ບົດທີ 28
ໂຕລາຂອງບາລາອາມເວົ້າໄດ້
ພວກອິດສະຣາເອນອາໄສຢູ່ບ່ອນກັນດານເກືອບ 40 ປີແລ້ວ. ເຂົາເຈົ້າຕໍ່ສູ້ຊະນະເມືອງທີ່ເຂັ້ມແຂງຫຼາຍເມືອງ. ຕອນນີ້ ເຂົາເຈົ້າຕັ້ງຄ້າຍພັກຢູ່ທົ່ງພຽງໂມອາບທີ່ຢູ່ທາງທິດຕາເວັນອອກຂອງແມ່ນ້ຳຈໍແດນ ແລະກໍຮອດເວລາແລ້ວທີ່ເຂົາເຈົ້າຈະໄດ້ເຂົ້າໄປໃນແຜ່ນດິນທີ່ພະເຈົ້າສັນຍາ. ບາລາກກະສັດຂອງໂມອາບຢ້ານວ່າຈະເສຍແຜ່ນດິນໃຫ້ພວກອິດສະຣາເອນ ລາວຈຶ່ງເອີ້ນຜູ້ຊາຍຄົນໜຶ່ງຊື່ບາລາອາມໃຫ້ມາໂມອາບເພື່ອສາບແຊ່ງພວກອິດສະຣາເອນ.
ແຕ່ພະເຢໂຫວາບອກບາລາອາມວ່າ: ‘ຫ້າມເຈົ້າສາບແຊ່ງພວກອິດສະຣາເອນ.’ ບາລາອາມຈຶ່ງບໍ່ໄປ. ກະສັດບາລາກເອີ້ນລາວໄປຫາເປັນເທື່ອທີສອງແລະສັນຍາວ່າຈະໃຫ້ທຸກສິ່ງທຸກຢ່າງຕາມທີ່ລາວຕ້ອງການ ແຕ່ບາລາອາມກໍບໍ່ຍອມໄປ. ແລ້ວພະເຈົ້າກໍບອກລາວວ່າ: ‘ເຈົ້າຈະໄປໂມອາບກະໄດ້ ແຕ່ເຈົ້າຕ້ອງເວົ້າສິ່ງທີ່ເຮົາບອກເຈົ້າເທົ່ານັ້ນ.’
ບາລາອາມກໍຂີ່ລາລົງໃຕ້ເພື່ອໄປແຜ່ນດິນໂມອາບ. ລາວວາງແຜນຈະສາບແຊ່ງພວກອິດສະຣາເອນທັງໆທີ່ພະເຢໂຫວາຫ້າມບໍ່ໃຫ້ເຮັດ. ທູດສະຫວັນຂອງພະເຢໂຫວາຈຶ່ງມາຢືນລັດທາງລາວ 3 ເທື່ອ. ບາລາອາມເບິ່ງບໍ່ເຫັນທູດສະຫວັນ ແຕ່ໂຕລາເຫັນ. ທຳອິດໂຕລາຍ່າງຫຼີກທູດສະຫວັນຢູ່ຫົນທາງອອກໄປທາງທົ່ງນາ. ເທື່ອທີສອງ ໂຕລາຍ່າງບຽດກຳແພງຈົນຕີນຂອງບາລາອາມເຖືອໃສ່ກຳແພງ ແລະເທື່ອສຸດທ້າຍ ໂຕລາກໍໝູບລົງກາງທາງ. ແຕ່ລະເທື່ອ ບາລາອາມກໍຈະເອົາໄມ້ຄ້ອນເທົ້າຕີໂຕລາ.
ຫຼັງຈາກນັ້ນ ພະເຢໂຫວາກໍເຮັດໃຫ້ໂຕລາເວົ້າໄດ້. ໂຕລາຖາມບາລາອາມວ່າ: ‘ເຈົ້າຕີຂ້ອຍເຮັດຫຍັງ?’ ບາລາອາມຕອບວ່າ: ‘ເຈົ້າເຮັດໃຫ້ຂ້ອຍເສຍໜ້າ. ຖ້າຂ້ອຍມີດາບ ຂ້ອຍຂ້າເຈົ້າຖິ້ມແລ້ວ!’ ໂຕລາເວົ້າວ່າ: ‘ເຈົ້າຂີ່ຂ້ອຍມາບັກຫຼາຍໆປີແລ້ວ ຂ້ອຍເຄີຍເຮັດແບບນີ້ກັບເຈົ້າບໍ?’
ແລ້ວພະເຢໂຫວາກໍເຮັດໃຫ້ບາລາອາມເຫັນທູດສະຫວັນ. ທູດສະຫວັນເວົ້າວ່າ: ‘ພະເຢໂຫວາເຕືອນເຈົ້າແລ້ວວ່າຫ້າມສາບແຊ່ງພວກອິດສະຣາເອນ.’ ບາລາອາມເວົ້າວ່າ: ‘ຂ້ອຍເຮັດຜິດແລ້ວ. ຂ້ອຍຈະກັບເມືອເຮືອນ.’ ແຕ່ທູດສະຫວັນບອກວ່າ: ‘ເຈົ້າຈະໄປໂມອາບກະໄດ້ ແຕ່ເຈົ້າຕ້ອງເວົ້າສິ່ງທີ່ພະເຢໂຫວາບອກເຈົ້າເທົ່ານັ້ນ.’
ບາລາອາມເຮັດຕາມທີ່ພະເຢໂຫວາບອກບໍ? ບໍ່. ລາວພະຍາຍາມສາບແຊ່ງພວກອິດສະຣາເອນຕັ້ງ 3 ເທື່ອ ແຕ່ທຸກເທື່ອພະເຢໂຫວາກໍເຮັດໃຫ້ຄຳເວົ້າຂອງລາວກາຍເປັນຄຳອວຍພອນ. ຕໍ່ມາ ພວກອິດສະຣາເອນກໍຕໍ່ສູ້ຊະນະພວກໂມອາບ ແລະບາລາອາມກໍຖືກຂ້າຕາຍ. ຖ້າບາລາອາມເຊື່ອຟັງພະເຢໂຫວາຕັ້ງແຕ່ທຳອິດ ລາວກໍຄືຊິບໍ່ຕາຍ.
“ລະວັງໃຫ້ດີ ຢ່າເປັນຄົນໂລບ. ເຖິງວ່າຄົນຜູ້ໜຶ່ງມີຊັບສົມບັດຫຼາຍໆ ແຕ່ມັນກໍໃຫ້ຊີວິດລາວບໍ່ໄດ້.”—ລູກາ 12:15