ຊີວິດຄລິດສະຕຽນ
ປັບປຸງຄວາມສາມາດໃນວຽກຮັບໃຊ້ຂອງເຮົາໃຫ້ດີຂຶ້ນ—ສອນນັກສຶກສາໃຫ້ກຽມຕົວລ່ວງໜ້າ
ເປັນຫຍັງເລື່ອງນີ້ຈຶ່ງສຳຄັນ? ເມື່ອນັກສຶກສາກຽມຕົວລ່ວງໜ້າ ເຂົາເຈົ້າກໍຈະເຂົ້າໃຈແລະຈື່ສິ່ງທີ່ໄດ້ຮຽນຫຼາຍຂຶ້ນ. ແຮ່ງເຂົາເຈົ້າເຂົ້າໃຈແລະຈື່ໄດ້ ເຂົາເຈົ້າກໍແຮ່ງຈະກ້າວໜ້າໄວຂຶ້ນ. ແມ່ນແຕ່ຫຼັງຈາກຮັບບັບເຕມາແລ້ວ ເຂົາເຈົ້າກໍຍັງຕ້ອງກຽມຕົວສຳລັບການປະຊຸມແລະການປະກາດເພື່ອເຂົາເຈົ້າຈະ “ເຝົ້າລະວັງ” ຢູ່ສະເໝີ. (ມັດ. 25:13) ດັ່ງນັ້ນ ການຮູ້ວິທີສຶກສາແລະມີຕາຕະລາງການສຶກສາທີ່ດີຈະຊ່ວຍເຂົາເຈົ້າໃຫ້ໄດ້ຮັບປະໂຫຍດຕະຫຼອດຊີວິດ. ເຮົາຄວນຊ່ວຍເຂົາເຈົ້າໃຫ້ສ້າງນິດໄສທີ່ດີໃນການກຽມຕົວສຳລັບການສຶກສາຕັ້ງແຕ່ທຳອິດ.
ສິ່ງທີ່ຄວນເຮັດ:
ເປັນຕົວຢ່າງທີ່ດີ. (ໂລມ 2:21) ເຈົ້າຄວນກຽມການສຶກສາໂດຍຄິດເຖິງນັກສຶກສາແຕ່ລະຄົນ (ວຮ 11/15 ໜ້າ 5) ແລະໃຫ້ລາວເບິ່ງປຶ້ມຂອງເຈົ້າທີ່ຂີດຄຳຕອບໄວ້ແລ້ວ.
ສະໜັບສະໜູນນັກສຶກສາກຽມຕົວລ່ວງໜ້າ. ທັນທີທີ່ເລີ່ມສຶກສາເທື່ອທຳອິດ ເຈົ້າຄວນຊ່ວຍລາວໃຫ້ຮູ້ວ່າການກຽມຕົວເປັນສ່ວນໜຶ່ງຂອງການສຶກສາຄຳພີໄບເບິນຕາມບ້ານແລະໃຫ້ລາວຮູ້ວ່າຈະໄດ້ຮັບປະໂຫຍດແນວໃດ. ຊ່ວຍລາວຈັດເວລາໃນການກຽມຕົວໄດ້. ຜູ້ນຳການສຶກສາບາງຄົນໃຫ້ນັກສຶກສາໃຊ້ປຶ້ມຂອງຕົນທີ່ຂີດຄຳຕອບໄວ້ແລ້ວຕອນທີ່ສຶກສານຳກັນເພື່ອຊ່ວຍລາວໃຫ້ເຫັນປະໂຫຍດຂອງການກຽມຕົວລ່ວງໜ້າ ແລະຊົມເຊີຍລາວເມື່ອເຫັນວ່າລາວກຽມຕົວ.
ເຮັດໃຫ້ລາວເບິ່ງວິທີກຽມ. ຕັ້ງແຕ່ໄລຍະທຳອິດຂອງການສຶກສາ ຜູ້ນຳການສຶກສາບາງຄົນໃຊ້ເວລາໃນການສຶກສາໜຶ່ງຄັ້ງເພື່ອສອນນັກສຶກສາໃຫ້ຮູ້ວິທີການກຽມຕົວລ່ວງໜ້າ.