ບົດຄວາມສຶກສາທີ 48
“ຂໍໃຫ້ຈັດການສິ່ງທີ່ພວກເຈົ້າເລີ່ມໄວ້ໃຫ້ສຳເລັດ”
“ຂໍໃຫ້ຈັດການສິ່ງທີ່ພວກເຈົ້າເລີ່ມໄວ້ໃຫ້ສຳເລັດ.”—2 ໂກ. 8:11, ລ.ມ.
ເພງ 35 “ເບິ່ງໃຫ້ອອກວ່າສິ່ງໃດສຳຄັນກວ່າ”
ໃຈຄວາມສຳຄັນa
1. ພະເຢໂຫວາຍອມໃຫ້ເຮົາເຮັດຫຍັງ?
ພະເຢໂຫວາຍອມໃຫ້ເຮົາເລືອກໄດ້ວ່າຈະໃຊ້ຊີວິດແບບໃດ. ພະອົງສອນເຮົາໃຫ້ຮູ້ວິທີເລືອກຢ່າງດີ ແລະພະອົງກໍຈະຊ່ວຍເຮົາໃຫ້ປະສົບຜົນສຳເລັດຖ້າເຮົາຕັດສິນໃຈໃນແບບທີ່ພະອົງພໍໃຈ. (ເພງ. 119:173) ດັ່ງນັ້ນ ຖ້າເຮົາເຮັດຕາມຄຳແນະນຳທີ່ສະຫຼາດໃນຄຳພີໄບເບິນ ເຮົາກໍຈະຕັດສິນໃຈໄດ້ດີຂຶ້ນ.—ເຫບ. 5:14
2. ຫຼັງຈາກທີ່ເຮົາຕັດສິນໃຈແລ້ວ ເຮົາອາດເຈິບັນຫາຫຍັງ?
2 ເຖິງວ່າເຮົາຈະຕັດສິນໃຈດີແລ້ວ ແຕ່ເຮົາອາດຮູ້ສຶກວ່າຍາກທີ່ຈະເຮັດໃຫ້ສຳເລັດຕາມທີ່ຕັ້ງໃຈໄວ້. ຕົວຢ່າງ: ພີ່ນ້ອງຊາຍໜຸ່ມຄົນໜຶ່ງຕັດສິນໃຈຈະອ່ານຄຳພີໄບເບິນໃຫ້ຈົບໝົດເຫຼັ້ມ ແຕ່ເມື່ອອ່ານໄດ້ບໍ່ເທົ່າໃດອາທິດລາວກໍເຊົາອ່ານ. ພີ່ນ້ອງຍິງຄົນໜຶ່ງຕັດສິນໃຈທີ່ຈະເປັນໄພໂອເນຍປະຈຳ ແຕ່ລາວກໍເລື່ອນຕະຫຼອດບໍ່ໄດ້ເລີ່ມຈັກເທື່ອ. ຄະນະຜູ້ດູແລຕັດສິນໃຈວ່າຈະບຳລຸງລ້ຽງພີ່ນ້ອງໃຫ້ຫຼາຍຂຶ້ນ ແຕ່ຜ່ານໄປຫຼາຍເດືອນແລ້ວກໍຍັງບໍ່ໄດ້ເຮັດຈັກເທື່ອ. ສະຖານະການເຫຼົ່ານີ້ອາດແຕກຕ່າງກັນ ແຕ່ກໍມີບາງຢ່າງທີ່ຄືກັນກໍຄືພວກເຂົາໄດ້ຕັດສິນໃຈແລ້ວ ແຕ່ຍັງບໍ່ໄດ້ເຮັດໃຫ້ສຳເລັດ. ຄລິດສະຕຽນສະຕະວັດທຳອິດໃນເມືອງໂກລິນໂທກໍເຈິບັນຫາທີ່ຄ້າຍຄືກັນ. ໃຫ້ເຮົາມາພິຈາລະນາວ່າ ເຮົາສາມາດຮຽນຮູ້ຫຍັງແດ່ຈາກພວກເຂົາ.
