ບົດທີ 36
ຄຳສັນຍາຂອງເຢັບທາ
ພວກອິດສະຣາເອນປະຖິ້ມພະເຢໂຫວາແລະໄປນະມັດສະການພະເຈົ້າປອມອີກ. ຕອນທີ່ພວກອຳໂມນມາໂຈມຕີເຂົາເຈົ້າ ພະເຈົ້າປອມເຫຼົ່ານັ້ນບໍ່ໄດ້ຊ່ວຍຫຍັງເຂົາເຈົ້າເລີຍ. ພວກອິດສະຣາເອນຕ້ອງທົນທຸກລຳບາກຢູ່ຫຼາຍປີ. ສຸດທ້າຍເຂົາເຈົ້າກໍຂໍຮ້ອງພະເຢໂຫວາວ່າ: ‘ພວກເຮົາເຮັດຜິດແລ້ວ ຂໍພະອົງຊ່ວຍພວກເຮົາຈາກສັດຕູແດ່.’ ພວກອິດສະຣາເອນທຳລາຍຮູບພະຕ່າງໆແລະກັບມານະມັດສະການພະເຢໂຫວາອີກເທື່ອໜຶ່ງ. ພະເຢໂຫວາບໍ່ຢາກເຫັນເຂົາເຈົ້າຕ້ອງທົນທຸກລຳບາກອີກ.
ທະຫານຄົນໜຶ່ງຊື່ເຢັບທາຖືກເລືອກໃຫ້ເປັນຜູ້ນຳປະຊາຊົນໄປຕໍ່ສູ້ກັບພວກອຳໂມນ. ລາວເວົ້າກັບພະເຢໂຫວາວ່າ: ‘ຖ້າພະອົງຊ່ວຍພວກເຮົາໃຫ້ຊະນະການຕໍ່ສູ້ເທື່ອນີ້ ລູກສັນຍາວ່າຕອນທີ່ລູກກັບເມືອເຮືອນ ຜູ້ໃດທີ່ອອກຈາກເຮືອນມາຕ້ອນຮັບລູກເປັນຜູ້ທຳອິດ ລູກຈະມອບລາວໃຫ້ພະອົງ.’ ພະເຢໂຫວາຟັງຄຳອະທິດຖານຂອງເຢັບທາແລະຊ່ວຍລາວໃຫ້ຕໍ່ສູ້ຊະນະ.
ເມື່ອເຢັບທາກັບມາເຮືອນ ຜູ້ທຳອິດທີ່ອອກມາຕ້ອນຮັບລາວກໍຄືລູກສາວຄົນດຽວຂອງລາວ. ລູກສາວຂອງເຢັບທາເຕັ້ນແລະຕີກອງແທມບູຣິນອອກມາ. ແລ້ວເຢັບທາຊິເຮັດແນວໃດ? ລາວບໍ່ລືມວ່າລາວໄດ້ສັນຍາຫຍັງໄວ້ກັບພະເຢໂຫວາ ລາວຈຶ່ງເວົ້າວ່າ: ‘ລູກເອີ້ຍ! ລູກເຮັດໃຫ້ຫົວໃຈຂອງພໍ່ແຕກສະຫຼາຍແລ້ວ. ພໍ່ໄດ້ສັນຍາກັບພະເຢໂຫວາໄວ້. ເພື່ອຮັກສາສັນຍາ ພໍ່ຕ້ອງສົ່ງລູກໃຫ້ໄປຮັບໃຊ້ຢູ່ເຕັ້ນສັກສິດໃນເມືອງຊີໂລ.’ ແຕ່ລູກສາວເວົ້າກັບພໍ່ວ່າ: ‘ພໍ່ເອີ້ຍ ຖ້າພໍ່ສັນຍາຫຍັງໄວ້ກັບພະເຢໂຫວາ ກໍໃຫ້ພໍ່ເຮັດຕາມທີ່ສັນຍາໄວ້ໂລດ. ແຕ່ລູກຂໍຢ່າງດຽວ ລູກຂໍຂຶ້ນໄປເທິງພູເພື່ອໃຊ້ເວລາຢູ່ກັບໝູ່ຜູ້ຍິງຂອງລູກ 2 ເດືອນ ແລ້ວລູກຈະໄປຮັບໃຊ້ຢູ່ເຕັ້ນສັກສິດ.’ ລູກສາວຂອງເຢັບທາຮັບໃຊ້ຢູ່ເຕັ້ນສັກສິດຢ່າງສັດຊື່ຕະຫຼອດຊີວິດຂອງລາວ. ໝູ່ຂອງລາວກໍໄປຢາມລາວຢູ່ເມືອງຊີໂລທຸກປີ.
“ຄົນທີ່ຮັກລູກຫຼາຍກວ່າຂ້ອຍກໍບໍ່ເໝາະສົມທີ່ຈະເປັນລູກສິດຂອງຂ້ອຍ.”—ມັດທາຍ 10:37