2 ໂນອາ
ລາວເຮັດໃຫ້ເຫັນວ່າໂລກໃນສະໄໝນັ້ນຄວນຖືກທຳລາຍ
ຫຼັງຈາກເອໂນກຕາຍ ທູດສະຫວັນບາງອົງທີ່ຢູ່ໃນສະຫວັນໄດ້ກະບົດຕໍ່ພະເຈົ້າ. ທູດສະຫວັນຊົ່ວເຫຼົ່ານີ້ຢາກນອນນຳຜູ້ຍິງທີ່ເປັນມະນຸດ ເຂົາເຈົ້າຈຶ່ງແປງກາຍເປັນມະນຸດ ແລ້ວກໍເອົາຜູ້ຍິງທຸກຄົນທີ່ເຂົາເຈົ້າຢາກໄດ້ມາເປັນເມຍ. ຕໍ່ມາ ເຂົາເຈົ້າກໍມີລູກນຳກັນ ລູກຂອງເຂົາເຈົ້າເປັນລູກຊອດແລະຖືກເອີ້ນວ່າເນຟິນຍ້ອນຄົນພວກນີ້ເປັນຄົນຮ່າງຍັກ ມັກຄວາມຮຸນແຮງ ແລະໂຫດຮ້າຍຫຼາຍ. ຄົນໃນສະໄໝນັ້ນຮຽນແບບຕົວຢ່າງທີ່ບໍ່ດີຂອງພວກເນຟິນ ເຂົາເຈົ້າກໍເລີຍເຮັດຊົ່ວຫຼາຍກວ່າເກົ່າ. ເມື່ອພະເຈົ້າເຫັນແນວນີ້ ເພິ່ນກໍຮູ້ສຶກເສຍໃຈຫຼາຍຍ້ອນສັງຄົມມະນຸດບໍ່ໄດ້ເປັນໄປຕາມທີ່ເພິ່ນຕັ້ງໃຈໄວ້. ແຕ່ມີຜູ້ຊາຍຄົນໜຶ່ງທີ່ແຕກຕ່າງຈາກຄົນອື່ນ ຜູ້ນັ້ນແມ່ນໂນອາເຊິ່ງເປັນເຫຼນຂອງເອໂນກ.
ໂນອາໃຫຍ່ຂຶ້ນມາເປັນຄົນດີຄືກັບເອໂນກ ແລະລາວກໍເຊື່ອຟັງພະເຈົ້າສະເໝີ. ຄຳພີໄບເບິນບອກວ່າ: “ໂນອາເຮັດໃຫ້ພະເຈົ້າພໍໃຈຢູ່ສະເໝີ.” ຕໍ່ມາ ລາວກໍແຕ່ງດອງ ແລ້ວລາວກັບເມຍກໍໄດ້ສອນລູກຊາຍທັງສາມຄົນໃຫ້ເຊື່ອຟັງພະເຢໂຫວາຄືກັນກັບເຂົາເຈົ້າ. ຍ້ອນແນວນີ້ ຄອບຄົວຂອງເຂົາເຈົ້າຈຶ່ງແຕກຕ່າງຈາກຄົນອື່ນໆທີ່ຢູ່ອ້ອມຂ້າງເຂົາເຈົ້າ.
ມີມື້ໜຶ່ງ ພະເຢໂຫວາບອກໂນອາວ່າເພິ່ນຊິທຳລາຍຄົນຊົ່ວທັງໝົດທີ່ຢູ່ເທິງໂລກໂດຍໃຫ້ນ້ຳຖ້ວມໂລກ. ແຕ່ພະເຢໂຫວາກໍຢາກໃຫ້ຄົນດີລອດຊີວິດ ເພິ່ນຈຶ່ງບອກໂນອາໃຫ້ສ້າງເຮືອໃຫຍ່ທີ່ມີຮູບຊົງສີ່ລ່ຽມ. ເຖິງວ່າໂນອາຈະບໍ່ເຄີຍເຫັນນ້ຳຖ້ວມໂລກຈັກເທື່ອຄືກັບທີ່ພະເຢໂຫວາບອກແລະບໍ່ເຄີຍສ້າງເຮືອໃຫຍ່ຂະໜາດນີ້ມາກ່ອນ ແຕ່ລາວກໍໄວ້ໃຈວ່າພະເຢໂຫວາຈະເຮັດຕາມຄຳສັນຍາ ລາວຈຶ່ງເລີ່ມລົງມືສ້າງເຮືອໃຫຍ່ນັ້ນ.
