ຖາມ-ຕອບເລື່ອງຄຳພີໄບເບິນ
ບາບຂອງເຮົາຈະໄດ້ຮັບການອະໄພບໍ?
ການເຮັດໃຫ້ພະເຈົ້າພໍໃຈບໍ່ແມ່ນເລື່ອງຍາກເກີນໄປ
ຄຳພີໄບເບິນບອກວ່າມະນຸດທຸກຄົນເປັນຄົນບາບ. ເຮົາໄດ້ຮັບແນວໂນ້ມທີ່ຜິດບາບມາຈາກອາດາມ ມະນຸດຄົນທຳອິດ. ຍ້ອນແນວນີ້ ບາງເທື່ອເຮົາຈຶ່ງເຮັດສິ່ງທີ່ບໍ່ດີແລ້ວກໍມາເສຍໃຈພາຍຫຼັງ. ພະເຢຊູຄລິດລູກຂອງພະເຈົ້າໄດ້ຕາຍເພື່ອລົບລ້າງບາບຂອງເຮົາ. ຄ່າໄຖ່ຂອງພະເຢຊູເຊິ່ງເປັນຂອງຂອງຂວັນຈາກພະເຈົ້າເຮັດໃຫ້ເຮົາໄດ້ຮັບການອະໄພບາບ.—ອ່ານໂຣມ 3:23, 24
ບາງຄົນໄດ້ເຮັດບາບຮ້າຍແຮງແລະສົງໄສວ່າພະເຈົ້າຈະໃຫ້ອະໄພເຂົາເຈົ້າຫຼືບໍ່. ເຮົາດີໃຈທີ່ຄຳພີໄບເບິນບອກວ່າ: “ເລືອດຂອງພະເຢຊູລູກຂອງພະອົງຈະລົບລ້າງບາບທັງໝົດຂອງພວກເຮົາ.” (1 ໂຢຮັນ 1:7) ເຖິງວ່າເຮົາຈະເຮັດບາບຮ້າຍແຮງ ແຕ່ຖ້າເຮົາມີຄວາມຄິດທີ່ຖືກຕ້ອງແລະກັບໃຈແທ້ໆ ພະເຢໂຫວາກໍເຕັມໃຈໃຫ້ອະໄພເຮົາ.—ອ່ານເອຊາຢາ 1:18
ເຮົາຕ້ອງເຮັດແນວໃດເພື່ອຈະໄດ້ຮັບການອະໄພບາບ?
ຖ້າເຮົາຢາກໃຫ້ພະເຢໂຫວາພະເຈົ້າໃຫ້ອະໄພເຮົາ ເຮົາຕ້ອງຮຽນຮູ້ກ່ຽວກັບເພິ່ນເພື່ອຈະເຂົ້າໃຈຄວາມຄິດ ຄຳແນະນຳ ແລະຂໍ້ຮຽກຮ້ອງຂອງເພິ່ນ. (ໂຢຮັນ 17:3) ພະເຢໂຫວາໃຫ້ອະໄພຢ່າງໃຈກວ້າງຕໍ່ຄົນທີ່ກັບໂຕກັບໃຈແລະພະຍາຍາມປ່ຽນແປງຊີວິດ.—ອ່ານກິດຈະການ 3:19
ການເຮັດໃຫ້ພະເຈົ້າພໍໃຈບໍ່ແມ່ນເລື່ອງຍາກເກີນໄປສຳລັບເຮົາ. ພະເຢໂຫວາເຂົ້າໃຈວ່າເຮົາມີແນວໂນ້ມທີ່ຈະເຮັດບາບໄດ້ງ່າຍ. ເພິ່ນເປັນພະເຈົ້າທີ່ເມດຕາກະລຸນາແລະມີຄວາມຮັກ. ເຈົ້າຢາກຮຽນຮູ້ວິທີທີ່ຈະເຮັດໃຫ້ເພິ່ນພໍໃຈຫຼາຍຂຶ້ນບໍ?—ອ່ານຄຳເພງ 103:13, 14