3. ພີ່ນ້ອງໃນເມືອງໂກລິນໂທໄດ້ຕັດສິນໃຈເຮັດຫຍັງ ແຕ່ເກີດຫຍັງຂຶ້ນ?
3 ປະມານປີ ຄ.ສ 55 ຄລິດສະຕຽນໃນເມືອງໂກລິນໂທໄດ້ຕັດສິນໃຈໃນເລື່ອງໜຶ່ງທີ່ສຳຄັນ. ພວກເຂົາຮູ້ວ່າພີ່ນ້ອງໃນເມືອງເຢຣຶຊາເລມແລະຢູເດທຸກຍາກແລະລຳບາກຫຼາຍ ແລະຫຼາຍປະຊາຄົມໄດ້ພາກັນລວບລວມເງິນບໍລິຈາກເພື່ອຊ່ວຍພີ່ນ້ອງຢູ່ຫັ້ນ. ພີ່ນ້ອງໃນເມືອງໂກລິນໂທໃຈດີແລະມີຄວາມເອື້ອເຟື້ອເພື່ອແຜ່ຫຼາຍ ພວກເຂົາຈຶ່ງຕັດສິນໃຈທີ່ຈະຊ່ວຍພີ່ນ້ອງເຫຼົ່ານັ້ນຄືກັນແລະໄດ້ຖາມອັກຄະສາວົກໂປໂລວ່າ ພວກເຂົາສາມາດຊ່ວຍຫຍັງໄດ້ແດ່. ໂປໂລສົ່ງຄຳແນະນຳໄປຫາພວກເຂົາແລະແຕ່ງຕັ້ງຕິໂຕໃຫ້ຊ່ວຍເກັບກຳເງິນບໍລິຈາກ. (1 ໂກ. 16:1; 2 ໂກ. 8:6) ສອງສາມເດືອນຜ່ານໄປ ໂປໂລກໍຮູ້ວ່າພີ່ນ້ອງໃນປະຊາຄົມໂກລິນໂທບໍ່ໄດ້ເຮັດຕາມທີ່ບອກໄວ້. ຜົນກໍຄື ພວກເຂົາລວບລວມເງິນບໍລິຈາກບໍ່ທັນທີ່ຈະສົ່ງໄປເມືອງເຢຣຶຊາເລມພ້ອມກັບປະຊາຄົມອື່ນໆ.—2 ໂກ. 9:4, 5
4. ຕາມ 2 ໂກລິນໂທ 8:7, 10, 11 ໂປໂລສະໜັບສະໜູນພີ່ນ້ອງໃນເມືອງໂກລິນໂທໃຫ້ເຮັດຫຍັງ?
4 ພີ່ນ້ອງໃນເມືອງໂກລິນໂທຕັດສິນໃຈໄດ້ດີ ແລະໂປໂລກໍຊົມເຊີຍພວກເຂົາທີ່ມີຄວາມເຊື່ອເຂັ້ມແຂງແລະຢາກສະແດງຄວາມເອື້ອເຟື້ອ. ແຕ່ໂປໂລຍັງຕ້ອງສະໜັບສະໜູນພວກເຂົາໃຫ້ເຮັດສິ່ງທີ່ຕັ້ງໃຈໄວ້ໃຫ້ສຳເລັດຄືກັນ. (ອ່ານ 2 ໂກລິນໂທ 8:7, 10, 11) ປະສົບການຂອງພວກເຂົາສອນເຮົາໃຫ້ຮູ້ວ່າ ແມ່ນແຕ່ຄລິດສະຕຽນທີ່ສັດຊື່ກໍຍັງເຫັນວ່າເປັນເລື່ອງຍາກທີ່ຈະເຮັດສິ່ງທີ່ຕັ້ງໃຈໄວ້ໃຫ້ສຳເລັດ.
5. ເຮົາຈະຕອບຄຳຖາມຫຍັງແດ່?
