ບົດທີ 50
ພະເຢໂຫວາປົກປ້ອງເຢໂຮຊາຟັດ
ເຢໂຮຊາຟັດກະສັດຂອງຢູດາທຳລາຍແທ່ນບູຊາຂອງພະບາອານແລະຮູບບູຊາໃຫ້ໝົດໄປຈາກແຜ່ນດິນຢູດາ. ລາວຢາກໃຫ້ປະຊາຊົນຮູ້ກົດໝາຍຂອງພະເຢໂຫວາ ລາວຈຶ່ງສົ່ງພວກເຈົ້ານາຍແລະພວກເລວີໄປສອນກົດໝາຍຂອງພະເຢໂຫວາໃຫ້ປະຊາຊົນຢູ່ຕາມເມືອງຕ່າງໆຂອງຢູດາ.
ປະເທດຕ່າງໆທີ່ຢູ່ອ້ອມຂ້າງບໍ່ກ້າມາໂຈມຕີຢູດາ ຍ້ອນເຂົາເຈົ້າຮູ້ວ່າພະເຢໂຫວາຢູ່ກັບປະຊາຊົນຂອງເພິ່ນ. ເຂົາເຈົ້າເຖິງຂັ້ນເອົາຂອງຂວັນມາໃຫ້ເຢໂຮຊາຟັດ. ແຕ່ຕໍ່ມາ ພວກໂມອາບ ພວກອຳໂມນ ແລະພວກທີ່ຢູ່ເຂດພູເສອີໄດ້ມາເຮັດສົງຄາມຕໍ່ສູ້ຢູດາ. ເຢໂຮຊາຟັດຮູ້ວ່າລາວຕ້ອງຂໍໃຫ້ພະເຢໂຫວາຊ່ວຍ ລາວຈຶ່ງສັ່ງໃຫ້ຜູ້ຊາຍ ຜູ້ຍິງ ແລະເດັກນ້ອຍທຸກຄົນມາລວມກັນຢູ່ເມືອງເຢຣູຊາເລັມ. ແລ້ວລາວກໍອະທິດຖານຕໍ່ໜ້າເຂົາເຈົ້າທຸກຄົນວ່າ: ‘ພະເຢໂຫວາຖ້າພະອົງບໍ່ຊ່ວຍ ພວກເຮົາກໍບໍ່ມີທາງຊິຊະນະເຂົາເຈົ້າໄດ້ ຂໍພະອົງບອກພວກເຮົາແດ່ວ່າຕ້ອງເຮັດແນວໃດ.’
ພະເຢໂຫວາຕອບຄຳອະທິດຖານຂອງເຢໂຮຊາຟັດວ່າ: ‘ບໍ່ຕ້ອງຢ້ານ ເຮົາຈະຊ່ວຍພວກເຈົ້າ ໃຫ້ຢືນຢູ່ຊື່ໆ ບໍ່ຕ້ອງເຮັດຫຍັງ ແລະຖ້າເບິ່ງວ່າເຮົາຈະຊ່ວຍພວກເຈົ້າໃຫ້ລອດແນວໃດ.’ ແລ້ວພະເຢໂຫວາຊ່ວຍເຂົາເຈົ້າແນວໃດ?
ເຊົ້າມື້ຕໍ່ມາ ເຢໂຮຊາຟັດໄດ້ເລືອກນັກຮ້ອງກຸ່ມໜຶ່ງໃຫ້ຍ່າງອອກໜ້າພວກທະຫານ. ເຂົາເຈົ້າຍ່າງຈາກເມືອງເຢຣູຊາເລັມໄປສະໜາມຮົບບ່ອນໜຶ່ງທີ່ເອີ້ນວ່າເຕໂກອາ.
ຕອນທີ່ນັກຮ້ອງກຳລັງຮ້ອງເພງສຽງດັງສັນລະເສີນພະເຢໂຫວາຢ່າງມີຄວາມສຸກ ພະເຢໂຫວາໄດ້ຕໍ່ສູ້ແທນປະຊາຊົນຂອງເພິ່ນ ເພິ່ນເຮັດໃຫ້ພວກອຳໂມນກັບພວກໂມອາບສັບສົນແລະເຮັດໃຫ້ເຂົາເຈົ້າຂ້າກັນເອງຈົນບໍ່ມີໃຜລອດຈັກຄົນ. ແຕ່ພະເຢໂຫວາໄດ້ປົກປ້ອງປະຊາຊົນຄົນຢູດາ ພວກທະຫານ ແລະພວກປະໂລຫິດ. ເມື່ອປະເທດຕ່າງໆທີ່ຢູ່ອ້ອມຂ້າງໄດ້ຍິນສິ່ງທີ່ພະເຢໂຫວາເຮັດ ເຂົາເຈົ້າກໍຮູ້ວ່າພະເຢໂຫວາຍັງປົກປ້ອງປະຊາຊົນຂອງເພິ່ນຢູ່. ພະເຢໂຫວາໃຊ້ຫຼາຍວິທີເພື່ອຊ່ວຍປະຊາຊົນຂອງເພິ່ນໂດຍບໍ່ຕ້ອງເພິ່ງມະນຸດ.
“ໃນສົງຄາມເທື່ອນີ້ພວກເຈົ້າຈະບໍ່ຕ້ອງຕໍ່ສູ້. ໃຫ້ເຂົ້າປະຈຳທີ່ ໃຫ້ຢືນຢູ່ຊື່ໆ ບໍ່ຕ້ອງເຮັດຫຍັງ ແລະພະເຢໂຫວາຈະຊ່ວຍພວກເຈົ້າໃຫ້ລອດ.”—2 ຂ່າວຄາວ 20:17