ກ່ອງເຄື່ອງມືສຳລັບການສອນ
1. ຜູ້ປະກາດຂ່າວດີເລື່ອງລາຊະອານາຈັກເປັນຄືກັບນາຍຊ່າງແນວໃດ?
1 ນາຍຊ່າງໃຊ້ເຄື່ອງມືຫຼາຍຢ່າງ. ເຄື່ອງມືບາງຢ່າງມີຄວາມຈຳເປັນສຳລັບວຽກໃດໜຶ່ງໂດຍສະເພາະ ສ່ວນເຄື່ອງມືຫຼັກກໍຈະຖືກໃຊ້ເປັນປະຈຳ. ນາຍຊ່າງທີ່ຊຳນານຈະມີເຄື່ອງມືຫຼັກເຫຼົ່ານີ້ໃນກ່ອງເຄື່ອງມືຂອງເຂົາເຈົ້າສະເໝີ ແລະເຂົາເຈົ້າໃຊ້ເຄື່ອງມືເຫຼົ່ານີ້ຢ່າງຊຳນານທີ່ສຸດ. ຄຳພີໄບເບິນສະໜັບສະໜູນຄລິດສະຕຽນແຕ່ລະຄົນທຸ່ມເທຕົວເອງໃນວຽກຮັບໃຊ້ແລະເປັນ “ເຈົ້າການທີ່ບໍ່ມີເຫດໃຫ້ລັກອາຍ.” (2 ຕີໂມ. 2:15) ເຄື່ອງມືທີ່ສຳຄັນທີ່ສຸດໃນກ່ອງເຄື່ອງມືຂອງເຮົາແມ່ນຫຍັງ? ແມ່ນຄຳພີໄບເບິນ ເຮົາຈະໃຊ້ເຄື່ອງມືຫຼັກນີ້ “ກະທຳໃຫ້ເປັນລູກສິດ.” (ມັດ. 28:19, 20) ດັ່ງນັ້ນ ເຮົາຄວນອອກຄວາມພະຍາຍາມທີ່ຈະຊຳນານໃນການ “ຕັດສ່ວນພະຄຳແຫ່ງຄວາມຈິງດ້ວຍຢ່າງສັດຊື່.” ນອກຈາກນັ້ນ ຍັງມີເຄື່ອງມືອື່ນໆໃນກ່ອງເຄື່ອງມືສຳລັບການສອນທີ່ຄລິດສະຕຽນທຸກຄົນຄວນຮຽນທີ່ຈະໃຊ້ຢ່າງຊຳນານ.—ສຸພາ. 22:29
2. ເຄື່ອງມືຫຼັກໃນການສອນຂອງເຮົາມີຫຍັງແດ່?
2 ເຄື່ອງມືຫຼັກໃນການສອນຂອງເຮົາ: ນອກຈາກຄຳພີໄບເບິນແລ້ວຍັງມີເຄື່ອງມືຫຍັງອີກທີ່ເຮົາໃຊ້? ເຄື່ອງມືຫຼັກທີ່ເຮົາໃຊ້ສອນຄວາມຈິງແມ່ນປຶ້ມຄຳພີໄບເບິນສອນແນວໃດແທ້ໆ? ຫຼັງຈາກຮຽນປຶ້ມຫົວນີ້ຈົບແລ້ວ ເຮົາຈະໃຊ້ປຶ້ມ “ຈົ່ງຮັກສາຕົວໄວ້ໃນຄວາມຮັກຂອງພະເຈົ້າ” ສອນນັກສຶກສາໃຫ້ນຳເອົາສິ່ງທີ່ຮຽນມາໃຊ້ໃນຊີວິດປະຈຳວັນ. ດັ່ງນັ້ນ ເຮົາຄວນຊຳນານໃນການໃຊ້ປຶ້ມທັງສອງຫົວນີ້. ເຄື່ອງມືຫຼັກອີກຢ່າງໜຶ່ງທີ່ໃຊ້ເລີ່ມການສອນຄຳພີໄບເບິນແມ່ນຈຸນລະສານຂ່າວດີຈາກພະເຈົ້າ! ຖ້າເຂດຂອງເຮົາມີຄົນທີ່ມີຂີດຈຳກັດໃນການອ່ານ ຫຼືມີຄົນທີ່ເວົ້າອີກພາສາໜຶ່ງທີ່ບໍ່ມີໃນໜັງສືຂອງອົງການຫຼືມີພຽງສອງສາມຫົວ ເຮົາກໍຈະໃຊ້ຈຸນລະສານເຊື່ອຟັງພະເຈົ້າ ຫຼືເຊື່ອຟັງພະເຈົ້າແລ້ວຈະມີຊີວິດຕະຫຼອດໄປ. ເຄື່ອງມືຫຼັກທີ່ໃຊ້ສອນນັກສຶກສາໃຫ້ເຂົ້າມາສົມທົບກັບອົງການແມ່ນຈຸນລະສານໃຜກຳລັງເຮັດຕາມໃຈປະສົງຂອງພະເຢໂຫວາໃນທຸກມື້ນີ້? ນອກຈາກນັ້ນ ບາງວິດີໂອກໍໄດ້ຊ່ວຍຜູ້ຄົນເຂົ້າມາເປັນລູກສິດເຊັ່ນ: ເປັນຫຍັງຈຶ່ງສຶກສາຄຳພີໄບເບິນ? ພວກເຮົາເຮັດຫຍັງຢູ່ທີ່ຫໍປະຊຸມລາຊະອານາຈັກ? ແລະພະເຈົ້າມີຊື່ບໍ? (ພາສາອັງກິດ) ເປັນເຄື່ອງມືທີ່ເຮົາຄວນຮຽນໃຊ້ໃຫ້ຊຳນານ.
3. ວຽກຮັບໃຊ້ພະເຈົ້າສະບັບຕໍ່ໄປຈະຊ່ວຍເຮົາໃຫ້ເຮັດຫຍັງ?
3 ວຽກຮັບໃຊ້ພະເຈົ້າສະບັບຕໍ່ໄປຈະຊ່ວຍເຮົາໃຫ້ມີຄວາມຊຳນານໃນການໃຊ້ສິ່ງພິມພື້ນຖານໃນກ່ອງເຄື່ອງມືສຳລັບການສອນ. ຖ້າເຮົາພະຍາຍາມໃຊ້ເຄື່ອງມືເຫຼົ່ານີ້ຢ່າງຊຳນານ ເຮົາກໍເອົາໃຈໃສ່ຕໍ່ຄຳແນະນຳທີ່ມີຂຶ້ນໂດຍການດົນໃຈທີ່ໂປໂລໃຫ້ກັບຕີໂມເຕວ່າ: “ຈົ່ງລະວັງຕົວເອງແລະໃນການສັ່ງສອນດ້ວຍດີ. ຈົ່ງຕັ້ງໝັ້ນຄົງຢູ່ໃນສິ່ງທັງຫຼາຍນີ້ ເຫດວ່າເມື່ອກະທຳຢ່າງນັ້ນທ່ານຈະຊ່ອຍຕົວເອງໃຫ້ພົ້ນແລະຄົນທັງຫຼາຍທີ່ຟັງທ່ານດ້ວຍ.”—1 ຕີໂມ. 4:16