ບົດທີ 64
ດານີເອນຢູ່ໃນຂຸມໂຕສິງ
ກະສັດອີກອົງໜຶ່ງຂອງບາບີໂລນແມ່ນດາຣິອຸດຄົນເມເດຍ. ດາຣິອຸດເຫັນວ່າດານີເອນມີຄວາມສາມາດພິເສດກວ່າຄົນອື່ນໆ ລາວຈຶ່ງແຕ່ງຕັ້ງດານີເອນໃຫ້ເປັນຄົນໜຶ່ງທີ່ມີຕຳແໜ່ງສຳຄັນທີ່ສຸດຂອງປະເທດ. ມີຫຼາຍຄົນອິດສາດານີເອນແລະຢາກກຳຈັດລາວ. ເຂົາເຈົ້າຮູ້ວ່າດານີເອນອະທິດຖານຫາພະເຢໂຫວາມື້ລະ 3 ເທື່ອທຸກມື້ ເຂົາເຈົ້າຈຶ່ງບອກກະສັດດາຣິອຸດວ່າ: ‘ກະສັດເອີ້ຍ ທ່ານໜ້າຈະອອກກົດໝາຍໃຫ້ປະຊາຊົນທຸກຄົນອະທິດຖານຫາທ່ານຜູ້ດຽວເທົ່ານັ້ນ. ຖ້າຜູ້ໃດບໍ່ເຮັດຕາມກົດໝາຍນີ້ ກໍຈະຖືກຖິ້ມລົງໃນຂຸມທີ່ມີໂຕສິງ.’ ດາຣິອຸດມັກຄວາມຄິດນີ້ ລາວຈຶ່ງເຊັນໃສ່ກົດໝາຍນັ້ນ.
ເມື່ອດານີເອນຮູ້ວ່າກະສັດໄດ້ອອກກົດໝາຍໃໝ່ ລາວກໍເມືອເຮືອນ. ລາວຄູ້ເຂົ່າລົງອະທິດຖານຫາພະເຢໂຫວາຢູ່ໃກ້ປ່ອງຢ້ຽມທີ່ເປີດຢູ່. ພວກຄົນທີ່ອິດສາລາວກໍພາກັນບຸກເຂົ້າມາໃນເຮືອນຂອງລາວແລະເຫັນລາວກຳລັງອະທິດຖານຢູ່ ເຂົາເຈົ້າຈຶ່ງຟ້າວໄປຫາດາຣິອຸດແລະບອກວ່າ: ‘ດານີເອນບໍ່ເຮັດຕາມຄຳສັ່ງທີ່ທ່ານໄດ້ເຊັນ ລາວຍັງອະທິດຖານຫາພະເຈົ້າຂອງລາວມື້ລະ 3 ເທື່ອຄືເກົ່າ.’ ແຕ່ດາຣີອຸດມັກດານີເອນແລະບໍ່ຢາກໃຫ້ລາວຕາຍ ລາວຈຶ່ງພະຍາຍາມຊອກທຸກວິທີຈົນຮອດຄ່ຳເພື່ອຈະຊ່ວຍຊີວິດດານີເອນ. ແຕ່ກົດໝາຍໃດກໍຕາມທີ່ກະສັດເຊັນແລ້ວຈະບໍ່ມີໃຜປ່ຽນແປງໄດ້ ແມ່ນແຕ່ກະສັດເອງກໍປ່ຽນແປງບໍ່ໄດ້. ກະສັດຈຶ່ງຈຳໃຈສັ່ງຄົນໃຫ້ໂຍນດານີເອນລົງໃນຂຸມທີ່ມີໂຕສິງທີ່ໂຫດຮ້າຍ.
ຄືນນັ້ນ ດາຣິອຸດເປັນຫ່ວງດານີເອນຫຼາຍຈົນນອນບໍ່ຫຼັບໝົດຄືນ. ເມື່ອຮອດຕອນເຊົ້າ ລາວກໍຟ້າວໄປຂຸມໂຕສິງແລະຮ້ອງຖາມດານີເອນວ່າ: ‘ພະເຈົ້າຂອງເຈົ້າຊ່ວຍເຈົ້າໄດ້ບໍ່?’
ແລ້ວດາຣິອຸດກໍໄດ້ຍິນສຽງຂອງດານີເອນ! ດານີເອນຮ້ອງຕອບກະສັດວ່າ: ‘ທູດສະຫວັນຂອງພະເຢໂຫວາໄດ້ມາອັດປາກໂຕສິງໄວ້ ພວກມັນເລີຍບໍ່ໄດ້ເຮັດຫຍັງໃຫ້ຂ້ອຍ.’ ດາຣິອຸດດີໃຈຫຼາຍ! ລາວສັ່ງໃຫ້ຄົນເອົາດານີເອນຂຶ້ນມາຈາກຂຸມ. ດານີເອນບໍ່ມີຮອຍຂູດຫຍັງເລີຍ. ແລ້ວກະສັດກໍສັ່ງວ່າ: ‘ໃຫ້ເອົາພວກທີ່ກ່າວຫາດານີເອນຖິ້ມລົງໃນຂຸມໂຕສິງ.’ ເມື່ອເຂົາເຈົ້າຖືກໂຍນລົງໄປ ໂຕສິງກໍຫຸ້ມກັດກິນເຂົາເຈົ້າ.
ດາຣິອຸດອອກຄຳສັ່ງໄປຫາປະຊາຊົນທຸກຄົນວ່າ: ‘ທຸກຄົນຕ້ອງຢ້ານຢຳພະເຈົ້າຂອງດານີເອນ ເພາະເພິ່ນຊ່ວຍດານີເອນໃຫ້ລອດຈາກໂຕສິງ.’
ເຈົ້າອະທິດຖານຫາພະເຢໂຫວາທຸກມື້ຄືກັບດານີເອນບໍ?
“ພະເຢໂຫວາຮູ້ວິທີຊ່ວຍຄົນທີ່ຢ້ານຢຳເພິ່ນໃຫ້ຜ່ານການທົດສອບ.”—2 ເປໂຕ 2:9