ບົດທີ 25
ເຕັ້ນສັກສິດສຳລັບນະມັດສະການພະເຈົ້າ
ຕອນທີ່ໂມເຊຢູ່ເທິງພູຊີນາຍ ພະເຢໂຫວາບອກລາວໃຫ້ສ້າງເຕັ້ນພິເສດເຕັ້ນໜຶ່ງທີ່ເອີ້ນວ່າ ເຕັ້ນສັກສິດ ເພື່ອໃຫ້ພວກອິດສະຣາເອນໃຊ້ເປັນບ່ອນນະມັດສະການເພິ່ນ. ເມື່ອເຂົາເຈົ້າຍ້າຍຄ້າຍພັກ ເຂົາເຈົ້າກໍຈະສາມາດຂົນເຕັ້ນສັກສິດນີ້ໄປນຳໄດ້.
ພະເຢໂຫວາບອກໂມເຊວ່າ: ‘ໄປບອກພວກອິດສະຣາເອນວ່າຖ້າໃຜຢາກຊ່ວຍສ້າງເຕັ້ນສັກສິດກໍໃຫ້ເອົາເຄື່ອງມາບໍລິຈາກເທົ່າທີ່ໃຫ້ໄດ້.’ ແລ້ວພວກອິດສະຣາເອນກໍເອົາຄຳ ເງິນ ທອງແດງ ເພັດນິນຈິນດາ ເຄື່ອງປະດັບ ດ້າຍຂົນແກະ ຜ້າລີນິນ ໜັງສັດ ແລະເຄື່ອງຂອງອື່ນໆມາບໍລິຈາກຫຼາຍແທ້ຫຼາຍວ່າ ຈົນໂມເຊບອກເຂົາເຈົ້າວ່າ: ‘ພວກເຮົາມີເຄື່ອງຂອງຫຼາຍພໍແລ້ວ! ບໍ່ຕ້ອງເອົາຫຍັງມາອີກ.’
ມີຊ່າງທີ່ມີສີມືຫຼາຍຄົນທັງຜູ້ຊາຍແລະຜູ້ຍິງມາຊ່ວຍກັນສ້າງເຕັ້ນສັກສິດ. ພະເຢໂຫວາໃຫ້ເຂົາເຈົ້າມີສະຕິປັນຍາແລະຄວາມຮູ້ຄວາມເຂົ້າໃຈໃນການເຮັດວຽກ. ບາງຄົນປັ່ນດ້າຍ ບາງຄົນຕ່ຳຜ້າຫຼືແສ່ວຜ້າ ສ່ວນບາງຄົນກໍເຮັດວຽກເຈຍລະໄນເພັດພອຍ ວຽກກ່ຽວກັບຄຳ ຫຼືແກະສະຫຼັກໄມ້.
ເຂົາເຈົ້າສ້າງເຕັ້ນສັກສິດຕາມແບບທີ່ພະເຢໂຫວາບອກ. ເຂົາເຈົ້າເຮັດຜ້າກັ້ງທີ່ງາມໆຜືນໜຶ່ງເພື່ອແບ່ງເຕັ້ນສັກສິດອອກເປັນ 2 ຫ້ອງຄື: ຫ້ອງບໍລິສຸດແລະຫ້ອງບໍລິສຸດທີ່ສຸດ. ໃນຫ້ອງບໍລິສຸດທີ່ສຸດມີຫີບສັນຍາທີ່ເຮັດຈາກໄມ້ອະຄາເຊຍແລະຄຳ. ສ່ວນໃນຫ້ອງບໍລິສຸດມີຂາຕະກຽງຄຳ ໂຕະ 1 ໜ່ວຍ ແລະແທ່ນເຜົາເຄື່ອງຫອມ. ຢູ່ເດີ່ນເຕັ້ນສັກສິດມີອ່າງທອງແດງແລະແທ່ນບູຊາໃຫຍ່. ຫີບສັນຍາໃນຫ້ອງບໍລິສຸດທີ່ສຸດຈະເຕືອນໃຈພວກອິດສະຣາເອນວ່າເຂົາເຈົ້າໄດ້ສັນຍາກັບພະເຢໂຫວາວ່າຈະເຊື່ອຟັງເພິ່ນ.
ພະເຢໂຫວາເລືອກອາໂຣນແລະລູກຊາຍຂອງລາວໃຫ້ເປັນປະໂລຫິດເຮັດວຽກຢູ່ເຕັ້ນສັກສິດ. ເຂົາເຈົ້າຕ້ອງເບິ່ງແຍງເຕັ້ນສັກສິດແລະເຜົາເຄື່ອງບູຊາໃຫ້ພະເຢໂຫວາ. ມີແຕ່ອາໂຣນຜູ້ດຽວເທົ່ານັ້ນທີ່ສາມາດເຂົ້າໄປໃນຫ້ອງບໍລິສຸດທີ່ສຸດໄດ້ຍ້ອນລາວເປັນປະໂລຫິດໃຫຍ່. ລາວຈະເຂົ້າໄປມອບເຄື່ອງບູຊາໃຫ້ພະເຢໂຫວາປີລະເທື່ອ ເພື່ອໄຖ່ບາບຂອງໂຕເອງ ຂອງຄອບຄົວ ແລະຂອງຄົນອິດສະຣາເອນທັງໝົດ.
ພວກອິດສະຣາເອນສ້າງເຕັ້ນສັກສິດແລ້ວຫຼັງຈາກທີ່ເຂົາເຈົ້າອອກມາຈາກເອຢິບໄດ້ 1 ປີ. ຕອນນີ້ ເຂົາເຈົ້າມີບ່ອນນະມັດສະການພະເຢໂຫວາແລ້ວ.
ແສງລັດສະໝີຂອງພະເຢໂຫວາແຜ່ກະຈາຍຢູ່ທົ່ວເຕັ້ນສັກສິດແລະມີຂີ້ເຝື້ອລອຍຢູ່ເທິງເຕັ້ນ. ຖ້າຂີ້ເຝື້ອຍັງລອຍຢູ່ເທິງເຕັ້ນສັກສິດ ພວກອິດສະຣາເອນກໍຈະບໍ່ຍ້າຍຄ້າຍພັກໄປໃສ. ແຕ່ຖ້າຂີ້ເຝື້ອລອຍຂຶ້ນໄປຈາກເຕັ້ນສັກສິດ ເຂົາເຈົ້າກໍຈະຮູ້ວ່າຮອດເວລາອອກເດີນທາງແລ້ວ. ເຂົາເຈົ້າຈະກູ້ເຕັ້ນສັກສິດແລະນຳຂີ້ເຝື້ອນັ້ນໄປ.
“ແລ້ວຂ້ອຍໄດ້ຍິນສຽງດັງມາຈາກບັນລັງນັ້ນວ່າ: ‘ເບິ່ງແມ້! ເຕັ້ນຂອງພະເຈົ້າຢູ່ກັບມະນຸດແລ້ວ. ເພິ່ນຈະຢູ່ກັບເຂົາເຈົ້າ ແລະເຂົາເຈົ້າຈະເປັນປະຊາຊົນຂອງເພິ່ນ. ພະເຈົ້າຈະຢູ່ກັບເຂົາເຈົ້າ.’”—ພະນິມິດ 21:3