ບົດທີ 30
ຂ້ອຍຄວນຫຼິ້ນເກມເອເລັກໂຕຣນິກບໍ?
ໄບຣອັນບອກວ່າ: “ເກມຄອມພິວເຕີມັນຕື່ນເຕັ້ນແລະຄັກຫຼາຍ. ໃນເກມເຮົາສາມາດເຮັດຫຍັງກໍໄດ້ທີ່ຊີວິດຈິງເຮັດບໍ່ໄດ້ໂດຍທີ່ບໍ່ສົ່ງຜົນເສຍຫາຍຮ້າຍແຮງຫຍັງ.” ເດໂບຣາບອກວ່າລາວມັກຫຼິ້ນເກມຄອມພິວເຕີຄືກັນ ແຕ່ລາວກໍເຕືອນວ່າ: “ມັນເຮັດໃຫ້ເຮົາເສຍເວລາແລະເຮັດໃຫ້ຕິດໄດ້ງ່າຍຫຼາຍ.”
ເກມເອເລັກໂຕຣນິກບໍ່ໄດ້ເປັນພຽງຄວາມບັນເທີງທີ່ທັນສະໄໝ ແຕ່ຍັງທົດສອບຄວາມສາມາດແລະຊ່ວຍແກ້ເບື່ອໄດ້ນຳ. ເກມຍັງຊ່ວຍເຈົ້າໃຫ້ຕອບສະໜອງໄດ້ໄວຂຶ້ນ. ບາງເກມກໍຊ່ວຍໃຫ້ຄິດເລກໄດ້ໄວຫຼືອ່ານໄດ້ດີ. ນອກຈາກນັ້ນ ໝູ່ຢູ່ໂຮງຮຽນກໍມັກຈະລົມກັນເລື່ອງເກມລ່າສຸດ. ຖ້າເຈົ້າໄດ້ຫຼິ້ນເກມນັ້ນແລ້ວ ເຈົ້າກໍຈະມີເລື່ອງລົມນຳເຂົາເຈົ້າໄດ້.
ເກມທີ່ໜ້າຕື່ນເຕັ້ນແລະເໝາະກັບຄລິດສະຕຽນຍັງພໍຫາໄດ້ ແຕ່ເຈົ້າຕ້ອງເລືອກຢ່າງລະມັດລະວັງ. ຍ້ອນຫຍັງ?
ຜົນເສຍຂອງເກມ
ໜ້າເສຍດາຍ ບໍ່ແມ່ນທຸກເກມທີ່ຈະຫຼິ້ນໄດ້ໂດຍບໍ່ມີພິດບໍ່ມີໄພຫຍັງ. ເກມສ່ວນໃຫຍ່ໃນທຸກມື້ນີ້ອອກແບບມາເພື່ອສົ່ງເສີມສິ່ງທີ່ຄຳພີໄບເບິນເອີ້ນວ່າ “ຄວາມຕ້ອງການຂອງຄົນ” ເຊິ່ງກໍຄືການປະພຶດທີ່ບໍ່ສະອາດທີ່ພະເຈົ້າຕຳໜິ.—ຄາລາເຕຍ 5:19-21
ເອດຣຽນອາຍຸ 18 ປີເວົ້າເຖິງເກມໜຶ່ງທີ່ນິຍົມກັນຫຼາຍວ່າເກມນັ້ນມີແຕ່ເລື່ອງ “ຄວາມຮຸນແຮງ ການຍົກແກ໊ງຕີກັນ ການໃຊ້ຢາເສບຕິດ ເລືອດອາບໂຕ ຄຳເວົ້າທີ່ຫຍາບຄາຍ ແລະເວົ້າເລື່ອງເພດຢ່າງໂຈ່ງແຈ້ງ.” ບາງເກມສົ່ງເສີມໃຫ້ໃຊ້ເວດມົນຄາຖາ ແລະແຕ່ລະເກມທີ່ອອກມາໃໝ່ກໍມັກຈະມີເລື່ອງເຫຼົ່ານີ້ຫຼາຍຂຶ້ນກວ່າເກົ່າ. ສ່ວນຫຼາຍແລ້ວ ເກມທີ່ໃຊ້ຄວາມຮຸນແຮງສາມາດຫຼິ້ນໄດ້ກັບຄົນອື່ນໆທາງອອນລາຍ ນີ້ແຮ່ງເຮັດໃຫ້ຮູ້ສຶກທ້າທາຍແລະໜ້າສົນໃຈ. ເຈມສ໌ອາຍຸ 19 ປີ ບອກວ່າ: “ເຈົ້າສາມາດຫຼິ້ນເກມຈາກຄອມພິວເຕີຢູ່ເຮືອນກັບຄົນທີ່ຢູ່ອີກຝາກໜຶ່ງຂອງໂລກໄດ້.”
