ບົດທີ 93
ພະເຢຊູກັບຄືນໄປສະຫວັນ
ຕອນທີ່ພະເຢຊູໄປເຈິພວກລູກສິດຢູ່ແຂວງຄາລີເລ ເພິ່ນໄດ້ໃຫ້ຄຳສັ່ງທີ່ສຳຄັນຫຼາຍກັບເຂົາເຈົ້າ. ເພິ່ນສັ່ງວ່າ: ‘ໃຫ້ພວກເຈົ້າໄປຫາຄົນທຸກຊາດແລະສອນເຂົາເຈົ້າໃຫ້ເຂົ້າມາເປັນລູກສິດ. ໃຫ້ສອນເຂົາເຈົ້າຄືກັບທີ່ຂ້ອຍສອນພວກເຈົ້າ ແລະໃຫ້ເຂົາເຈົ້າຮັບບັບເຕມາ.’ ຈາກນັ້ນ ເພິ່ນກໍສັນຍາວ່າ: “ໃຫ້ຈື່ໄວ້ວ່າ ຂ້ອຍຈະຢູ່ກັບພວກເຈົ້າສະເໝີ.”
ຕະຫຼອດໄລຍະ 40 ມື້ຫຼັງຈາກທີ່ພະເຢຊູຟື້ນຄືນຈາກຕາຍ ເພິ່ນໄດ້ມາໃຫ້ພວກລູກສິດຫຼາຍຮ້ອຍຄົນເຫັນທັງຢູ່ໃນແຂວງຄາລີເລແລະເມືອງເຢຣູຊາເລັມ. ເພິ່ນສອນບົດຮຽນທີ່ສຳຄັນຫຼາຍເລື່ອງໃຫ້ເຂົາເຈົ້າແລະເຮັດການອັດສະຈັນຫຼາຍຢ່າງໃຫ້ເຂົາເຈົ້າເຫັນ. ຈາກນັ້ນ ພະເຢຊູກໍໄປເຈິພວກອັກຄະສາວົກເປັນເທື່ອສຸດທ້າຍຢູ່ເທິງພູໝາກກອກ. ເພິ່ນບອກເຂົາເຈົ້າວ່າ: ‘ຢ່າອອກໄປຈາກເມືອງເຢຣູຊາເລັມ ໃຫ້ລໍຖ້າຈົນກວ່າຈະໄດ້ຮັບສິ່ງທີ່ພໍ່ຂອງຂ້ອຍສັນຍາໄວ້.’
ພວກອັກຄະສາວົກບໍ່ເຂົ້າໃຈວ່າພະເຢຊູໝາຍຄວາມວ່າແນວໃດ. ເຂົາເຈົ້າຈຶ່ງຖາມເພິ່ນວ່າ: ‘ທ່ານຈະເປັນກະສັດຂອງອິດສະຣາເອນຕອນນີ້ເລີຍບໍ?’ ພະເຢຊູຕອບວ່າ: ‘ຕອນນີ້ຍັງບໍ່ຮອດເວລາທີ່ພະເຢໂຫວາຈະໃຫ້ຂ້ອຍເປັນກະສັດ. ອີກບໍ່ດົນ ພວກເຈົ້າຈະໄດ້ຮັບພະລັງບໍລິສຸດຈາກພະເຈົ້າແລະພວກເຈົ້າຈະເປັນພະຍານຂອງຂ້ອຍ. ໃຫ້ພວກເຈົ້າປະກາດຢູ່ເມືອງເຢຣູຊາເລັມ ແຂວງຢູດາຍ ແຂວງຊາມາເຣຍ ແລະຈົນຮອດສຸດຂອບໂລກ.’
ຈາກນັ້ນ ພະເຢຊູກໍຖືກຮັບຂຶ້ນໄປເທິງຟ້າແລະມີຂີ້ເຝື້ອມາບັງເພິ່ນໄວ້. ພວກລູກສິດແນມເບິ່ງພະເຢຊູຈົນເພິ່ນຫາຍໄປ.
ຫຼັງຈາກນັ້ນ ພວກລູກສິດກໍລົງມາຈາກພູໝາກກອກໄປເມືອງເຢຣູຊາເລັມ. ເຂົາເຈົ້າໄປປະຊຸມຮ່ວມກັນຢູ່ຫ້ອງຊັ້ນເທິງແລະອະທິດຖານນຳກັນເປັນປະຈຳ. ເຂົາເຈົ້າລໍຖ້າເບິ່ງວ່າພະເຢຊູຈະບອກໃຫ້ເຂົາເຈົ້າເຮັດຫຍັງຕໍ່ໄປ.
“ຈະມີການປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກ ເພື່ອໃຫ້ຄົນທຸກຊາດມີໂອກາດໄດ້ຍິນ ແລ້ວຈຸດຈົບກໍຈະມາຮອດ.”—ມັດທາຍ 24:14