ບົດທີ 43
ກະສັດດາວິດເຮັດຜິດຮ້າຍແຮງ
ເມື່ອຊາອູນຕາຍ ດາວິດກໍຂຶ້ນເປັນກະສັດຕອນອາຍຸ 30 ປີ. ຫຼັງຈາກເປັນກະສັດໄດ້ຫຼາຍປີ ລາວກໍເຮັດຜິດຮ້າຍແຮງ. ມີຄືນໜຶ່ງ ດາວິດແນມລົງມາຈາກດາດຟ້າວັງຂອງລາວ ລາວເຫັນຜູ້ຍິງຄົນໜຶ່ງເປັນຄົນງາມຫຼາຍ. ຜູ້ຍິງຄົນນັ້ນຊື່ບັດເຊບາແລະເປັນເມຍຂອງທະຫານທີ່ຊື່ອູຣີຢາ. ດາວິດໃຫ້ຄົນໄປພາບັດເຊບາມາວັງຂອງລາວແລ້ວເຂົາເຈົ້າກໍນອນນຳກັນ. ຕໍ່ມາ ບັດເຊບາກໍຖືພາ. ດາວິດພະຍາຍາມປົກປິດຄວາມຜິດທີ່ລາວເຮັດໂດຍສັ່ງຫົວໜ້າກອງທັບຂອງລາວໃຫ້ສົ່ງອູຣີຢາໄປເປັນກອງໜ້າໃນສະໜາມຮົບ ແລ້ວກໍໃຫ້ທະຫານຄົນອື່ນໆຄ່ອຍໆຖອຍອອກມາເພື່ອໃຫ້ລາວຖືກຂ້າ. ຫຼັງຈາກອູຣີຢາຖືກຂ້າຕາຍໃນສະໜາມຮົບແລ້ວ ລາວກໍແຕ່ງດອງກັບບັດເຊບາ.
ແຕ່ພະເຢໂຫວາເຫັນເລື່ອງບໍ່ດີທຸກຢ່າງທີ່ເກີດຂຶ້ນ ແລ້ວເພິ່ນຊິເຮັດແນວໃດກັບເລື່ອງນີ້? ພະເຢໂຫວາໄດ້ສົ່ງຜູ້ພະຍາກອນນາທານໄປຫາດາວິດ. ນາທານເວົ້າກັບດາວິດວ່າ: ‘ຄົນຮັ່ງຄົນໜຶ່ງມີແກະບັກຫຼາຍໆໂຕ ສ່ວນຄົນທຸກຄົນໜຶ່ງມີແກະນ້ອຍພຽງໂຕດຽວທີ່ລາວຮັກຫຼາຍ. ແຕ່ຄົນຮັ່ງນັ້ນກໍໄປຍາດເອົາແກະນ້ອຍໂຕດຽວຂອງຄົນທຸກມາ.’ ເມື່ອໄດ້ຍິນແນວນັ້ນ ດາວິດກໍໃຈຮ້າຍຫຼາຍແລະເວົ້າວ່າ: ‘ຄົນຮັ່ງຜູ້ນັ້ນຈະຕ້ອງຕາຍ!’ ແລ້ວນາທານກໍບອກດາວິດວ່າ: ‘ຄົນຮັ່ງຜູ້ນັ້ນກໍແມ່ນທ່ານຫັ້ນແຫຼະ!’ ດາວິດເສຍໃຈຫຼາຍ ລາວຍອມຮັບກັບນາທານວ່າ: ‘ຂ້ອຍເຮັດຜິດຕໍ່ພະເຢໂຫວາແລ້ວ.’ ຄວາມຜິດນີ້ເຮັດໃຫ້ລາວກັບຄອບຄົວເຈິບັນຫາແລະຄວາມຫຍຸ້ງຍາກຫຼາຍຢ່າງ. ພະເຢໂຫວາລົງໂທດດາວິດແຕ່ກໍຍັງໃຫ້ລາວມີຊີວິດຢູ່ ຍ້ອນລາວເປັນຄົນສັດຊື່ແລະຖ່ອມໂຕ.
ດາວິດຢາກສ້າງວິຫານໃຫ້ພະເຢໂຫວາ ແຕ່ພະເຢໂຫວາເລືອກໂຊໂລໂມນລູກຊາຍຂອງລາວໃຫ້ສ້າງວິຫານ. ດາວິດຈຶ່ງເລີ່ມກຽມສິ່ງຕ່າງໆໄວ້ໃຫ້ໂຊໂລໂມນແລະເວົ້າວ່າ: ‘ວິຫານຂອງພະເຢໂຫວາຈະຕ້ອງຍິ່ງໃຫຍ່ແລະງົດງາມ. ແຕ່ໂຊໂລໂມນຍັງນ້ອຍຢູ່ ຂ້ອຍຈະຊ່ວຍກຽມທຸກຢ່າງໄວ້ໃຫ້ລາວ.’ ດາວິດບໍລິຈາກເງິນຫຼາຍແທ້ຫຼາຍວ່າສຳລັບວຽກນີ້. ລາວຊອກຊ່າງສີມືທີ່ເກັ່ງໆໄວ້ບັກຫຼາຍໆ. ລາວສະສົມຄຳແລະເງິນໄວ້ໃຫ້ໂຊໂລໂມນ ແລະໄດ້ສັ່ງໄມ້ຊີດ້າຈາກເມືອງຕີເຣແລະຊີໂດນໄວ້ນຳ. ກ່ອນດາວິດຈະຕາຍ ລາວໄດ້ເອົາແບບກໍ່ສ້າງວິຫານໃຫ້ໂຊໂລໂມນແລະບອກວ່າ: ‘ພະເຢໂຫວາໃຫ້ພໍ່ແຕ້ມແບບກໍ່ສ້າງນີ້ໄວ້ໃຫ້ລູກ. ບໍ່ຕ້ອງຢ້ານເດີ້ ພະເຢໂຫວາຈະຊ່ວຍລູກ. ໃຫ້ລູກເຂັ້ມແຂງແລະເລີ່ມເຮັດໂລດ.’
“ຄົນທີ່ປົກປິດຄວາມຜິດຂອງໂຕເອງໄວ້ຈະບໍ່ປະສົບຄວາມສຳເລັດ ແຕ່ຄົນທີ່ສາລະພາບແລະເຊົາເຮັດຜິດຈະໄດ້ຮັບຄວາມເມດຕາ.”—ສຸພາສິດ 28:13