ເກມອອນລາຍກຳລັງເປັນທີ່ນິຍົມຫຼາຍ. ໃນເກມນັ້ນ ຜູ້ຫຼິ້ນແຕ່ລະຄົນສາມາດສ້າງໂຕລະຄອນຂອງໂຕເອງຂຶ້ນມາໄດ້ເຊິ່ງອາດຈະເປັນຄົນ ສັດ ຫຼືເຄິ່ງຄົນເຄິ່ງສັດ ແລະຈະມີໂຕລະຄອນແບບນີ້ເປັນພັນໆໂຕ. ໃນໂລກອອນລາຍຈະມີເຮືອນ ລົດ ເທັກບາ ຮ້ານໂສເພນີ ແລະອື່ນໆຄືກັບຢູ່ໃນໂລກຂອງຄວາມເປັນຈິງ. ຕອນທີ່ຫຼິ້ນເກມຢູ່ ຜູ້ຫຼິ້ນກໍສາມາດສົ່ງຂໍ້ຄວາມລົມກັບຄົນອື່ນໄດ້ຜ່ານທາງໂຕລະຄອນທີ່ເອີ້ນວ່າອາວາຕາ.
ໃນເກມອອນລາຍ ຜູ້ຫຼິ້ນສາມາດເລືອກເປັນໂຕລະຄອນທີ່ບໍ່ດີໄດ້ນຳເຊັ່ນ ມາເຟຍ ໂສເພນີ ຜູ້ຊາຍທີ່ຫາກິນນຳໂສເພນີ ນັກຂູດຮີດ ນັກປອມແປງ ຫຼືມືສັງຫານ. ຜູ້ຫຼິ້ນເກມອາດເຮັດສິ່ງຕ່າງໆທີ່ລາວຈະບໍ່ມີທາງເຮັດໃນຊີວິດປະຈຳວັນ. ພຽງແຕ່ກົດບໍ່ເທົ່າໃດປຸ່ມ ໂຕລະຄອນກໍສາມາດມີເຊັກກັນໄດ້ໃນຂະນະທີ່ຜູ້ຫຼິ້ນພິມຂໍ້ຄວາມລົມກັນເລື່ອງເຊັກ. ບາງເກມຜູ້ຫຼິ້ນຈະໃຫ້ໂຕລະຄອນຂອງລາວມີເຊັກກັບໂຕລະຄອນທີ່ເປັນເດັກນ້ອຍ. ຫຼາຍຄົນຈຶ່ງອອກມາທ້ວງວ່າເປັນຫຍັງຈຶ່ງມີການສ້າງເກມທີ່ໂຫດຮ້າຍຂະໜາດນີ້.
ເປັນຫຍັງຈຶ່ງຕ້ອງເລືອກ?
ຄົນທີ່ຫຼິ້ນເກມກ່ຽວກັບຄວາມຮຸນແຮງຫຼືເກມທີ່ມີເລື່ອງເພດຢ່າງໂຈ່ງແຈ້ງອາດເວົ້າວ່າ: “ມັນບໍ່ເປັນຫຍັງດອກ ເພາະມັນເປັນເກມຊື່ໆບໍ່ແມ່ນເລື່ອງແທ້.” ແຕ່ຢ່າຕົວະໂຕເອງໂດຍການຫາເຫດຜົນຜິດໆແບບນີ້!
