ບົດທີ 22
ມີການເຮັດວຽກຫຍັງແດ່ຢູ່ສຳນັກງານສາຂາ?
ໝູ່ເກາະໂຊໂລມົງ
ການາດາ
ອາຝຼິກກາໃຕ້
ສະມາຊິກຄອບຄົວເບເທນເຮັດວຽກໃນຫຼາຍພະແນກທີ່ແຕກຕ່າງກັນເພື່ອເບິ່ງແຍງວຽກງານການປະກາດຂອງໜຶ່ງຫຼືຫຼາຍປະເທດ. ເຂົາເຈົ້າອາດເຮັດວຽກຢູ່ກຸ່ມການແປ ພິມວາລະສານ ຫຍິບປົກປຶ້ມ ຢູ່ສາງເກັບປຶ້ມ ເຮັດການບັນທຶກສຽງ/ພາບ ຫຼືເບິ່ງແຍງເລື່ອງອື່ນ ໆ ໃນຂົງເຂດທີ່ຮັບຜິດຊອບ.
ຄະນະກຳມະການສາຂາເບິ່ງແຍງວຽກງານຂອງສາຂາ. ຄະນະກຳມະການປົກຄອງມອບໝາຍການດຳເນີນງານຂອງແຕ່ລະສຳນັກງານສາຂາໃຫ້ກັບຄະນະກຳມະການສາຂາເຊິ່ງປະກອບດ້ວຍຜູ້ເຖົ້າແກ່ສາມຄົນຫຼືຫຼາຍກວ່ານັ້ນທີ່ມີຄຸນສົມບັດພຽງພໍ. ຄະນະກຳມະການສາຂາລາຍງານໃຫ້ຄະນະກຳມະການປົກຄອງກ່ຽວກັບຄວາມກ້າວໜ້າຂອງວຽກງານໃນແຕ່ລະດິນແດນເຊິ່ງຢູ່ໃນຂອບເຂດອຳນາດຂອງຄະນະກຳມະການສາຂາຫຼືກ່ຽວກັບບັນຫາໃດ ໆ ກໍຕາມທີ່ອາດເກີດຂຶ້ນ. ການລາຍງານເຊັ່ນນັ້ນຊ່ວຍຄະນະກຳມະການປົກຄອງໃຫ້ຕັດສິນໃຈວ່າຫົວເລື່ອງໃດທີ່ຄວນຈະມີການພິຈາລະນາໃນວາລະສານທີ່ຈະພິມອອກໃນວັນຂ້າງໜ້າ ແລະຢູ່ການປະຊຸມປະຈຳອາທິດແລະການປະຊຸມໃຫຍ່. ຕົວແທນຂອງຄະນະກຳມະການປົກຄອງຈະຖືກສົ່ງອອກໄປເປັນປະຈຳເພື່ອຢ້ຽມຢາມສຳນັກງານສາຂາຕ່າງ ໆ ແລະໃຫ້ການຊີ້ນຳຕໍ່ຄະນະກຳມະການສາຂາໃນການຮັບມືກັບວຽກມອບໝາຍຂອງເຂົາເຈົ້າ. (ສຸພາສິດ 11:14) ມີການຈັດກຽມລາຍການພິເສດເຊິ່ງລວມເຖິງຄຳບັນລະຍາຍໂດຍຕັວແທນຈາກສຳນັກງານໃຫຍ່ເພື່ອໜູນກຳລັງໃຈຜູ້ທີ່ຢູ່ໃນເຂດແດນທີ່ສາຂາຮັບຜິດຊອບ.
ໃຫ້ຄວາມຊ່ວຍເຫຼືອຕໍ່ປະຊາຄົມທ້ອງຖິ່ນ. ຄະນະກຳມະການສາຂາທີ່ຢູ່ສຳນັກງານສາຂາອະນຸມັດການກໍ່ຕັ້ງປະຊາຄົມໃໝ່. ຄະນະກຳມະການສາຂາຍັງຊີ້ນຳວຽກງານຂອງໄພໂອເນຍ ມິຊັນນາລີ ແລະຜູ້ດູແລໝວດທີ່ຮັບໃຊ້ຢູ່ໃນດິນແດນທີ່ສາຂາຮັບຜິດຊອບ. ຄະນະກຳມະການສາຂາຈັດຕັ້ງວຽກງານຕ່າງ ໆ ກ່ຽວກັບການປະຊຸມໝວດແລະການປະຊຸມພາກ ປະສານງານການກໍ່ສ້າງຫໍປະຊຸມໃໝ່ ແລະກວດເບິ່ງວ່າມີການສົ່ງປຶ້ມໄປໃຫ້ປະຊາຄົມຕ່າງ ໆ ເພື່ອຕອບສະໜອງຄວາມຈຳເປັນຂອງປະຊາຄົມເຫຼົ່ານັ້ນ. ວຽກງານທຸກຢ່າງທີ່ເຮັດຢູ່ສຳນັກງານສາຂາປະກອບສ່ວນເຮັດໃຫ້ວຽກງານການປະກາດປະສົບຄວາມສຳເລັດຢ່າງເປັນຂັ້ນເປັນຕອນ.—1 ໂກລິນໂທ 14:33, 40
ຄະນະກຳມະການສາຂາຊ່ວຍຄະນະກຳມະການປົກຄອງແນວໃດ?
ສຳນັກງານສາຂາເບິ່ງແຍງຄວາມຮັບຜິດຊອບອັນໃດແດ່?