ບົດທີ 51
ນັກຮົບທີ່ກ້າຫານກັບເດັກນ້ອຍຜູ້ຍິງຄົນໜຶ່ງ
ໃນແຜ່ນດິນຊີເຣຍ ມີເດັກນ້ອຍຜູ້ຍິງອິດສະຣາເອນຄົນໜຶ່ງຖືກທະຫານຊີເຣຍຈັບມາ. ລາວຕ້ອງຢູ່ໄກຈາກບ້ານເກີດແລະຕ້ອງແຍກຈາກຄອບຄົວ. ລາວມາເປັນຄົນຮັບໃຊ້ຂອງເມຍນາອາມານທີ່ເປັນຫົວໜ້າກອງທັບ. ເດັກນ້ອຍຜູ້ຍິງຄົນນີ້ນະມັດສະການພະເຢໂຫວາ ເຖິງວ່າຄົນອ້ອມຂ້າງລາວຈະບໍ່ໄດ້ນະມັດສະການເພິ່ນ.
ນາອາມານເປັນພະຍາດຜິວໜັງທີ່ເປັນຕາຢ້ານຫຼາຍແລະລາວກໍຮູ້ສຶກເຈັບປວດຕະຫຼອດເວລາ. ເດັກນ້ອຍຜູ້ຍິງຄົນນີ້ຢາກຊ່ວຍນາອາມານແທ້ໆ ລາວຈຶ່ງບອກເມຍຂອງນາອາມານວ່າ: ‘ຂ້ອຍຮູ້ຈັກຄົນໜຶ່ງທີ່ຈະຊ່ວຍຜົວທ່ານໄດ້. ລາວຊື່ເອລີຊາ ລາວເປັນຜູ້ພະຍາກອນຂອງພະເຢໂຫວາຢູ່ອິດສະຣາເອນ. ລາວສາມາດປົວຜົວຂອງທ່ານໃຫ້ເຊົາໄດ້.’
ເມຍຂອງນາອາມານເລົ່າໃຫ້ຜົວຟັງວ່າເດັກນ້ອຍຄົນນີ້ບອກຫຍັງລາວ. ນາອາມານຢາກລອງເຮັດທຸກວິທີເພື່ອຈະເຊົາພະຍາດ ລາວຈຶ່ງໄປຫາເອລີຊາຢູ່ອິດສະຣາເອນ. ນາອາມານຄິດວ່າເອລີຊາຈະອອກຈາກເຮືອນມາຕ້ອນຮັບລາວຍ້ອນລາວເປັນຄົນສຳຄັນ ແຕ່ເອລີຊາພັດສົ່ງຄົນຮັບໃຊ້ມາບອກລາວວ່າ: ‘ໃຫ້ໄປຈຸ່ມໂຕຢູ່ແມ່ນ້ຳຈໍແດນ 7 ເທື່ອ ແລ້ວເຈົ້າຈະເຊົາ.’
ນາອາມານຮູ້ສຶກຜິດຫວັງຫຼາຍ ລາວເວົ້າວ່າ: ‘ຂ້ອຍຄິດວ່າຜູ້ພະຍາກອນຄົນນີ້ຈະປົວຂ້ອຍໂດຍເອີ້ນຊື່ພະເຈົ້າຂອງລາວແລະແກວ່ງມືໄປມາເທິງບາດຂ້ອຍ ແຕ່ລາວພັດບອກໃຫ້ຂ້ອຍໄປຈຸ່ມໂຕຢູ່ແມ່ນ້ຳຂອງອິດສະຣາເອນ. ແມ່ນ້ຳຢູ່ຊີເຣຍດີກວ່າແມ່ນ້ຳຢູ່ອິດສະຣາເອນຕັ້ງບັກຫຼາຍໆ ຂ້ອຍໄປຈຸ່ມຢູ່ຫັ້ນຊິບໍ່ດີກວ່າຫວະ!’ ນາອາມານໃຈຮ້າຍຫຼາຍແລະໄປຈາກເຮືອນຂອງເອລີຊາ.
ຄົນຮັບໃຊ້ຂອງນາອາມານເວົ້າເຕືອນສະຕິລາວວ່າ: ‘ທ່ານຢາກລອງທຸກວິທີເພື່ອທ່ານຈະເຊົາບໍ່ແມ່ນບໍ? ຜູ້ພະຍາກອນຄົນນີ້ມີແຕ່ບອກໃຫ້ທ່ານເຮັດແນວງ່າຍໆໜຶ່ງ ເປັນຫຍັງທ່ານຈຶ່ງບໍ່ລອງເຮັດເບິ່ງ?’ ນາອາມານຟັງຄົນຮັບໃຊ້ຂອງລາວ. ລາວຈຶ່ງໄປແມ່ນ້ຳຈໍແດນແລະຈຸ່ມໂຕໃນນ້ຳ 7 ເທື່ອ. ຫຼັງຈາກເທື່ອທີ 7 ທີ່ລາວຂຶ້ນມາຈາກນ້ຳ ລາວກໍເຊົາພະຍາດເປັນປົກກະຕິ. ລາວດີໃຈເອົາແທ້ເອົາວ່າແລະກັບໄປຂອບໃຈເອລີຊາ. ນາອາມານເວົ້າວ່າ: ‘ຕອນນີ້ຂ້ອຍຮູ້ແລ້ວວ່າພະເຢໂຫວາເປັນພະເຈົ້າທ່ຽງແທ້.’ ເຈົ້າຄິດວ່າເດັກນ້ອຍຜູ້ຍິງຄົນອິດສະຣາເອນຈະຮູ້ສຶກແນວໃດເມື່ອເຫັນນາອາມານເຊົາພະຍາດແລ້ວ?
“ພະອົງເຮັດໃຫ້ມີຄຳສັນລະເສີນອອກຈາກປາກຂອງເດັກນ້ອຍແລະແອນ້ອຍ.”—ມັດທາຍ 21:16