ຄຳພີໄບເບິນບອກວ່າ: “ການກະທຳຂອງເດັກນ້ອຍເຮັດໃຫ້ຄົນອື່ນຮູ້ໄດ້ວ່າ ລາວເປັນຄົນທີ່ບໍລິສຸດແລະສັດຊື່ຫຼືບໍ່.” (ສຸພາສິດ 20:11) ຖ້າເຈົ້າຫຼິ້ນເກມທີ່ຮຸນແຮງຫຼືຜິດສິນລະທຳ ເຈົ້າຍັງຈະເປັນຄົນດີແລະມີຈິດໃຈບໍລິສຸດຢູ່ບໍ? ຈາກການວິໄຈພົບວ່າການເບິ່ງຄວາມບັນເທີງທີ່ຮຸນແຮງເຮັດໃຫ້ກາຍເປັນຄົນໃຈຮ້ອນແລະຮຸນແຮງຫຼາຍຂຶ້ນ. ຜູ້ຊ່ຽວຊານບາງຄົນບອກວ່າເກມເອເລັກໂຕຣນິກອອກແບບມາເພື່ອໃຫ້ຜູ້ຫຼິ້ນມີສ່ວນຮ່ວມນຳ ມັນຈຶ່ງເຮັດໃຫ້ມີຜົນເສຍຫຼາຍກວ່າການເບິ່ງໂທລະທັດ.
ການຫຼິ້ນເກມທີ່ຮຸນແຮງຫຼືເກມທີ່ຜິດສິນລະທຳເປັນຄືກັບການຫຼິ້ນສິ່ງເສດເຫຼືອຂອງກຳມັນຕະພາບລັງສີ. ມັນອາດຈະບໍ່ໄດ້ສົ່ງຜົນເສຍທັນທີ ແຕ່ມັນຈະມີຜົນເສຍແນ່ນອນ. ຜົນເສຍນັ້ນແມ່ນຫຍັງ? ການຮັບເອົາລັງສີໃນປະລິມານຫຼາຍຈະທຳລາຍເນື້ອເຍື່ອໃນກະເພາະອາຫານເຮັດໃຫ້ເຊື້ອແບັກທີເຣຍທີ່ຢູ່ໃນລຳໄສ້ບຸກເຂົ້າສູ່ກະແສເລືອດແລະເຮັດໃຫ້ເຮົາປ່ວຍໄດ້. ຄ້າຍກັນ ການຫຼິ້ນເກມທີ່ຮຸນແຮງຫຼືເກມທີ່ມີເລື່ອງເພດຢ່າງໂຈ່ງແຈ້ງຈະເຮັດໃຫ້ຄົນເຮົາ “ບໍ່ຮູ້ສຶກອາຍຕໍ່ບາບ” ແລະຍອມໃຫ້ຄວາມຕ້ອງການຂອງຮ່າງກາຍຄອບງຳຄວາມຄິດແລະການກະທຳ.—ເອເຟໂຊ 4:19; ຄາລາເຕຍ 6:7, 8
ຂ້ອຍຄວນເລືອກເກມແບບໃດ?
ຖ້າພໍ່ແມ່ຍອມໃຫ້ເຈົ້າຫຼິ້ນເກມເອເລັກໂຕຣນິກ ເຈົ້າຈະຮູ້ໄດ້ແນວໃດວ່າຄວນເລືອກເກມແບບໃດແລະໃຊ້ເວລາຫຼິ້ນຫຼາຍສ່ຳໃດ? ໃຫ້ລອງມາພິຈາລະນາຄຳຖາມຕໍ່ໄປນີ້:
ຖ້າຂ້ອຍເລືອກເກມແບບນີ້ພະເຢໂຫວາຈະຮູ້ສຶກແນວໃດ? ເພງສັນລະເສີນ 11:5 ບອກວ່າ: “ພະເຢໂຫວາກວດເບິ່ງທັງຄົນດີແລະຄົນຊົ່ວ. ເພິ່ນຊັງຄົນທີ່ມັກຄວາມຮຸນແຮງ.” ສຳລັບຄົນທີ່ກ່ຽວຂ້ອງກັບເວດມົນຄາຖາ ຄຳພີໄບເບິນບອກວ່າ: “ພະເຢໂຫວາຂີ້ດຽດຄົນທີ່ເຮັດສິ່ງເຫຼົ່ານີ້.” (ພະບັນຍັດ 18:10-12) ຖ້າເຈົ້າຢາກເປັນໝູ່ກັບພະເຈົ້າ ເຈົ້າຕ້ອງເຮັດຕາມຄຳແນະນຳໃນເພງສັນລະເສີນ 97:10 ທີ່ບອກວ່າ: “ຂໍໃຫ້ຊັງສິ່ງຊົ່ວ.”
