ຄຳຖາມຈາກຜູ້ອ່ານ
ເມື່ອຄິດເຖິງຄຳສັ່ງໃນຄຳພີໄບເບິນກ່ຽວກັບການໃຊ້ເລືອດຢ່າງຖືກຕ້ອງ ພະຍານພະເຢໂຫວາມີທັດສະນະແນວໃດໃນເລື່ອງການໃຊ້ເລືອດຂອງໂຕເອງເພື່ອປິ່ນປົວທາງການແພດ?
ແທນທີ່ຈະຕັດສິນໃຈໂດຍອາໄສສະເພາະແຕ່ຄວາມມັກສ່ວນໂຕຫຼືຄຳແນະນຳບາງຢ່າງທາງການແພດ ຄລິດສະຕຽນແຕ່ລະຄົນຄວນພິຈາລະນາຢ່າງຈິງຈັງໃນສິ່ງທີ່ຄຳພີໄບເບິນບອກ. ນີ້ເປັນເລື່ອງລະຫວ່າງລາວກັບພະເຢໂຫວາ.
ພະເຢໂຫວາຜູ້ທີ່ສ້າງຊີວິດເຮົາໄດ້ບອກເຮົາຢ່າງຈະແຈ້ງວ່າບໍ່ໃຫ້ກິນເລືອດ. (ປະຖົມມະການ 9:3, 4) ໃນກົດໝາຍທີ່ພະເຈົ້າໃຫ້ຊາດອິດສະຣາເອນບູຮານ ເພິ່ນບອກໃຫ້ຮູ້ວ່າຄວນໃຊ້ເລືອດສຳລັບຫຍັງເພາະເລືອດໝາຍເຖິງຊີວິດ. ເພິ່ນບອກວ່າ: “ຊີວິດຂອງຄົນແລະສັດທຸກຊະນິດຢູ່ໃນເລືອດ. ເຮົາໃຫ້ເລືອດກັບພວກເຈົ້າເພື່ອໃຫ້ພວກເຈົ້າເອົາໄປຊິດໃສ່ແທ່ນບູຊາແລະໄດ້ຮັບການຍົກໂທດ.” ຖ້າຄົນໜຶ່ງຂ້າສັດເພື່ອເປັນອາຫານເດຈະເປັນແນວໃດ? ພະເຈົ້າບອກວ່າ: “ລາວຈະຕ້ອງໃຫ້ເລືອດສັດນັ້ນໄຫຼອອກຈົນໝົດແລະເອົາດິນຖົມໄວ້.”a (ລະບຽບພວກເລວີ 17:11, 13) ພະເຢໂຫວາເວົ້າຢ້ຳຄຳສັ່ງຂໍ້ນີ້ຊ້ຳແລ້ວຊ້ຳອີກ. (ພະບັນຍັດ 12:16, 24; 15:23) ປຶ້ມຊື່ຊອນຊິໂນ ຄຸມາດສ໌ ຂອງຄົນຢິວບອກວ່າ: “ຕ້ອງບໍ່ເກັບເລືອດໄວ້ ແຕ່ໃຫ້ເທລົງດິນເພື່ອບໍ່ໃຫ້ໃຜເອົາມາກິນ”. ຄົນອິດສະຣາເອນບໍ່ຄວນເກັບເລືອດ ແລະໃຊ້ເລືອດຂອງສິ່ງທີ່ມີຊີວິດອື່ນ ຍ້ອນຊີວິດເຫຼົ່ານັ້ນເປັນຂອງພະເຈົ້າ.