5 ຄືກັບພີ່ນ້ອງໃນປະຊາຄົມໂກລິນໂທ ເຮົາອາດພົບວ່າເປັນເລື່ອງຍາກທີ່ຈະເຮັດສິ່ງທີ່ຕັດສິນໃຈໄວ້ແລ້ວໃຫ້ສຳເລັດ. ຍ້ອນຫຍັງ? ຍ້ອນເຮົາເປັນຄົນບໍ່ສົມບູນແບບ ເຮົາອາດເລື່ອນມື້ເລື່ອນຍາມຕະຫຼອດ. ຫຼືອາດມີເຫດການທີ່ບໍ່ຄາດຄິດເກີດຂຶ້ນເຊິ່ງເຮັດໃຫ້ຍາກທີ່ຈະເຮັດຕາມສິ່ງທີ່ຕັ້ງໃຈໄວ້. (ຜູ້ປ. 9:11; ໂລມ 7:18) ດັ່ງນັ້ນ ມີຂັ້ນຕອນຫຍັງແດ່ທີ່ເຮົາຄວນເຮັດກ່ອນຕັດສິນໃຈຫຼືເພື່ອປ່ຽນການຕັດສິນໃຈຂອງເຮົາ? ແລະເຮົາຈະເຮັດສິ່ງທີ່ຕັດສິນໃຈໄວ້ຕັ້ງແຕ່ທຳອິດໃຫ້ສຳເລັດໄດ້ແນວໃດ?
ວິທີທີ່ຊ່ວຍໃຫ້ຕັດສິນໃຈໄດ້ຢ່າງຖືກຕ້ອງ
6. ຕອນໃດທີ່ເຮົາອາດຈະຕ້ອງຕັດສິນໃຈໃໝ່?
6 ເຮົາຈະບໍ່ປ່ຽນການຕັດສິນໃຈທີ່ສຳຄັນບາງເລື່ອງ ເຊັ່ນ: ເຮົາຕັດສິນໃຈທີ່ຈະຮັບໃຊ້ພະເຢໂຫວາແລະຕັ້ງໃຈທີ່ຈະສັດຊື່ຕໍ່ຄູ່ແຕ່ງດອງຂອງເຮົາ. (ມັດ. 16:24; 19:6) ແຕ່ກໍມີບາງເລື່ອງທີ່ເຮົາອາດຈະຕ້ອງຕັດສິນໃຈໃໝ່. ຍ້ອນຫຍັງ? ຍ້ອນວ່າສະພາບການປ່ຽນໄປ. ມີຂັ້ນຕອນຫຍັງແດ່ທີ່ຈະຊ່ວຍເຮົາໃຫ້ຕັດສິນໃຈໄດ້ດີທີ່ສຸດ?
7. ເຮົາຄວນອະທິດຖານຂໍຫຍັງ ແລະຍ້ອນຫຍັງ?
7 ອະທິດຖານຂໍສະຕິປັນຍາ. ພະເຢໂຫວາດົນໃຈໃຫ້ຢາໂກໂບຂຽນວ່າ: “ຖ້າໃຜໃນພວກເຈົ້າຂາດສະຕິປັນຍາ ໃຫ້ພະຍາຍາມຂໍຈາກພະເຈົ້າຕໍ່ໆໄປ . . . ເພາະພະເຈົ້າເຕັມໃຈໃຫ້ທຸກຄົນຢ່າງໃຈກວ້າງ.” (ຢໂກ. 1:5, ລ.ມ.) ໃນບາງເລື່ອງເຮົາຕ້ອງຍອມຮັບວ່າ ເຮົາ “ຂາດສະຕິປັນຍາ.” ດັ່ງນັ້ນ ເຮົາຕ້ອງໝາຍເພິ່ງພະເຢໂຫວາໃຫ້ຊ່ວຍເຮົາທັງຕອນທີ່ຕັດສິນໃຈ ແລະຕອນທີ່ຕ້ອງປ່ຽນການຕັດສິນໃຈ. ຖ້າເຮົາເຮັດແບບນັ້ນ ພະເຢໂຫວາກໍຈະຊ່ວຍເຮົາໃຫ້ຕັດສິນໃຈໄດ້ຢ່າງສະຫຼາດ.