ເກມນີ້ຈະມີຜົນແນວໃດຕໍ່ຄວາມຄິດຂອງຂ້ອຍ? ລອງຖາມໂຕເອງວ່າ: ‘ຖ້າຂ້ອຍຫຼິ້ນເກມນີ້ ຂ້ອຍຈະ “ໜີໄກໆຈາກການເຮັດຜິດສິນລະທຳທາງເພດ” ໄດ້ງ່າຍຂຶ້ນບໍຫຼືຍາກຂຶ້ນ?’ (1 ໂກຣິນໂທ 6:18) ເກມທີ່ມີຮູບພາບຫຼືການສົນທະນາທີ່ກະຕຸ້ນອາລົມທາງເພດຄືຊິບໍ່ໄດ້ຊ່ວຍເຈົ້າໃຫ້ຄິດເຖິງສິ່ງທີ່ຖືກຕ້ອງ ບໍລິສຸດແລະດີ.—ຟີລິບປອຍ 4:8
ຂ້ອຍຈະໃຊ້ເວລາຫຼິ້ນເກມຫຼາຍສ່ຳໃດ? ການຫຼິ້ນເກມຕ້ອງໃຊ້ເວລາເຖິງຈະເປັນເກມທີ່ດີກໍຕາມ. ດັ່ງນັ້ນ ໃຫ້ບັນທຶກໄວ້ວ່າເຈົ້າໃຊ້ເວລາຫຼິ້ນເກມຫຼາຍສ່ຳໃດ. ການຫຼິ້ນເກມເຮັດໃຫ້ເຈົ້າບໍ່ມີເວລາເຮັດສິ່ງທີ່ສຳຄັນກວ່າບໍ? ໃຫ້ກວດເບິ່ງເປັນໄລຍະໆວ່າເຈົ້າໃຊ້ເວລາໄປກັບຫຍັງແດ່ເພື່ອຈະຊ່ວຍເຈົ້າໃຫ້ເຮັດສິ່ງທີ່ສຳຄັນກວ່າ.—ເອເຟໂຊ 5:16
ຄຳພີໄບເບິນບໍ່ໄດ້ບອກວ່າຊີວິດເຈົ້າຕ້ອງມີແຕ່ຮຽນ ຫຼືບໍ່ກໍເຮັດວຽກ. ແຕ່ຍັງບອກໃຫ້ເຮົາມີ “ເວລາຫົວ . . . ແລະເວລາເຕັ້ນລຳ.” (ປັນຍາຈານ 3:4) ຂໍສັງເກດວ່າຄຳພີໄບເບິນໃຊ້ຄຳວ່າ “ເຕັ້ນລຳ” ສະແດງວ່າບໍ່ແມ່ນແຕ່ການນັ່ງຫຼິ້ນຊື່ໆ ແຕ່ຕ້ອງມີການເຄື່ອນໄຫວຮ່າງກາຍນຳ. ເຈົ້າໜ້າຈະໃຊ້ເວລາວ່າງເຮັດກິດຈະກຳແບບນັ້ນແທນທີ່ຈະນັ່ງແຕ່ຢູ່ຈໍ.
ເລືອກຢ່າງສະຫຼາດ
ແນ່ນອນວ່າ ການຫຼິ້ນເກມຈະເຮັດໃຫ້ມ່ວນໂດຍສະເພາະຖ້າເຈົ້າຫຼິ້ນເກັ່ງ. ນີ້ຈຶ່ງເປັນເຫດຜົນທີ່ເຈົ້າຕ້ອງເລືອກເກມທີ່ເຈົ້າຈະຫຼິ້ນຢ່າງສະຫຼາດ. ລອງຄິດເບິ່ງວ່າ ‘ຕອນຢູ່ໂຮງຮຽນ ເຈົ້າຮຽນວິຊາໃດເກັ່ງທີ່ສຸດ?’ ຄືຊິແມ່ນວິຊາທີ່ເຈົ້າມັກແມ່ນບໍ? ທີ່ຈິງຖ້າເຈົ້າມັກວິຊາໃດ ເຈົ້າກໍຈະຈື່ວິຊານັ້ນໄດ້ດີ. ຕອນນີ້ໃຫ້ຖາມໂຕເອງວ່າ: ‘ຂ້ອຍມັກເກມຫຍັງຫຼາຍທີ່ສຸດ? ເກມນີ້ສອນຫຍັງຂ້ອຍແດ່?’