ເຖິງວ່າກົດໝາຍຂອງໂມເຊຈະຖືກຍົກເລີກເມື່ອເມຊີອາຕາຍ ແຕ່ທັດສະນະຂອງພະເຈົ້າໃນເລື່ອງຄວາມສັກສິດຂອງເລືອດຍັງຄືເກົ່າ. ໂດຍໄດ້ຮັບການກະຕຸ້ນຈາກພະລັງບໍລິສຸດຂອງພະເຈົ້າ ພວກອັກຄະສາວົກຈຶ່ງສັ່ງຄລິດສະຕຽນໃຫ້ ‘ງົດເວັ້ນຈາກເລືອດ.’ ເລື່ອງນີ້ຮ້າຍແຮງຫຼາຍແລະບໍ່ຄວນຖືເບົາ. ຄຳສັ່ງນີ້ສຳຄັນສ່ຳກັບຄຳສັ່ງທີ່ບອກໃຫ້ງົດເວັ້ນຈາກການຜິດສິນລະທຳທາງເພດຫຼືການຂາບໄຫວ້ຮູບບູຊາ. (ກິດຈະການ 15:28, 29; 21:25) ເມື່ອການບໍລິຈາກເລືອດແລະການໃສ່ເລືອດເປັນເລື່ອງທຳມະດາຫຼັງຈາກສົງຄາມໂລກຄັ້ງທີ 2 ພະຍານພະເຢໂຫວາເຂົ້າໃຈວ່າການເຮັດແບບນີ້ຂັດກັບຄຳສອນຂອງພະເຈົ້າ.b
ບາງເທື່ອທ່ານໝໍຈະແນະນຳຄົນປ່ວຍໃຫ້ຝາກເລືອດຂອງໂຕເອງໄວ້ຫຼາຍອາທິດກ່ອນການຜ່າຕັດ (ການບໍລິຈາກເລືອດໂຕເອງກ່ອນການຜ່າຕັດຫຼື PAD) ເພື່ອໝໍຈະສາມາດເອົາເລືອດມາໃຊ້ໃນລະຫວ່າງຜ່າຕັດໄດ້ຖ້າຈຳເປັນ. ແຕ່ການກັກເກັບເລືອດແລະການໃສ່ເລືອດຕາມວິທີນີ້ຂັດແຍ່ງໂດຍກົງກັບທີ່ເວົ້າໄວ້ໃນປຶ້ມລະບຽບພວກເລວີແລະພະບັນຍັດ. ດັ່ງນັ້ນ ບໍ່ຄວນເກັບເລືອດໄວ້ ແຕ່ຕ້ອງເທລົງດິນ ເຊິ່ງໝາຍເຖິງເລືອດນັ້ນຈະຖືກສົ່ງຄືນໃຫ້ພະເຈົ້າ. ເຖິງແມ່ນວ່າທຸກມື້ນີ້ກົດໝາຍຂອງໂມເຊຈະບໍ່ມີຜົນບັງຄັບໃຊ້ແລ້ວ ແຕ່ພະຍານພະເຢໂຫວາກໍນັບຖືຫຼັກການທີ່ພະເຈົ້າໃຫ້ໄວ້ໃນພະບັນຍັດແລະເຂົາເຈົ້າກໍຕັ້ງໃຈທີ່ຈະ ‘ງົດເວັ້ນຈາກເລືອດ.’ ດັ່ງນັ້ນ ເຮົາບໍ່ບໍລິຈາກເລືອດ ຫຼືບໍ່ເກັບເລືອດຂອງເຮົາທີ່ຄວນ ‘ເທລົງດິນ’ ໄວ້ສຳລັບໃສ່ໃຫ້ໂຕເອງ ເພາະການເຮັດແບບນັ້ນຂັດກັບກົດໝາຍຂອງພະເຈົ້າ.
ແຕ່ກໍມີວິທີການບາງຢ່າງທີ່ທ່ານໝໍເຮັດກັບເລືອດຂອງເຮົາທີ່ບໍ່ໄດ້ຂັດແຍ່ງໂດຍກົງກັບຫຼັກການໃນຄຳພີໄບເບິນ. ຕົວຢ່າງເຊັ່ນ: ຄລິດສະຕຽນຫຼາຍຄົນຍອມໃຫ້ເອົາເລືອດຂອງໂຕເອງອອກໄປຈຳນວນໜຶ່ງເພື່ອກວດຫຼືວິເຄາະ ເຊິ່ງຫຼັງຈາກນັ້ນຕົວຢ່າງເລືອດນັ້ນກໍຈະຖືກເອົາໄປຖິ້ມ. ແຕ່ກໍມີການປິ່ນປົວທາງການແພດອື່ນໆທີ່ເຮົາຕ້ອງໄດ້ຄິດດີໆກ່ອນທີ່ຈະປິ່ນປົວ.
