ບົດທີ 48
ລູກຊາຍຂອງແມ່ໝ້າຍຟື້ນຄືນຈາກຕາຍ
ໃນຊ່ວງທີ່ມີຄວາມແຫ້ງແລ້ງ ພະເຢໂຫວາບອກເອລີຢາວ່າ: ‘ໃຫ້ເຈົ້າໄປເມືອງຊາເຣຟັດ ແມ່ໝ້າຍຜູ້ໜຶ່ງທີ່ຢູ່ເມືອງນັ້ນຈະລ້ຽງເຈົ້າ.’ ເມື່ອໄປຮອດປະຕູເມືອງ ເອລີຢາເຫັນແມ່ໝ້າຍທີ່ທຸກຍາກຄົນໜຶ່ງກຳລັງເກັບຟືນຢູ່ ລາວຂໍກິນນ້ຳນຳແມ່ໝ້າຍຄົນນັ້ນ. ຕອນທີ່ແມ່ໝ້າຍໄປເອົານ້ຳໃຫ້ເອລີຢາ ເອລີຢາຮ້ອງບອກແມ່ໝ້າຍວ່າ: “ຂ້ອຍຂໍເຂົ້າຈີ່ນຳແດ່ປ່ຽງໜຶ່ງ.” ແຕ່ແມ່ໝ້າຍຕອບລາວວ່າ: ‘ຂ້ອຍບໍ່ມີເຂົ້າຈີ່ຈັກໜ້ອຍເລີຍ ມີແຕ່ແປ້ງກັບນ້ຳມັນໜ້ອຍໜຶ່ງ ພໍແຕ່ເຮັດເຂົ້າຈີ່ກ້ອນນ້ອຍໆໃຫ້ຂ້ອຍກັບລູກຊາຍກິນເທົ່ານັ້ນ.’ ເອລີຢາຈຶ່ງບອກລາວວ່າ: ‘ພະເຢໂຫວາສັນຍາວ່າແປ້ງແລະນ້ຳມັນຂອງເຈົ້າຈະບໍ່ໝົດຈັກເທື່ອຈົນຮອດມື້ທີ່ຝົນຕົກ ຖ້າເຈົ້າເອົາເຂົ້າຈີ່ໃຫ້ຂ້ອຍກິນກ່ອນ.’
ແມ່ໝ້າຍກໍກັບເມືອເຮືອນແລະເຮັດເຂົ້າຈີ່ໃຫ້ຜູ້ພະຍາກອນຂອງພະເຢໂຫວາກິນ. ແລ້ວກໍເປັນໄປຕາມທີ່ພະເຢໂຫວາສັນຍາໄວ້. ແປ້ງແລະນ້ຳມັນໃນໄຫຂອງແມ່ໝ້າຍບໍ່ໝົດຈັກເທື່ອ ລາວກັບລູກຊາຍມີຂອງກິນຕະຫຼອດໃນຊ່ວງທີ່ມີຄວາມແຫ້ງແລ້ງ.
ຫຼັງຈາກນັ້ນ ກໍມີເລື່ອງເສົ້າເກີດຂຶ້ນ ລູກຊາຍຂອງແມ່ໝ້າຍບໍ່ສະບາຍແຮງແລະຕໍ່ມາລາວກໍຕາຍ. ແມ່ໝ້າຍຂໍຮ້ອງໃຫ້ເອລີຢາຊ່ວຍ. ເອລີຢາຈຶ່ງອູ້ມເດັກນ້ອຍນັ້ນຂຶ້ນໄປຫ້ອງທີ່ຢູ່ເທິງດາດຟ້າ ແລ້ວກໍວາງລາວຢູ່ເທິງຕຽງ ແລະອະທິດຖານວ່າ: ‘ພະເຢໂຫວາ ຂໍພະອົງເຮັດໃຫ້ເດັກນ້ອຍຄົນນີ້ກັບມາມີຊີວິດອີກ.’ ສິ່ງທີ່ພະເຢໂຫວາຈະເຮັດຕໍ່ຈາກນີ້ເປັນຕາເຫຼືອເຊື່ອຫຼາຍ. ຮູ້ບໍວ່າຍ້ອນຫຍັງ? ຄືກັບທີ່ເຮົາຮູ້ ຍັງບໍ່ເຄີຍມີໃຜຟື້ນຄືນຈາກຕາຍມາກ່ອນ ແລະແມ່ໝ້າຍກັບລູກຊາຍຂອງລາວກໍບໍ່ແມ່ນຄົນອິດສະຣາເອນອີກ.
ເດັກນ້ອຍຄົນນັ້ນກໍກັບມາມີຊີວິດແລະເລີ່ມຫາຍໃຈອີກເທື່ອໜຶ່ງ! ເອລີຢາເວົ້າກັບແມ່ໝ້າຍວ່າ: ‘ເບິ່ງແມ້! ລູກຂອງເຈົ້າຟື້ນແລ້ວ.’ ແມ່ໝ້າຍດີໃຈຫຼາຍ ແລະເວົ້າກັບເອລີຢາວ່າ: ‘ຕອນນີ້ຂ້ອຍຮູ້ແລ້ວວ່າເຈົ້າເປັນຄົນຂອງພະເຈົ້າແທ້ໆ ຍ້ອນເຈົ້າເວົ້າແຕ່ສິ່ງທີ່ພະເຢໂຫວາບອກໃຫ້ເວົ້າ.’
“ໃຫ້ເບິ່ງໂຕກາແມ້ ພວກມັນບໍ່ໄດ້ຫວ່ານແນວປູກຫຼືເກັບກ່ຽວ ບໍ່ມີສາງຫຼືເລົ້າເຂົ້າ ແຕ່ພະເຈົ້າກໍຍັງລ້ຽງພວກມັນ. ພວກເຈົ້າມີຄ່າຫຼາຍກວ່ານົກຫຼາຍເທົ່າບໍ່ແມ່ນບໍ?”—ລູກາ 12:24