ໂນອາກັບຄອບຄົວຕ້ອງເຈິກັບສັດຕູທີ່ເປັນຕາຢ້ານຫຼາຍເຊິ່ງຊັງເລື່ອງທີ່ເຂົາເຈົ້າປະກາດແລະວຽກທີ່ເຂົາເຈົ້າເຮັດ
ໂນອາກັບຄອບຄົວຕ້ອງມີຄວາມກ້າຫານຫຼາຍແທ້ໆເພື່ອຈະເຮັດວຽກນີ້. ເຂົາເຈົ້າຕ້ອງເຈິກັບການຕໍ່ຕ້ານທີ່ໜັກໆແລະການເຍາະເຍີ້ຍຫຼາຍອີ່ຫຼີ. ນອກຈາກນັ້ນ ຍັງມີພວກທູດສະຫວັນຊົ່ວທີ່ມີລິດເດດເຊິ່ງເປັນສັດຕູທີ່ເປັນຕາຢ້ານຫຼາຍ ແລະຍັງມີພວກເນຟິນລູກຂອງເຂົາເຈົ້າທີ່ມັກທຳຮ້າຍຄົນອື່ນ. ແຕ່ໂນອາກັບເມຍທີ່ເປັນຜູ້ຊ່ວຍທີ່ດີ ແລະລູກຊາຍທັງສາມຄົນກັບເມຍຂອງເຂົາເຈົ້າກໍຍັງເຊື່ອຟັງພະເຢໂຫວາຕໍ່ໆໄປ. ຄອບຄົວຂອງໂນອາທັງແປດຄົນດຸໝັ່ນເຮັດວຽກໃນການສ້າງເຮືອໃຫຍ່ທຸກໆມື້. ເຂົາເຈົ້າສ້າງເຮືອນັ້ນປະມານ 50 ປີ.
ຕອນທີ່ກຳລັງສ້າງເຮືອໃຫຍ່ ໂນອາກໍເຮັດແນວອື່ນໄປນຳ. ຄຳພີໄບເບິນເອີ້ນລາວວ່າ: “ຜູ້ປະກາດແນວທາງທີ່ຖືກຕ້ອງ.” ໂນອາໄດ້ໄປເຕືອນຄົນອື່ນວ່າພະເຈົ້າຈະທຳລາຍຄົນຊົ່ວໂດຍໃຫ້ນ້ຳມາຖ້ວມໂລກ ແລະຄົນໃນຄອບຄົວຂອງລາວກໍໄດ້ເຮັດຕາມຕົວຢ່າງຂອງລາວໂດຍໄປເຕືອນຄົນອື່ນຄືກັນ. ແຕ່ກໍບໍ່ມີໃຜຟັງສິ່ງທີ່ເຂົາເຈົ້າເວົ້າ ແມ່ນແຕ່ຍາດຕິພີ່ນ້ອງກໍບໍ່ມີໃຜຟັງຈັກຄົນເລີຍ. ເຖິງວ່າຜູ້ຄົນຈະໄດ້ຍິນເລື່ອງທີ່ໂນອາປະກາດ ແຕ່ເຂົາເຈົ້າກໍບໍ່ຢາກເຊົາເຮັດຊົ່ວ. ໂນອາມີຄວາມເຊື່ອທີ່ເຂັ້ມແຂງຫຼາຍ ລາວຈຶ່ງແຕກຕ່າງຈາກຄົນອື່ນຫຼາຍແທ້ໆ. ບໍ່ແປກໃຈເລີຍທີ່ຄຳພີໄບເບິນເວົ້າເຖິງໂນອາວ່າ: “ຍ້ອນລາວມີຄວາມເຊື່ອ ລາວຈຶ່ງເຮັດໃຫ້ເຫັນວ່າໂລກໃນສະໄໝນັ້ນຄວນຖືກທຳລາຍ.”
ໃນທີ່ສຸດ ໂນອາກັບຄອບຄົວກໍສ້າງເຮືອໃຫຍ່ແລ້ວໆ. ຕອນນີ້ ເຂົາເຈົ້າກໍມີແຕ່ຕ້ອງສະສົມອາຫານ ນ້ຳ ແລະສິ່ງອື່ນໆທີ່ຈຳເປັນສຳລັບເຂົາເຈົ້າແລະສັດທຸກໂຕທີ່ຈະຢູ່ໃນເຮືອນັ້ນ. ແລ້ວກໍມີສິ່ງທີ່ອັດສະຈັນເກີດຂຶ້ນ. ສັດທຸກຊະນິດທັງໂຕຜູ້ແລະໂຕແມ່ກໍພາກັນຍ່າງເປັນຂະບວນມາຫາເຮືອ. ຈາກນັ້ນ ພວກມັນກໍ “ໄດ້ເຂົ້າໄປໃນເຮືອພ້ອມກັບໂນອາ ທັງໂຕຜູ້ແລະໂຕແມ່ເທື່ອລະຄູ່.”