ຕົວຢ່າງເຊັ່ນ: ຂະບວນການຫຼຸດຄວາມເຂັ້ມຂຸ້ນຂອງເລືອດ. ລະຫວ່າງການຜ່າຕັດ ເລືອດຂອງຜູ້ປ່ວຍບາງສ່ວນອາດຖືກປ່ຽນທາງໄຫຼວຽນໃຫ້ຜ່ານນອກຮ່າງກາຍໄປເຂົ້າເຄື່ອງອຸປະກອນທາງການແພດ. ເລືອດທີ່ຍັງຢູ່ໃນຮ່າງກາຍຜູ້ປ່ວຍຈະເຮັດໃຫ້ເຈືອຈາງ. ຫຼັງຈາກນັ້ນ ເລືອດຂອງລາວເຊິ່ງຢູ່ໃນເສັ້ນທາງການໄຫຼນອກຮ່າງກາຍຈະຖືກໃສ່ກັບເຂົ້າມາໃນໂຕລາວອີກເທື່ອໜຶ່ງ ນີ້ເຮັດໃຫ້ປະລິມານເມັດເລືອດຂອງລາວໃກ້ຄຽງກັບຕອນທີ່ປົກກະຕິ. ຄ້າຍຄືກັນ ອາດມີການເກັບເລືອດທີ່ໄຫຼອອກຈາກບາດແຜແລະຕອງເພື່ອຈະໃສ່ເຊວເມັດເລືອດແດງກັບໄປສູ່ໂຕຜູ້ປ່ວຍໄດ້ ນີ້ເອີ້ນວ່າການເກັບຮັກສາເຊວເມັດເລືອດ. ຫຼືໃນຂະບວນການອີກຢ່າງໜຶ່ງ ເລືອດອາດຖືກເຮັດໃຫ້ໄຫຼເຂົ້າສູ່ເຄື່ອງມືຢ່າງໜຶ່ງເຊິ່ງເຮັດວຽກຄ້າຍຄືກັບ ຫົວໃຈ ປອດ ຫຼືໝາກໄຂ່ຫຼັງ. ຈາກນັ້ນ ເລືອດຈາກເຄື່ອງມືນັ້ນຈະໄຫຼກັບເຂົ້າສູ່ໂຕຜູ້ປ່ວຍ. ໃນອີກຂະບວນການໜຶ່ງ ເລືອດຈະຖືກສົ່ງເຂົ້າໄປໃນເຄື່ອງແຍກ ເພື່ອກຳຈັດເລືອດສ່ວນທີ່ເປັນອັນຕະລາຍຫຼືເສຍຫາຍອອກໄປ ຫຼືອາດມີເປົ້າໝາຍເພື່ອແຍກສ່ວນປະກອບບາງຢ່າງຂອງເລືອດອອກແລະໃຊ້ສ່ວນນັ້ນກັບຮ່າງກາຍສ່ວນອື່ນ. ນອກຈາກນີ້ ໃນບາງກໍລະນີ ທ່ານໝໍອາດເກັບຕົວຢ່າງຂອງເລືອດແລະເຕີມສານບາງຢ່າງເຂົ້າໄປໃນເລືອດເພື່ອເຮັດການກວດສອບບາງຢ່າງ ແລ້ວກໍເອົາເລືອດນັ້ນກັບເຂົ້າສູ່ຮ່າງກາຍຂອງຜູ້ປ່ວຍ.
ມີການປິ່ນປົວຫຼາຍວິທີແລະທ່ານໝໍກໍຄິດຄົ້ນວິທີປິ່ນປົວແບບໃໝ່ໆຕະຫຼອດ. ບໍ່ແມ່ນໜ້າທີ່ຂອງເຮົາທີ່ຈະຕັດສິນໃຈແທນຄົນອື່ນວ່າຈະຕ້ອງເຮັດແນວໃດໃນແຕ່ລະກໍລະນີ. ເມື່ອຄລິດສະຕຽນຄົນໜຶ່ງຕ້ອງໄດ້ຮັບການປິ່ນປົວ ລາວຕ້ອງຕັດສິນໃຈເອງວ່າຈະຍອມຮັບການປິ່ນປົວແບບໃດ. ສະນັ້ນ ກ່ອນຮັບການປິ່ນປົວ ລາວຄວນລົມກັບທ່ານໝໍໃຫ້ແນ່ໃຈວ່າຈະມີການນຳໃຊ້ເລືອດຂອງລາວແນວໃດແດ່ໃນລະຫວ່າງການປິ່ນປົວ. ລາວຕ້ອງຕັດສິນໃຈໂດຍທີ່ບໍ່ຂັດກັບໃຈຮູ້ຜິດຮູ້ຖືກຂອງລາວ. (ເບິ່ງຂອບ).