ແທນທີ່ຈະເລືອກເກມຕາມໝູ່ ໃຫ້ກ້າເລືອກແຕກຕ່າງຈາກເຂົາເຈົ້າ. ທີ່ສຳຄັນທີ່ສຸດແມ່ນໃຫ້ເຮັດຕາມຄຳແນະນຳໃນຄຳພີໄບເບິນທີ່ວ່າ: “ໃຫ້ກວດເບິ່ງຢູ່ສະເໝີວ່າສິ່ງທີ່ພວກເຈົ້າເຮັດເປັນສິ່ງທີ່ຜູ້ເປັນນາຍພໍໃຈຫຼືບໍ່.”—ເອເຟໂຊ 5:10
ການຮັກດົນຕີເປັນເລື່ອງທຳມະດາ. ແຕ່ມັນຄອບງຳເຈົ້າບໍ?
ຂໍ້ຄຳພີຫຼັກ
“ພວກເຈົ້າຜູ້ທີ່ຮັກພະເຢໂຫວາເອີ້ຍ ຂໍໃຫ້ຊັງສິ່ງຊົ່ວ.”—ເພງສັນລະເສີນ 97:10
ຄຳແນະນຳ
ໃຫ້ຂຽນສັ້ນໆວ່າເກມທີ່ເຈົ້າຫຼິ້ນເປັນເກມແບບໃດ. ເປົ້າໝາຍຂອງເກມນີ້ແມ່ນຫຍັງແລະຕ້ອງເຮັດແນວໃດຈຶ່ງຈະຊະນະ. ໃຫ້ປຽບທຽບສິ່ງທີ່ເຈົ້າຂຽນກັບຫຼັກການໃນຄຳພີໄບເບິນທີ່ເວົ້າເຖິງໃນບົດນີ້ ແລ້ວຄິດເບິ່ງວ່າເຈົ້າຄວນຫຼິ້ນເກມນັ້ນບໍ.
ເຈົ້າຮູ້ບໍ . . . ?
ໃນປີ 2006 ມີການເປີດສູນບຳບັດຄົນຕິດເກມອອນລາຍບ່ອນທຳອິດຂອງໂລກໃນເມືອງອຳສະເຕີດຳ ປະເທດເນເທີແລນ.
ແຜນພາກປະຕິບັດ!
ຖ້າໝູ່ຊວນຂ້ອຍໃຫ້ຫຼິ້ນເກມທີ່ໃຊ້ຄວາມຮຸນແຮງຫຼືເກມທີ່ຜິດສິນລະທຳ ຂ້ອຍຈະເວົ້າວ່າ ․․․․․
ຂ້ອຍຈະຫຼິ້ນເກມອາທິດລະ ․․․․․ ຊົ່ວໂມງ ແລະຂ້ອຍຈະເຮັດແບບນີ້ໄດ້ຖ້າຂ້ອຍ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເກມມີຜົນຕໍ່ຄວາມຄິດແລະອາລົມຂອງຜູ້ຫຼິ້ນແນວໃດ?
● ເປັນຫຍັງຕ້ອງຄິດເຖິງມາດຕະຖານຂອງພະເຢໂຫວາຕອນທີ່ເລືອກເກມ?
● ຖ້ານ້ອງຂອງເຈົ້າຕິດເກມທີ່ບໍ່ດີ ເຈົ້າຈະຊ່ວຍນ້ອງແນວໃດ?
[ຖ້ອຍຄຳທີ່ຍົກມາໜ້າ 249]
“ເກມສ່ວນໃຫຍ່ເຮັດໃຫ້ຄວາມຮູ້ສຶກຂອງເຈົ້າຕາຍດ້ານຈາກສິ່ງທີ່ບໍ່ດີເຊັ່ນ ການໃຊ້ຄວາມຮຸນແຮງ ຄຳເວົ້າທີ່ຫຍາບຄາຍແລະການເຮັດຜິດສິນລະທຳ ເຊິ່ງຈະເຮັດໃຫ້ເຈົ້າເຮັດຜິດໄດ້ງ່າຍຂຶ້ນ. ດັ່ງນັ້ນ ເຈົ້າຄວນເລືອກເກມດີໆ.”—ເອມີ້
[ຮູບພາບໜ້າ 250]
ການຫຼິ້ນເກມທີ່ຮຸນແຮງຫຼືເກມທີ່ຜິດສິນລະທຳເປັນຄືກັບການຫຼິ້ນສິ່ງເສດເຫຼືອຂອງກຳມັນຕະພາບລັງສີ. ມັນອາດຈະບໍ່ໄດ້ສົ່ງຜົນເສຍທັນທີ ແຕ່ມັນຈະມີຜົນເສຍແນ່ນອນ.