ພະເຈົ້າບອກໂນອາກຽມໂຕໃຫ້ພ້ອມແລະພາຄອບຄົວເຂົ້າໄປໃນເຮືອຍ້ອນວ່າອີກ 7 ມື້ຝົນຈະເລີ່ມຕົກແລ້ວ. ພວກເຮົານຶກພາບອອກເລີຍວ່າຄອບຄົວນີ້ຄືຊິຫຍຸ້ງຫຼາຍຈົນຮອດວິນາທີສຸດທ້າຍເພື່ອຊິຂົນເຄື່ອງທີ່ຈຳເປັນເຂົ້າໄປໃນເຮືອແລະຈັດທຸກສິ່ງທີ່ຢູ່ໃນນັ້ນໃຫ້ເປັນລະບຽບ. ຕອນນັ້ນ ພວກທີ່ເຍາະເຍີ້ຍເຂົາເຈົ້າກໍຄືຊິເຍາະເຍີ້ຍຫຼາຍຂຶ້ນກວ່າເກົ່າ. ເມື່ອເອົາທຸກຢ່າງທີ່ຈຳເປັນເຂົ້າໄປໃນເຮືອແລ້ວໆແລະຄອບຄົວຂອງໂນອາກໍຢູ່ໃນເຮືອແລ້ວ ພະເຢໂຫວາກໍອັດປະຕູເຮືອໃຫ້ເຂົາເຈົ້າດ້ວຍໂຕເພິ່ນເອງ. ເມື່ອເຫັນແນວນີ້ພວກທີ່ເຍາະເຍີ້ຍກໍປາກບໍ່ອອກແລະບໍ່ກ້າເຍາະເຍີ້ຍເຂົາເຈົ້າອີກ. ຫຼັງຈາກນັ້ນ ຝົນກໍເທລົງມາ ຝົນຕົກແບບນີ້ຕະຫຼອດ 40 ມື້ 40 ຄືນ ແລ້ວນ້ຳກໍສູງຂຶ້ນໆ. ໃນທີ່ສຸດ ນ້ຳກໍຖ້ວມສູງຈົນຫຼິບຈອມພູທຸກໜ່ວຍ. ພະເຢໂຫວາທຳລາຍຄົນຊົ່ວໃຫ້ໝົດໄປຈາກໂລກອີ່ຫຼີ.
ໂນອາກັບຄອບຄົວຢູ່ໃນເຮືອຢ່າງປອດໄພເປັນເວລາໜຶ່ງປີ. ໃນໄລຍະນັ້ນ ນ້ຳກໍຄ່ອຍໆບົກລົງເລື້ອຍໆ. ໃນທີ່ສຸດ ເຮືອກໍໄປຄ້າງຢູ່ພູໜ່ວຍໜຶ່ງ. ແລ້ວພະເຢໂຫວາກໍບອກໂນອາວ່າເຂົາເຈົ້າສາມາດອອກໄປນອກເຮືອໄດ້ແລ້ວ. ເມື່ອຄອບຄົວຂອງໂນອາອອກຈາກເຮືອແລ້ວ ໂນອາກໍໄດ້ສ້າງແທ່ນບູຊາອັນໜຶ່ງໃຫ້ພະເຢໂຫວາ ແລ້ວກໍເຜົາເຄື່ອງບູຊາໃຫ້ເພິ່ນ ແລະຂອບໃຈເພິ່ນທີ່ຊ່ວຍຊີວິດເຂົາເຈົ້າໃຫ້ລອດ. ພະເຢໂຫວາໄດ້ສັນຍາວ່າຈະບໍ່ເຮັດໃຫ້ນ້ຳຖ້ວມໂລກອີກແລະໃຫ້ມີຮຸ້ງຢູ່ເທິງຟ້າເພື່ອເປັນສັນຍາລັກຢືນຢັນຄຳສັນຍາຂອງເພິ່ນ.
ເຮົາທຸກຄົນໃນທຸກມື້ນີ້ກໍເປັນລູກຫຼານຂອງຄອບຄົວໂນອາ ເຮົາຈຶ່ງມີເຫດຜົນແທ້ໆທີ່ຈະຂອບໃຈເຂົາເຈົ້າທີ່ກ້າຫານແລະກ້າໃຊ້ຊີວິດແຕກຕ່າງຈາກຄົນຊົ່ວໃນສະໄໝນັ້ນ.
ອ່ານເລື່ອງຂອງລາວຢູ່ຂໍ້ຄຳພີເຫຼົ່ານີ້:
ໃຫ້ລົມກັນວ່າ:
ໂນອາສະແດງຄວາມກ້າຫານແນວໃດ?
