະທຳທາງເພດຄວນຂໍຄວາມຊ່ວຍເຫຼືອຈາກຜູ້ເບິ່ງແຍງໃນປະຊາຄົມ.—ຢາໂກໂບ 5:14, 15.
ຂໍ້ຄຳພີຫຼັກ
“ຂໍພະອົງກວດເບິ່ງລູກແລະເບິ່ງວ່າລູກມີຄວາມອຸກໃຈຫຍັງແດ່. ຂໍພະອົງເບິ່ງວ່າລູກມີແນວບໍ່ດີຫຍັງບໍ່.”—ເພງສັນລະເສີນ 139:23, 24.
ຄຳແນະນຳ
ເພື່ອຈະມີທັດສະນະທີ່ຖືກຕ້ອງໃນເລື່ອງການເປັນລູກຜູ້ຊາຍໃຫ້ເບິ່ງຕົວຢ່າງຂອງພະເຢຊູ. (1 ເປໂຕ 2:21) ເພິ່ນເປັນຕົວຢ່າງທີ່ສົມບູນແບບຂອງລູກຜູ້ຊາຍທີ່ເຂັ້ມແຂງແຕ່ກໍອ່ອນໂຍນ.
ເຈົ້າຮູ້ບໍ . . . ?
ເຖິງແມ່ນວ່າເຈົ້າອາດຈະຄວບຄຸມຄວາມຕ້ອງການຂອງໂຕເອງບໍ່ໄດ້ທັງໝົດ ແຕ່ເຈົ້າຄວບຄຸມການກະທຳຂອງໂຕເອງໄດ້. ເຈົ້າສາມາດເລືອກທີ່ຈະບໍ່ເຮັດຕາມຄວາມຕ້ອງການທີ່ຜິດໆໄດ້.
ແຜນພາກປະຕິບັດ!
ຖ້າມີຄົນຖາມວ່າເປັນຫຍັງຄຳພີໄບເບິນຕຳໜິການຮັກເພດດຽວກັນ ຂ້ອຍຈະບອກວ່າ ․․․․․
ຖ້າມີຄົນບອກວ່າທັດສະນະຂອງຄຳພີໄບເບິນຄັບແຄບ ຂ້ອຍຈະຫາເຫດຜົນວ່າ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເປັນຫຍັງພະເຈົ້າບໍ່ຍອມຮັບການຮັກເພດດຽວກັນ?
● ມີຂັ້ນຕອນຫຍັງແດ່ທີ່ຈະຊ່ວຍເຈົ້າບໍ່ໃຫ້ເຂົ້າໄປຫຍຸ້ງກ່ຽວກັບການຮັກເພດດຽວກັນ?
● ການມີທັດສະນະຄືກັບພະເຈົ້າໃນເລື່ອງຮັກເພດດຽວກັນ ໝາຍຄວາມວ່າເຈົ້າຕ້ອງກຽດຊັງຄົນທີ່ຮັກເພດດຽວກັນບໍ?
[ຖ້ອຍຄຳທີ່ຍົກມາໜ້າ 236]
“ທັດສະນະທີ່ເສື່ອມຊາມຂອງໂລກເຮັດໃຫ້ຂ້ອຍສັບສົນເລື່ອງເພດ. ຕອນນີ້ຂ້ອຍພະຍາຍາມທີ່ຈະບໍ່ຫຍຸ້ງກ່ຽວກັບສິ່ງໃດກໍຕາມທີ່ສົ່ງເສີມການຮັກເພດດຽວກັນ.”—ແອນນາ
[ຮູບພາບໜ້າ 233]
ໄວລຸ້ນທຸກຄົນຕ້ອງເລືອກວ່າຈະເຮັດຕາມມາດຕະຖານດ້ານສິນລະທຳທີ່ສູງສົ່ງຂອງພະເຈົ້າ ຫຼືທັດສະນະທີ່ເສື່ອມຊາມຂອງໂລກ.