8. ເຮົາຄວນຄົ້ນຄວ້າແນວໃດກ່ອນທີ່ຈະຕັດສິນໃຈ?
8 ຄົ້ນຄວ້າຢ່າງລະອຽດ. ໃຫ້ເຮົາຄົ້ນຄວ້າຄຳພີໄບເບິນ ອ່ານປຶ້ມຕ່າງໆທີ່ມາຈາກອົງການຂອງພະເຢໂຫວາ ແລະລົມກັບຄົນທີ່ໃຫ້ຄຳແນະນຳທີ່ດີກັບເຈົ້າໄດ້. (ສຸພາ. 20:18) ທັງໝົດນີ້ເປັນສິ່ງສຳຄັນທີ່ເຈົ້າຕ້ອງເຮັດກ່ອນຕັດສິນໃຈທີ່ຈະປ່ຽນວຽກ ຍ້າຍເຮືອນຫຼືເລືອກວ່າຈະຮຽນຫຍັງເພື່ອຈະມີເງິນລ້ຽງດູຕົວເອງແລະຮັບໃຊ້ພະເຢໂຫວາໄດ້ຕໍ່ໆໄປ.
9. ຖ້າເຮົາສັດຊື່ຕໍ່ຕົວເອງຈະເປັນປະໂຫຍດແນວໃດ?
9 ຄິດເຖິງເຫດຜົນຂອງເຈົ້າ. ພະເຢໂຫວາສົນໃຈເຫດຜົນທີ່ເຮົາເຮັດສິ່ງຕ່າງໆ. (ສຸພາ. 16:2) ພະອົງຢາກໃຫ້ເຮົາເປັນຄົນສັດຊື່ໃນທຸກເລື່ອງ. ດັ່ງນັ້ນ ເຮົາຕ້ອງສັດຊື່ຕໍ່ຕົວເອງແລະຕໍ່ຄົນອື່ນກ່ຽວກັບເຫດຜົນທີ່ເຮົາຕັດສິນໃຈ. ຖ້າເຮົາບໍ່ສັດຊື່ແທ້ໆ ມັນກໍຍາກທີ່ເຮົາຈະເຮັດຕາມສິ່ງທີ່ຕັ້ງໃຈໄວ້ໃຫ້ສຳເລັດ. ຕົວຢ່າງ: ພີ່ນ້ອງຊາຍຄົນໜຶ່ງອາດຕັດສິນໃຈເປັນໄພໂອເນຍປະຈຳ. ແຕ່ຫຼັງຈາກນັ້ນ ລາວກໍຮູ້ສຶກວ່າຍາກທີ່ຈະເຮັດເວລາໃຫ້ໄດ້ຄົບຊົ່ວໂມງ ແລະຮູ້ສຶກບໍ່ມີຄວາມສຸກກັບວຽກຮັບໃຊ້. ລາວອາດຄິດວ່າເຫດຜົນທີ່ລາວເປັນໄພໂອເນຍກໍຍ້ອນຢາກເຮັດໃຫ້ພະເຢໂຫວາພໍໃຈ. ແຕ່ອາດເປັນໄປໄດ້ບໍທີ່ແທ້ຈິງແລ້ວເຫດຜົນທີ່ລາວເຮັດກໍເພື່ອຢາກໃຫ້ພໍ່ແມ່ຫຼືຄົນອື່ນພໍໃຈ?
10. ອັນໃດເປັນສິ່ງສຳຄັນເພື່ອຈະປ່ຽນແປງຕົວເອງ?