ຄົ້ນຄວ້າຫຼາຍຂຶ້ນ
1. ໂລກເປັນແນວໃດໃນສະໄໝກ່ອນນ້ຳຖ້ວມໂລກ? (ຫ02 1/3 ໜ້າ 5 ຫຍໍ້ໜ້າ 3–ໜ້າ 6 ຫຍໍ້ໜ້າ 4-ຊກຈອ)
2. ພະເຈົ້າສັ່ງໂນອາໃຫ້ສ້າງເຮືອຕອນໃດ? ແລະເພິ່ນບອກລາວໃຫ້ຮູ້ວ່ານ້ຳຈະເລີ່ມຖ້ວມໂລກຕອນໃດແທ້ໆ? (ຫ12 15/4 ໜ້າ 23 ຂໍ້ 5-8-ຊກຈອ)
3. ເປັນຫຍັງເຮົາຈຶ່ງເຊື່ອໄດ້ວ່າເຄີຍມີນ້ຳຖ້ວມໂລກແທ້ໆ? (ວຊພຖຕ ບົດຄວາມທີ 156 ຫຍໍ້ໜ້າ 2-5 ແລະຂອບ-ຊກຈອ) ຮູບ ກ
Historic Collection/Alamy Stock Photo
ຮູບ ກ: ເລື່ອງເລົ່າເກົ່າແກ່ຂອງຄົນຮິນດູບອກວ່າມີຜູ້ຊາຍຄົນໜຶ່ງໄດ້ສ້າງເຮືອເພື່ອຈະລອດຈາກນ້ຳຖ້ວມໂລກ. ເມື່ອລາວລອດຊີວິດ ລາວກໍເຜົາເຄື່ອງບູຊາ. ຈາກນັ້ນ ລາວກໍໄດ້ກາຍເປັນບັນພະບຸລຸດຂອງມະນຸດທຸກຄົນ.
4. ເກີດຫຍັງຂຶ້ນຫຼັງຈາກນ້ຳຖ້ວມໂລກຜ່ານໄປ 100 ກວ່າປີ ແລະສິ່ງນັ້ນສົ່ງຜົນແນວໃດຕໍ່ໂນອາເຊິ່ງເຖົ້າຫຼາຍແລ້ວ? (it “ໂນອາ” ຈຸດທີ 1 ຫຍໍ້ໜ້າ 12-ຊກຈອ) ຮູບ ຂ
ຮູບຂ
ຄິດເຖິງສິ່ງທີ່ເຈົ້າຈະເອົາໄປໃຊ້
ສະໄໝຂອງເຮົາຄ້າຍຄືກັບສະໄໝຂອງໂນອາແນວໃດ? (ມທ. 24:36-39)
ຕົວຢ່າງຂອງໂນອາສອນເຈົ້າແນວໃດໃນເລື່ອງ . . .
ການຈັດເວລາຢ່າງດີ? ຮູບ ຄ
ຮູບຄ
ການເປັນຄົນດຸໝັ່ນ? ຮູບ ງ
ຮູບງ
ການເປັນຄົນອົດທົນ? ຮູບ ຈ
ຮູບຈ
ໃນຊີວິດຂອງເຈົ້າ ເຈົ້າຈະກ້າຫານຄືກັບໂນອາໄດ້ແນວໃດ?
ເບິ່ງພາບໃຫ້ກວ້າງຂຶ້ນ
ເລື່ອງນີ້ສອນຫຍັງຂ້ອຍກ່ຽວກັບພະເຢໂຫວາ?
ເລື່ອງນີ້ກ່ຽວຂ້ອງແນວໃດກັບຄວາມຕ້ອງການຂອງພະເຢໂຫວາ?
ຕອນທີ່ໂນອາຖືກປຸກໃຫ້ຄືນມາຈາກຕາຍ ຂ້ອຍຢາກຖາມຫຍັງລາວ?
ຮຽນຮູ້ຕື່ມອີກ
ໃຫ້ມາເບິ່ງວ່າພໍ່ຄົນໜຶ່ງພະຍາຍາມຫຼາຍສ່ຳໃດເພື່ອຈະຮຽນແບບໂນອາ.
ຮຽນແບບຄົນທີ່ມີຄວາມເຊື່ອ ບໍ່ແມ່ນຄົນທີ່ບໍ່ມີ—ໂນອາ ບໍ່ແມ່ນຄົນອື່ນໆໃນສະໄໝຂອງລາວ (2:57)
ຊ່ວຍລູກຂອງເຈົ້າໃຫ້ຮຽນຈາກເລື່ອງຂອງໂນອາ.
“ໂນອາມີຄວາມເຊື່ອໃນພະເຈົ້າ” (ijwis ບົດຄວາມທີ 18-ຊກຈອ)