ບົດທີ 97
ໂກເນລີໂອໄດ້ຮັບພະລັງບໍລິສຸດ
ໃນເມືອງກາຍຊາເຣຍມີນາຍທະຫານທີ່ສຳຄັນຂອງໂຣມຄົນໜຶ່ງຊື່ໂກເນລີໂອ. ເຖິງວ່າລາວບໍ່ແມ່ນຄົນຢິວ ແຕ່ຄົນຢິວກໍນັບຖືລາວ ຍ້ອນລາວເປັນຄົນເອື້ອເຟື້ອມັກຊ່ວຍເຫຼືອຄົນທຸກຍາກ. ໂກເນລີໂອເຊື່ອໃນພະເຢໂຫວາແລະອະທິດຖານຫາເພິ່ນສະເໝີ. ມີມື້ໜຶ່ງ ທູດສະຫວັນໄດ້ມາຫາໂກເນລີໂອແລະບອກລາວວ່າ: ‘ພະເຈົ້າຟັງຄຳອະທິດຖານຂອງເຈົ້າແລ້ວ. ໃຫ້ເຈົ້າໃຊ້ຄົນໄປເມືອງຢົບປາແລ້ວເຊີນຄົນທີ່ຊື່ຊີໂມນມາເຮືອນເຈົ້າ.’ ໂກເນລີໂອກໍເຮັດຕາມທີ່ທູດສະຫວັນບອກທັນທີ. ເຂົາເຈົ້າສົ່ງ 3 ຄົນໄປເມືອງຢົບປາທີ່ຢູ່ທາງໃຕ້ຂອງເມືອງກາຍຊາເຣຍປະມານ 50 ກິໂລແມັດ.
ໃນເວລາດຽວກັນ ເປໂຕທີ່ຢູ່ເມືອງຢົບປາກໍໄດ້ຮັບນິມິດຈາກພະເຈົ້າ. ລາວເຫັນສັດຫຼາຍຊະນິດທີ່ພະເຈົ້າບໍ່ອະນຸຍາດໃຫ້ຄົນຢິວກິນ ແລະມີສຽງບອກວ່າໃຫ້ກິນສັດເຫຼົ່ານັ້ນ. ແຕ່ເປໂຕບໍ່ຍອມກິນແລະເວົ້າວ່າ: ‘ຂ້ອຍບໍ່ເຄີຍກິນສັດທີ່ບໍ່ສະອາດເຫຼົ່ານີ້ເລີຍໃນຊີວິດ.’ ສຽງນັ້ນບອກລາວວ່າ: ‘ຢ່າຖືວ່າສັດເຫຼົ່ານີ້ບໍ່ສະອາດອີກເລີຍ ເພາະພະເຈົ້າເຮັດໃຫ້ສະອາດແລ້ວ.’ ສຽງນັ້ນບອກເປໂຕອີກວ່າ: ‘ມີຜູ້ຊາຍ 3 ຄົນມາຢູ່ໜ້າປະຕູເຮືອນ. ໃຫ້ເຈົ້າໄປກັບເຂົາເຈົ້າເດີ້.’ ເປໂຕໄປຫາເຂົາເຈົ້າຢູ່ປະຕູແລະຖາມວ່າມາເຮັດຫຍັງ. ເຂົາເຈົ້າຕອບວ່າ: ‘ໂກເນລີໂອທີ່ເປັນນາຍຮ້ອຍຂອງກອງທັບໂຣມໄດ້ສົ່ງພວກເຮົາມາເຊີນເຈົ້າໄປເຮືອນຂອງລາວຢູ່ກາຍຊາເຣຍ.’ ເປໂຕຊວນເຂົາເຈົ້າໃຫ້ພັກຄ້າງຄືນນຳ ແລ້ວມື້ຕໍ່ມາເປໂຕກໍເດີນທາງໄປເມືອງກາຍຊາເຣຍກັບເຂົາເຈົ້າ ແລະມີພີ່ນ້ອງບາງຄົນຈາກເມືອງຢົບປາໄປນຳ.
ເມື່ອໂກເນລີໂອເຫັນເປໂຕ ລາວກໍໝູບລົງສະແດງຄວາມນັບຖື. ແຕ່ເປໂຕບອກວ່າ: ‘ລຸກຂຶ້ນແມ້ ຂ້ອຍກໍເປັນຄົນທຳມະດາຄືກັນກັບເຈົ້າ. ປົກກະຕິແລ້ວຄົນຢິວຈະບໍ່ໄປເຮືອນຂອງຄົນຕ່າງຊາດ ແຕ່ພະເຈົ້າບອກໃຫ້ຂ້ອຍມາເຮືອນຂອງເຈົ້າ. ບອກຂ້ອຍໄດ້ບໍວ່າເຈົ້າເຊີນຂ້ອຍມາເຮັດຫຍັງ?’
ໂກເນລີໂອບອກເປໂຕວ່າ: ‘4 ມື້ກ່ອນຕອນທີ່ຂ້ອຍກຳລັງອະທິດຖານຫາພະເຈົ້າ ກໍມີທູດສະຫວັນອົງໜຶ່ງບອກຂ້ອຍໃຫ້ສົ່ງຄົນໄປເຊີນເຈົ້າມາ. ຂໍເຈົ້າສອນຄຳສອນຂອງພະເຢໂຫວາໃຫ້ພວກເຮົາຟັງແດ່.’ ເປໂຕເວົ້າວ່າ: ‘ຕອນນີ້ຂ້ອຍເຂົ້າໃຈແລ້ວວ່າພະເຈົ້າບໍ່ລຳອຽງ. ເພິ່ນຍອມຮັບທຸກຄົນທີ່ຕ້ອງການນະມັດສະການເພິ່ນ.’ ເປໂຕສອນເຂົາເຈົ້າຫຼາຍເລື່ອງກ່ຽວກັບພະເຢຊູ. ແລ້ວໂກເນລີໂອແລະທຸກຄົນທີ່ຢູ່ໃນເຮືອນກໍໄດ້ຮັບພະລັງບໍລິສຸດແລະຮັບບັບເຕມາ.
“[ພະເຈົ້າ] ຍອມຮັບທຸກຄົນທີ່ຢ້ານຢຳເພິ່ນແລະເຮັດສິ່ງທີ່ຖືກຕ້ອງ ບໍ່ວ່າລາວຈະເປັນຄົນຊາດໃດກໍຕາມ.”—ກິດຈະການ 10:35