10 ຂໍໃຫ້ຄິດເຖິງຕົວຢ່າງຂອງນັກສຶກສາຄຳພີໄບເບິນຄົນໜຶ່ງທີ່ຕັດສິນໃຈເຊົາສູບຢາ. ທຳອິດ ລາວກໍບໍ່ສູບຢາປະມານໜຶ່ງຫຼືສອງອາທິດ ແຕ່ຫຼັງຈາກນັ້ນລາວກໍກັບໄປສູບຢາອີກ. ແຕ່ໃນທີ່ສຸດ ລາວກໍເຊົາສູບຢາໄດ້! ສິ່ງທີ່ຊ່ວຍລາວໃຫ້ເອົາຊະນະນິດໄສທີ່ບໍ່ດີໄດ້ກໍຄື ຄວາມຮັກທີ່ລາວມີຕໍ່ພະເຢໂຫວາແລະຢາກເຮັດໃຫ້ພະອົງພໍໃຈ.—ໂກໂລ. 1:10; 3:23
11. ເປັນຫຍັງເຮົາຕ້ອງມີເປົ້າໝາຍຊັດເຈນ?
11 ຕັ້ງເປົ້າໝາຍທີ່ຊັດເຈນ. ຖ້າເປົ້າໝາຍຂອງເຈົ້າຊັດເຈນ ເຈົ້າກໍແຮ່ງຈະເຮັດຕາມສິ່ງທີ່ຕັ້ງໃຈໄວ້ໃຫ້ສຳເລັດໄດ້ງ່າຍຂຶ້ນ. ຕົວຢ່າງ: ເຈົ້າອາດຕັດສິນໃຈທີ່ຈະອ່ານຄຳພີໄບເບິນຫຼາຍຂຶ້ນ. ແຕ່ຖ້າເຈົ້າບໍ່ມີຕາຕະລາງທີ່ຊັດເຈນ ເຈົ້າກໍອາດຈະເຮັດຕາມທີ່ຕັ້ງໃຈໄວ້ບໍ່ໄດ້.b ຫຼືຜູ້ເຖົ້າແກ່ໃນປະຊາຄົມອາດຕັດສິນໃຈທີ່ຈະບຳລຸງລ້ຽງພີ່ນ້ອງໃຫ້ຫຼາຍຂຶ້ນ ແຕ່ເມື່ອເວລາຜ່ານໄປພວກເຂົາກໍບໍ່ໄດ້ເຮັດຕາມທີ່ຕັ້ງໃຈໄວ້. ດັ່ງນັ້ນ ເພື່ອຈະເຮັດໃຫ້ສຳເລັດ ພວກເຂົາອາດຖາມຕົວເອງດ້ວຍຄຳຖາມເຫຼົ່ານີ້ ເຊັ່ນ: “ເຮົາໄດ້ກຳນົດແລ້ວບໍວ່າຈະໄປບຳລຸງລ້ຽງພີ່ນ້ອງໃດແດ່? ເຮົາໄດ້ກຳນົດເວລາທີ່ແນ່ນອນແລ້ວບໍວ່າຈະໄປຢາມພວກເຂົາຕອນໃດ?”
12. ເຮົາອາດຈຳເປັນຕ້ອງເຮັດຫຍັງ ແລະຍ້ອນຫຍັງ?
12 ເບິ່ງຕາມຄວາມເປັນຈິງ. ບໍ່ມີໃຜທີ່ຈະມີເວລາ ຊັບສິນເງິນຄຳຫຼືກຳລັງທີ່ຈະເຮັດທຸກສິ່ງທຸກຢ່າງທີ່ຢາກເຮັດໄດ້. ດັ່ງນັ້ນ ເຮົາຕ້ອງເບິ່ງຕາມຄວາມເປັນຈິງແລະມີເຫດຜົນ. ຖ້າຈຳເປັນ ເຈົ້າອາດຕ້ອງຕັດສິນໃຈໃໝ່ເມື່ອເຈົ້າຮູ້ວ່າເຈົ້າບໍ່ສາມາດເຮັດໄດ້. (ຜູ້ປ. 3:6) ສົມມຸດວ່າ ເຈົ້າທວນຄືນການຕັດສິນໃຈແລ້ວ ໄດ້ປັບປ່ຽນຕາມທີ່ຈຳເປັນແລ້ວ ແລະກໍຮູ້ສຶກວ່າເຈົ້າສາມາດເຮັດຕາມທີ່ຕັ້ງໃຈໄດ້. ຕອນນີ້ໃຫ້ເຈົ້າມາເບິ່ງ 5 ຂັ້ນຕອນທີ່ຈະຊ່ວຍເຈົ້າໃຫ້ເຮັດຕາມສິ່ງທີ່ຕັດສິນໃຈໄວ້ແລ້ວໃຫ້ສຳເລັດ.