ຄລິດສະຕຽນຕ້ອງຈື່ໄວ້ສະເໝີວ່າເຂົາເຈົ້າໄດ້ສັນຍາກັບພະເຢໂຫວາວ່າຈະຮັບໃຊ້ເພິ່ນແລະ ‘ຮັກເພິ່ນສຸດຫົວໃຈ ສຸດຊີວິດ ສຸດກຳລັງ ແລະສຸດຄວາມຄິດ.’ (ລູກາ 10:27) ບໍ່ຄືກັບຄົນສ່ວນຫຼາຍໃນໂລກ ພະຍານພະເຢໂຫວາຖືວ່າການເຊື່ອຟັງພະເຈົ້າແລະໄດ້ເປັນໝູ່ກັບເພິ່ນເປັນສິ່ງສຳຄັນທີ່ສຸດໃນຊີວິດເຂົາເຈົ້າ. ພະເຢໂຫວາຜູ້ໃຫ້ຊີວິດສະໜັບສະໜູນເຮົາທຸກຄົນໃຫ້ມີຄວາມເຊື່ອໃນພະເຢຊູຜູ້ທີ່ໄດ້ສະລະເລືອດຂອງເພິ່ນເພື່ອພວກເຮົາ ເພິ່ນບອກວ່າ: “ຜູ້ນັ້ນຈ່າຍຄ່າໄຖ່ດ້ວຍເລືອດຂອງເພິ່ນເພື່ອປົດປ່ອຍພວກເຮົາ ຄວາມຜິດຂອງພວກເຮົາຈຶ່ງໄດ້ຮັບການຍົກໂທດ. ນີ້ສະແດງວ່າພະເຈົ້າມີຄວາມກະລຸນາທີ່ຍິ່ງໃຫຍ່ແທ້ໆ.”—ເອເຟໂຊ 1:7
[ຂໍ້ຄວາມໄຂເງື່ອນ]
a ສາດສະດາຈານແຟຣ໋ງ ເອັດຈ໌. ກໍແມນ ຂຽນວ່າ: “ເມື່ອຄົນໜຶ່ງເທເລືອດສັດທີ່ຖືກຂ້າລົງດິນ ລາວກໍສະແດງຄວາມນັບຖືຕໍ່ຊີວິດສັດ ແລະຍັງເຮັດໃຫ້ເຫັນວ່າລາວເຊື່ອຟັງແລະສະແດງຄວາມນັບຖືຕໍ່ພະເຈົ້າຜູ້ສ້າງນຳ.”
b ຫໍສັງເກດການ ສະບັບ 1 ກໍລະກົດ 1951 (ພາສາອັງກິດ) ຕອບຄຳຖາມສຳຄັນກ່ຽວກັບເລື່ອງນີ້ ເຊິ່ງເຮັດໃຫ້ຮູ້ວ່າເປັນຫຍັງການໃສ່ເລືອດທີ່ໄດ້ຮັບບໍລິຈາກເປັນເລື່ອງຜິດ.
[ຂອບ]
ຄຳຖາມທີ່ເຈົ້າຈະຖາມໂຕເອງ
ຖ້າຈະມີການເຮັດໃຫ້ເລືອດຂ້ອຍໄຫຼວຽນອອກນອກຮ່າງກາຍແລະເຖິງຂັ້ນຢຸດໄຫຼຊ່ວງໜຶ່ງ ໃຈຮູ້ຜິດຮູ້ຖືກຂອງຂ້ອຍຈະຍອມໃຫ້ຂ້ອຍເບິ່ງວ່າເລືອດນັ້ນຍັງເປັນສ່ວນໜຶ່ງຂອງໂຕຂ້ອຍບໍ ຫຼືຂ້ອຍຮູ້ສຶກວ່າຕ້ອງ ‘ເທເລືອດນັ້ນລົງດິນ’ ເຊິ່ງໝາຍຄວາມວ່າຂ້ອຍຕ້ອງຖິ້ມເລືອດນັ້ນ?
ຈາກສິ່ງທີ່ຂ້ອຍໄດ້ຮຽນຈາກຄຳພີໄບເບິນ ຂ້ອຍຈະຮູ້ສຶກວ່າເປັນເລື່ອງຜິດຫຼືບໍ່ຖ້າເລືອດຂອງຂ້ອຍບາງສ່ວນຖືກເອົາອອກຈາກຮ່າງກາຍໃນລະຫວ່າງທີ່ປິ່ນປົວເພື່ອເອົາມາເຮັດຫຍັງບາງຢ່າງ ແລ້ວກໍເອົາເຂົ້າສູ່ຮ່າງກາຍຂ້ອຍອີກເທື່ອໜຶ່ງ?