ຂັ້ນຕອນທີ່ຊ່ວຍເຈົ້າໃຫ້ເຮັດຕາມສິ່ງທີ່ຕັດສິນໃຈໄວ້ໄດ້ສຳເລັດ
13. ເຈົ້າຕ້ອງເຮັດຫຍັງເພື່ອຈະມີກຳລັງທີ່ຈຳເປັນທີ່ຈະເຮັດສິ່ງທີ່ເຈົ້າໄດ້ຕັດສິນໃຈ?
13 ອະທິດຖານຂໍກຳລັງໃຫ້ລົງມືເຮັດ. ພະເຈົ້າສາມາດໃຫ້ເຈົ້າມີ “ກຳລັງເພື່ອຈະເຮັດສິ່ງທີ່ພະອົງພໍໃຈ” ແລະຊ່ວຍເຈົ້າໃຫ້ເຮັດສິ່ງທີ່ຕັດສິນໃຈໄດ້ສຳເລັດ. (ຟີລິບ 2:13, ລ.ມ.) ໃຫ້ອະທິດຖານຂໍພະລັງບໍລິສຸດຈາກພະເຢໂຫວາໃຫ້ເຈົ້າມີກຳລັງທີ່ຈຳເປັນຕ້ອງມີ. ເຖິງເບິ່ງຄືວ່າຄຳອະທິດຖານຂອງເຈົ້າຍັງບໍ່ໄດ້ຮັບຄຳຕອບກໍຂໍໃຫ້ເຈົ້າອະທິດຖານຕໍ່ໆໄປ. ຄືກັບທີ່ພະເຍຊູບອກວ່າ: “ໃຫ້ຂໍຕໍ່ໄປເລື້ອຍໆແລ້ວຈະໄດ້ຮັບ [ພະລັງບໍລິສຸດ].”—ລືກາ 11:9, 13, ລ.ມ.
14. ຫຼັກການໃນສຸພາສິດ 21:5 ຊ່ວຍເຈົ້າແນວໃດໃຫ້ເຮັດສິ່ງທີ່ຕັ້ງໃຈໄວ້ໃຫ້ສຳເລັດ?
14 ວາງແຜນ. (ອ່ານສຸພາສິດ 21:5) ເພື່ອຈະເຮັດວຽກໃຫ້ສຳເລັດຕາມທີ່ຕັ້ງໃຈໄວ້ ເຈົ້າຕ້ອງວາງແຜນແລະເຮັດຕາມແຜນທີ່ວາງໄວ້. ຄ້າຍຄືກັນ ເມື່ອເຈົ້າໄດ້ຕັດສິນໃຈແລ້ວ ກໍໃຫ້ຂຽນອອກມາວ່າຈະເຮັດຫຍັງແດ່. ໃຫ້ແບ່ງວຽກໃຫຍ່ໆອອກເປັນວຽກຍ່ອຍເພື່ອຈະຊ່ວຍເຈົ້າໃຫ້ເຫັນຄວາມກ້າວໜ້າໄດ້ງ່າຍຂຶ້ນ. ໂປໂລສະໜັບສະໜູນຄລິດສະຕຽນເມືອງໂກລິນໂທໃຫ້ແບ່ງເງິນເພື່ອຈະບໍລິຈາກໄວ້ “ໃນມື້ທຳອິດຂອງທຸກອາທິດ” ແທນທີ່ຈະລໍຖ້າເກັບເງິນບາດດຽວຕອນທີ່ໂປໂລມາຮອດ. (1 ໂກ. 16:2, ລ.ມ.) ການແບ່ງວຽກໃຫຍ່ອອກມາເປັນວຽກຍ່ອຍຍັງຈະຊ່ວຍເຈົ້າບໍ່ໃຫ້ຮູ້ສຶກວ່າມັນໜັກເກີນໄປ.
15. ຫຼັງຈາກວາງແຜນແລ້ວ ເຮົາຄວນເຮັດຫຍັງ?
15 ເມື່ອເຈົ້າວາງແຜນຢ່າງຊັດເຈນແລະຂຽນອອກມາກໍຈະຊ່ວຍເຈົ້າໃຫ້ລົງມືເຮັດໄດ້ງ່າຍຂຶ້ນ. (1 ໂກ. 14:40) ຕົວຢ່າງ: ຄະນະຜູ້ດູແລອາດມອບໝາຍໃຫ້ຜູ້ດູແລຄົນໜຶ່ງຈົດບັນທຶກເລື່ອງທີ່ຄະນະຜູ້ດູແລຕັດສິນໃຈເຊັ່ນ ໃຜແດ່ທີ່ຖືກມອບໝາຍໃຫ້ເຮັດແລະຈະເຮັດໃຫ້ແລ້ວມື້ໃດ. ການເຮັດແບບນີ້ຈະຊ່ວຍຜູ້ດູແລໃຫ້ເຮັດຕາມສິ່ງທີ່ຕັດສິນໃຈໄວ້ໄດ້ງ່າຍຂຶ້ນ. (1 ໂກ. 9:26) ໃນຊີວິດປະຈຳວັນ ເຈົ້າກໍເຮັດແບບນັ້ນໄດ້ຄືກັນ. ຕົວຢ່າງ: ເຈົ້າອາດຂຽນລາຍການອອກມາວ່າຈະເຮັດຫຍັງແດ່ໃນແຕ່ລະມື້ ແລະຈັດລຳດັບວ່າຈະເຮັດຫຍັງກ່ອນ. ການເຮັດແບບນີ້ບໍ່ພຽງແຕ່ຊ່ວຍເຈົ້າໃຫ້ເຮັດສິ່ງທີ່ຕັ້ງໃຈໄວ້ໄດ້ສຳເລັດ ແຕ່ຍັງຊ່ວຍເຈົ້າໃຫ້ເຮັດແລ້ວໄວກວ່າທີ່ກຳນົດອີກ.
16. ອັນໃດຄືສິ່ງຈຳເປັນເພື່ອຈະເຮັດສິ່ງທີ່ຕັດສິນໃຈໄວ້ໃຫ້ສຳເລັດ ແລະໂລມ 12:11 ສະໜັບສະໜູນເລື່ອງນີ້ແນວໃດ?
16 ອອກຄວາມພະຍາຍາມ. ຕ້ອງອອກຄວາມພະຍາຍາມທີ່ຈະເຮັດຕາມແຜນແລະເຮັດສິ່ງທີ່ຕັ້ງໃຈໄວ້ໃຫ້ສຳເລັດ. (ອ່ານໂລມ 12:11) ໂປໂລບອກຕີໂມເຕໃຫ້ “ໃສ່ໃຈ” ຕົວເອງແລະ “ມຸ່ງໝັ້ນ” ທີ່ຈະເປັນຜູ້ສອນທີ່ດີຂຶ້ນ. ຄຳແນະນຳນີ້ຂອງໂປໂລຍັງໃຊ້ໄດ້ກັບເປົ້າໝາຍອື່ນໆຂອງຄລິດສະຕຽນ.—1 ຕີໂມ. 4:13, 16, ລ.ມ.
17. ເອເຟດ 5:15, 16 ຊ່ວຍເຮົາແນວໃດໃຫ້ເຮັດຕາມແຜນທີ່ວາງໄວ້?
17 ຈັດເວລາດີໆ. (ອ່ານເອເຟດ 5:15, 16) ກຳນົດເວລາແລະຢ່າປ່ຽນ. ຢ່າມີແຕ່ຖ້າເວລາທີ່ເໝາະສົມແລ້ວຈຶ່ງເຮັດ ເພາະເຈົ້າອາດຈະບໍ່ມີເວລານັ້ນເລີຍ. (ຜູ້ປ. 11:4) ລະວັງທີ່ຈະບໍ່ໃຫ້ສິ່ງທີ່ບໍ່ສຳຄັນມາຍາດເວລາແລະກຳລັງຂອງເຮົາທີ່ຈະເຮັດສິ່ງທີ່ສຳຄັນກວ່າ. (ຟີລິບ 1:10) ຖ້າເປັນໄປໄດ້ ໃຫ້ເລືອກເວລາຕອນທີ່ຄົນອື່ນຈະບໍ່ມາລົບກວນເຈົ້າ. ບອກຄົນອື່ນໃຫ້ຮູ້ວ່າເຈົ້າຕ້ອງການສະມາທິ. ນອກຈາກນັ້ນ ໃຫ້ປິດໂທລະສັບແລະກວດເບິ່ງອີເມວຫຼືສື່ສັງຄົມອອນລາຍຕາມຫຼັງ.c
18-19. ສິ່ງໃດຈະຊ່ວຍເຮົາໃຫ້ເຮັດສິ່ງທີ່ຕັດສິນໃຈໄວ້ໄດ້ສຳເລັດເຖິງວ່າຈະບໍ່ງ່າຍ?
18 ຄິດເຖິງຜົນທີ່ຈະໄດ້ຮັບ. ຄືກັບການເດີນທາງ. ຖ້າເຈົ້າຢາກໄປໃຫ້ເຖິງຈຸດໝາຍແທ້ໆ ເຈົ້າຕ້ອງເດີນທາງຕໍ່ໆໄປເຖິງວ່າຈະຕ້ອງປ່ຽນເສັ້ນທາງ. ຄ້າຍຄືກັນ ຖ້າເຮົາຄິດເຖິງຜົນທີ່ຈະໄດ້ຮັບ ເຮົາຕ້ອງບໍ່ຍອມແພ້ງ່າຍໆເຖິງວ່າເຮົາຈະເຮັດບໍ່ສຳເລັດຫຼືອອກນອກເສັ້ນທາງ.—ຄລາ. 6:9
19 ການຕັດສິນໃຈຢ່າງຖືກຕ້ອງແລະເຮັດຕາມທີ່ຕັ້ງໃຈໄວ້ອາດເປັນເລື່ອງຍາກ. ແຕ່ພະເຢໂຫວາຈະໃຫ້ສະຕິປັນຍາແລະກຳລັງກັບເຮົາເພື່ອຈະເຮັດສິ່ງທີ່ຕັ້ງໃຈໄວ້ໄດ້ສຳເລັດ.
ເພງ 65 ກ້າວໜ້າຕໍ່ໆໄປ!
a ເຈົ້າເຄີຍຕັດສິນໃຈແລ້ວມາເສຍໃຈພາຍຫຼັງບໍ? ຫຼືບາງເທື່ອເຈົ້າຮູ້ສຶກວ່າຍາກທີ່ຈະຕັດສິນໃຈຢ່າງຖືກຕ້ອງແລະເຮັດຕາມນັ້ນບໍ? ບົດຄວາມນີ້ຈະຊ່ວຍເຈົ້າໃຫ້ເອົາຊະນະບັນຫາເຫຼົ່ານີ້ແລະຊ່ວຍໃຫ້ເຮັດສິ່ງທີ່ເຈົ້າຕັ້ງໃຈໄວ້ສຳເລັດ.
b ເພື່ອຈະວາງແຜນການອ່ານຄຳພີໄບເບິນໄດ້ ເຈົ້າອາດຈະໃຊ້ “ຕາຕະລາງການອ່ານຄຳພີໄບເບິນ” ທີ່ຢູ່ໃນເວັບໄຊ jw.org®.
c ເບິ່ງຄຳແນະນຳເພີ່ມເຕີມກ່ຽວກັບການຈັດເວລາ ໃນບົດຄວາມ “20 ວິທີເພື່ອຈະມີເວລາຫຼາຍຂຶ້ນ” ໃນຕື່ນເຖີດ! ເມສາ 2010 (ພາສາໄທ).